1 ሄሳፌ ጉዬ ጎዳይ ሙሴ፥ 2 «ኮይሮ ኣጊናን ኮይሮ ጋላስ፥ ኔኒ ጾሳ ዱንካኔ ቶላ። 3 ጫቆ ቃላ ታቦታ ኢዛ ጊዶን ዎꬃዳ ታቦታዛ ማጋላሻን ጌንꬃ። 4 ጻራጴዛ ጌልꬃዳ ኢዛ ቦላ ዎꬋናስ ኮሺዛ ሚሻታ ኡባ ኢዛ ቦላ ዎꬃ። ሂስታዳ ጾምፔታ ኢዛ ቦላ ዎꬂዛ ሚሻዛ ሶ ጌልꬃዳ ኢዛ ቦላ ጾምፔታ ዎꬃ። 5 ዎርቃፌ ኦሴቲዳ ኤጻኔ ጩዋሲዛሶዛ ጫቆ ቃላ ታቦታ ሲንꬃን ዎꬃዳ፥ ጾሳ ዱንካኔዛ ጊዶ ጌሊዛ ፔንጌ ማጋላሻዛ ካቃ።

6 «ጹጌቲዛ ያርሾ ያርሺዛሶዛ ጾሳ ዱንካኔዚ ጌሊዛ ፔንጌ ሲንꬃን ዎꬃ። 7 ኢዛን ሜጬቲዛ ኬሬዛ ጾሳ ዱንካኔዛፔኔ ያርሺዛሶዛፔ ጊዶን ዎꬃዳ ሃꬄ ኢዛን ቲጋ። 8 ጾሳ ዱንካኔዛፔ ካሬራ ዩሻ ኣꬃዳ ዱንካኔዛስ ካሬ ባጋ ዉይጌ ጊጊሳዳ ዱቡሻ ጌሊዛሶን ማጋላሻ ካቃ።

9 «ቲዬቲዛ ዛይቴዛ ኤካዳ ጾሳ ዱንካኔዛኔ ኢዛ ጊዶን ዲዛይሳ ኡባ ቲያ፤ ኢዛኔ ኢዛ ጊዶን ጎኤቲዛ ሚሻታ ኡባ ዱማሳ፤ ሂስቲኮ ኢዚ ጌሽ ጊዳና። 10 ሄሳፌ ጉዬ ጹጌቲዛ ያርሾ ያርሺዛሶኔ ኢዛስ ጎኤቲዛ ሚሻ ኡባ ቲያ፤ ያርሺዛሶዛ ዱማሳ፤ ሂስቲኮ ኢዚ ኡባፌ ኣꬊዳ ጌሽ ጊዳና። 11 ሜቻ ኬሬዛኔ ኬሬዛ ኢዛ ቦላ ዎꬂዛ ሚሻታ ቲያዳ ኢስታ ዱማሳ።

12 «ኔኒ ኣሮኔኔ ኢዛ ናይታ ጾሳ ዱንካኔዚ ጌሊዛ ፔንጌ ኤሃዳ ሃꬃን ሜጫ። 13 ሄሳፌ ጉዬ ቄሴቴꬃ ማይኦዛ ኣሮኔ ማይዛዳ ኢዚ ታስ ቄሴቴꬃን ኦꬃና ማላ ኢዛ ቲያዳ ዱማሳ። 14 ኢዛ ኣቱማ ናይታካ ኤሃዳ ቆሌ ማይዛ። 15 ኢስቲ ታስ ቄሴቴꬃን ኦꬃና ማላ፥ ኢስታ ኣዋ ቲይዳ ማላ፥ ኢስታካ ቲያ። ኢስታ ቲዬቴꬃንካ ኢስታኔ ኢስታ ዬሌታይ ዉሪ ቄሴ ጊዲዲ ኦꬃና ማላ ታ ኦꬃና» ጊዴስ።

16 ሙሴይ ኡባካ ጎዳይ ባና ኣዛዚዳ ማላ ኦꬂዴስ።

17 ሄሳ ጊሻስ ጊብጼፔ ኢስቲ ኬዚዳ ናምኣንꬆ ላይꬃን፥ ኮይሮ ኣጊናን ኮይሮ ጋላሳን ጾሳ ዱንካኔይ ቶሌቲዴስ። 18 ሙሴይ ጾሳ ዱንካኔዛ ኤሲዛ ዎዴ ዱንካኔዛ ቶሆ ኢስታ ሶሆን ሶሆን ዎꬂዴስ፤ ቶሌ ሚꬃታኔ ቱሳ ኣꬂዴስ፤ ጎርዲዛ ሚꬃታካ ጌልꬂዴስ። 19 ሄሳፌ ጉዬ ሙሴይ ጎዳይ ኣዛዚዳ ማላ ዱንካኔዛ ቶሊዲ ኢዛ ቦላራ ካማ ካሚዴስ።

20 ሂስቲዲ ታሙ ኣዛዞቲ ጻፌቲዳ ማሴቲዳ ሹቻታ ኤፊዲ ታቦታዛ ጊዶን ዎꬂዴስ፤ ቶኪዛ ቶሆ ሚꬃታ ታቦታን ኣꬂዴስ፤ ማሮቴꬃ ካማካ ታቦታ ቦላ ዎꬂዴስ። 21 ሄሳፌ ጉዬ ታቦታዛ ጾሳ ዱንካኔዛ ጊዶ ጌልꬂዴስ፤ ጌንꬂዛ ማጋላሻ ካቂዲ፥ ጎዳይ ኣዛዚዳ ማላ ጫቆ ቃላ ታቦታዛ ካሚዴስ።

22 ጎዳይ ሙሴ ኣዛዚዳ ማላ፥ ሙሴይ ጻራጴዛዛ ጾሳ ዱንካኔዛን ጌልꬂዲ፥ ማጋላሻፔ ካሬራ ሁኤሶራ ዎꬂዲ፥ 23 ኢዛ ቦላ ጎዳ ሲንꬃን ዎꬂዛ ጌሻ ኡኬꬅ ጊግሲዴስ።

24 ጎዳይ ሙሴ ኣዛዚዳ ማላ፥ ጾምፔ ዎꬂዛሶዛ ጾሳ ዱንካኔ ጊዶ ጌልꬂዲ፥ ጻራጴዛስ ሲንꬃ ባጋራ፥ ጾሳ ዱንካኔዛስ ቶሆሶራ ዎꬂዴስ፤ 25 ቃሴ ጾምፔታ ጎዳ ሲንꬃን ኦይꬂዴስ።ኬሳ 30፡11-16

26 ጎዳይ ኣዛዚዳ ማላ፥ ዎርቃፌ ኦሴቲዳ ኤጻኔ ጩዋሲዛሶዛ ጾሳ ዱንካኔዛ ጊዶ ጌልꬂዲ ማጋላሻዛስ ሲንꬃ ባጋራ ዎꬂዲ፥ማቶ 17፡24 27 ኢዛ ቦላ ሳዊዛ ኤጻኔ ጩዋሲዴስ። 28 ሄሳፌ ጉዬ ጾሳ ዱንካኔዛ ፔንጌን ማጋላሻ ካቂዴስ።

29 ጹጌቲዛ ያርሾ ያርሺዛሶዛ ጾሳ ዱንካኔ ጌሊዛሶ ፔንጌ ኣቻን ዎꬂዴስ፤ ኢዛ ቦላ ጹጌቲዛ ያርሾኔ ካꬃ ያርሾ ጎዳይ ኣዛዚዳ ማላ ያርሺዴስ።

30 ሜቻ ኬሬዛ ጾሳ ዱንካኔዛፔኔ ያርሺዛሶዛፔ ጊዶን ዎꬂዴስ። ሂስቲዲ ሜጬታናስ ሃꬄ ኢዛን ቲጊዴስ። 31 ሙሴይ፥ ኣሮኔይኔ ኢዛ ናይቲ ባ ኩሼኔ ባ ቶሆ ኢዛን ሜጬቲዳ። 32 ጎዳይ ሙሴ ኣዛዚዳ ማላ፥ ኢስቲ ጾሳ ዱንካኔን ጌሊዛ ዎዴ ዎይኮ ያርሺዛሶ ሺቂዛ ዎዴ ኣይዴካ ሜጬቴቴስ።

33 ጾሳ ዱንካኔን ያርሺዛሶ ዩሺ ኣꬂዲ ዱቡሻ ጊግሲዴስ፤ ሄ ዱቡሻ ፔንጌን ማጋላሻ ካቂዴስ። ሄሳꬆ ሂስቲዲ ሙሴይ ኦሶዛ ፖሊዴስ።

34 ሄሳፌ ጉዬ ሻራይ ጾሳ ዱንካኔዛ ካሚዴስ፤ ጎዳ ቦንቾይካ ኢዛ ኩሚዴስ። 1ካዎ 8፡10-11፤ ኢሳ 6፡4፤ ሂዚ 43፡4-5፤ ኣጁ 15፡8 35 ሻራይ ጾሳ ዱንካኔዛ ቦላ ኡቲዳ ጊሻሲኔ ጎዳ ቦንቾይ ኢዛ ጊዶን ኩሚዳ ጊሻስ ሙሴይ ኢዛ ጊዶ ጌላናስ ዳንዳይቤና።

36 ኢስራኤሌ ኣሳይ ባ ኦጌ ኡባን፥ ሄ ሻራይ ጾሳ ዱንካኔዛፔ ዴንዲዛ ዎዴ ኣይዴካ ኢዛ ካሊዲ ቤቴስ። 37 ጊዶ ኣቲን ሄ ሻራይ ዴንዶንታ ኢጺኮ ኢዚ ዴንዳና ጋላሳይ ጋካናስ ኢስቲካ ቃጼቴና። 38 ኢስታ ኦጌ ኡባን ጎዳ ሻራይ ኢስራኤሌ ኣሳይ ዉሪ ቤኢሺን፥ ጋላስ ጋላስ ጾሳ ዱንካኔ ካሜሲኔ ቃማ ቃማ ቃሴ ታማይ ሄ ሻራ ጊዶን ኤጼስ።