1 ካሴ ታስ ኣጁታዛ ቢርሺዛ ኪታንቻዚ ታስ፥ «ኔ ዴሬዛ ናጊዛ ጊታ ኪታንቻስ ሃላቃ ሚካኤሌይ ኢዚ ሄ ዎዴ ቆንጫና፤ ኣሳ ዜሬꬂ ሜꬌቶሶፌ ሄ ዎዴ ጋካናስ ሃኒ ኤሮንታ ዎልቃማ ሜቶይ ሃናና፤ ኢስታ ሱንꬃይ ማጻፋን ጻፌቲዳ ኡባ ኣሳይ ኣታና። ማቶ 24፡21፤ ማር 13፡19፤ ኣጁ 7፡14፤ 12፡7 2 ኢስቲ ሃይቂን ቢታይ ሚዳይቲ ዉሪካ ዴንዳና፤ ኢስታ ጋርሳፌ ባጋይቲ ሜርና ዴኦስ፥ ባጋይቲ ሜርና ካዉሻሲኔ ዋዬስ ዴንዳና። ኢሳ 26፡19፤ ማቶ 25፡46፤ ዮሃ 5፡29 3 ሄ ዎዴ ኣꬎ ኤራንቻቲ ሳሎ ፖኦ ማላ ጶላና፤ ዳሮታ ጺሎቴꬃ ኦጌ ካሌꬂዳይቲ ዉሪ ሜሪፔ ሜርና ጋካናስ ሳሎ ጾሊንቴታ ማላ ጾልቃና።

4 «ዳኔላ! ኔኒ ኣላሜ ዉርሴꬂ ጋካናስ ሃይሳ ማጻፋዛ ጎርዳዳ ማታሜን ሾጫ፤ ሄ ዎዴ ኣሳይ ኤራቴꬅ ዳርሳናስ ያኔ ሃ ዎጼሬታና» ጊዴስ። ኣጁ 22፡10

5 ሄሳፌ ጉዬ ታ ሲንꬃን ሃꬃ ሻፋ ዶናን ሃራ ናምኣታ ሄ ፒንꬃኒኔ ሃ ፒንꬃን ኤቂዳይታ ቤኣዲስ። 6 ኢስታ ጊዶፌ ኢሳይ ሌኤ ሃሬ ማይኢዲ ሄ ሻፋዛፔ ፑዴ ባጋራ ኤቂዳ ኪታንቻዛ፥ «ሃይቲ ማላሊሲዛ ሃኖቲ ፖሌታናስ ኣይ ኬና ዎዴይ ኣቲዴ?» ጊዲ ኦይቺዴስ።

7 ሌኤ ሃሬ ማይኢዲ ሻፋፔ ጋና ባጋራ ኤቂዳ ኪታንቻዚ ባ ኩሼታ ፑዴ ሳሎ ዴንꬂዲ፥ «ሄሲ ሄꬑ ላይꬂኔ ባጋ ጋምኣና፤ ጌሻ ኣሳታ ዎልቃይ ዉርሺን ሃይቲ ዉሪካ ፖሌታና» ጊዲ ሜርናስ ዴኢዛይሳን ጫቂሺን ሲያዲስ። ኣጁ 10፡5፤ 12፡14

8 ኢዚ ጊዛይሳ ሲያዲስ ሺን ታስ ጌሊቤና፤ ሂስቲን ታኒ፥ «ታ ጎዶ! ሃይሳ ኡባ ዉርሴꬂ ኣይ ጊዳኔ?» ጋ ኦይቻዲስ።

9 ኢዚካ ታስ፥ «ዳኔላ! ሃይሳ ኣላሜዛ ዉርሴꬂ ጋካናስ ሃይሲ ቲንቢቴ ቃላዚ ጎርዴቲዲ ማታሜን ሾጬቲዳ ጊሻስ ኔኒ ባ። 10 ዳሮቲ ቆሬታና፥ ጋጬቲ ጌያናኔ ኢስታ ቦላ ዎሶይ ባይንዳይታ ጊዳና፤ ኢታቲ ጊዲኮ ባንታ ኢታቴꬅ ጉጂ ጉጂ ባና፤ ኢታታፔ ኢሶይካ ኣኬኬና፤ ጊዶ ኣቲን ኣꬎ ኤራንቻቲ ኣኬካና። ኣጁ 22፡11

11 «ጋላስ ጋላስ ሺቂዛ ያርሾይ ዲጌቶሳፌኔ ባሻ ቱናቴꬂ ዶሜቶሳፌ ሃ ሲሚን 1,290 ጋላስ ጊዳና። ዳኔ 9፡27፤ 11፡31፤ ማቶ 24፡15፤ ማር 13፡14 12 ጌንጪዲ 1,335 ጋላሳቲ ኣꬋና ጋካናስ ባ ኣማኖ ናጊዛይ ኣንጄቲዳ ኣሳ።

13 «ዳኔላ! ኔኒ ዉርሴꬅ ጋካናስ ባ፤ ሄሳፌ ጉዬ ኔ ሼምፓና፤ ዉርሴꬃ ጋላስ ኔስ ጊጊዳ ጺንጾ ኔ ላታና» ጊዴስ።