39
ቄሴታ ማይኦ
(ኬሳ 28፡1-14)
1 ቄሴቲ ጾሳ ዱንካኔን ኦꬂዛ ዎዴ ማይኣና ማይኦ፥ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔ ዳዲዳ። ኣሮኔ ቄሴቴꬃ ማይኦካ ጎዳይ ሙሴ ኣዛዚዳ ማላ ኦꬂዳ።
2 ቃሴ ኢስቲ ኤፉዴ ዎርቃፌ፥ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሊቆ ላይኖፔ ዳዲዳ። 3 ኢስቲ ዎርቃ ቆጺ ሌኢሲዲ፥ ኢዛፔ ቃራሪ ቃራሪዲ ቃጪና ኬሲዳ። ሂስቲዲ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናኔ ሊቆ ላይኖ ጋꬂዲ ኩሼ ሂላንቻቲ ዳዲዳ። 4 ናምኡ ባጋይ ጋጊዲ ኢሲኖ ጊዳና ማላ ናምኡ ሃሼ ቦላ ጋꬂዲ ኦይꬂዛ ጫርቃ ጊግሲዳ። 5 ጎዳይ ሙሴ ኣዛዚዳ ማላ ሂላይ ኣሌቂሲዲ ዳዲዳ ዳንጮይካ ኤፉዴራ ኢሲፌ ጊዲዲ፥ ዎርቃፌ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሊቆ ላይኖፔ ዳዴቲዴስ። 6 ኢስቲ ማርጊዴ ጌቴቲዛ ናምኡ ሹቻታ ጊግሲዲ ዎርቃፌ ሜꬊዳ ሹቹ ኦይኪዛይሳ ቦላ ማራራ ዎꬂዳ። ማታፋ ቦላ ሱንꬅ ዎጪ ጻፊዛ ማላ ሄ ሹቻታ ቦላ ኢስራኤሌ ናይታ ሱንꬅ ዎጪዲ ጻፊዳ። 7 ጎዳይ ሙሴ ኣዛዚዳ ማላ ታማኔ ናምኡ ኢስራኤሌ ቆሞታ ሃሳኢሲዛዝ ጊዳና ማላ፥ ሃ ታማኔ ናምኡ ሹቻታ ኤፉዴዛራ ኦይꬂዲ ሃሼ ካቆዛ ቦላ ዎꬂዳ።
ቲራ ቦላ ዲዛ ኪሴ
(ኬሳ 28፡15-30)
8 ኢስቲ ቲራን ዎꬂዛ ኪሴ ኩሼ ሂላን ኦꬂዳ። ሄ ቲራን ዎꬂዛ ኪሴዛ ኤፉዴ ዎርቃፌ ዳዲዳ ማላ፥ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሊቆ ላይኖፔ ዳዲዳ። 9 ኢዛስ ኦይዱ ጼራይ ዴስ፤ ꬎቃቴꬃይኔ ኣሆቴꬃይ ኢሲ ኢሲ ታꬋኮ። 10 ሄሳፌ ጉዬ ኢዛ ቦላ ኦይዱ ማራን ኣልኦ ሹቻታ ዎꬂዳ፤ ኮይሮ ማራን ዎꬂዳ ሹቻይ ሳርዲዮኔ፥ ቶጳዚዮኔኔ ጾልቂዛ ኢንቁ፤ 11 ናምኣንꬆ ማራን ባሉሬ፥ ሲምፔሬ ኣልማዜ ጌቴቲዛ ኣልኦ ሹቻታ፤ 12 ሄꬓንꬆ ማራን ያኪንቴ፥ ኬልቄዶኔኔ ኣሜቴስጺኖሴ፤ 13 ኦይዳንꬆ ማራን ቢሪሌ፥ ማርጊዴኔ ያስጲዴ። ሄይታ ኡባ ዎርቃፌ ኦሴቲዳ ሹቹ ኦይኪዛይሳ ቦላ ዎꬂዳ። 14 ኢስራኤሌ ናይታ ሱንꬃ ቆዳ ማላ፥ ሹቻታ ቆዳይካ ታማኔ ናምኣ፤ ኢሳይ ኢሳይ ማታሜ ማላ ዎጬቲዲ ታማኔ ናምኡ ቆሞታ ሱንꬂ ሄ ሹቻታ ቦላ ጻፌቲዴስ።
15 ቲራን ዲዛ ኪሴዛስ ዎዶሮ ማላ ዶቄቲዳ ሳንሳላታ ዋላካይ ባይንዳ ዎርቃፌ ሜꬊዳ። 16 ናምኡ ዎርቃፌ ሜꬊዳ ሹቹ ኦይኪዛይታኔ ናምኡ ዎርቃ ሚጊዶታ ሜꬊዲ ቲራን ዎꬂዛ ኪሴዛስ ቆሞ ጋጻ ጼራታ ጋꬂ ኦይꬂዳ። 17 ሄ ናምኡ ዎርቃ ሳንሳላታታ ቲራን ዎꬂዛ ኪሴዛስ ጼራን ዲዛ ሚጊዶታራ ጋꬂ ኦይሴꬂዳ። 18 ሄ ሳንሳላታታስ ሃንኮ ባጋ ጼራ ቃሴ ኤፉዴዛስ ሲንꬃ ባጋራ፥ ሃሼ ካቆ ቦላ ዲዛ ሹች ኦይኪዛይታራ ጋꬂ ቃቺዳ። 19 ቃሴካ ናምኡ ዎርቃ ሚዲጋታ ሜꬊዲ ኤፉዴፔ ካሊ ዲዛ ቲራ ኪሴዛስ ሶ ባጋራ ዲዛ ናምኡ ጼራታን ኣꬂዳ።*ሚዲጋ ጊዛይሳ ኢሲ ኢሲ ባጋ ጋሞꬆ ቃላን ሚጊዶ ዎይኮ ጩጴ ጌቴቴስ። 20 ሄሳꬆካ ዎርቃፌ ሃራ ናምኡ ሚጊዶታ ሜꬊዲ፥ ኤፉዴዛስ ሲንꬃ ባጋራ፥ ሃሼ ካቆዛፔ ጋርሳ ባጋራ ኤፉዴ ጼሳን ቃቺዛይሳፌ ቆሞራ፥ ሲኮይ ጋጊዛሶ ኣቻን ኢስታ ኦይꬂዳ። 21 ጎዳይ ሙሴ ኣዛዚዳ ማላ ቲራ ኪሴን ዲዛ ሚጊዶታ ኤፉዴዛን ዲዛ ሚጊዶታራ ጋꬂዲ፥ ሳሎ ሚሳቲዛ ሱቄꬃን ቃቺዳ ጊሻስ ቲራ ኪሴዚ ጼሳፌ ቦላራ ዲዛ ጊሻስ ቃሾይ ዶልኤና።
ቄሴቲ ማይዛ ሃራ ማይኦታ
(ኬሳ 28፡31-43)
22 ኤፉዴዛፔ ቦላራ ማይኢዛ ቃሚሳ ኢስቲ ሙሌራ ሳሎ ሚሳቲዛ ጫርቃፌ ጊግሲዳ፤ ሄሲካ ሼማኔ ኦሶኮ። 23 ሄ ቃሚሳዛስ ቆꬌ ኣꬂዛሶ ሜꬊዳ፤ ቆꬌሶይ ዳኬቶንታ ማላ፥ ሶ ባጋ ቃላምኢዲ ዩሺ ኣꬂ ሲኪዳ። 24 ኢስታ ቃሚሳዛስ ዱጌ ባጋ ማጫራ ዩሾን ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሊቆ ላይኖፔ ኦሮማኔ ጌቴቲዛ ሚꬃ ኣይፌ ቴራ ሚስሌታ ሜꬊዳ። 25 ቃሴካ ዎርቃፌ ዳላታ ሜꬊዲ ቃሚሳታስ ዱጌ ባጋ ጼራ ዩሺ ኣꬂዲ ኦሮማኔ ሚስሌታ ጊዶን ኣꬂ ኣꬂ ዋላኪዳ። 26 ጎዳይ ሙሴስ ኣዛዚዳ ማላ ኢስቲ ጾሳ ዱንካኔ ኦሶ ኦꬂሼ ማይኣና ማላ ቃሚሳዛስ ዱጌ ባጋ ማጫራ ዩሺ ኣꬂዲ ዳላኔ ኦሮማኔ ቴራ ሚስሌ ዋላኪ ኣꬂዳ።
27 ጎዳይ ሙሴ ኣዛዚዳ ማላ ኢስቲ ኣሮኔሲኔ ኢዛ ናይታስ ሼማኔይ ዳዲዳ ሊቆ ላይኖፔ ቆሌታ ጊግሲዳ። 28 ቃሴ ሁኤን ጻጺዛ ሻሼታ፥ ቆቤታኔ ጋርሳራ ማይኢዛ ማይኦታ ሊቆ ላይኖፔ ዳዲዲ ጊግሲዳ። 29 ሄሳꬆካ ቃሴ ኢስቲ ሳሎ ሚሳቲዛ፥ ኦቻ ቴራ ሚሳቲዛኔ ጼቃ ዞኦ ቃጪናፔኔ ሊቆ ላይኖፔ ዳዲዲ ኩሼ ሂላን ኣሌቂሲዲ ዳንጮ ጊግሲዳ።
30 ኢስቲ ኣኪሊሌ ሚስሌ ዋላካይ ባይንዳ ዎርቃፌ ሜꬊዲ ማታሜ ቦላ ዎጪዛ ማላ ኢዛ ቦላ፥ «ጎዳስ ጌሽ ጊዲዲ ዱማቲዴስ» ጊዛይሳ ዎጪ ጻፊዳ። 31 ሄሳፌ ጉዬ ሁኤ ጎሳ ቦላ ካቃና ማላ፥ ጎዳይ ሙሴ ኣዛዚዳ ማላ ሳሎ ሚሳቲዛ ባቄꬅ ኢዛን ኣꬂዲ ቃቺዳ።
ሙሴይ ኦሶዛ ኡባ ጾሞሲዴስ
(ኬሳ 35፡10-19)
32 ጾሳ ዱንካኔዛ ኦሶይ ዉሪ ሙሌራ ፖሌቲዴስ። ኢስራኤሌ ኣሳይ ኡባ ጎዳይ ሙሴ ኣዛዚዳ ማላ ኦꬂዴስ። 33 ሄሳፌ ጉዬ ኢስቲ ጾሳ ዱንካኔዛ ሙሌራ ኤኪዲ ሙሴኮ ኤሂዳ፤ ሄሲካ ዱንካኔዛኔ ኢዛ ሚሻዛ ኡባ፥ ቃጴታ፥ ቶሌ ሚꬃታ፥ ፔንጌ ጎርዲዛ ሚꬃታ፥ ቱሳታኔ ኢስቲ ኤቂዛ ቶሆታ፥ 34 ቦላራ ካማናስ ꬋርሾዛ ኢቴ ዞኦ ቃላሜን ዬጊ ኬሲዳይሳ፥ ቃጬቲዳ ጋልባ፥ ጌንꬂዛ ማጋላሻ፥ 35 ጫቆ ቃላ ታቦታ፥ ኢዛ ቶኪዛ ቶሆ ሚꬃታ፥ ኣቶ ጌቴቲዛ ካማ፥ 36 ጻራጴዛኔ ኢዛ ሚሼ ኡባ ጎዳ ሲንꬃን ዎꬂዛ ጌሻ ኡኬꬃ፥ 37 ዋላካይ ባይንዳ ዎርቃፌ ኦሴቲዳ ጾምፔ ዎꬂዛሶዛኔ ኢዛን ማራን ዲዛ ጾምፔታ፥ ኢስታ ሚሻታ ኡባኔ ጾምፔ ዛይቴ፥ 38 ዎርቃፌ ኦሴቲዳ ኤጻኔ ጩዋሲዛሶዛ፥ ቲዬቲዛ ዛይቴ፥ ሳዊዛ ኤጻኔ፥ ጾሳ ዱንካኔ ፔንጌ ማጋላሻ፥ 39 ጻርቂማላፔ ኦꬂዳ ያርሺዛሶዛ፥ ጻርቂማላ ዛይዛሬዛ፥ ኢዛ ቶኪዛ ቶሆ ሚꬅ፥ ኢዛ ሚሻታ ኡባ፥ ሜቻ ኬሬኔ ኬሬዛ ኢዛ ቦላ ዎꬂዛ ሚሻታ፥ 40 ዱንካኔዛስ ካሬ ባጋ ዉይጌ ጎዳ ጌንꬂዛ ማጋላሻታ፥ ኢዛ ቱሳታ፥ ኢስቲ ኤቂዛ ቶሆታ፥ ዱንካኔዛስ ካሬ ባጋ ዉይጌ ጌሊዛ ፔንጌታ ማጋላሻታ፥ ዱንካኔዛስ ካሬ ባጋ ዉይጌ ዎዶሮታኔ ꬊሽኬታ፥ ጾሳ ዱንካኔዛስ ኮሺዛ ሚሻታ ኡባ፤ 41 ቄሴቲ ጌሻ ሶን ኦꬂዲ ማይኣናስ ዳዴቲዳ ማይኦታ፥ ኣሮኔይኔ ኢዛ ናይቲ ቄሴቴꬃን ኦꬂሼ ማይኢዛ ማይኦታ።
42 ኢስራኤሌ ኣሳይ ኦሶዛ ኡባ ጎዳይ ሙሴ ኣዛዚዳ ማላ ኦꬂዴስ። 43 ሙሴይ ኦሶዛ ጾሞሲ ጼሊዲ ኢስታ ጎዳይ ኣዛዚዳ ማላ ኦꬂዳይሳ ቤዪዴስ። ሄሳ ጊሻስ ሙሴይ ኢስታ ኣንጂዴስ።