1 ቤሊሻጾሬይ ካዎቲዳ ሄꬓንꬆ ላይꬃን ታኒ ዳኔሊ ሃይሳፌ ካሴ ቤኢዳይሳፌ ሃራ ኣጁታ ቤያዲስ። 2 ኤላማ ኣዉራጃን ሱሳ ጊምቤ ማታን ኣጁታን ታና ቤያዲስ፤ ኣጁታዛን ታኒ ኡላዬ ሻፋ ኣቻን ዳይስ። 3 ታኒ ꬎቁ ሂስታ ጼላሼ ሄ ሻፋዛ ኣቻን ናምኡ ጊታ ካጬቲ ዲዛ ኢሲ ꬋርሾይ ኤቂዳይሳ ቤያዲስ፤ ካጬቲ ኣዱሳ፤ ሄ ካጬታፔ ኢሶይ ኣዱቂ ኤኬስ፤ ጊዶ ኣቲን ኢዚ ሞኪዳይ ጉዬፔ። 4 ሄ ꬋርሾዚ ባ ካጬን ኣርሼይ ዉሊዛ ባጋ፥ ፑዴሃ ባጋኔ ዱጌሃ ባጋ ቃይጬስ፤ ኣይ ሜዶሳይካ ኢዛራ ኤቄታና ዳንዳይቤና፤ ኢዛ ኩሼፔካ ኣሻና ዳንዳይዛይ ዴና፤ ኢዚ ባ ኮዪዳ ማላ ኦꬂዴስ፤ ሂስቲዲ ካሴፔካ ሚኒ ሚኒ ቢዴስ።

5 ታኒ ሄሳ ሄ ኣጁታዛ ጊሻስ ዩሻ ቆፒሺን ኢዛ ኣይፌታፔ ጊዶን ጊታ ካጬይ ዲዛ ዴይሻ ኦርጌይ ቶሆን ጋዴ ዬꬎንታ ዲሼ ቢታ ካንꬂዲ ቆፖንታ ኣርሼይ ዉሊዛ ባጋፌ ዪዴስ። 6 ካሴ ሻፋ ኣቻን ኤቂ ዲሺን ታ ቤኢዳ ናምኡ ካጬራ ዲዛ ꬋርሾዛኮ ሃንቆራ ዲዲሚ ዪዲ ኢጪዴስ። 7 ኢዚ ꬋርሾዛኮ ሺቂሺን ታ ቤያዲስ፤ ኢዚ ꬋርሾዛ ሃንቆን ኢጪዲ ꬋርሾዛ ካጬታ ናምኣታ ሜንꬄሬꬂ ዬጊዴስ፤ ꬋርሾዚካ ኢዛራ ኤቄታናስ ዎልቃ ꬋይዴስ፤ ሄሳ ጊሻስ ኦርጌዚ ꬋርሾዛ ዱጌ ቢታ ቦላ ዬጊዲ ኢዛ ባ ቶሆን ዬꬊ ኤቂዴስ፤ ꬋርሾዛ ዴይሻፌ ኣሻና ዳንዳይዛይ ቤቲቤና። 8 ዴይሻ ኦርጌዚ ኬሂ ሚኒ ሚኒ ዎልቃቲ ቢዴስ፤ ጊዶ ኣቲን ኢዚ ባ ዎልቃን ሚኒ ሚኒ ቢዳ ዎዴ ኢዛስ ጊታ ካጬዚ ሜቂ ዎꬊዴስ፤ ሄ ካጬዛሶሆዛን ሃራ ኦይዱ ጊታ ካጬቲ ሞኪዳ፤ ኢስቲ ኡባይካ ሳሎ ጫርኮ ኦይዳታ ባጋ ሲሚ ዲጪዳ።

9 ሃይታ ኦይዱ ካጬታፔ ኢሳ ቦላ ሃራ ጉꬃ ካጬይ ሞኪዴስ፤ ሄ ጉꬃ ካጬዛ ዎልቃይ ዱጌሃ ባጋኔ ኣርሼይ ሞኪዛ ባጋ ጌዴ ሎኦ ዴሬይኮ ኬሂ ዲጪ ዲጪ ቢዴስ። *ሎኦ ዴሬ ጊዛይሲ ካሴ ኣይሁዳቲ ባንታ ዴሬ ኢስራኤሌ ቤሳናስ ጎኤቲዛ ቃላ። 10 ፑዴ ሳሎ ሜꬌቴꬃታኮ ጋካናስ ꬎቁ ጊዴስ፤ ሳሎ ጾሊንቴታፔ ኣማርዳይታ ዱጌ ቢታ ቦላ ዬጊዲ ኢስታ ቦላ ዱሬቲዴስ። ኣጁ 12፡4 11 ሳሎን ዲዛ ሜꬌቴꬃታ ሃላቃራ ጊናታና ኮዪዲ ባና ꬎቁ ዶቁ ሂስቲዴስ፤ ጋላስ ጋላስ ሺቂዛ ያርሾዚ ኢዛስ ሺቆንታ ማላ ዲጊዴስ፤ ጾሳ ኬꬃካ ቱኒሲዴስ። 12 ማካላቴꬃ ጋሶን ጌሻታ ኦላንቻቲኔ ጋላስ ጋላስ ሺቂዛ ያርሾዚ ኢዛስ ኢሜቲዴስ፤ ኢዚ ኦꬂዛ ሚሺ ዉሪካ ኢዛስ ጊጊ ጊጊ ቢዴስ፤ ቱማይካ ዱጌ ሳኣን ኦሌቲዴስ።

13 ሄሳፌ ጉዬ ጌሻታፔ ኢሶይ ሃሳይሺን ታ ሲያዲስ፤ ቃሴ ጌሻታፔ ሃራይ ኢሶይ ኢዛስ፥ «ሃች ሃች ያርሺዛ ያርሾ ኣጁታይ ፖሌታና ዎዴይ ኣይዴ? ሃ ማካላቴꬃ ጋሶን ዪዛ ባሻይ ኣዉዴ ጋካናስ ጋምኣኔ? ቃሴካ ሳሎ ኦላንቻቲኔ ጾሳ ኬꬃይ ኣዉዴ ጋካናስ ዬꬌቲሼ ዳኔ?» ጊ ኦይቺዴስ።

14 ሄ ኦይሼቲዳ ጌሻይካ፥ «2,300 ማላዶኔ ኦማርስ ጋካናስ ጋምኣና፤ ሄሳፌ ጉዬ ጾሳ ኬꬃይ ጌያና» ጊሺን ታ ሲያዲስ።

15 ታኒ ዳኔሊ ሃይሳ ኣጁታዛ ጼሊሺኒኔ ዩሻ ቆፒሺን ኣሴ ሚሳቲዛይ ታ ሲንꬃን ኤቂዴስ። 16 ኡላዬ ሻፋፔ ሄ ፒንꬃን፥ «ጋብሬሌ! ሃይሳ ኣዴዛስ ኣጁታዛ ቢርሼꬅ ዮታ!» ጊ ዋሲዛ ኣሳ ጬንጉርስ ሲያዲስ። ሉቃ 1፡19፥26

17 ጋብሬሌይ ታ ኤቃ ዲዛሶ ማቲ ማቲ ዪሺን ታ ዳጋማዳ ሲንꬃ ጉꬅ ጉፋናዲስ፤ ኢዚካ፥ «ኣሳ ናዉ! ሃይሲ ኣጁታዚ ቤሲዛይ ኣላሜ ዉርሴꬃ ጊሻስ ጊዲዳይሳ ኔ ኣኬካ» ጊዴስ። 18 ኢዚ ሄሳ ዮቲሺን ታኒ ቢታ ቦላ ሲንꬃ ጉꬅ ጉፋናዲስ፤ ኬሃ ꬊስኮ ሴራዲስ፤ ኢዚ ጊዲኮ ታና ካፊዲ ፑዴ ዴንꬂ ታ ቶሆን ኤሲዴስ። 19 ኢዚ ታና፥ «ሃይሲ ኣጁታዚ ኣላሜ ዉርሴꬃን ሃናና ዮኦታ ቤሴስ፤ ጉዬፔ ሃንቆ ዎዴ ኣዚ ሃናናኮ ታ ኔስ ዮታና። 20 ኔ ቤኢዳ ናምኡ ካጬራ ዲዛ ꬋርሾዚ ሜዶኔኔ ፓሪሴ ካዎቴꬃታ ቤሴስ። 21 ዴይሻ ኦርጌዚ ጊሪኬ ካዎቴꬃ ቤሴስ፤ ኢዛ ኣይፌታ ጊዶን ዲዛ ጊታ ካጬዚ ኮይሮ ካዎዛ ቤሴስ። 22 ሜቂዳሶዛን ሞኪዳ ኦይዱ ካጬቲ ሄ ካዎቴꬃይ ኦይዱ ኬዛናይሳ ቤሴቴስ፤ ጊዶ ኣቲን ኮይሮ ካዎቴꬃ ማላ ሚኖ ጊዶንታይሳ ቤሴስ።

23 «ኢስታ ካዎቴꬃ ዉርሴꬃ ዎዴይ ጋኪሺን ማካላንቻቲ ኢታቴꬃን ጉጂ ጉጂ ቢዛ ዎዴ ባቢሲዛ ሲንꬂ ዲዛ ባሌꬂዛ ካዎይ ካዎታና። 24 ሄ ካዎዚ ኬሂፔ ሚናና፤ ጊዶ ኣቲን ባ ዎልቃን ሚኔና፤ ሻጲዛ ኢታ ሚሽ ኦꬃና፤ ኢዚ ኦꬂዛ ኡባይ ኢዛስ ጊጋ ጊዳና፤ ጊታ ኣሳታኔ ጌሻታ ꬋይሳና። 25 ኢዚ ማካላንቻ ጊዲዳ ጊሻስ ሾጬቺ ሾጬቺ ዱሬታና፤ ኢዚ ባና ባርካ ጊታ ማላ ቆዳና፤ ሳሮን ዶስ ጊሺን ኢዚ ዳሮታ ꬋይሳና፤ ካዎታ ካዎ ቦላ ኢዚ ዴንዳና፤ ሂስቲኮካ ዛሪዲ ኢዚ ꬋያና፤ ጊዲኮካ ኣሳ ዎልቃን ጊዴና።

26 «ማላዶኔ ኦማርሳ ዎዴ ሺቂዛ ያርሾ ጊሻስ ኔ ቤኢዳ ኣጁታይ ቱማ፤ ጊዶ ኣቲን ሃ ኣጁታይ ፖሌታናይ ቡሮ ዳሮ ላይꬃፌ ጉዬን ጊዲዳ ጊሻስ ኔ ዎዚናን ቁምኣ ኦይካ» ጊዴስ።

27 ታስ ዳኔላስ ዎልቃይ ኢጺዴስ፤ ዳሮ ዎዴካ ሳኬታ ኢቻዲስ፤ ሄሳፌ ጉዬ ዴንዳዳ ካዎ ኦሶሶ ባዲስ፤ ታ ቤኢዳ ኣጁታን ኬሃ ዳጋማዲስ፤ ታ ኤራፔ ቦላ ጊዲዴስ።