5
ኢስራኤሌ ኣሳ ማሬቴꬅ
1 ኢስራኤሌ ኣሳዉ! ኢንቴ ጊሻስ
ታ ዚላሊዛ ዚላስ ሲዪቴ።
2 «ጌላኦያ ኢስራኤሌይ ኩንዳዱስ፤
ናምኣንꬆ ዴንዳናስ
ዳንዳዩኩ፤
ኢዞ ማዲ ዴንꬃናይ
ባይንዳ ጊሻስ
ኢዛ ባርካ ባ ዴሬን
ኩንዳ ኣታና።»
3 ኡባ ሃሪዛ ጎዳይ፥
«ኢስራኤሌ ካታማ ኢሲኔይፔ
1,000 ኦላንቻቲ ኦላስ ባናሺን
ኢስታፌ ሃይቆንታ ፓጻ ኣታናይ
100 ኣሳታ ጻላ ጊዳና፤
ሃራ ካታማፔካ 100
ኦላ ኣሳቲ ኦላስ ባናሺን
ኢስታፌ 10 ኣሲ ጻላ
ሲሚ ያና» ጊዴስ።
4 ጎዳይ ኢስራኤሌ ኣሳስ፥
«ኢስራኤሌ ኣሳዉ!
ሃ ታኮ ሲሚቴ፤
ኢንቴ ሃይቆንታ ዴኣና።
5 ኢንቴ ቤርሳቤሄ ቦፒቴ፤
ቤቴሌይ ላሌታዳ
ሙሌራ ꬋያና፤
ጌልጌላን ዲዛ ኣሳይ ዲኤታና፤
ሄሳ ጊሻስ ቤቴሌ ጊዲን
ዎይኮ ጌልጌላ ቦፒቴ» ጊዴስ።
6 ሃ ጾሳኮ ሲሚቴ፤
ሂስቲኮ ኢንቴ ሼምፖራ
ፓጻ ዴኣና፤
ኣካይ ጊኮ ጾሲ
ታማ ማላ
ኢስራኤሌ ዴራ ማና፤
ቤቴሌን ዲዛይታካ
ታማይ ማና፤
ሄ ታማ ቶይሳናይ
ኢስታስ ቤቴና።
7 ኢንቴኖ ፒርዳ ጌላሲዛይቶ!
ቱማካ ጌዴ ዎርዶን
ላሚዛይቶ
ኢንቴስ ኣዬ ኣና!
8 ፒሊያዲሴ ጌቴቲዛ ላፑን
ጾሊንቴታኔ
ኦርዮኔ ጌቴቲዛ
ኢሲ ቦላ ዲዛ
ጾሊንቴታ ሜꬊዳይ
ጋላሳ ኦማርሳን፥
ኦማርሳ ጋላሳን ላሚዛይ፥
ኣባ ሃꬅ ኣዛዚዲ
ቢታ ቦላ ጎጊሲዛይ፥ ኢዮ 9፡9፤ 38፡31
9 ዎልቃማታኔ ኢስታ ሚጻታ
ላሊ ꬋይሲዛይ ኢዛ፤
ኢዛስ ሱንꬃይካ ጾሳ።
10 ኢንቴ ቃሴ ኢንቴና ፒርዳሶን
ሃንቂዛዴ ኢጼታ፤
ቱሙ ሃሳይዛዴካ ካꬌታ።
11 ማንቆታ ኡንኤꬄታ፤
ኢስታ ዎልቃራ ካꬅ ጊሪሴታ፤
ኢንቴስ ማሴቲዳ ሹቻፌ
ኬꬅ ኬጺዴታ ሺን
ሄ ኬꬃን ዴኬታ።
ኣራዳ ቢታን ዎይኔ ሚꬃ
ቶኪዴታ ሺን ኢዛፔ
ኣጌቲዳ ዎይኔ ኡሹ ኡዬኬታ።
12 ኢንቴ ቆሆይ ኣይ ማላ ዳሮኮኔ
ኢንቴ ናጋራይ ኣይ ማላ ዴጾኮ
ታ ኤራይስ፤
ኢንቴ ጺሎ ኣሳታ ኡንኤꬄታ፤
ማታኤ ኤኪዲ ፒርዳሶን
ማንቆታስ ጌላ ፒርዴታ።
13 ሄሳ ጊሻስ ሄ ዎዴ
ዎዴይ ኢታ ጊዲዳ ጊሻስ
ኣኬካይ ዲዛ ኣሲ ጮኡ ጌስ።
14 ኢንቴ ሼምፖራ ፓጻ ዴኣና ማላ ሎኦፔ ኣቲን ኢታ ኦꬆፍቴ፤ ኢንቴ ሄሳꬆ ኦꬂኮ ኢንቴ ጊዳ ማላ ጎዳይ ሳሎ ጾሳይ ኢንቴናራ ጊዳና። 15 ኢታ ሚሽ ኢጺቴ፤ ሎኦ ጊዲዳዝ ዶሲቴ፤ ፒርዳ ፒርዲዛሶን ቱሙ ፒርዳ ጌላሶፒቴ። ጎዳይ ሳሎ ጾሳይ ኣቲዳ ኢስራኤሌ ኣሳ ማራናኮ ኦኔ ኤሪዛይ?
16 ሄሳ ጊሻስ ጎዳይ ሳሎ ጾሳይ፥
«ኦጌ ቦላኔ ዱቡሻይ ዲዛሶን
ኡባን ዋሶይኔ ዬሆይ
ሲዬታና፤
ጎሻንቻቲ ኮይሳስ
ዚላሊዛይቲ ዬሆስ ጼይጌታና።
17 ዎይኔ ሚꬂ ቶኬቲዛሶን
ኡባን ዬሆ ጻላ ጊዳና፤
ሄሲካ ዉሪ ሃናናይ ታ ኢንቴ
ጊዶራ ኣꬊዛ ጊሻሳ» ጌስ።
ጾሳ ፒርዳ ጋላሳ
18 ኢንቴኖ ጎዳ ጋላስ ናጊዛይቶ!
ኢንቴስ ኣዬ ኣና!
ሄ ጋላሳይ ꬉማፔ ኣቲን
ፖኦ ጋላስ ጊዶንታ ጊሻስ
ኢንቴ ኣይስ ሄ ጋላሳ ኮዬቲ?
19 ሄ ጋላሳይ ኣሲ ጋሞፌ ኣታናስ
ቆቴቲሼ ዛርዶራ ጋጊዛ ማላ
ዎይኮ ኬሲ ኤኪ ባሶ ጌሊዲ
ባ ኩሼን ኬꬃ ጎዳ ኦይኪን
ሾሺ ዱኪዳ ማላ ሃናና።
20 ጎዳይ ፒርዲዛ ጋላሳይ
ኢንቴስ ꬉማፔ ኣቲን
ፖኦ ጊዴና፤
ሄ ጋላሳይ ኢዛን
ኣይኮ ፖኦይካ ባይንዳ
ጊርዲ ጊዳ ꬉማ ጊዳና።
21 «ታኒ ኢንቴ ላይꬃን
ላይꬃን ቦንቺዛ
ባኣሌዛ ካꬋይሲኔ ኢጻይስ፤
ኢንቴ ጎይኖስ ሺቂዛ ሺቆይካ
ታና ኡፋይሴና።
22 ታማን ጹጌቲዛ ያርሾኔ
ካꬃ ያርሾ
ኢንቴ ታስ ሺሺኮካ
ታ ሄሳ ኢንቴፌ ኤኪኬ፤
ꬊኬቲዳ ኢንቴ ሜሄታፔ
ኢንቴ ታስ ኢሲፌቴꬃ
ያርሾስ ሺሺኮ
ታ ኢዛ ኣይፌንካ ጼሊኬ። ኢሳ 1፡11-14
23 ኢንቴ ዬጺሼ
ታ ሃይꬃን ካጮፍቴ፤
ኢንቴ ዲꬃ ጊሪስ
ታ ሲያናስ ኮይኬ።
24 ጊዶ ኣቲን ቱሙ ፒርዳይ
ጎጊዛ ሃꬃ ማላ፤
ጺሎቴꬂካ ሚጮንታ
ፑልቶ ማላ ጎጎ።
25 «ኢስራኤሌ ኣሳዉ!
ቱማፔ ኢንቴ ኦይዱ ታሙ
ላይꬅ ባዞ ቢታን ዲዛ ዎዴ
ቱሙ ያርሾኔ ካꬃ ጼራ
ታስ ሺሺዴቲ?ሃዋ 7፡42-43
26 ኢንቴ ኢንቴስ ኦꬂዳ፥
‹ካዎ ዛኩቴ› ጌቴቲዛ
ኤቃ ጾሳዛ፤
ቃሴካ፥ ‹ኬዌኔ› ጌቴቲዛ
ኢንቴ ሜꬊ ኬሲዳ ጾሊንቴ
ሚሳቲዛ ኤቃ ጾሳታ ቶኪዴታ።
27 ታኒ ኢንቴና ዳማስቆፌ ጌዴ ሃሳ ጎዳና» ጌስ ጎዳይ ሳሎ ጾሳይ።