1 «ሄሳ ጊሻስ ባስሊኤሌይ፥ ኤላቤይኔ ጾሳ ዱንካኔ ኦꬃና ማላ ጎዳይ ኤራቴꬅ ኢሚዳ ኣሳይ ዉሪ ጎዳይ ኣዛዚዳ ማላ ኢስቲ ኦꬃና» ጊዴስ።

2 ሄሳፌ ጉዬ ሙሴይ ባስሊኤሌ፥ ኤላቤኔ ጎዳይ ዱማ ኤራቴꬅ ኢሚዳይታ ኦሶ ኦꬃናስ ያና ኮይዛይታ ኡባ ጼይጊዲ ሺሺዴስ። 3 ሺቂዳይቲ ኢስራኤሌ ኣሳይ ጾሳ ዱንካኔ ኦꬃናስ ኤሂዳ ኢሞታ ኡባ ሙሴፔ ኤኪዳ። ቃሴ ኣሳይ ባ ዶሳን ጮ ኢሚዛ ኢሞታ ማላዶ ማላዶ ጉጂ ጉጂዲ ኤሆ ኣጊቤና። 4 ሂስቲን ጾሳ ዱንካኔዛ ኦꬂዛ ኤራቴꬂ ኩሚዳ ኣሳይ ዉሪ ባ ኦꬂዛይሳ ኣጊ ሙሴኮ ቢዲ፥ 5 «ኣሳይ ጎዳይ ኣዛዚዳ ኦሶስ ኮሺዛይሳፌ ቦላራ ዳሮ ኤሆን ዴስ» ጊዳ።

6 ሂስቲን ሙሴይ ባ ዱንካኔን ዱንካኔን ዲዛ ኣሳስ፥ «ናምኣንꬆ ኦናካ ጊዲን ጾሳ ዱንካኔ ኦሶስ ኢሚዛ ኢሞታ ኤሆፖ» ጊ ዮቲን ኣሳይ ኤሂዛይሳ ኣጋጊዴስ። 7 ጋሶይካ ኢስቲ ኤሂዳ ኢሞታይ ኦሶ ኡባ ኦꬃናስ ጊዲ ፓላሃና።

8 ኦሶዛ ኦꬂዛይታ ጊዶፌ ሂላ ዳርዛይቲ ዉሪ ሊቆ ላይኖፔኔ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔ ዳዴቲዳ ታሙ ማጋላሻታፔ ጾሳ ዱንካኔዛ ጊግሲዳ። ሄ ማጋላሻታ ቦላ ቦላራ ኢሲ ሂላንቻይ ኪሩቤታ ሚስሌ ሲኪዴስ። 9 ማጋላሻቲ ዉሪ ኢሲ ጊና ጊዲዲ ኣዱሳቴꬃይ ናምኡ ታማኔ ኦስፑን ዋꬋ፤ ኣሆቴꬃይ ኦይዱ ዋꬋ። 10 ኢቻሹ ማጋላሻታ ኢሲፌ ጋꬂ ሲኪዳ፤ ቃሴ ሃንኮ ኣቲዳ ኢቻሹ ማጋላሻታካ ኢዛꬆካ ኦꬂዳ። 11 ኢሲፌ ጋꬂ ሲኪዳ ማጋላሻታፔ ኢሲ ማጋላሻስ ዉርሴꬃ ጋጻን ሳሎ ሚሳቲዛ ጫርቃፌ ሲꬌ ሜꬊዳ። ቃሴ ኢሲፌ ጋጊ ሲኬቲዳ ሃንኮ ማጋላሻታንካ ሄሳꬆካ ኦꬂዳ። 12 ኢስቲ ኢሲፌ ጋጊዳ ኢሲ ማጋላሻ ቦላ ኢቻሹ ታሙ ሲꬌታ፥ ቃሴ ኢሲፌ ጋጊዳ ሃንኮ ማጋላሻታ ቦላካ ኢቻሹ ታሙ ሲꬌታ ሜꬊዳ። ሄ ሲꬌቲ ዉሪካ ኢሶይ ኢሳራ ጊናን ዴቴስ። 13 ሄሳፌ ጉዬ ዎርቃፌ ኢቻሹ ታሙ ቃጴታ ሜꬊዲ ዱንካኔዚ ኢሲኖ ጊዳና ማላ፥ ሄ ማጋላሻታ ጋጻ ጋጻ ሄ ቃጴታን ጋꬂ ኦይሴꬂዳ።

14 ጾሳ ዱንካኔዛ ቦላራ ካሚዛ ዱንካኔዛስ ታማኔ ኢሲ ማጋላሻታ ዴይሻ ኣንታሻፔ ዳዲዳ። 15 ታማኔ ኢሲ ማጋላሻቲካ ኢሲ ጊና፤ ኢሲ ኢሲ ማጋላሻስ ኣዱሳቴꬂ ሄꬑ ታሙ ዋꬋ፥ ኣሆቴꬂ ኦይዱ ዋꬋ። 16 ኢቻሹ ማጋላሻታ ኢሲ ባጋራ፥ ኡሱፑን ማጋላሻታ ቃሴ ሃንኮ ባጋራ ጋꬂዲ ሲኪዳ። 17 ሄሳፌ ጉዬ ጋꬂ ሲኪዳ ማጋላሻታፔ ኢሲ ማጋላሻ ጋጻን ኢቻሹ ታሙ ሲꬌታ ሜꬊዳ። ቃሴካ ጋꬂ ሲኪዳ ሃንኮ ማጋላሻታፔ ዉርሴꬃ ማጋላሻዛ ጋጻን ኢቻሹ ታሙ ሲꬌታ ሜꬊዳ። 18 ናምኡ ባጋራ ዲዛ ማጋላሻታ ጋꬂ ኢሲ ካማ ኦꬃናስ ጻርቂማላፔ ኢቻሹ ታሙ ቃጴታ ሜꬊዳ። 19 ሄሳፌ ጉዬ ዱንካኔዛ ካማናስ ዞኦ ቃላሜን ዬጊ ኬሲዳ ꬋርሾ ኢቴ ጊግሲዳ፤ ቃሴ ኢዛ ቦላራ ካማናስ ቃጬቲዳ ጋልባ ጊግሲዳ።

20 ጾሳ ዱንካኔ ቶሌ ሚꬃታ ሉሌ ጊዲዳ ኦዶሮ ሚꬃፌ ኬሲዳ። 21 ኢሲ ኢሲ ቶሌ ሚꬃስ ኣዱሳቴꬃይ ታሙ ዋꬋ፤ ኣሆቴꬃይ ኢሲ ዋꬋኔ ባጋ። 22 ኢሲ ኢሲ ቶሌ ኢሳ ኢሳራ ጋꬂ ኦይሴꬂዛ ናምኡ ቶሌ ሜꬊዳ። ጾሳ ዱንካኔዛ ቶሌ ሚꬃታ ዉርሲካ ሄሳꬆ ኦꬂዳ። 23 ጾሳ ዱንካኔዛስ ቶሆሶ ባጋራ ናምኡ ታሙ ቶሌ ሚꬃታ ሜꬊዲ፥ 24 ኢሲ ኢሲ ቶሌ ሚꬃስ ናምኡ ቶሆ፥ ሙሌራ ኦይዱ ታሙ ቶሆ ቢራፔ ጊግሲዳ። 25 ጾሳ ዱንካኔዛስ ሁኤሶ ባጋራ ናምኡ ታሙ ቶሌ ሚꬃታ ሜꬊዲ፥ 26 ኢሲ ኢሲ ቶሌ ሚꬃስ ናምኡ ቶሆ፥ ሙሌራ ኦይዱ ታሙ ቶሆ ቢራፔ ጊግሲዳ። 27 ጾሳ ዱንካኔዛስ ጉዬ ጋጻን ዱጌ ባጋራ ኡሱፑን ቶሌ ሚꬃታ ሜꬊዳ። 28 ጾሳ ዱንካኔዛ ጉዬ ጋጻን ዲዛ ዞዜታስ ናምኡ ቶሌ ሚꬃታ ጊግሲዳ። 29 ሃ ናምኡ ዞዜታን ዲዛ ቶሌቲ ጻጶፔ ጼራ ጋካናሼ ናምኡ ጊዲ ቢዲ ጼራን ኢሲ ሳጋዮን ጌሊ ኦይኬቲዳ። ኢስቲ ናምኣይካ ሄሳꬆ ኦሴቲዳ። 30 ሄሳ ጊሻስ ኢሲ ኢሲ ቶሌ ሚꬃስ ጋርሳራ ናምኡ ናምኡ ቶሆቲ ዴቴስ፤ ሙሌራ ኦስፑን ጻጋጋቲኔ ቢራፔ ኦሴቲዳ ታማኔ ኡሱፑን ቶሆቲ ዴቴስ።

31 ቃሴ ኢስቲ ኦዶሮ ሚꬃፌ ታማኔ ኢቻሹ ካሬ ጎርዲዛ ሚꬅ ኬሲዳ፤ ኢስታፌ ጾሳ ዱንካኔዛስ ኢሲ ባጋ ሚሌን ዲዛ ቶሌ ሚꬃታስ ኢቻሹ ጎርዲዛ ሚꬃታ፥ 32 ቃሴ ሃንኮ ባጋ ሚሌን ዲዛ ቶሌ ሚꬃታስ ኢቻሹ ጎርዲዛ ሚꬃታ ጊግሲዳ። ሄሳꬆካ ጾሳ ዱንካኔዛስ ጉዬ ባጋራ ኣርሼይ ዉሊዛ ባጋራ ዉርሴꬃ ጋጻን ዲዛ ቶሌ ሚꬃታስ ኢቻሹ ጎርዲዛ ሚꬃታ ሜꬊዳ። 33 ጊዶራ ጎርዲዛ ሚꬃቲ ጻጋጋታስ ጊዶ ጊናራ፥ ሃ ጋጻፔ ሄ ጋጻ ጋካናስ ካንꬂ ኬዛና ማላ ኦꬂዳ። 34 ቶሌ ሚꬃ ዎርቃን ቲይዲ ጎርዲዛ ሚꬃቲ ኣꬊዛ ሳጋዮታ ዎርቃፌ ሜꬊዳ፤ ቃሴ ጎርዲዛ ሚꬃታ ዎርቃን ቲይዳ።

35 ሳሎ ሚሳቲዛ ቃጪናፔ፥ ኦቻ ቴራ ሚሳቲዛ ቃጪናፔ፥ ጼቃ ዞኦ ቃጪናፔኔ ሊቆ ላይኖፔ ኢሲ ማጋላሻ ኦꬂዳ። ሄ ማጋላሻዛ ቦላ ኢሲ ሂላይ ኪሩቤታ ሚስሌ ሲኪዴስ። 36 ማጋላሻስ ኦይዱ ቱሳታ ኦዶሮ ሚꬃፌ ጊግሲዲ ዎርቃን ቲይዳ። ሂስቲዲ ዎርቃፌ ካቆታ ኢስታስ ጊግሲዳ። ቃሴ ቱሳታ ኤሲዛ ኦይዱ ቶሆታ ቢራፔ ሜꬊዳ። 37 ጾሳ ዱንካኔ ጌሊዛ ፔንጌዛስ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሊቆ ላይኖፔ ዳዴቲዳ፥ ጺልፔን ኣሌቄቲዳ ማጋላሻ ጊግሲዳ። 38 ቃሴ ኢስታስ ኢቻሹ ካቆታራ ዲዛ ኢቻሹ ቱሳታ ኦꬂዳ። ቱሳታ ጼራኔ ጪሮ ቃቺዛይታ ዎርቃን ቲይዳ። ቃሴ ቱሳቲ ኤቃና ማላ ኢቻሹ ቶሆ ጻርቂማላፔ ሜꬊዳ።