ዳሮ ጋላሳታፔ ጉዬ

ኔኒ ዛራ ዴማና።

ኦስፑን ሶሆን

ሻኬሬꬃ ዎꬃ፤

ኣይስ ጊኮ ቢታ ቦላ

ኣይ ኢታይ ያናኮ ኔኒ ኤራካ።

ቢታ ቦላ ኢራይ ቡኬስ።

ሚꬂ ፑዴሃ ዎይኮ

ዱጌሃ ኩንዲኮ

ባ ኩንዲዳሶን ኢቺ ኣቴስ።

ቃሴ ሻራ ማሊዛይ

ባ ካꬅ ሺሼና።

ኢዛ ኦጌ ኤራካ፤

ቃሴ ሼምፖይ ዎይኮ ኣያናይ

ኣዪ ኡሎን ዲዛ ሜꬌታ ጊዶን

ዋኒ ጌሊዛኮ ኔ ኤራካ።

ሄሳꬆካ ኡባ

ሜꬊዳ ጾሳ ኦሶ

ኔ ሻካ ኤራና ዳንዳያካ።

ኦማርሲካ ኔ ኩሼይ

ኦሶ ቢርሾፎ፤

ጋሶይካ ሃይሲ ዎይኮ ሄሲ፥

ዎይኮ ናምኣይ ሎኣናኮ፥

ዎይኮ ኣዋይሲ ኣይፋናኮ

ኔ ኤራካ።

ኣዋ ኣይፌ ቤኦይ

ኣይፌ ኡፋይሴስ።

ሃ ሳኣን ዴኢኮ

ሄ ኡባንካ ኡፋዬቶ።

ጊዶ ኣቲን ꬉማ ጋላሳቲ

ዳሪዛ ጊሻስ ቆፖ፤

ቡሮ ያና ሚሺ

ኡባይካ ሃዳ።

ኔ ናቴቴꬃ

ላይꬃን ኡፋዬታ፤

ኔ ናቴቴꬃ ላይꬃን

ኔ ዎዚናን ኡፋዬታ፤

ኔ ኣይፌይ ጼሊዳ ኡባኔ

ኔ ዎዚናይ ኣሞቲዳ ኡባ ፖላ፤

ጊዶ ኣቲን ኔ ኦꬂዳ ኦሶ

ኡባ ጊሻስ ጾሲ

ኔና ፒርዳስ ሺሻናይሳ ኤራ።

ጬጬ ሃሳ፤

ኢታ ሚሺካ ኔፔ ዲጋ፤

ጋሶይካ ናቴቴꬂኔ ዬላጋቴꬂ

ኤሌ ኣꬋና።