ሆሴኤ ቲንቢቴ
ጊዶ ቆፋ
ናቤ ሆሴኤይ ኪርስቶሲ ዬሌታናፔ ካሴ 721 ላይꬃን ሳማሪያ ካታማያ ላሌታናፔ ካሴ ዲዛ ናቤ። ሄ ዎዴ ሜቶይ ኩሚዳ ኢታ ዎዴዛን ናቤ ኣሞጼፔ ጉዬ ፑዴሃ ባጋራ ዲዛ ኢስራኤሌ ካዎቴꬃ ጋርሳን ቲንቢቴ ዴራስ ዮቲዴስ። ሆሴኤይ ዴሬዚ ኤቃ ጾስ ጎይኒዛይሳኔ ጎዳን ኣማኔቴꬅ ፓጪሲዳይሳ ቆንጪሲ ዮቲዴስ። ሆሴኤይ ሄሳ ዴሬዚ ጎዳን ኣማኔቶንታይሳ ኣሳ ኤሪሳናስ ኣማኔቶንታ ማቾ ኤኪዲ ኢስታስ ሌሚሶ ጊዲዲ ኢስታ ታማርሴስ፤ ኢዛ ማቼያ ጎሜራ ኢዛስ ኣማኔቶንታይሳꬆካ ዴሬዚ ጎዳ ባ ጾሳ ኣጋጊዴስ፤ ሄሳ ጋሶን ፒርዳይ ኢስራኤሌ ቦላ ያና ጌስ፤ ጊዶ ኣቲን ዉርሴꬃን ጎዳይ ባ ዴሬዛ ኬሂ ሲቂዛ ጊሻስ ባኮ ዛሪዲ ባሲኔ ዴራስ ጊዶን ዲዛ ኢሲፌቴꬃ ኦራጺሲዴስ፤ ሄ ጊታ ሲቆዚ ሃይሳፌ ካሊ ዲዛ ቃላን ቆንጪዴስ፤ «ኢስራኤሌ ኣሳዉ! ታ ኔና ዎስታ ኣጋጎ? ታ ኔና ዎስታ ሃራስ ኣꬃ ኢሞ? ታ ኔና ሲቂዛ ሲቆይ ኬሂ ጊታ ጊዲዳ ጊሻስ ሄሳ ኡባ ኦꬃናስ ታ ዎዚናይ ኮዬና።» [11፡8]
ሃ ማጻፋይ ኦይኪዳ ኩሜꬃ ቆፋ
ሆሴኤ ሶ ኣሳይ ኣማኖይ ባይንዳይታስ ሌሚሶ ጊዴꬅ 1፡1—3፡5
ጎዳይ ኢስራኤሌ፥ ዩሁዳኔ ኢስታ ካሌꬂዛይታ ዋላሴ 4፡1—5፡15
ዴሬዚ ጎዳኮ ሲሚዳ ሚሳቲሶ 6፡1—7፡10
ጎዳን ኣማኔቶንታ ኢጺዳ ኢስራኤሌ ዴራ 7፡11—8፡14
ኢስራኤሌ ዴሬዚ ባስ ቤሲዛ ቂጻቴ ኤኮ 9፡1-16
ኢስራኤሌ ዴራስ ዮቲዳ ሚኖ ቆፊሶ 10፡1-15
ጎዳይ ዴራ ሲቂዛ ሲቆ 11፡1-11
ጎዳይ ዴራ ቦላ ዬዲዳ ፒርዳ 11፡12—13፡16
ናጋራፔ ማሬቴꬂኔ ኣንጆ ሂዶታ 14፡1-9
1
1 ኦዚያይ፥ ኢዮኣታሜይ፥ ኣካዜይኔ ሂዝቂያሲ ኢሶይ ኢሳፌ ካሊ ካሊዲ ዩሁዳን ካዎቲዳ ዎዴ ሄሳꬆካ ኢዮኣሳ ና ኢዮርባኣሜይ ኢስራኤሌን ካዎቲዳ ዎዴ ቢኤሬ ና ሆሴኤኮ ዪዳ ጎዳ ቃላይ ሃይሳፌ ካሊዛይሳ። 2ካዎ 14፡23—15፡7፤ 15፡32—16፡20፤ 18፡1—20፡21፤ 2ታሪ 26፡1—27፡8፤ 28፡1—32፡33
ሆሴኤ ማቾኔ ኢዛ ናይታ
2 ጎዳይ ሆሴኤ ባጋራ ኢስራኤሌ ናይታስ ቃላ ቡሮ ዮቲሼ ሆሴኤስ፥ «ታ ዴሬይ ታፔ ሻኬቲዲ ኢታ ላይማ ላይማቲዛ ጊሻስ ኔኒ ባዳ ኢሲ ላይማቲዛ ማጫስ ኔስ ማቾ ኤካ፤ ኢዚፔ ኔስ ናይታ ዬላ» ጊዴስ።
3 ሄሳ ጊሻስ ሆሴኤይ ቢዲ ዲቢላዬሜ ናዮ ጎሜሮ ማቾ ኤኪዴስ፤ ኢዛካ ቃንꬃታዳ ኢዛስ ኣቱማ ና ዬላዱስ። 4 ሄሳፌ ጉዬ ጎዳይ ሆሴኤስ፥ «ኢዩኔ ኢዛ ዜሬꬃቲ ኢዝራኤሌን ዎꬊዳ ኣሳታ ጌዶን ኢዩ ዜሬꬃታ ታ ቃጻያና ዎዴይ ሃሆ ጊዴና፤ ኢስራኤሌ ካዎቴꬂ ሃይሳፌ ጉዬ ኩንዳና ማላ ታ ኦꬃና።2ካዎ 10፡11 5 ሄ ዎዴ ኢዝራኤሌ ሾባን ኢስራኤሌ ኦላ ኣሳ ኡባ ታ ሜንꬄሬꬃና፤ ሄሳ ጊሻስ ኔ ናዛ ሱንꬃ፥ ‹ኢዝራኤሌ› ጋዳ ሱንꬃ» ጊዴስ።
6 ጎሜራ ቃሴካ ቃንꬃታዳ ማጫ ና ዬላዱስ። ጎዳይካ ሆሴኤስ፥ «ታኒ ሃይሳፌ ጉዬ ኢስራኤሌ ኣሳስ ቃꬌቲኬ፤ ታ ኢስታ ማሪኬ፤ ሄሳ ጊሻስ ኔኒ ኢዚ ሱንꬃ፥ ‹ሎሩሃማ› ጋ ሱንꬃ።*ሎሩሃማ ጉሲ ታ ዴራ ታ ማሪኬ ጉሳ። 7 ዩሁዳ ኣሳስ ጊዲኮ ታኒ ታ ሲቆ ቤሳና። ታኒ ጎዳይ ኢስታ ጾሳይ ኣሻና፤ ታ ኢስታ ኣሻናይሲ ኦላ ዎልቃን ጊዴና፤ ማሻን፥ ቶራን ዎይኮ ፓራኒኔ ፓራን ኦሊዛይታን ጊዴና» ጊዴስ።
8 ጎሜራ ባ ናዮ ꬋንꬂ ዱꬂዳፔ ጉዬ ቃሴካ ቃንꬃታዳ ኣቱማ ና ዬላዱስ። 9 ጎዳይካ ሆሴኤ፥ «ሃይሳፌ ጉዬ ኢስራኤሌ ኣሳይ ታ ዴሬ ጊዴና፤ ታኒካ ኢስታ ጾስ ጊዲኬ። ሄሳ ጊሻስ ኔኒ ኔ ናዛ ሱንꬃ፥ ‹ሎኣሚ› ጋ ጼይጋ» ጊዴስ። †ሎኣሚ ጉሲ ታ ዴሬ ጊዴና።
ኢስራኤሌ ኣሳስ ኢሜቲዳ ሂዶታ
10 ጊዲኮካ ኢስራኤሌ ኣሳይ ቆዳይ ባይንዳ ኣባን ሻሚንታ ማላ ዳራና። ሃኢ ጾሲ፥ «ኢንቴ ታ ዴሬ ዴኬታ» ጌቴቲዳሶሆን፥ «ኢንቴ ዴኦ ጾሳ ናይታ» ጌቴቲ ጼይጌታና ዎዴይ ያና። ኦሮ 9፡26 11 ሄ ዎዴ ዩሁዳ ኣሳይኔ ኢስራኤሌ ኣሳይ ሲሚዲ ኢሲኖ ጊዳና። ናምኣቲ ባንታና ኣይሳናዴ ኢሲ ኣስ ዶራና። ቃሴካ ኢስቲ ባንታ ዴሬን ዲቻኒኔ ዱሬቴꬃን ዴኣና። ኢዝራኤሌ ጋላሳይ ጊታ ጊዳና።