37
ታቦታ ኦሶ
(ኬሳ 25፡10-22)
1 ባስሊኤሌይ ኦዶሮ ሚꬃፌ ታቦታ ጊግሲዴስ። ታቦታስ ኣዱሳቴꬃይ ናምኡ ዋꬋኔ ባጋ፤ ኣሆቴꬃይ ኢሲ ዋꬋኔ ባጋ፤ ꬎቃቴꬃይ ኢሲ ዋꬋኔ ባጋ። 2 ታቦታ ጊግሲዲ ሶ ባጋኔ ካሬ ባጋ ዋላካይ ባይንዳ ዎርቃን ሜሺዴስ፤ ኢዛ ዩዪ ኣꬋናስ ዳንጮ ዎርቃራ ዩሺ ኣꬂዴስ። 3 ቃሴ ኦይዱ ዎርቃ ሳጋዮታ ሴሪሲዲ ታቦታስ ኦይዱ ቶሆታን፥ ኢሲ ባጋራ ናምኡ ሳጋዮታ፥ ቃሴ ሃንኮ ባጋራ ናምኡ ሳጋዮታ ኣꬂዴስ። 4 ሂስቲዲ ኦዶሮ ሚꬃፌ ቶሆ ሚꬃታ ኬሲዲ ኢስታካ ዎርቃን ሜሺዴስ። 5 ታቦታ ቶካናስ ታቦታ ሚሌን ዲዛ ሳጋዮታን ቶሆ ሚꬃታ ኣꬂዴስ።
6 ዋላካይ ባይንዳ ዎርቃፌ ናምኡ ዋꬋኔ ባጋ ኣዱቂዛ፥ ኢሲ ዋꬋኔ ባጋ ኣኪዛ ኣቶ ጌቴቲዛ ሶሆዛ ካማ ሜꬊዴስ። 7 ካማታስ ዉርሴꬃ ናምኡ ባጋ ጋጻን ናምኡ ኪሩቤታ ቆጼቲዳ ዎርቃፌ ሜꬊዴስ። 8 ኢሲ ኪሩቤዛ ኢሲ ባጋ ጋጻን፥ ናምኣንꬆ ኪሩቤዛ ሃንኮ ባጋ ጋጻን፥ ናምኣታካ ካማዛራ ጋꬂ ኦይሴꬂ ሜꬊዴስ። 9 ኪሩቤቲ ባ ቄፌ ዴንꬂዲ ኣቶ ጌቴቲዛ ሶሆዛ ካሚዛ ካማ ባ ቄፌን ካሚ ዎꬂዳ፤ ቃሴ ኢሶይ ኢሳራ ጼሌታና ማላ ኦꬂዴስ።
ጻራጴዛ
(ኬሳ 25፡23-30)
10 ቃሴ ኣዱሳቴꬃይ ናምኡ ዋꬋ፥ ኣሆቴꬃይ ኢሲ ዋꬋ፥ ꬎቃቴꬃይ ኢሲ ዋꬋኔ ባጋ ጊዲዳ ጻራጴዛ ኦዶሮ ሚꬃፌ ሜꬊዲ፥ 11 ዋላካይ ባይንዳ ዎርቃን ሜሺዴስ። ኢዛ ዩዪ ኣꬋናስ ዎርቃ ኪፋፌ ዩሺ ኣꬂዴስ። 12 ሄሳꬆካ ኣሆቴꬃይ ታꬋኮ ጊዲዛ ኪፋፌ ኢዛ ቦላ ዩሺ ኣꬂዴስ። ሂስቲዲ ኢዛ ዩዪ ኣꬋናስ ዎርቃ ዳንጮ ዩሺ ኣꬂዴስ። 13 ሂስቲዲ ታቦታ ቶካናስ ጊጊዛ ኦይዱ ዎርቃ ሳጋዮታ ሜꬊዲ ኦይዱ ቶሆቲ ቶኬቲዳ ኦይዱ ዞዜታራ ኦይሴꬂዴስ። 14 ጻራጴዛዛ ቶካናስ ቶሆ ሚꬃታ ኢስታ ጊዶራ ኣꬂዛ ሳጋዮቲ ጻራጴዛዛ ጻንጻ ቦላ ሜꬌቲዳ። 15 ጻራጴዛዛ ቶኪዛ ቶሆ ሚꬃ ኦዶሮ ሚꬃፌ ኬሲዲ ዎርቃን ሜሺዴስ። 16 ሄሳꬆካ ጻራጴዛ ቦላ ዎꬂዛ ዱማ ዱማ ሚሻታ ዋላካይ ባይንዳ ዎርቃፌ ሜꬊዴስ፤ ሄይቲካ ሳኔታኔ ጪልፋታ፥ ቃሴ ኡሻ ያርሾ ኢስታን ሴሪሲዛ ኬሬታኔ ጹኣታ።
ጾምፔ ዎሶሶ
(ኬሳ 25፡31-40)
17 ሄሳፌ ጉዬ ባስሊኤሌይ ጾምፔ ዎꬂዛሶዛ ቆጼቲዳ ዋላካይ ባይንዳ ዎርቃፌ ሜꬊዴስ፤ ጾምፔዚ ኢዛን ኤቂዛ ቶሆ፥ ቃሴ ጊዶ ቶማካ ኡባ ቆጼቲዳ ዎርቃፌ ሜꬊዴስ። ኢዛ ኩሬታ፥ ኢዛ ꬌሞታኔ ኢዛ ጪሻታ ኡባ ኢዛራ ኢሲፌ ኦይሴꬂ ሜꬊዴስ። 18 ሚሌራ ኡሱፑን ባላታ ሜꬊዴስ፤ ሄꬑ ሃጋታ ኢሲ ባጋራ፥ ቃሴ ሄꬑ ሃጋታ ሃንኮ ባጋራ ኬሲዴስ። 19 ኡሱፑን ሃጋታስካ ሁኤን ሁኤን ኢሲ ኢሲ ꬌሞቲኔ ጪሻቲ ዲዛ፥ ኦቾሎኔ ጪሽ ሚሳቲዛ ዋንጫ ሜꬊዴስ፤ 20 ጾምፔ ዎꬂዛሶዛስ ጊዶ ቶማይ፥ ꬌሞቲኔ ጪሻቲ ዲዛ ኦቾሎኔ ጪሼ ሚሳቲዛ ኦይዱ ዋንጫን ኣሌቄቲ ኡቲዴስ። 21 ናምኣይ ናምኣይ ኢሲፌ ዋꬃን ዲዛ ሄꬑ ባላታኔ ጋርሳራ ኢሲ ኢሲ ꬌሞይ ዴስ። 22 ꬌሞቲኔ ሃጋቲ ዉሪ ጾምፔ ዎꬂዛሶዛራ ኢሲፌ ኦይኬቲ ኢሲኖ ጊዲዲ ዋላካይ ባይንዳ ዎርቃፌ ቆጼቲ ሜꬌቲዳ።
23 ኢዚ ቃሴ ጾምፔ ዎꬂዛሶዛስ ላፑን ጾምፔታ፥ ጾምፔ ቶይሲዛ ቃጴታኔ ቃጴታ ዎꬂዛሶ ዋላካይ ባይንዳ ዎርቃፌ ሜꬊዴስ። 24 ጾምፔዛ ዎꬂዛሶዛኔ ኢዛን ጎኤቲዛ ሚሽ ኡባ ሜꬋናስ ሄꬑ ታማኔ ኢቻሽ ኪሎ ጊዲዛ ዋላካይ ባይንዳ ዎርቃ ዉርሲዴስ።
ኤጻኔ ጩዋሲዛሶ
(ኬሳ 30፡1-5)
25 ሄሳꬆካ ቃሴ ኤጻኔ ጩዋሲዛሶዛ ኦዶሮ ሚꬃፌ ሜꬊዴስ። ኢዛስ ኦይዱ ጉላይ ዴስ፤ ኣዱሳቴꬃይ ኢሲ ዋꬋ፤ ኣሆቴꬃይ ኢሲ ዋꬋ፥ ꬎቃቴꬃይ ናምኡ ዋꬋ። ኢዛ ካጬቲካ ኢዛራ ኢሲኖ ጊዲዲ ኦይኬቲ ሜꬌቲዳይታ።*ጉላ ጊዛይሳ ኢሲ ኢሲ ባጋ ጋሞꬆ ቃላን ዞዜ ዎይኮ ዴንቄሼ ጌቴስ። 26 ኢዛስ ቦላ ባጋዛ፥ ኦይዱ ሚሌታኔ ኢዛ ካጬታ ዋላካይ ባይንዳ ዎርቃን ሜሺዲ ኢዛ ዩሺ ኣꬃናስ ጻንጻዛ ዎርቃፌ ኦꬂዴስ። 27 ሄ ዎርቃ ጻንጻፌ ጋርሳራ ኤጻኔ ጩዋሲዛሶዛስ ዎርቃፌ ናምኡ ሳጋዮታ ሜꬊዴስ፤ ሂስቲዲ ሄ ባጋራኔ ሃ ባጋራ ናምኡ ናምኡ ኦይꬂዴስ። ሄይቲ ቶኪዛ ዎዴ ቶሆ ሚꬃታ ኣꬃናስ ማዳናሳ። 28 ቶሆ ሚꬃታ ኦዶሮ ሚꬃፌ ኬሲዲ ኢስታ ዎርቃን ሜሺዴስ።
29 ቃሴ ዱማቲዳ ቲዬቲዛ ዛይቴኔ ሳዎ ቱኑ ጊዛ ሎኦ ኤጻኔ ሺቶ ማላ ጊግሲዴስ።