1 ጎዳ ኔ ጾሳይ ኔና ላቲሳና ቢታዮ ኔ ጌላ ኡቲዛ ዎዴ፥ 2 ጎዳ ኔ ጾሳይ ኔስ ኢሚዛ ቢታን ሞኪዳ ካꬅ ኡባፌ ጼራ ኬሼራ ጎዳ ኔ ጾሳይ ባ ሱንꬂ ሄሳን ጼይጌታና ማላ ዶሪዳሶ ኤካ ባ። ኬሳ 23፡19 3 ሂስታዳ ሄ ዎዴን ኣዋቴꬃን ኦꬂዛ ቄሴዛኮ ባዳ፥ «ጎዳ ኔ ጾሳይ ኑስ ኢማና ጊዲ ካሴ ኑ ኣዋታስ ጫቂዳ ቢታዮ ታ ጌሊዳይሳ ኔ ጎዳ ሲንꬃን ሃች ማርካታይስ» ጋ።

4 ቄሴዚካ ካꬃራ ዲዛ ኬሼዛ ኤኪዲ ጎዳ ኔ ጾሳስ ያርሾ ሺሺዛሶዛስ ሲንꬃ ባጋን ዎꬆ። 5 ሄሳፌ ጉዬ ኔኒ ጎዳ ኔ ጾሳ ሲንꬃን፥ «ታ ኣዋይ ካሴ ጮ ዩዪ ዩዪ ዲዛ ኣራሜ ዴሬ ኣሳ፤ ኢዚ ቆዳን ጉꬃ ኣሳታራ ጊብጼ ዎꬊዲ ዴኢሼ ሄን ጊታ ዎልቃማኔ ቆዳን ጮራ ካዎቴꬅ ጊዲዴስ። 6 ጊብጼ ኣሳይ ጊዲኮ ኑስ ሜቄꬅ ኢቲዲ ኑና ኡንኤꬂዳኔ ዴጾ ኦሶ ኑ ቦላ ጫኒዳ። 7 ሂስቲን ኑኒ ጎዳ ኑ ኣዋታ ጾሳኮ ዋሲዶስ፤ ኢዚካ ኑ ዋሶዛ ሲዪዲ ኑ ዋዬዛ፥ ኑ ዳቡራዛኔ ኑኒ ቆሄቲዳይሳ ቤኢዴስ። 8 ሂስቲዲ ጎዳይ ባ ዎልቃማ ቄሴኒኔ ባ ሚጬቲዳ ኩሼን፥ ጊታ ዳጋማን፥ ማላታኒኔ ማላሊሲዛ ኦራꬃ ሚሽ ኦꬂዲ ጊብጼ ቢታፌ ኑና ኬሲዴስ። 9 ኑና ሃ ሃይሳ ኤሂዲ ሃኖ ማꬂኔ ኤሲ ኢዚን ኩሚዳ ሞꬎ ቢታዮ ላቲሲዴስ። 10 ሄሳ ጊሻስ ሄኮ ታኒካ ኢዚ ታስ ኢሚዳ ጋዴን ካጺዳ ካꬃፌ ጼራ ኢዛስ ኤካ ያዲስ» ጋዳ ኬሼዛ ዎꬃዳ ጎዳ ኔ ጾሳ ሲንꬃን ሆካ ጎይና። 11 ኔሲኔ ኔ ሶ ኣሳስ ጎዳ ኔ ጾሳይ ኢሚዳ ሎኦ ሚሻን ኡፋዬቲዲ ጎዳ ጋላቲቴ፤ ሌዌቲኔ ኢንቴ ጊዶን ዴኢዛ ቤቴ ኣሳቲ ኡባይካ ኢንቴናራ ኡፋዬቴቶ።

12 ኣስራታ ኬሲዛ ሄꬓንꬆ ላይꬃን ላይꬃን ሞኪዳ ካꬅ ኡባፌ ኣስራታ ኬሳ ዉርሲዳፔ ጉዬ ኔ ካታማን ዴኢዛ ሌዌታስ፥ ቤቴ ኣሳታስ፥ ዪኦታሲኔ ኣምኤታስ ኔ ካታማን ኢስቲ ካሊ ማና ማላ ኢማ። ዛሬ 14፡28-29 13 ሄሳፌ ጉዬ ጎዳ ኔ ጾሳ ሲንꬃን፥ «ኔ ኣዛዚዳ ማላ ታኒ ታሶፔ ኔስ ዱማቲዳይሳ ሌዌ ቆሞታስ፥ ቤቴ ኣሳታስ፥ ዪኦታሲኔ ኣምኤታስ ኢማዲስ፤ ታኒ ኔ ኣዛዞታፔ ኢሲኖካ ሜንꬃቤኬ፤ ቃሴ ኢሲኖካ ዶጋ ኣጋቤኬ። 14 ኣሲ ሃይቂን ካዮታሼ ኢዛፔ ማቤኬ፤ ታኒ ጌዮንታ ዳሼ ኢዛፔ ኣይኮካ ማቤኬ፤ ሃይቂዳ ኣሳ ጊሻስ ሺቂዛ ያርሾስካ ኢዛፔ ኣይኮካ ሺሻቤኬ። ታኒ ጎዳ ታ ጾሳስ ኣዛዜታዲስ፤ ቃሴ ኔኒ ታና ኣዛዚዳ ኡባ ፖላዲስ። 15 ኔኒ ሳሎን ዴኢዛ ጌሻ ሶሆፔ ሃ ዱጌ ጼላ፤ ኔ ዴሬ ኢስራኤሌኔ ካሴ ኑ ኣዋታስ ኔ ኢማና ጋዳ ጫቂዳ ማላ ኑስ ኢሚዳ ሃ ማꬂኔ ኤሲ ጎጊዛ ቢታዮ ኣንጃ» ጋ።

16 ጎዳ ኔ ጾሳ ዎጋታኔ ማራታ ኔ ናጋና ማላ ሄኮ ሃች ኔና ኣዛዚዴስ፤ ሄሳ ጊሻስ ኔኒ ኩሜꬃ ሼምፖፌኔ ኩሜꬃ ዎዚናፔ ናጋ። 17 ጎዳይ ኔስ ጾሳ ጊዲዳይሳ ኔ ኢዛ ኦጌን ባናይሳ፥ ኢዛ ዎጋ፥ ኢዛ ኣዛዞታኔ ኢዛ ማራ ኔኒ ፖላናይሳ ሃች ኤሪሳዳሳ። 18 ቃሴ ጎዳይካ ባ ጌሊዳ ቃላ ማላ ኔኒ ኢዛስ ዱማ ኣስ ጊዲዳይሳ፥ ኢዛስ ጺንጾ ጊዲዳይሳኔ ኔኒ ኢዛ ኣዛዞ ኡባ ናጋናይሳ ኤሪሲዴስ። ኬሳ 19፡5፤ ዛሬ 4፡20፤ 7፡6፤ 14፡2፤ ቲቶ 2፡14፤ 2ጴጽ 2፡9 19 ኔኒ ሄሳ ኦꬂኮ ኢዚ ሜꬊዳ ኣሳ ኡባፌ ቦላራ ጋላታን፥ ሱንꬃኒኔ ቦንቾን ጊታ ካዎቴꬅ ኦꬃና፤ ኢዚ ጌሊዳ ጫቆ ቃላ ማላ ኢዛስ ዱማ ዴሬ ኦꬃናይሳ ኔስ ኤሪሲዴስ።