ኣብዲዩ ቲንቢቴ
ጊዶ ቆፋ
ሃይሲ ጉꬃ ማጻፋዚ ቤቲዳይ ኪርስቶሲ ዬሌታናፔ ካሴ 586 ላይꬃን ዬሩሳላሜይ ላሌቲዳፔ ጉዬ ቆንጬን ኤሬቶንታ ዎዴና። ሄ ዎዴ ኣርሼይ ሞኪዛ ዱጌሃ ባጋራ ዲዛ ዩሁዳስ ኣዱሳ ዎዴሶፌ ሞርኬ ጊዲዳ ኤዶሜ ኣሳይ ዬሩሳላሜ ላሌቴꬃን ኡፋዬቲዲ ቢታ ኦሊ ኦይኪዛይታ ማዲሼ ካታማይ ሃሮ ኡባ ቦንቄስ፤ ኣብዲዩይ ኤዶሜ ኣሳ፥ ሃንኮ ኢስራኤሌ ሞርኬታራ ኢሲ ቦላ ሚኖ ቂጻቴይኔ ጾኔቴꬂ ጋካናይሳ ካሴቲ ዮቲዴስ።
ሃ ማጻፋይ ኦይኪዳ ኩሜꬃ ቆፋ
ኤዶሜ ኦቶሬቴꬂኔ ቂጻቴ 1-9
ኤዶሜ ሜንጼ ኢታቴꬅ 10-14
ኢስራኤሌ ጾኖ 15-21
1
ናቤ ኣብዲዩይ ቤኢዳ ኣጁታ
1 ኣብዲዩይ ቤኢዳ ኣጁታ፤
ጎዳይ ኤዶሜ ጊሻስ
ኣብዲዩ ኪቲዴስ፤
ኑ ሲዪዳ ጾሳ ኪታይ፥
«ታኒ ጾሳይ ኤዶሜ ቦላ
ሜቶ ጋꬃና ማላ ኣዛዛዳ
ዴራ ጊዶ ኣስ ኪታዲስ» ጌስ።
2 ጎዳይ ኤዶሜስ፥
«ታ ኔና ዴሬ ኣሳፔ ላፊሳና፤
ኔኒ ኣስ ኡባን
ሌቄቲዳዝ ጊዳና።
3 ኔኖ ዛላ ጎምፓን ዲዛይሶ!
ኔ ዱሳሶ ꬎቃሶሆን
ኬጺዳይሶ!
‹ታ ዲዛሶፔ ታና ዚቃሶ
ዎꬃና ዳንዳይዛይ ኦኔ?›
ጊዛይሶ!
ኔ ዎዚና ኦቶሮቴꬂ
ኔና ባሌꬂዴስ።
4 ኔ ጎሌ ካፎ ማላ
ኬሃ ፑዴ ፒራꬊኮካ፥
ኔ ኬꬅ ጾሊንቴ ጊዶን
ኬጺኮካ
ታ ኔና ሄፔ
ሃ ዱጌ ዎꬃና።
5 «ካይሶቲ ዎይኮ ቦንቂዛይቲ
ኦማርስ ዪኮ
ባስ ጊዲዛይሳ ኤኬቴስ፤
ካꬅ ማጺዛይቲ ፒጼ ኣሼቴስ፤
ጊዶ ኣቲን ኔ ሞርኬቲ
ኢሲኖካ ኣሼቴና። *ፒጼ፡ ፒጼ ጌቴቲዛይሲ ኣማራꬆ ቃላን ቃርሚያ ጌቴቴስ።
6 ኢንቴኖ ኤሳዌ ዜሬꬃቶ!
ኢንቴ ኬꬅ ቦንቄቲዴስ፤
ሄኮ ኢንቴ ሃሮይ ዉሪ
ቦጌቲዴስ።
7 ኔናራ ጫቄቲዳ ላጌቲ
ኔና ባሌꬂዳ፤
ኔና ዶሲዛ ላጌቲ
ኔ ቦላ ሞርኬቴꬃን ዴንዲዳ፤
ኔ ካꬅ ሚዳይቲ ኔስ ያርዴ
ዎꬂዲ ኔና
ኔ ዴሬፔ ጎዲዳ፤
ጊዶ ኣቲን ኢስቲ ሄሳ ኔ ቦላ
ኦꬂሺን ኔኒ ኤራቤካ።
8 «ሄ ዎዴ ኤዶሜፔ
ኣꬎ ኤራንቻታ፥
ኤሳዌ ዙማፔ
ኤራቴꬅ ꬋይሳና።
9 ኤዶሜ ዴሬን ዴኢዛ
ኣሳቲ ዉሪካ ሃይቃና፤
ቴማኔ ኦሊዛ ዎልቃማ
ኦላንቻቲ ባባና።
ጾሳይ ኤዶሜ ቃጻዪዛ ጋሶ
10 «ኔ ኢሻ ያቆቤ ዜሬꬃታ
ኔኒ ጌኔ ዎꬊዳ ጊሻስ
ኔ ካዉያዳ ሜርናስ ꬋያና።
11 ዬሩሳላሜ ሞርኬቲ
ፔንጌ ሜንꬂዲ
ሃሪዳ ሚሽ ኡባ
ቦንቂዛ ዎዴ
ኔኒ ላንቄራ ኤቃ ጼላዳሳ፤
ሄሳ ጊሻስ ዬሩሳላሜ ቦላ
ሳማ ዬጊ ጊሼቲ
ኤኪዳይታፔ
ኔኒ ዱማታካ።
12 ዩሁዳ ዴሬን ዴኢዛ ኢሻታ ቦላ
ጋኪዳ ሜቶን ኔኒ ኡፋዬታና
ኮሼናሺን ኡፋዬታዳሳ፤
ቃሴ ኢስታ ꬋዮኒኔ ሜቶን
ኡፋዬታናኔ ኦቶሬታና
ኔስ ቤሴናሺን ኦቶሬታዳሳ።
13 ታ ዴሬይ ꬋይዛ ጋላስ
ኢስታ ፔንጌራ
ኔኒ ጌላና ቤሴናሺን፤
ኢስቲ ꬋይዛ ጋላስ ሜቶቲሺን
ኔኒ ኡፋዬታና ቤሴናሺን፤
ቃሴካ ኢስቲ ꬋይዛ ጋላስ
ኔ ኢስታ ሃሮ
ቦጋና ኔስ ቤሴናሺን።
14 ጎዴቲዲ ቆቴቲዳይታ ዎꬋና
ኔ ኦይዱ ኦጌ ቦላ
ናጋና ቤሴናሺን ናጋዳሳ፤
ቃሴ ኣቲዳ ኣሳታ
ሜቶ ጋላስ ኔ ኣꬃ
ኢማናስ ቤሴናሺን
15 «ታ ጾሳይ ኣሳ ኡባ ቦላ
ፒርዲዛ ዎዴይ ጋኪዳ ጊሻስ
ኤዶሜ! ኔ ኦꬂዳ
ኢታ ኦሶይ
ኔ ቦላ ሲማና፤
ሄሳ ጊሻስ ኔ ኦሶ ማላ
ኔ ኤካና።
16 ኣንጄቲዳ ታ ዙማ ቦላ
ኢንቴ ዋዬ ኡሹ ኡዪዳ ማላ
ኢንቴ ዩሾን ዲዛ ሃንኮ ዴሬይ
ዋዬ ኡሹ ኡያና፤
ኡዪዳይቲ ዉሪካ ꬋያና።
ኢስራኤሌ ዴሬ ጾኖ
17 «ጺዮኔ ዙማን ሜቶፔ
ኣታናይ ዳና፤
ሄ ዙማያካ ጌሽ ጊዳና፤
ያቆቤ ዴሬይ ቦንቄቲዳ
ባ ሃሮ ዛሪ ኤካና።
18 ያቆቤ ዜሬꬃቲ ታማ ማላ፥
ዮሴፌ ዜሬꬃቲ
ታማ ላጮ ማላ ጊዲን
ኤሳዌ ዜሬꬃቲ
ኡቱላ ማላ ጊዳና፤
ታማይ ኡቱላ ሚዛ ማላ
ያቆቤ ዜሬꬃቲኔ
ዮሴፌ ዜሬꬃቲ
ኤሳዌ ዜሬꬃታ ꬋይሳና።
19 «ዩሁዳ ዴሬፔ
ዱጌሃ ባጋራ ዲዛ
ኔጌቤ ኣሳይ ኤዶሜ
ቢታ ላታና፤
ኣርሼይ ዉሊዛ ባጋራ
ጋꬋን ዲዛ ኣሳቲ
ፊሊስጼሜ፥ ኤፍሬሜኔ
ሳማሪያ ቢታ ላታና፤
ቃሴ ቢኒያሜ ዜሬꬃቲ
ጋላኣዴ ቢታ ላታና።
20 ቤቲ ቢዳ ኢስራኤሌ ኣሳይ
ኣላሄ ጌቴቲዛ
ዴሬፔ ሲሚዲ
ካናኔ ቢታፌ
ሲራፍታ ጋካናስ
ዲዛ ቢታ ላታና፤
ቤቴ ቢዲ
ሲራፍታ ዴሬን ዲዛ
ኢስራኤሌ ኣሳይ
ኔጌቤን ዲዛ ካታማታ ላታና።
21 ኣቲዳ ኢስራኤሌ ኣሳቲ
ጺዮኔ ዙማ ቦላ ኡቲዲ
ኤዶሜ ዴሬ ኣይሳና፤
ቃሴ ካዎቴꬃይካ
ጾሳስ ጊዳና» ጊ ዮቲዴስ።