1 ሄሳ ጋሶን ታ ጳዉሎሲ ኢንቴስ ኣማኖንታይታ ጊሻስ ዬሱስ ኪርስቶሲ ቃቺዳዴ ጊዳዲስ። 2 ታ ኢንቴና ጎኣና ማላ ጾሲ ኪያቴꬃን ታስ ኦሶስ ኤጻ ኢሚዳይሳ ኢንቴ ቱማፔ ሲዪዴታ። 3 ሃይሳፌ ካሴ ታ ኢንቴስ ቃንꬃራ ጻፊዳ ማላ ታስ ቆንጪን ታ ኤራናስ ዳንዳይዳ ጹራይ ሃይሳ። 4 ሄሳ ጊሻስ ኢንቴ ሄሳ ናባቢሼ ኪርስቶሳ ጹራ ታ ኣይ ማላ ኤሪዳኮ ኢንቴካ ኤራናስ ዳንዳዬታ። 5 ሄ ጹራይካ ሃኢ ኣማኒዛ ሃዋሬታሲኔ ናቤታስ ቆንጪዳ ማላ ካሴ ቤኒ ኣꬊዳ ዎዴ ዲዛ ኣሳታስካ ቆንጪቤና። 6 ሄሲ ሄ ጹራይ ኣይዛቤቲ ሚሺራቾ ቃላ ባጋራ ኢስራኤሌ ናይታራ ኢሲፌ ላቲዛይታ፤ ኢሲፌ ኢሳዴ ኣሳቴꬃ ማላ ጊዲዲ ዬሱስ ኪርስቶሳ ባጋራ ቤቲዳ ሂዶታ ኢሲፌ ጊሼቲ ላቲዛይታ ጊዳናሳ።

7 ታኒካ ኢዛ ዎልቃ ኦሶ ማላ ታስ ኢሜቲዳ ጾሳ ኪያቴꬃ ኢሞታ ማላ ሃይሳ ሚሺራቾ ቃላ ኦሳንቻ ጊዳዲስ። 8 ታ ቃሴ ሃንኮ ኣማኒዛ ኣሳፔ ላፋ ጊዲኮካ ኦኒካ ዛዋይ ባይንዳ ኪርስቶሳ ዱሬቴꬅ ኣይዛቤታስ ሳባካና ማላ ጾሳ ኪያቴꬃን ሃይሲ ታስ ኢሜቲዴስ። 9 ሄሳꬆካ ኡባ ሜꬊዳ ጾሳን ቤኒ ዎዴ ቆቴቲ ዲዛ ጾሳስ ጹራ ቆፋይ ኣዛኮ ኡባስ ታ ቆንጪሳና ማላ ታስ ጾሳ ኪያቴꬂ ኢሜቲዴስ። 10 ኢዛ ቆፋይ ሃኢ ዎዴ ዎሳ ኬꬃ ባጋራ ዱማ ዱማ ሜꬋይ ዲዛ ጾሳ ሂላቴꬂ ሳሎን ዲዛ ሃላቃታሲኔ ጎዳታስ ኤሬታና ማላ ሃኒዴስ።

11 ጾሲ ኑ ጎዳ ዬሱስ ኪርስቶሳ ባጋራ ሃይሳ ፖሊዳይ ባ ሜርና ቆፋ ማላ። 12 ኑኒ ኢዛይታ ጊዲዳ ጊሻሲኔ ኢዛን ኣማኒዳ ጊሻስ ጌሻቴꬃራኔ ሂርጋይ ባይንዳ ኑኒ ጾሳኮ ሺቃና ዳንዳዮስ። 13 ሄሳ ጊሻስ ኢንቴ ቦንቼታና ማላ ታኒ ኢንቴ ጊሻስ ታ ቦላ ጋኪዳ ዋዬዛን ኢንቴ ኡፋይስ ቃንጾንታ ማላ ታ ኢንቴና ሃዳራ ጋይስ።

14 ሄሳ ጊሻስ ታኒ ጾሳ ሲንꬃን ጉልባታይስ። 15 ሳሎን ዲዛይኔ ቢታ ቦላ ዲዛ ኢዛሶ ኣሳይ ዉሪካ ኢዚ ሱንꬂን ሱሜስ። 16 ኢንቴ ጋርሳ ባጋራ ሚናና ማላ ኣያና ባጋራ ኢዛ ቦንቾ ዱሬቴꬂ ኢንቴስ ኢሜታና ማላ ታ ዎሳይስ። 17 ሄሲካ ኪርስቶሲ ኢንቴ ዎዚናን ኣማኖን ዳና ማላኔ ቃሴካ ኢንቴ ኢዛን ጻጲዲ ሲቆን ሚናና ማላ ዎሳይስ። 18 ኪርስቶሳ ሲቆስ ኣሆቴꬃይ፥ ኣዱሳቴꬃይ፥ ꬎቃቴꬃይኔ ጪማቴꬂ ኣይ ጊናኮ ኢንቴ ኣማኒዛ ኡባ ኣሳራ ኢሲፌ ሻኪ ኤራና ማላ። 19 ኢንቴ ጾሳ ኩሜꬃራ ሻኪ ኤሪዲ ኢዛን ኩሜꬅ ጊዳና ማላ ኣሳ ኤራፔ ቦላ ጊዲዳ ኪርስቶሳ ሲቆ ኢንቴ ኤራና ማላ ታ ዎሳይስ። 20 ሄሳ ጊሻስ ኑ ጊዶን ኦꬂዛ ባ ዎልቃ ጊና ኑ ዎሲዛይሳፌኔ ዎይኮ ኑ ቆፒዛይሳፌ ኡባፌ ቦላራ ኬሂ ዳርሲ ኦꬃናስ ዳንዳይዛ ጾሳስ፥ 21 ዎሳ ኬꬃን ቃሴካ ዬሱስ ኪርስቶሳ ባጋራ ዎዴ ኡባን ሜርናፔ ሜርና ጋካናስ ኢዛስ ቦንቾይ ጊዶ። ኣሚን።