ዮናሳ ቲንቢቴ
ጊዶ ቆፋ
ዮናሳ ቲንቢቴይ ጾሳስ ኣዛዜቲኬ ጊዳ ኢሲ ናቤ ቦላ ጋኪዳ ዱማ ዱማ ሜቶታ ዮቲዛ ማጻፋ ጊዲዳ ጊሻስ ሃራ ቲንቢቴ ማጻፋታፔ ዱማቴስ። ጾሲ ዮናሳ፥ «ኢስራኤሌ ኣሳስ ሚኖ ሞርኬ ጊዲዳ ጊታ ኣሶሬ ካዎቴꬃስ ዋና ካታማ ናናዌ ባ!» ጊዲ ኢዛ ኣዛዚዴስ።
ዮናሲ ጊዲኮ፥ «ጾሳይ ካታማዮ ꬋይሳናስ ኢሚዳ ሚኖ ቆፊሶዛስ ኢዚ ጊዳ ማላ ኦꬄና» ጊ ቆፒዳ ጊሻስ ጾሳ ቃላ ኤኪዲ ናናዌ ባናስ ኮዪቤና፤ ዳሮ ሃኖቲ ሃንዳፔ ጉዬ ኬሂ ኡፋዬቶንታ ዲሼ ኣዛዜቲዴስ፤ ኢዚ ቡሮ ሃናና ጊዳ ኢዛ ቃላዚ ፖሌቶንታ ኣጊን ላንጬቲዴስ።
ሃ ማጻፋዚ ጾሳስ ኢዛ ሜꬌቴꬃ ኡባ ቦላ ጎዳቴꬂ ዲዛይሳ ኤሪሴስ። ሃራፔካ ጾሲ ሲቆኔ ማሪዛ ጎዳ ጊዲዳ ጊሻስ ባ ዴራ ሞርኬታ ቦላ ሃንቄቲዲ ሙሌራ ꬋይሳናፔ ኣቶ ጊዲ ማራናስ ዶሲዛይሳ ቤሴስ።
ሃ ማጻፋይ ኦይኪዳ ኩሜꬃ ቆፋ
ጎዳፔ ዮናሳ ባቃታ 1፡1-7
ዮናሳ ዎሳ 2፡1-10
ዮናሲ ናናዌ ቢን ዴሬዛ ማሬቴꬅ 3፡1-11
ጾሲ ዴሬዛ ማሪዳ ጊሻስ ዮናሳ ሃንቄቴꬅ 4፡1-11
1
ዮናሲ ኣዛዜቶንታ ኢጾ
1 ኣማቴ ና ዮናሳኮ ጎዳ ቃላይ፥ 2ካዎ 14፡25 2 «ዴንዳዳ ሄ ጊታ ካታማ ናናዌ ባ፤ ሄ ካታማ ኣሳ ኢታቴꬅ ታ ቤኢዳይሳ ኢስታስ ዮታ» ጊሼ ዪዴስ። 3 ጊዶ ኣቲን ዮናሲ ጎዳ ሲንꬃፌ ባቃቲዲ ታርሴሴ ቢታ ባናስ ዴንዲዴስ፤ ኢዚ ዮጴ ካታማ ዎꬊዲ ታርሴሴ ቢዛ ማርካቤ ዴሚዴስ፤ ጎዳ ሲንꬃፌ ባቃቲዲ ኢስታራ ታርሴሴ ባናስ ሚሽ ቃንጺዲ ማርካቤዛን ጌሊዴስ።
4 ማርካቤዚ ቢሺን ጎዳይ ኣባ ቦላ ጎቴ ጫርኮ ዴንꬂን ኣባ ዳምባላይ ኬሂ ዳሪዳ ጊሻስ ማርካቤዚ ሜቃና ጋኪዴስ። 5 ሂስቲን ማርካቤዛን ዲዛ ኣሳይ ባቢዳ ጊሻስ ዉሪካ ባ ጾሳኮ ዋሲዴስ፤ ቃሴ ማርካቤዚ ካዉያና ማላ ኢዛ ጊዶን ዲዛ ጫና ዴንꬂዲ ኣባን ኦሊዳ፤ ጊዲኮካ ዮናሲ ማርካቤዛስ ጋርሳ ኪፊሌ ዎꬊዲ ሄን ዴጾ ꬊስኮ ዎꬊዴስ።
6 ማርካቤዛ ሃላቃይ ኢዛኮ ቢዲ፥ «ኣይስ ꬊስካዲ? ዴንዳዳ ኔ ጾሳ ዎሳ! ኢዚ ባ ሎኦ ኣይፌን ጼሊዲ ኑና ኣሻናኮ ኦኒ ኤሪዜ!» ጊዴስ።
7 ማርካቤዛን ዲዛ ኣሳይ ኢሶይ ኢሳ፥ «ሃ ዪቴ! ሃይሲ ኢታ ሚሺ ኦና ጋሶን ኑና ጋኪዳኮ ኤራናስ ኣኔ ሳማ ዬጎስ» ጊዳ፤ ሂስቲን ኢስቲ ሳማ ዬጊን ሳማይ ዮናሳ ቦላ ዎꬊዴስ። 8 ሄሳፌ ጉዬ ኢስቲ ዮናሳ፥ «ሃይሲ ኢታ ሚሺ ኦና ጋሶን ኑ ቦላ ጋኪዳኮ ኣኔ ኑስ ዮታ! ኔ ኦሶይ ኣዜ? ኣዋፔ ያዲ? ኔ ዴሬይ ኣዋ? ኔኒ ኦና ዜሬꬄ?» ጊ ኦይቺዳ።
9 ሂስቲን ዮናሲ ዛሪዲ፥ «ታኒ ኢብራዌ ኣሳ፤ ኣባኔ ቢታ ሜꬊዳ ሳሎ ጎዳ ጎይናይስ» ጊዴስ።
10 ሄሳ ጊሻስ ጾሳ ሲንꬃፌ ኢዚ ባቃቲዛይሳ ኢዚ ኢስታስ ዮቲዳይሳፌ ኣሳይ ኤሪዳ ጊሻስ ኬሂ ባቢዲ፥ «ሃይሶ ኣይ ፓላ ሚሽ ኦꬃዲ?» ጊዳ።
11 ቃሴ ኣባ ዳምባላይ ካሴይሳፌ ሃ ዳሪዳ ጊሻስ ኣሳይ ዮናሳ፥ «ኑስ ኣባይ ጮኡ ጋና ማላ ኔና ኑኒ ዎስቲኖ?» ጊዲ ኦይቺዳ።
12 ኢዚካ ኢስታስ፥ «ሃይሲ ዎልቃማ ዳምባላይ ኢንቴ ቦላን ዴንዲዳይ ታ ጋሶን ጊዲዳይሳ ታ ኤራይስ፤ ሄሳ ጊሻስ ታና ዴንꬂዲ ኣባን ኦሊቴ፤ ሂስቲኮ ኣባይ ኢንቴስ ጮኡ ጋና» ጊዴስ።
13 ጊዶ ኣቲን ማርካቤዛን ዲዛ ኣሳይ ማርካቤዛ ጉዬ ኣባ ላንቄ ኬሳናስ ሚንꬂ ላጊዳ ሺን ኣባ ዳምባላይ ኬሂ ዳሪዳ ጊሻስ ኬሳናስ ዳንዳይቤቴና። 14 ሄሳ ጊሻስ ኢስታስ፥ «ኣቤት ጎዳዉ! ሃይሳ ኣዴዛ ሼምፖ ጊሻስ ኔኒ ኑና ꬋይሶንታ ማላኔ ሃይሳ ጌሻ ሱꬃ ኣጮዛካ ኔኒ ኑፔ ኦይቾንታ ማላ ኑኒ ኔና ኬሂ ዎሶስ። ኣይስ ጊኮ ጎዳዉ ኔኒ ኔ ኮዪዳ ማላ ኦꬃዳሳ» ጊዲ ጎዳኮ ዋሲዳ።
15 ሄሳፌ ጉዬ ዮናሳ ዴንꬂዲ ኣባን ኦሊን ኣባ ዳምባላይ ጮኡ ጊዴስ። 16 ሂስቲን ኣሳይ ጎዳስ ኬሂ ባቢዴስ፤ ጎዳስ ያርሾ ያርሺዳ፤ ኣዲናካ ኣዲኔቲዳ።
17 ዮናሳ ሚታና ማላ ኢሲ ጊታ ሞሌ ጎዳይ ጊግሲን ሄ ሞሌዛ ኡሎን ዮናሲ ሄꬑ ጋላሲኔ ሄꬑ ኦማርስ ኣቂዴስ። ማቶ 12፡40