1 ናይቶ! ኢንቴ ኢንቴና ዬሊዳይታስ ጎዳን ኣዛዜቲቴ፤ ሄሲ ኢንቴስ ቤሴስ። ቆላ 3፡20 2 «ኔ ኣዋኔ ኔ ኣዮ ቦንቻ» ጊዛ ኣዛዞ ጊዶን ዲዛ ሂዶታይ ኮይሮ ኣዛዞ። 3 ኔ ሄሳꬆ ኦꬂኮ ኔስ ሎኣናኔ ኔስ ላይꬃይ ቢታ ቦላ ኣዱቃና። 4 ዬሊዳይቶ! ኢንቴካ ኢንቴ ናይታ ሃንቄꬆፍቴ፤ ጊዶ ኣቲን ኢንቴ ናይታ ጎዳ ዞሬኒኔ ሴራን ዲቺቴ። ቆላ 3፡21

5 ኦሳንቻቶ! ኢንቴ ኪርስቶሳስ ኣዛዜቲዛ ማላ ቢታ ቦላ ኢንቴና ኦሲሲዛይታስ ያሻቴꬃኒኔ ቦንቾን ሱሬ ዎዚናፔ ኣዛዜቲቴ። 6 ጮ ኣሳ ኣይፌን ቤታና ማላኔ ኦሲሲዛይታፔ ዶና ኣንጆ ኤካናስ ጊዶንታ ኢንቴ ኪርስቶሳ ኣይሌታ ማላ ጾሳ ሼኔ ኩሜꬃ ዎዚናፔ ፖላና ማላ ዎዚናፔ ኣዛዜቲቴ። 7 ኣሳስ ኦꬂዛ ማላ ጊዶንታ ጎዳስ ኦꬂዛ ማላ ኢንቴ ኩሜꬃ ዎዚናፔ ኦꬂቴ። 8 ጋሶይካ ኣይሌ ጊዲን ዎይኮ ጎዳ ጊዲን ባ ኦꬂዛ ሎኦ ኦሶስ ኡባስ ዎይቶ ኤካናይሳ ኢንቴ ኤሬታ።

9 ኢንቴኖ ጎዳቶ! ኢንቴካ ኢንቴ ኦሲሲዛይታስ ሄሳꬆ ኦꬂቴ፤ ኢስታሲኔ ኢንቴስ ጎዳ ጊዲዳይ ቦላ ሳሎን ዲዛይሳ፤ ኢዚካ ኣይፌሶ ጼሊ ኣስ ማዶንታይሳካ ኢንቴካ ኤሪዛ ጊሻስ ኦሳንቻታ ባቢሶ ኣጊዲ ሎኦ ኦꬂቴ።ቆላ 4፡1፤ ዛሬ 10፡17፤ ቆላ 3፡25

10 ሃራ ባጋራ ሚኖ ጎዳኒኔ ኢዛ ጊታ ዎልቃን ሚኒቴ። 11 ዳቡሎሳ ጌኔ ኦሶ ኢንቴ ኤቄታናስ ዳንዳያና ማላ ጾሳ ኦላ ማይኦታ ማይኢቴ። 12 ጋሶይካ ኑ ኦሌታናይ ኣሾራኔ ሱꬃራ ጊዶንታ ሃይሳ ꬉማ ኣላሜዛ ሃሪዛ ጎዳታራ፥ ዎልቃማታራኔ ሳሎ ቦላ ዲዛ ቱና ኣያና ኦላንቻታራ ኦሌቶስ። 13 ኢታ ጋላሳይ ጋኪሺን ኢንቴ ሞርኬ ዎልቃራ ኤቄታናስ ዳንዳያና ማላ ጾሳ ኦላ ማይኦታ ኩሜꬅ ማይኢቴ፤ ኢንቴ ኡባካ ፖሊዳፔ ጉዬ ሚኒ ኤቃናስ ዳንዳዬታ።

14 ሄሳ ጊሻስ ኢንቴ ጼሳን ቱማ ዚናሬ ማላ ዳንጬቲዲ ጺሎቴꬃ ጹሩሬታ ማላ ቲራን ማይኢዲ፥ *ጹሩሬ ጉሲ ቤኒ ዎዴ ኦላ ኣሳቲ ቲራን ማይኢዛ ኦላ ማይኦ። ኢሳ 11፡5፤ 59፡17 15 ሳሮቴꬃ ሚሺራቾ ቃላ ቶሆን ጫማ ማላ ኣꬂዲ ጊጌቲ ኤቂቴ። ኢሳ 52፡7 16 ሄይታንታፌካ ቦላራ ታማ ማላ ፖፖልኡ ጊዛ ኢታ ኣያና ዎንዳፌታ ኢንቴ ኡባ ቶይሳና ዳንዳያና ማላ ኣማኖ ጎንዳሌ ማላ ዴንꬂቴ። 17 ኣቶቴꬅ ቢራታ ቆቤ ማላ ሁኤን ዎꬂቴ፤ ኣያና ጊꬃ ማሻ ኦይኪቴ፤ ሄሲካ ጾሳ ቃላ። ኢሳ 59፡17

18 ዎሳን ኣይ ሃኖንካ ኣያናን ዎሲቴ፤ ሄሳ ቆፒዲ ቤጊቴ፤ ኣማኒዛይታ ኡባ ጊሻስ ቃንጾንታ ዎሲቴ። 19 ታኒ ሚሺራቾ ቃላ ጹራ ኣሳስ ቆንጪሳናስ ዶና ዶይዛ ኡባ ዎዴ ያሺ ባይንዳ ታ ጻላቴꬃን ዮታናስ ቃላይ ታስ ኢሜታና ማላ ታስ ዎሲቴ። 20 ታኒ ሚሺራቾ ቃላ ጊሻስ ሳንሳላታን ቃሼታዳ ኪቴቲዳዴ ጊዲዳይ ሄሳሳ፤ ሄሳ ጊሻስ ታ ዮታናስ ቤሲዛይሳ ባቦንታ ዮታና ማላ ታስ ዎሲቴ።

21 ታ ኣይ ማላ ዲዛኮኔ ኣይ ኦꬂዛኮ ኢንቴ ኤራና ማላ ዶሴቲዳ ታ ኢሻይ ጎዳስ ኣማኔቲዳ ኦሳንቻይ ቲቂቆሲ ኢንቴስ ሃኒዳይሳ ዉርሲካ ኢንቴስ ዮታና። ሃዋ 20፡4፤ 2ጺም 4፡12 22 ኢንቴ ኑ ሃኖቴꬅ ኤራና ማላኔ ኢንቴ ዎዚና ኢዚ ሚንꬄꬃና ማላ ታ ኢዛ ኢንቴኮ ዬዳዲስ። ቆላ 4፡7-8

23 ኣዋ ጾሳፌ፥ ጎዳ ዬሱስ ኪርስቶሳፔ ሳሮቴꬂኔ ሲቆይ ኣማኖራ ኢንቴስ ታ ኢሻታስ ጊዶ። 24 ጎዳ ዬሱስ ኪርስቶሳ ፓጬይ ባይንዳ ሲቂዛ ኡባስ ሳሮቴꬂ ጊዶ። ኣሚን።