ሺቶ ዜቄꬄቴስ፤

ሄሳꬆካ ጉꬃ ኤያቴꬂ

ኣꬎ ኤራቴꬂኔ

ቦንቾ ካዉሼስ።

ኢዛ ኡሻች ካሌꬄስ፤

ጊዶ ኣቲን ኤያ ዎዚናይ

ሃዲርስ ካሌꬄስ።

ኢዛስ ኣኬካይ ፓጬስ፤

ባ ኤያቴꬃ ኦናስካ ቆንጪሴስ።

ኔ ሶሆ ዬዶፋ፤

ጋሶይካ ዳንዳያይ

ጊታ ሃንቆ

ጮኡ ሂስቴስ።

ኢታ ሚሺ ዴስ፤

ሄሲካ ዴሬ ሃሪዛዴፌ

ኬዚዛ ባላ።

ዱሬቲ ሂርኪ ዚቃ ሶሆን ኡቲዳ።

ዳናቲ ቃሴ ኣይሌታ ማላ

ቶሆን ቢሺን ቤኣዲስ።

ኢዚ ኩንዳና፤

ቃሴ ዲርሳ ላሊዛ ኣስ

ሾሺ ዱካና። ማዛ 7፡15፤ ሌሚ 26፡27

ሄ ሹቻን ዴሼቴስ፤

ቃሴ ሚꬅ ቄሪዛይ

ሄ ሚꬃን ቆሄቴስ።

ዳሮ ዎልቃ ዉርሴስ፤

ጊዶ ኣቲን ሂላን ኦꬂኮ

ኦሶዛ ኣይፊሴስ።

ጃላናፔ ሲንꬃን ዱኪኮ

ሙሬኒዛዴ ኣይኮካ ጎኤና።

ኬዚዛ ቃላይ

ፑላን ኩሚዳዛ፤

ጊዶ ኣቲን ኤያይ ባርካ

ባ ኢንጻርሳን ꬋዬስ።

ኢዛ ቃላይ ኤያቴꬃ፤

ዉርሴꬃንካ ኢታ ጎሽ ጊዴስ።

ቡሮፔ ሃናናይሳ

ኤሪዛይ ዴና፤

ሃይቂዳዴስ ኢዛፔ

ጉዬን ሃናናይሳ

ኦኔ ኢዛስ ዮታና ዳንዳይዛይ?

ኦꬂዛዴ ዳቡርሴስ፤

ኢዚ ካታማ

ጋꬂዛ ኦጌ ኤሬና።

ዬላጋ ጊዲዳሬ!

ኔ ዳናቲ ዎንታራ

ጊቢራ ጊግሲዛ

ቢታዬ ኔስ ኣዬ ኣና!

ዛሬፔ ጊዲዳሬ!

ማꬆታናስ

ጊዶንታ ሚኔታናስ

ኮሺዛ ዎዴ ሚዛ ዳናቲ

ዲዛ ቢታዬ!

ኔኒ ኣንጄቲዳሮ።

ካራይ ያርጳቴስ፤

ኢዛ ኩሼቲ ዳቡርኮ

ኬꬂ ኣꬄስ።

ዎይኔ ኡሺ ኣስ ኡፋይሴስ፤

ሚሺ ዲኮ ሚሺ ሃኔስ።

ኔ ኣቂዛ ኪፊሌን ዳሼ

ዱሬ ቃንጎፋ፤

ቄፌን ፒራꬊዛራ ኔ ጊዛይሳ

ኤፋ ጋꬃና ዳንዳያዉስ።