1 ናምኡ ኣሳቲ ባ ጋርሳን ፓላሜቲዲ ፒርዳሶ ቢኮ ቆሄቲዳይሳ ኔ ጺሎ፤ ቆሂዳይሳ፥ «ኔ ዎርዶ» ጊዲ ፒርዲዛይቲ ፒርዴቶ። 2 ቆሂዳይሲ ጋራፌቲ ቃጻዬታናስ ቤሲዛ ጊዲኮ ፒርዲዛይቲ ኢዚ ዛቁሊዲ ጋራፌታና ማላ ኣዛዜቶ፤ ሄሳፌ ጉዬ ሞራንቻይ ፒርዲዛይታ ሲንꬃን ባ ሞሮ ኬና ጋራፌቶ። 3 ኢዚ ኦይዱ ታሙቶ ሾጬቶ ኣቲን ሄሳፌ ኣꬎ ሾጬታናስ ቤሴና፤ ሄሳፌ ቦላራ ጋራፌቲኮ ኔ ኢሻዚ ኔ ሲንꬃን ካዉያና። 2ቆሮ 11፡24

4 ካꬅ ቦራን ቡካሼ ቡኪዛ ቦራ ዶና ቃቾፋ። 1ቆሮ 9፡9፤ 1ጺም 5፡18

5 ኢሲፌ ዴኢዛ ኢሻንታፌ ኢሶይ ና ዬሎንታ ሃይቂኮ ኢዛ ማቻ ካሬ ባዳ ኣላጋ ኣስ ጌሉፑ፤ ኢዚ ኣዚና ኢሻይ ኢዞ ላቲዲ ኢዚስ ኮሺዛ ኡባ ኩንꬆ። 6 ቃሴካ ኢስታፌ ዬሌቲዳ ኮይሮ ናይ ኢስራኤሌ ቢታን ሃይቂዳዴ ሱንꬃይ ꬋዮንታ ማላ ካሴ ሃይቂዳ ኢሻስ ና ጊዶ። ማቶ 22፡24፤ ማር 12፡19፤ ሉቃ 20፡28

7 ጊዶ ኣቲን ኢዚ ባ ኢሻ ማቼዮ ኣይሳናስ ኮዮንታ ኣጊኮ ኢዛ ካታማ ፔንጌን ኡቲዳ ጪማታኮ ባዳ፥ «ታ ኣዚና ኢሻይ ባ ኢሻ ሱንꬂ ኢስራኤሌን ዴኣና ማላ ኮዪቤና፤ ታና ኤኪኬ ጊዲ ታስ ኮሺዛ ሚሽ ኩንꬆንታ ኢጺዴስ» ጋዳ ማጋኑ። 8 ሄሳፌ ጉዬ ሄ ካታማዮ ካሌꬂዛ ጪማቲ ኣዴዛ ባኮ ጼይጊዲ ኢዛ ኦይቼቶ። ኢዚ ሃኢካ ማጫሳዮ ኤኮንታ ኢጺኮ፥ 9 ሄ ሃይቂዳይሳ ማቼያ ሄ ካታማዮ ካሌꬂዛ ጪማታ ሲንꬂ ሺቃዳ ሄ ኣዴዛ ቶሆፔ ኢሲ ጫማ ሾዳዳ ኢዛ ኣይፌሶን ጩች ጩታዳ፥ «ባ ኢሻስ ዜሬꬂ ዴኣና ማላ ኮዮንታ ኣሳ ቦላ ሃይሳ ማላ ካዉሻቴꬂ ጋካናስ ቤሴስ» ጉ።

10 ሄ ኣዴዛ ዛሬይ ኢስራኤሌ ኣሳ ጊዶን፥ «ኢዛ ቶሆፔ ጫማይ ሾዴቲዳዴ ሶ ኣሳታ» ጌቴቲ ካዉሻን ጼይጌቲሼ ዴኣና። ኡሩ 4፡7-8

11 ናምኡ ኣሳቲ ዋꬌቲሺን ኢስታፌ ኢሳ ማቼያ ያዳ ባ ኣዚና ኣሻናስ ባ ኩሼ ዬዳዳ ሃንኮይሳ ኣቱማቴꬃ ኦይኪኮ፥ 12 ሄ ማጫሳይ ኩሼይ ማሮይ ባይንዳ ቃንጼቶ።

13 ኣስ ባሌꬃናስ ጊታኔ ጉꬅ ጊዲዳ ናምኡ ቆሞ ጌዳራ ሚሺ ኔ ማታን ዶፖ። 14 ኣስ ባሌꬃናስ ኣዱሴኔ ቃንꬅ ጊዲዳ ናምኡ ቆሞ ዋꬋ ሚሺ ኔ ሶን ዶፖ። 15 ጎዳ ኔ ጾሳይ ኔስ ኢማና ቢታይን ኔኒ ኣዱሳ ዎዴ ዴኣና ማላ ኣማንꬂዛኔ ሊኬ ጊዲዳ ጌዳራ ሚሺኔ ዋꬋ ሚሺ ኔስ ዶ። 16 ጌዳራ ሚሻኒኔ ዋꬋ ሚሻን ዎርዶራ ኣስ ባሌꬂዛ ኣሳታ ኡባ ጎዳ ኔ ጾሳይ ኢጼስ። ሌዌ 19፡35-36

17 ኢንቴ ጊብጼ ቢታፌ ኬዚ ቢሺን ኣማሌቄ ኣሳይ ኢንቴ ቦላ ጋꬂዳ ቆሆዛ ባሎፒቴ። 18 ኢስቲ ጾሳስ ያዮንታ ኣሳ፤ ኢንቴ ኦጌን ኢንቴናራ ኤቄቲዳ፤ ኢንቴ ሄሜቲሺን ዳቡርዲ ጉዬ ኣቲዳ ኣሳ ኡባ ዎꬊዳ። 19 ሄሳ ጊሻስ ጎዳ ኢንቴ ጾሳይ ሄ ቢታዮ ኢንቴና ላቲሲዲ ኢንቴና ዩዪ ኣꬊዳ ኢንቴ ሞርኬታ ኡባፌ ሼምፒሲዛ ዎዴ ኣሲ ኢስታ ቢታ ቦላ ዛሪ ቆፖንታ ማላ ኣማሌቄ ኣሳ ዉርሳ ꬋይሳ፤ ሄሳ ሙሌካ ባሎፓ። ኬሳ 17፡8-14፤ 1ሳሜ 15፡2-9