9
ኢስራኤሌ ቦላ ያና ፒርዳ
1 ጎዳይ ያርሾ ያርሺዛሶዛ ሚሌን ኤቂ ዲሺን ታ ቤያዲስ፤
ኢዚካ ታና፥
«ጾሳ ኬꬃ ዮቻይ
ቃጻና ጋካናስ
ኬꬃ ቁስቴ
ሾጫ ላላዳኔ
ኣሳ ቦላ ኩንዳና ማላ ኦꬃ፤
ሄሳፌካ ኣቲዳይታ
ታኒ ኢስታ ማሻራ
ዎꬋ ꬋይሳና፤
ኢስታፌ ኦኒካ ባቃቴና፤
ባቃቲኮካ ታፔ
ኬሲ ኤኪ ኣቴና።
2 ኢስቲ ዱፎ ቦኪ ጌሊዳኮካ
ታ ኩሼይ
ኢስታ ሄፔ ሾዲ ሃ ኬሳና፤
ኢስቲ ፑዴ ሳሎ ኬዚዳኮካ
ታኒ ኢስታ ሄፔ
ሃ ዱጌ ጎቻ ዎꬃና።
3 ኢስቲ ፑዴ ቃርሜሎሴ ዙማ ቦላ
ኬዚ ቆቴቲዳኮካ
ታ ካሌታ ባዳ
ኢስታ ሄፔ ዎꬃና፤
ኢስቲ ዱጌ ጪማ ኣባ ጊዶ
ጌሊዲ ታፔ ቆቴቲዛኮካ
ሄን ኢስታ ሾሺ ዱካና ማላ
ታ ኣዛዛና።
4 ኢስቲ ባ ሞርኬታ ኩሼን
ዲኤቲ ቢኮካ
ሄን ኢስቲ ማሻን
ሃይቃና ማላ
ታ ኣዛዛና፤
ታኒ ኢስታ ቦላ
ታ ኣይፌ ሎኦስ ጊዶንታ
ኢታስ ዛራና» ጊ ኣዛዚዴስ።
5 ኡባ ሃሪዛ ጎዳይ
ኢዚ ቢታዮ ቦቼስ፤
ኢዛካ ሴራዉስ፤
ኢዚን ዲዛ ኡባይ ዬኬስ፤
ናይሌ ሻፋይ
ኪጺ ጉሚዛ ማላ
ቢታ ኡባይ ቃጼስ፤
ቃሴ ዛሪዲ ኪጻ ሃꬂ
ዎꬊዛ ማላ ዎꬋና።
6 ባ ዱሳሶ ሳሎ ኦꬂዳይ፥
ሳሎካ ሳኣፔ ቦላን
ሚንꬂዳይ፥
ኣባ ሃꬃ ኣዛዚዲ
ቢታ ቦላ ጎጊሲዛይ
ኢዛስ ሱንꬃይ ጎዳ።
7 ጎዳይ፥ «ኢስራኤሌ ኣሳዉ!
ኢንቴ ታስ
ቶጵያ ኣሳ ማላ ጊዴኬቲ?
ታኒ ኢንቴና
ጊብጼፔ ኬሶይሳꬆ
ፊሊስጼሜ ኣሳ ቃርጼሴፔ
ቃሴ ሶሪያ ኣስ
ቂሬፔ ኬሳቤኪና?
8 ታኒ ኡባ ሃሪዛ ጎዳይ
ጌዴ ናጋራንቻ
ኢስራኤሌ ኣሳ
ካዎቴꬃኮ ጼላይስ፤
ታ ኢዛ ቢታፌ ሙሌራ ꬋይሳና፤
ጊዶ ኣቲን ያቆቤ ዜሬꬅ
ኡባ ꬋይሲኬ» ጌስ።
9 «ቤኢቴ ካꬅ
ዛይዛሬን ዛይዛሪዛ ማላ
ኢስራኤሌ ኣሳ
ኣይዛቤ ካዎቴꬃ
ጊዶን ዛይዛራና ማላ
ታ ኣዛዛና፤
ጊዶ ኣቲን ኢስታፌ ኢሳዴይካ
ዎራ ዎꬊ ꬋዬና።
10 ‹ኑ ቦላ ኣይኮ ኢታይካ ጋኬና
ዎይኮ ኑና ቦቼና› ጊዛ
ታ ዴሬ ኣሳ ጋርሳን ዲዛ
ናጋራንቻቲ ኡባይ
ኦላን ሃይቃና» ጌስ ጎዳይ።
ኢስራኤሌ ኣሳ ሲሞ ሂዶታ
11 «ጮ ኩንዲ ላሌቲዳ ኬꬃ ማላ ጊዲዳ
ዳዊቴ ዜሬꬃታ ካዎቴꬃስ
ታኒ ዛራ ኤሳና ዎዴይ ያና፤
ታኒ ጊምቤዛ ዛራ ጊምባና፤
ላሌቲዳይሳካ ኦራጺሳና፤
ካሴይሳꬆ ዛራ ኦꬃና።
12 ሄሳꬆካ ኤዶሜ ዴሬን
ኣቲዳይታኔ
ታ ሱንꬃን ጼይጌቲዳ ዴሬታ
ኡባ ኢስቲ ላታና»
ጌስ ጎዳይ። ሃዋ 15፡16-18
13 «ካꬅ ማጺዛይቲ ማጺ ዉርሶንታ
ዲሺን ጎሻ ዎዴይ ጋኬስ፤
ዎይኔ ኣይፌ ጉምኢዛዴይ
ጉምኢ ጊጎንታ ዲሺን
ዎይኔ ፑቴ
ቶኪዛ ዎዴይ ጋኬስ፤
ሄ ዎዴ ማልኢዛ ሎኦ ዎይኔ
ኡሺ ዙማፔ ፑልታና፤
ዙምቡላታፔካ ጎጋና።
14 ዲኤቲ ቢዳ ኢስራኤሌ ኣሳ
ሃ ኢስታ ዴሬ ዛራ ኤሃና፤
ላሌቲዳ ካታማታ ዛሪ
ኬጺዲ ኢዛን ዴኣና፤
ኢስቲ ዎይኔ ቶኪዲ
ኢዛፔ ኣጌቲዳ ኡሹ ኡያና፤
ዱማ ዱማ ኣይፊዛ ሚꬅ
ቶኪዲ ኢዛ ኣይፌ ማና።
15 ታ ዴሬ ኢስራኤሌ ኣሳ
ታኒ ካሴ ኢስታ ቢታን
ዛራዳ ቶካና፤
ታኒ ኢስታስ ኢሚዳ ቢታፌ
ኢስቲ ናምኣንꬆ ꬎቃሌቲ
ꬋዬቴና»
ጌስ ጎዳይ ሳሎ ጾሳይ።