21
ዩሁዳ ካዎ ሚናሴ
(2ታሪ 33፡1-20)
1 ሚናሴይ ካዎቲዛ ዎዴ ኢዛስ ላይꬃይ 12፤ ኢዚ ዬሩሳላሜን ኡቲዲ 55 ላይꬅ ሃሪዴስ፤ ኢዛ ኣያ ሃፌሴቦ ጌቴታዉስ። 2 ሚናሴይ ጎዳይ ኢስራኤሌ ሲንꬃፌ ጎዲ ኬሲዳ ሃራሲዛ ካዎቴꬃታ ሎሴ ካሊዲ ጎዳ ሲንꬃን ኢታ ኦሶ ኦꬂዴስ።ኤር 15፡4 3 ካሴ ኢዛ ኣዋ ሂዝቂያሲ ዙምቡላታ ቦላ ዲዛ ኤቃ ጾሳታ ኬꬅ ላሊዳይሳ ዛሪ ኬጺዴስ፤ ኢስራኤሌ ካዎ ኣካቤይ ኦꬆይሳꬆ ኢዚካ ባኣሌስ ያርሾ ያርሺዛሶ ጊግሲዴስ። ኣሼሪ ሚስሌ ቱስ ኤሲዴስ፤ ሄሳꬆካ ሳሎ ጾሊንቴታስካ ጎይኒዴስ። 4 ጎዳይ፥ «ታኒ ታ ሱንꬃ ዬሩሳላሜን ዎꬃና» ጊዳ ጾሳ ኬꬃን ያርሾታ ያርሺዛሶሆታ ኦꬂዴስ።2ሳሜ 7፡13 5 ጾሳ ኬꬃ ዛጎ ናምኣታን ሳሎ ጾሊንቴታስ ጎይናናሶሆታ ጊግሲዴስ። 6 ባ ናዛ ጹጌቲዛ ያርሾ ሂስቲ ሺሺዴስ፤ ሂስቲዲ ሙሬኒዛይታ፥ ማሮታ፥ ሞይቲሌ ሃሳይሲዛይታኔ ኣያና ካዪዛይታ ዞሬ ኦይቺዴስ፤ ጎዳ ሃንቄꬂዛ ኢታ ሃኖታ ኢዛ ሲንꬃን ኦꬂዴስ።
7 ኢዚ ባ ማሲ ጊግሲዳ ኣሼሪ ሚስሌዛ ጾሳ ኬꬃ ጊዶን ዎꬂዴስ። ሄሲካ ጎዳይ ካሴ ዳዊቴ ና ሶሎሞኔስ፥ «ታኒ ሃይሳ ጾሳ ኬꬃኒኔ ኢስራኤሌ ቆሞታ ኡባታ ጋርሳፌ ዶሪዳ ዬሩሳላሜን ታ ሱንꬃ ሜርናስ ሄን ዎꬃና። 8 ጊዲኮካ ታኒ ኢስታ ኣዛዚዳይሳ ኡባካ ኢስቲ ሚኒ ፖሌቶኔ ታ ኣይሌ ሙሴይ ካሴ ኢስታስ ኢሚዳ ዎጋዛ ኢስቲ ፖሊ ናጌቶ ኣቲን ሃይሳፌ ጉዬ ኢስራኤሌ ኣሳ ካሴ ኢስታ ኣዋታስ ኢሚዳ ቢታፌ ኢስቲ ኬዚዲ ዋዬታና ማላ ታ ኦꬂኬ» ጊዳ ቃላይ ሃይሳ ሃ ሶሆዛ ጊሻሳ። 1ካዎ 9፡3-5፤ 2ታሪ 7፡12-18 9 ዴሬዚ ጊዲኮ ሄሳ ሲዪቤና፤ ካሴ ጎዳይ ꬋይሲዳ ካዎቴꬃታፔካ ቦላራ ኢስቲ ኢታ ኦꬃና ማላ ሚናሴይ ኣሳ ባሌꬂዴስ።
10 ጎዳይ ባ ኣይሌ ናቤታ ባጋራ ሂዝጊ ዮቲዴስ፤ 11 «ዩሁዳ ካዎ ሚናሴይ ሃይሳ ሹኒዛ ኢታ ናጋራ ኦꬂዴስ፤ ኢዚ ካሴ ባፔ ካሴ ዲዛ ኣሞሬ ዴሬ ኣሳፔካ ቦላራ ኢታ ኦꬂዴስ። ዩሁዳ ኣሳካ ኤቃታን ባሌꬂዴስ። 12 ሄሳ ጊሻስ ጎዳ ኢስራኤሌ ጾሳይ ሲዪዳዴ ሃይꬃስ ኢቲዛ ሜቶ ታኒ ዬሩሳላሜ ቦላኔ ዩሁዳ ቦላ ዬዳና። 13 ታኒ ሳማሪያስ ጊግሲዳ ዋꬋ ዎዶሮ፥ ታኒ ኣካቤሶ ኢዛራ ጊናሳ ጼሊዳ ቱምቤዛካ ዬሩሳላሜ ቦላ ዬዳና፤ ኣሲ ሳኔ ሜጪ ጉፋንꬂዛ ማላ ታኒካ ዬሩሳላሜ ሜጫ ꬋይሳና። 14 ጫሻ ኣቲዳ ታ ጺንጾታ ታኒ ኣጋና፤ ታኒ ኢስታ ኢስታ ሞርኬታስ ኣꬃ ኢማና፤ ኢስቲ ባ ሞርኬታስ ዲኦ ሚሽ ጊዳና። 15 ታኒ ሄሳꬆ ኦꬂዛ ጋሶይካ ኢስቲ ካሴ ባ ኣዋቲ ጊብጼፔ ኬዞሶፌ ሃኖ ጋካናስ ኢስቲ ታ ሲንꬃን ኢታ ኦሶ ኦꬂዲ ታና ሃንቆስ ዴንꬄꬂዳ ጊሻሳ» ጊዴስ።
16 ሃራፔካ ሚናሴይ ዩሁዳ ኣሳይ ጾሳ ሲንꬃን ኢታ ኦꬃና ማላ ኢስቲ ናጋራ ኦሲሲዳ ናጋራፔ ሃራካ ዬሩሳላሜስ ሃ ጋጻፔ ሄ ጋጻ ጋካናስ ጺሎ ጊዲዳ ዳሮ ኣሳ ሱꬅ ጉሲዴስ።
17 ሚናሴ ካዎቴꬃ ዎዴ ሃኒዳ ሃራ ሚሽ ባ ኦꬂዳ ናጋራ ቦላ ጉጂዲ ኢዚ ኦꬂዳይ ኡባይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ?
18 ሚናሴይ ካሴ ባ ኣዋታ ማላ ሃይቂዴስ፤ ኢዚ ኦዛ ኣታኪልቴ ጊዶን ዲዛ ዱፎን ሞጌቲዴስ፤ ኢዛ ናዚ ኣሞኔይካ ኢዛሶሆን ካዎቲዴስ።
ዩሁዳ ካዎ ኣሞኔ
(2ታሪ 33፡21-25)
19 ኣሞኔይ ካዎቲሺን ኢዛስ ላይꬃይ 22፤ ኢዚ ዬሩሳላሜን ኡቲዲ 2 ላይꬅ ሃሪዴስ። ኢዛ ኣያ ሜሶላሞ ጌቴታዉስ፤ ኢዛ ያጺባ ዴሬ ኣስ ሃሩሴ ና። 20 ኢዛ ኣዋ ሚናሴይ ኦꬆይሳꬆ ኢዚካ ጎዳ ሲንꬃን ኢታ ሚሽ ኦꬂዴስ። 21 ካሴ ባ ኣዋይ ቢዳ ኦጌዛራ ኢዚካ ቢዴስ፤ ካሴ ባ ኣዋይ ጎይኒዳ ኤቃ ጾሳታስ ጎይኒዴሲኔ ኢስታስ ሆኪ ጉልባቲዴስ። 22 ካሴ ባ ጎዳ ጾሳ ኣጋጊዴስ፤ ኢዚ ጎዳ ኦጌን ቢቤና።
23 ኣሞኔ ዴሬ ሹሜቲ ማካሊዳ፤ ካዎዛካ ካዎቴꬃ ኬꬃ ጊዶን ዎꬊዳ። 24 ሄሳፌ ጉዬ ሄ ዴሬ ኣሳይ ካዎ ኣሞኔ ቦላ ዴንዲዲ ኢዛ ዎꬊዴስ፤ ኢዛ ናዛ ኢዮሲያሳካ ኢዛሶሆን ካዎꬂዳ። 25 ኣሞኔይ ካዎቲ ዲዛ ዎዴ ሃኒዳ ሃራ ኦሶይ ኢዚ ፖሊዳይ ኡባይካ ዩሁዳ ካዎታ ታሪኬ ማጻፋታን ጻፌቲ ዴስ ጊዴኔ? 26 ኢዚ ኦዛ ኣታኪልቴ ጊዶን ዲዛ ዱፎን ሞጌቲዴስ፤ ኢዛ ናዚ ኢዮሲያሲ ኢዛሶሆን ካዎቲዴስ።