1 ሄ ዎዴ ሂዝቂያሲ ዳሮ ሳኬቲዲ ሼምፖ ቦላ ዲሺን ኣሞጼ ና ናቤ ኢሳያሲ ኢዛኮ ቢዲ፥ «ጎዳይ ኔና፥ ‹ኔ ሃይቃና፤ ኔ ሃይሳፌ ጉዬ ሼምፖራ ፓጻ ዴኣካ። ሄሳ ጊሻስ ኔሶ ጊጊሳ› ጌስ» ጊዴስ።

2 ሂዝቂያሲካ ጌዴ ጎዳ ባጋ ሲሚዲ ጎዳኮ ዎሲሼ፥ 3 «ኣቤት ጎዳዉ! ታኒ ኔ ሲንꬃን ኣማኔቴꬃን፥ ኩሜꬃ ዎዚናፔ ሄሜቲዳይሳኔ ኔና ኡፋይሲዛዝ ኦꬂዳይሳ ታስ ቆፓ» ጊዲ ጫሞ ዬሆ ዬኪዴስ።

4 ኢሳያሲ ቡሮ ካዎ ኬꬃ ዛጎ ካንꬂ ቢሺን ጎዳ ኣቻፌ ኢዛስ፥ 5 «ኔኒ ጉዬ ሲማዳ ታ ዴሬዛ ሃላቃ ሂዝቂያሳስ፥ ‹ካሴ ጎዳይ ኔ ኣዋ ዳዊቴ ጾሳይ ታ ኔ ዎሳ ሲያዲስ፤ ኔ ኣፉንꬃካ ቤያዲስ፤ ታኒ ኔና ፓꬃና። ሃቺፌ ዶሚን ሄꬑ ጋላሳታፌ ጉዬ ኔኒ ፑዴ ጎዳ ኬꬅ ኬዛና። 6 ታ ኔ ላይꬃ ቦላ 15 ላይꬅ ጉጃና፤ ኔናኔ ሃኖ ካታማዮ ኣሶሬ ካዎ ኩሼፔ ኣሻና፤ ታኒ ታ ጊሻሲኔ ታ ኣይሌ ዳዊቴ ጊሻስ ጋዳ ሃኖ ሃ ካታማዮ ናጋና› ጋ» ጊዛ ቃላይ ዪዴስ።

7 ሄሳፌ ጉዬ ኢሳያሲ፥ «ታስ ባላሴ ሚꬃ ቴራ ኤኪ ዪቴ» ጊዴስ፤ ሂስቲን ኢስቲ ቂናኢዲ ኢዛስ ኪጻ ቦላ ዎꬂን ኢዚ ፓጺዴስ።

8 ሂዝቂያሲ፥ «ጎዳይ ታና ፓꬃናይሳሲኔ ሄꬑ ጋላሳፌ ጉዬ ታኒ ጎዳ ኬꬅ ኬዛናይሳስ ማላታይ ኣዜ?» ጊዲ ኢሳያሳ ኦይቺዴስ።

9 ኢሳያሲካ ኢዛስ ዛሪዲ፥ «ጎዳይ ባ ጊዳ ቃላ ፖላናይሳስ ማላታይ ሃይታፔ ኢሳ፤ ሃይሲ ኩዋዚ 10 ኬች ሲንꬅ ቦ ጋይ? ዎይኮ ታሙ ኬች ጉዬ ቦ ጋይ?» ጊ ኦይቺዴስ።

10 ሂዝቂያሲ ኢዛስ፥ «ኩዋይ 10 ኬች ሲንꬅ ቡሲ ሜቴና፤ ሄሳፌ ኩዋይ ጉዬ ሲማና ማላ ኦꬃ» ጊ ዮቲዴስ።

11 ናቤ ኢሳያሲ ሄሳፌ ጉዬ ፑዴ ጎዳስ ዋሲዴስ፤ ጎዳይካ ኣካዜይ ኦꬂዳ ኬቻ ቦላ ዎꬊዳ ኩዋዛ 10 ኬች ጉዬ ሲማና ማላ ኦꬂዴስ።

12 ሄ ዎዴ ባቢሎኔ ካዎ ባልዳኔ ና ማሮዶኬ-ባልዳኔይ ሂዝቂያሲ ሳኬቲዳይሳ ሲዪዳ ጊሻስ ሂዝቂያሳስ ዳብዳቤኔ ኢሞታ ዬዲዴስ። 13 ሂዝቂያሲካ ቃስታኔታ ሞኪ ኤኪዲ ባ ሚሽ ኡባ ዎꬂዛ ኬꬃን ዲዛ ቢራ፥ ዎርቃ፥ ዱማ ቆሞ ሳዎታ፥ ኣልኦ ዛይቴ፥ ኦላ ማሳራታ ኢዛን ዎꬂዛ ሚንጃ ኬꬃታኔ ሃራ ኣቲዳ ሚንጃ ኬꬃን ዲዛይታ ኡባ ኢስታ ቤሲዴስ። ባ ካዎቴꬃ ኬꬃኒኔ ባ ካዎቴꬃን ዲዛ ሚሽ ኡባፌ ሂዝቂያሲ ቤሶንታ ኣጊዳዚ ዴና።

14 ሄሳፌ ጉዬ ኢሳያሲ ሂዝቂያሳኮ ቢዲ፥ «ሃይቲ ኣሳቲ ኣዋፔ ዪዶ? ኔስ ኣይ ዮቲዶ?» ጊ ኦይቺዴስ። ሂዝቂያሲ፥ «ሃይቲ ሃሆ ዴሬ ባቢሎኔፔ ዪዳ» ጊዴስ።

15 ናቤዚካ ኢዛ፥ «ኔ ካዎቴꬃ ኬꬃፌ ኣይ ቤይዶ?» ጊ ኦይቺዴስ፤ ሂዝቂያሲካ ኢዛስ፥ «ኢስቲ ታ ካዎቴꬃ ኬꬃን ዲዛ ሚሽ ኡባ ቤይዳ፤ ታኒ ሚሽ ኢስታን ዎꬂዛ ኬꬃታፔ ታ ቤሶንታ ኣሺዳሶይ ሙሌካ ዴና» ጊዴስ። 16 ሄሳፌ ጉዬ ኢሳያሲ ሂዝቂያሳስ፥ «ኔኒ ጎዳ ቃላ ሲያ፤ 17 ጎዳይ፥ ‹ኔ ካዎቴꬃ ኬꬃን ዲዛይ ኡባይ ካሴ ኔ ኣዋቲ ሃኖ ጋካናስ ሺሺዳይ ኡባይካ ባቢሎኔ ዲኤቲ ባና ዎዴይ ያናይሲ ኣቴና፤ ኢሲ ሚሺካ ኣቴና› ጌስ። 2ካዎ 24፡13፤ 2ታሪ 36፡10 18 ኔፔ ዬሌቲዳ ኔ ናይታፔ ባጋቲ ዲኤቲዲ ባናኔ ባቢሎኔ ዴሬን ኢስቲ ካዎ ኬꬃን ጉንዱላታ ጊዲ ዳና» ጊዴስ። 2ካዎ 24፡14-15፤ ዳኔ 1፡1-7 19 ሂዝቂያሲካ፥ «ኔ ዮቲዳ ጎዳ ቃላይ ሎኦ» ጊዴስ። ኢዚ ሄሳꬆ ጊዳይ፥ «ታ ፓጻ ዲዛ ዎዴ ታስ ሳሮቴꬂኔ ዎፓይ ዲኮ ሄሳፌ ጉዬ ባ ዶሳ ሃኖ» ጊ ቆፒዳ ጊሻሳ። 20 ሂዝቂያሳ ካዎቴꬃ ላይꬃታን ሃኒዳ ሃራ ሚሻቲ፥ ኢዚ ኦꬂዳ ኦሶ ኡባይ፥ ሃꬅ ካታማ ጌልꬃናስ ኢዚ ዛሪሲዳ ዛራይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ? 21 ሂዝቂያሲ ሃይቂዲ ባ ኣዋታን ጋይቲዴስ፤ ኢዛ ና ሚናሴይ ኢዛሶሆን ካዎቲዴስ።