7
ዳኔላስ ኣጁታን ቆንጪዳ ኦይዱ ዶኣታ
(7፡1—12፡13)
1 ባቢሎኔ ካዎ ቤሊሻጾሬይ ካዎቲዳ ኮይሮ ላይꬅ ዳኔሊ ባ ኣልጋን ኢቺ ዲሼ ኣጉሞኔ ኣጁታ ቤዪዴስ፤ ሄሳፌ ጉዬ ባ ቤኢዳ ኣጉሞዛ ጻፊዴስ። 2 ዳኔሊ፥ «ሳሎ ጫርኮ ኦይዳቲ ዎጋ ኣባ ቃꬂሺን ኦማርስ ኣጁታን ቤያዲስ። 3 ዱማ ዱማ ቆሞ ዎጋ ጊታ ኦይዱ ዶኣቲ ኣባፌ ኬዚዳ። ኣጁ 13፡1፤ 17፡8
4 «ኮይሮ ዶኣዚ ጋሞ ሚሳቴስ፤ ኢዛስ ጎሌ ቄፌ ማላ ቄፌቲ ዴቴስ፤ ታኒካ ጼሎን ዲሺን ሄ ቄፌቲ ሾዴቲ ሾዴቲ ዎꬊዳ፤ ሄ ዶኣዚ ꬎቁ ጊዲ ኣሳ ማላ ናምኡ ቶሆታን ኤቂዴስ፤ ኢዛስ ኣሳ ዎዚናይ ኢሜቲዴስ።
5 «ናምኣንꬆ ዶኣዚ ዛርዶ ዶኣ ሚሳቴስ፤ ኢዚ ኢሲ ሚሌን ꬎቁ ጊ ኤቂዴስ፤ ኢዚ ባ ኣቻን ሄꬑ ሚሌ ሜቄꬃታ ሳጺ ኦይኪዴስ፤ ‹ኔ ኮዪዳ ኬና ኣሾ ማ› ጊዛ ቃላይ ኢዛስ ዮቴቲዴስ።
6 «ታኒ ሄሳ ጼሎን ዲሺን ማሄ ሚሳቲዛ ሃራ ዶኣይ ኬዚዴስ፤ ኢዛስ ካፎ ቄፌ ሚሳቲዛ ኦይዱ ቄፌቲ ዞኮ ቦላ ዴቴስ። ኦይዱ ሁኤቲ ኢዛስ ዴቴስ፤ ጎዳቴꬂካ ኢዛስ ኢሜቲዴስ። ኣጁ 13፡2
7 «ሄሳፌ ጉዬ ኦይዳንꬆ ዶኣዛ ታ ቤያዲስ፤ ኢዚካ ኬሂ ባቢሲዛ፥ ዳጋንꬂዛዚኔ ዎልቃማ ዶኣ፤ ሄ ዶኣዛስ ፑዜሬꬂዛኔ ሜንꬄሬꬂዛ ቢራታ ሚሳቲዛ ጊታ ኣቻቲ ዴቴስ። ኢዚ ሚሺን ኣቲዳይሳ ባ ቶሆታን ዬꬌቴስ፤ ካሴ ኣꬊዳ ዶኣታ ኡባፌ ኢዚ ዱማ፤ ኢዛስ ታሙ ካጬቲ ዴቴስ። ኣጁ 12፡3፤ 13፡1
8 «ታኒ ካጬታ ጊሻስ ቆፋን ዲሺን ካጬታ ጊዶራ ሃራ ኢሲ ጉꬃ ካጬይ ኬዚዴስ። ኮይሮ ካጬታፔ ሄꬓቲ ሾዴቲ ዎꬊዳ፤ ሄ ጉꬃ ካጬዛስ ኣሳ ኣይፌይኔ ኦቶሬቴꬃን ሃሳይዛ ዶናይ ዴስ። ኣጁ 13፡5-6
9 «ታ ጼሎን ዲሺን
ኣራታቲ ሚጬቲዳ፤
ቤኒ ቤኒሶፌ ዲዛይሲ
ኢዛ ቦላ ኡቲዴስ፤
ኢዛ ማይኦይ
ሻቻ ማላ ቦꬃ፤
ኢዛ ቢናናይካ
ፑቶ ማላ ቦꬃ፤
ኢዛ ኣራታይ ታማ ላጮ፥
ኢዛ ፓራ-ጋሬቲ ኤጺዛ ታማ ማላ። ኣጁ 20፡4፤ 1፡14
10 ኢዛ ሲንꬃራ ታማ ሃꬂ
ፑልቲ ጎጌስ፤
ኢዛስ ዳሮ ሺያን ቆዴቲዛ
ኦሳንቻቲ ዴቴስ፤
ቆዳይ ባይንዳ ዴሬይ
ኢዛ ሲንꬃን ኤቂዴስ፤
ፒርዳ ሺሎታይካ ኡቲዴስ፤
ማጻፋቲካ ዶዬቲዳ። ኣጁ 5፡11፤ 20፡12
11 «ታኒ ሄ ካጬዚ ሃሳይዛ ኦቶሮ ቃላፔ ዴንዲዳይሳን ታ ኢዛኮ ጉጃ ጉጃ ጼላዲስ፤ ሄ ዶኣዚ ኦይኬቲዲ ሹኬታና ጋካናሲኔ ኢዛ ኣሾይ ሲፋሌቲዲ ጌዴ ላጪዛ ታማን ኦሌታና ጋካናስ ታኒ ጼሎ ኣጋቤኬ። 12 ሃንኮ ኣቲዳ ዶኣታ ጎዳቴꬂ ኢስታፌ ኤኬቲዴስ፤ ጊዶ ኣቲን ጉꬃ ዎዴስ ኢስቲ ሼምፖራ ፓጻ ዴኣና ማላ ፒቃዴይ ኢሜቲዴስ።
13 «ኣሳ ና ሚሳቲዛዴይ ሳሎ ሻራይ ኢዛ ጊዶꬂ ኦይኪን ዪዛይሳ ኦማርስ ኣጁታን ቤያዲስ፤ ኢዛ ጌዴ ቤኒ ቤኒሶፌ ዲዛይሳኮ ሺሺዳ። ማቶ 24፡30፤ 26፡64፤ ማር 13፡26፤ 14፡62፤ ሉቃ 21፡27፤ ኣጁ 1፡7፥13፤ 14፡14 14 ኣላሜ ቦላ ዲዛ ኣስ ኡባይ፥ ካዎቴꬃቲ ኡባይኔ ዱማ ዱማ ቃላን ሃሳይዛ ዛሬቲ ኡባይ ኢዛስ ሃጋዛና ማላ ጎዳቴꬂ፥ ቦንቾይኔ ካዎቴꬂ ኢዛስ ኢሜቲዴስ፤ ኢዚ ሜርናስ ሃራና፤ ኢዛ ካዎቴꬃስካ ዉርሴꬂ ዴና። ኣጁ 11፡15
ኣጁታዛ ቢርሼꬅ
15 «ታኒ ዳኔሊ ሃይሳ ታ ቤኢዳ ኣጁታን ኬሃ ሜቶታዲስ፤ ታ ሼምፖያካ ጬጫዱስ። 16 ታስ ሄን ጋዳን ኤቂዳይታፔ ኢሳኮ ሺቃዳ ሃይሳ ኡባ ቱሙ ቢርሼꬂ ኣዛኮ ኦይቻዲስ፤ ኢዚካ ታስ ሄሳ ኡባ ቢርሼꬅ ዮቲዴስ። 17 ኢዚካ ታስ፥ ‹ሃይቲ ዎጋ ጊታ ኦይዱ ዶኣቲ ቢታፌ ዴንዳና ኦይዱ ካዎታ። 18 ጊዶ ኣቲን ኡባፌ ꬎቃ ጾሳ ጌሻቲ ኢዛ ካዎቴꬃ ባስ ኤካና፤ ሜርናስ ኦይካና፤ ኤ ሜርናስ ኢስቲ ኦይካና› ጊዴስ። ኣጁ 22፡5
19 «ሄሳፌ ጉዬ ታኒ ሃንኮ ዶኣታ ኡባፌ ዱማቲዲ ያሺሲዛ ኦይዳንꬆ ዶኣሲ ዲዛ ቱሙ ቢርሼꬃ ኤራናስ ኮያዲስ። ሄ ዶኣስ ቢራታ ኣቺኔ ጻርቂማላ ጹጉንꬂ ዴስ፤ ኢዚ ባናራ ጋይቲዳ ኡባ ሜንꬄሬꬂ ሜስ፤ ሚሺን ኣቶይሳ ባ ቶሆን ዬꬌሬቴስ። 20 ቃሴካ ሄ ዶኣዛ ሁኤን ዲዛ ታሙ ካጬታ ጊሻስ፥ ኢስታ ጊዶን ሞኪዳ ካጬ ጊሻሲኔ ሄ ካጬታ ጊዶፌ ሾዴቲዳ ሄꬑ ካጬታ ጊሻስ ሄሳꬆካ ሃራታፔ ኣꬊዛ ኣሳ ኣይፌ ሚሳቲዛ ኣይፌታ ጊሻስ፥ ኦቶሮቴꬃን ሃሳይዛ ዶናይ ኢዛስ ዲዛ ሃ ካጬዛ ጊሻስ ታ ኤራናስ ኮያዲስ። 21 ቤኢቴ ታ ጼሊሺን ሃይሲ ሃ ካጬዚ ጌሻታ ቦላ ኦላ ኣዋጂዲ ኢስታ ጾኒዴስ። ኣጁ 13፡7 22 ሄሲካ ሃኒዳይ ቤኒ ቤኒሶፌ ዲዛይሲ ያና ጋካናሲኔ ኡባፌ ꬎቃ ጾሳይ ጌሻታስ ቱማ ፒርዳ ፒርዳና ጋካናሳ። ጌሻቲ ኢዛ ካዎቴꬃ ላቲዛ ዎዴይ ጋኪዴስ። ኣጁ 20፡4
23 «ኢዚካ ታስ ሄሳ ቢርሼꬃ፥ ‹ሄ ኦይዳንꬆ ዶኣዚ ቡሮፔ ቢታ ቦላ ዴንዳና ኦይዳንꬃ ካዎቴꬃ፤ ሄሲ ሄ ካዎቴꬃይ ኡባፌ ዱማ ጊዲዳ ጊሻስ ኢዚ ቢታ ኡባ ዎራጂዲ ባ ቶሆን ዬꬋና፥ ሊቂሳናኔ ማና። 24 ታሙ ካጬቲ ሄ ካዎቴꬃ ጊዶፌ ኬዛና ታሙ ካዎታ፤ ሄሳፌ ጉዬ ካሴ ካዎታፔ ሃራ ዱማ ካዎይ ዴንዲዲ ሄ ታሙ ካዎታፔ ሄꬓታ ሺሪ ዬጋና። ኣጁ 17፡12 25 ኢዚ ኡባፌ ꬎቃ ጾሳ ቦላ ማካላ ቃላ ሃሳያና፤ ኢዛ ጌሻታ ኢዚ ዋዪሳና፤ ኢዛ ቦንቾ ባኣሌታኔ ኢዛ ዎጋ ላማናስ ኢዚ ዳፌታና፤ ጌሻቲ ሄꬑ ላይꬂኔ ባጋ ጋካናስ ኢዛ ጎዳቴꬃ ጋርሳን ዴኣና። ኣጁ 12፡14፤ 13፡5-6
26 « ‹ሄሳፌ ጉዬ ፒርዳ ኣራታይ ሚጬታና፤ ኢዛ ካዎቴꬃይ ኢዛፔ ቃሬቲ ኤኬቲን ኢዚ ሜርናስ ሙሌራ ꬋያና። 27 ሳሎፔ ጋርሳራ ዴኢዛ ካዎቴꬃ ኡባ ማታይ፥ ዎልቃይኔ ጊታቴꬃይ ኡባፌ ꬎቃ ጾሳ ዴሬ ጌሻታስ ኢሜታና። ኢዛ ካዎቴꬃይካ ሜርና ካዎቴꬅ ጊዳና፤ ዴሬዛ ሃሪዛይቲ ኡባቲ ኢዛስ ኣዛዜታናኔ ኢዛስ ጎይናና› ጊዴስ። ኣጁ 20፡4፤ 22፡5
28 «ታ ኣጁታ ቢርሼꬂ ሃይሳን ፖሌቴስ፤ ታኒ ዳኔሊ ታ ቆፋን ኬሃ ጬጫዲስ፤ ታ ኣይፌሶይ ላሜቲዴስ፤ ጊዶ ኣቲን ታኒ ሃይሳ ዉርሳካ ታ ዎዚናን ቁምኣ ኦይካዲስ» ጊዴስ።