2
1 ሄሳ ጊሻስ ኢንቴ ኢንቴ ኢሻታ ኢስራኤሌ ናይታ፥ «ኣሚ»*ኣሚ ጉሲ ታ ዴሬ ጉሳ። ኢንቴ ሚቼታካ «ኡሩሃማ» ጊ ሱንꬂቴ።
ኣማኔቶንታ ኢጺዳ ኢስራኤሌ ኣሳ ቃጻዬቴꬅ
2 «ታ ናይቶ! ኢንቴ ኣዮ ዞሪቴ፤
ሃይሳፌ ጉዬ ኢዛ ታስ
ማቾ ጊዱኩ፤
ታኒካ ኢዚስ ኣዚና ጊዲኬ፤
ባ ሲንꬃፌ ላይማ ሱኬ ሃኖ፥
ባ ዎዲራ ጊዶፌ
ላይማቴꬅ ዲጉ።
3 ኢዛ ሲሞንታ ኢጺኮ
ኢዛ ባ ኣዬይ ኡሎፔ
ካሎ ዬሌቲዳ ማላ
ታ ኢዞ ጺሬ ካሎ ኣሻና።
ባዞ ማላኔ ሜላ ቢታ ማላ
ታ ኢዞ ኦꬃና።
ታ ኢዞ ሃꬃ
ሳሞን ዎꬋና።
4 ላይማ ማጫሳፌ
ዬሌቲዳ ጊሻስ
ኢዚ ናይታስ ታ ሚሼቲኬ።
5 ኢስታ ኣያ ላይማ፤
ካዉሻ ሃኖን ሻራዱስ።
ኢዛ ባ ዶናራ፥
‹ታኒ ታ ላጌꬆታኮ ባይስ፤
ኢስቲ ታስ ካꬂኔ ሃꬄ፥
ሱፌፔኔ ሌኤ ሃሬፔ
ዳዴቲዳ ማይኦ፥
ዎጋራ ዛይቴኔ
ዎይኔ ኡሹ ኢማና› ጋዱስ።
6 ሄሳ ጊሻስ ታኒ ኢዚ ኦጌ
ኣጉንꬃራ ጎርዳና፤
ኢዛ ኬዛና ፔንጌ
ዴሞንታ ማላ
ታኒ ጊምቤ ዩሻ
ኣꬃ ጎርዳና።
7 ኢዛ ባ ላጌꬆታ
ዴማናስ ዎጻና ሺን
ኢስታኮ ጋካናስ ዳንዳዩኩ።
ኢዛ ኢስታ
ዳሮ ኮያና ሺን ዴሙኩ፤
ሃይሳፌ ጉዬ፥
‹ሃይሳ ሃ ዱሳፌ
ታስ ካሴ ዱሳይ ሎኦ፤
ሄሳ ጊሻስ ቤኒ ታ ኣዚናኮ
ታ ሲማ ባና› ጋና።
8 ታኒ ኢዚስ ካሴ ካꬅ፥
ዎይኔ ኡሺኔ
ዎጋራ ዛይቴ ኢሚዳይሳኔ
ቃሴካ ኢዛ ባኣሌ ጌቴቲዛ
ኤቃ ጾሳስ ያርሾ ቢራኔ
ዎርቃ ኢዚስ ዳርሲዳይ
ታና ጊዲዳይሳ
ኢዛ ሻካ ኤራቤኩ።
9 ሄሳ ጊሻስ
ካꬂ ካጺዛ ዎዴ
ሃ ካጺዛ ካꬃ፥
ዎይኔ ኣይፌይ ቴሪዛ ዎዴ
ዎይኔ ኡሻ፥
ታኒ ኢዚፔ ዎꬃ ኤካና።
ሄሳꬆካ ኢዛ ባ ካሎቴꬃ
ካሞንታ ማላ ሱፌፔኔ
ሌኤ ሃሬፔ
ዳዴቲዳ ማይኦዛ
ታ ኢዚፔ ቃራ ኤካና።
10 ኢዚ ላጌꬆታ ሲንꬃን
ታ ኢዞ ካሎ ኣሻና፤
ኢዞ ታ ኩሼፔ
ኣሻናይ ዴና።
11 ኢዛ ባ ኡፋይሳ ባኣሌታ ኡባ፥
ላይꬃን ላይꬃን
ቦንቺዛ ባኣሌታ፥
ኣጊና ጼሮን ጼሮን
ቦንቺዛ ባኣሌታ፥
ሳምባታታኔ ሃራ ኢዛ
ዱማ ዱማ ዶራ
ቦንቺዛ ባኣሌታ
ናምኣንꬆ ኦꬆንታ ማላ
ታ ዲጋና።
12 ኢዛ ባ ላጌꬆታፔ
ባስ ዋጋ ጋዳ
ኤኪዳ ዎይኔ ሚꬃታኔ
ባላሴ ሚꬃታ ታ ꬎቃላና።
ኢስታካ ዎራ ዶኣቲ ማና።
13 ባኣሌ ጌቴቲዛ ኤቃ ጾሳስ
ኤጻኔ ጩዋሳናሲኔ
ሎኦ ጌጼ ዎꬃዳ
ኢዛ ባ ላጌꬆታ ካላዳ
ታና ኣጊዳ ጊሻስ
ታ ኢዞ ቃጻያና።
ጾሲ ባ ዴራ ሲቂዛ ሲቆ
14 «ሄሳ ጊሻስ ታ ኢዞ
ማቃዳ ባዞ ኤፋና፤
ሄን ታ ኢዚራ ሲቆ ቃላን
ሃሳይሳና።
15 ካሴ ኢዚ ዎይኔ ኣታኪልቴዛ
ታ ኢዚስ ዛራና፤
ሜቶ ሾባ ታ ኢዚስ
ሂዶታ ፔንጌ ሂስታና፤
ሄን ኢዛ ጊብጼፔ ኬዚዳ ጋላስ
ናቴꬃን ዳሼ ዬጺዳ ማላ
ዬጻና።ኢያ 7፡24-26
16 ኢዛ ሄ ጋላሲ ታና፥
‹ታ ኣዚናዞ› ጋ ጼይጋና ኣቲን
ሃይሳፌ ጉዬ፥
‹ባኣሌ› ጌቴቲዛ
ኤቃ ጾሳ ሱንꬃን
ታና ጼይጉኩ።
17 ባኣሌ ጌቴቲዛ
ኤቃ ጾሳታ ሱንꬃ
ታ ኢዚ ዶናፔ ዲጋና፤
ሃይሳፌ ጉዬ
ኢስታ ሱንꬂ ዴንዴና።
18 ሄ ዎዴ ዶኣታራ፥
ካፎታራኔ ቢታ ቦላ
ጎሼቲዛ ሜꬌቴꬅ ኡባታራ
ታ ኢንቴ ጊሻስ ጫቄታና።
ኡባይካ ሳሮን ዳና ማላ
ኦላ፥ ቶራኔ፥ ማሻ
ቢታ ቦላፌ ታ ዲጋና።
19 ሃኔ ኢስራኤሌ!
ታ ኔና ሜርናስ ታስ ጊጊሳና፤
ታ ኔስ ጺሎቴꬃኒኔ
ሱሬቴꬃን ፒርዳና፤
ኣጎንታ ሲቆኒኔ ቃꬌታን
ታ ኔና ታስ ኦይቻ ጊጊሳና።
20 ታኒ ኣማኔታዳ ኔና
ታስ ማቾ ጊጊሳና።
ኔኒካ ታኒ
ጎዳ ጊዲዳይሳ ኤራና።
21 «ሄ ጋላስ ታኒ ዛሮ ኢማና፤
ታኒ ሳሎ ኣዛዛና፤
ሳሎይካ ሳኣስ ዛሮ ኢማና።
22 ቢታይ ካꬅ፥ ዎይኔ ኡሹኔ
ዛይቴ ኢማና፤
ኢስቲካ ኢዝራኤሌስ ዛሮ ጊዳና።
23 ታኒ ታ ዴሬዮ ቢታ ቦላ ቶካና።
‹ማሮቴꬂ ባይንዳሮ› ጌቴቲዳሮ
ታ ዛራዳ ማራና፤
‹ታ ማሪኬ› ጊዳይሳካ
ዛራ ማራና፤
‹ኢንቴ ታ ዴሬ ዴኬታ›
ጌቴቲዴታ።
‹ታ ዴሬታ› ጋዳ
ታ ጼይጋና ጋና፤
ኢስቲካ ታና፥
‹ኔኒ ኑ ጾሳ› ጋና» ጌስ። ኦሮ 9፡25፤ 1ጴጽ 2፡10