1 ጎዳይ ጋይቶቴꬃ ዱንካኔዛ ጊዶን ዲሼ ሙሴ ጼይጊዲ ሂዝጊ ኣዛዚዴስ፥ 2 «ኢስራኤሌ ኣሳይ ጎዳስ ያርሾ ሺሺዛ ዎዴ ኢስቲ ናጋና ዎጋይ ሃይሳፌ ካሊዛይሳ፤ ኢሲ ኢሲ ኣሲ ሚዛፔ ጊዲን ዶርሳፌ ዎይኮ ዴይሻፌ ጊዲን ኣይ ቆሞ ያርሾካ ሺሺዛ ዎዴ፥ 3 ሄሲካ ሚዛፔ ኢሳ ጹጌቲዛ ያርሾስ ሺሻናስ ኮይኮ ኢሲ ቦሬይካ ኢዛ ቦላ ባይንዳ ሚርጎ ቦራ ዶሪዲ ኤሆ፤ ሂስቲኮ ኢዚ ጎዳ ኡፋይሲዛ ያርሾ ጊዳና ማላ ጋይቶቴꬃ ዱንካኔዛ ፔንጌን ሺሾ። 4 ጹጌቲዛ ያርሾ ሺሺዛዴይ ባ ሺሺዛ ቦራ ሁኤ ቦላ ባ ኩሼ ዎꬆ፤ ሄ ያርሾዚካ ኢዛ ናጋራ ዉርሳናስ ጎዳይ ኤኪዛ ሎኦ ያርሾ ጊዳና። 5 ሄሳዴይ ሚርጎዛ ሄን ጎዳ ሲንꬃን*ጎዳ ሲንꬃን ጌቴቲዛይሲ ጋይቶቴꬃ ዱንካኔን ጉሳ። ሹኮ፤ ሂስቲኮ ኣሮኔ ዜሬꬃታፔ ጊዲዳ ቄሴቲ ቦራዛ ሱꬃ ጎዳስ ሺሼቶ፤ ጋይቶቴꬃ ዱንካኔን ጌሊዛ ፔንጌ ባጋራ ዲዛ ያርሾ ያርሺዛሶዛ ቦላ ላንቄራ ዩዪ ኣꬋናስ ሱꬃ ዉጼቶ። 6 ሄሳፌ ጉዬ ሄ ያርሾዛ ሺሺዛይሲ ሄ ሹኬቲዳ ሜሄዛ ጋልባ ሾቂዲ ኬሶ፤ ኣሾዛ ቆሞን ቆሞን ቃንጼሬꬆ። 7 ቄሴ ኣሮኔ ዜሬꬅ ጊዲዳ ቄሴቲ ያርሾ ያርሺዛሶዛ ቦላ ሚꬅ ጎጲዲ ታማ ኤꬄቶ። 8 ቄሴዛ ኣሮኔ ዜሬꬅ ጊዲዳ ቄሴቲ ሄ ሜሄዛ ኣሾዛ ቆሞን ቆሞን ሻኪዲ ሁኤዛኔ ሃንዳዛ ጉጂዲ ያርሾ ሺሺዛሶን ኮሬቲዳ ሚꬃ ቦላ ዎꬄቶ። 9 ሄ ያርሾዛ ሺሺዛይሲ ሄ ሜሄዛ ቃንꬃ ኣሾዛኔ ጉዬ ጌዳታ ሃꬃን ሜጮ፤ ቄሴዚ ያርሾዛ ኡባ ያርሺዛሶዛ ቦላ ጹጎ፤ ሃይሳ ማላ ታማን ጹጌቲዛ ያርሾ ሳዎይ ጎዳ ኡፋይሴስ።

10 «ኢዛዴይ ባ ዶርሳፌ ዎይኮ ባ ዴይሻፌ ኢሳ ጹጌቲዛ ያርሾስ ሺሻና ኮይኮ ኢሲ ቦሬይ ኢዛ ቦላ ባይንዳ ꬋርሾ ዎይኮ ኦርጌ ጊዶ። 11 ሄሳካ ያርሾ ሺሺዛሶዛፔ ፑዴሃ ባጋራ ጾሳ ሲንꬃን ሹኮ፤ ኣሮኔ ዜሬꬅ ጊዲዳ ቄሴቲ ሱꬃ ኤኪዲ ያርሾ ያርሺዛሶዛ ቦላ ዩዪ ኣꬋናስ ዉጼቶ። 12 ሄ ያርሻ ሺሺዛዴይ ሄ ሹኪዳ ኣሾዛ ቆሞን ቆሞን ቃንጺ ኬሲዳፔ ጉዬ ሄ ኦሶዛስ ዶሬቲዳ ቄሴይ ሄ ኬሲዳ ኣሾዛ ኡባ ሁኤዛኔ ሃንዳዛካ ኢሲፌ ያርሾ ያርሺዛሶን ጎጴቲዲ ታማን ኤጺዛ ሚꬃ ቦላ ዎꬆ፤ 13 ኣዴዚ ሄ ሜሄዛስ ቃንꬃ ኣሾዛኔ ናምኡ ጌዳታ ሃꬃን ሜጮ፤ ቄሴዚካ ሄሳ ኡባ ጎዳስ ያርሾ ኦꬂ ሺሺዲ ያርሾ ሺሺዛሶዛ ቦላ ኡባ ጹጎ፤ ሄሳ ማላ ታማን ጹጌቲዛ ያርሾ ሳዎይ ጾሳ ኡፋይሴስ።

14 «ኢሳዴይ ጎዳስ ጹጌቲዛ ያርሾ ካፎፔ ሺሻና ኮይኮ ሃራጴ ጪዬ ዎይኮ ዋኖሴ ጌቴቲዛ ካፎፔ ጊዳናስ ዳንዳዬስ። 15 ቄሴዚካ ሄ ካፎዛ ኤኪዲ ጌዴ ያርሾዛሶ ሺሺዲ ካፎዛ ቆꬌ ሚርቆ፤ ያርሾዛ ሺሺዳ ታማን ኢዛ ጹጎ፤ ሱꬂካ ያርሾይ ኢዛ ቦላ ሺቂዛይሳ ሚሌራ ዱጌ ጾኬቶ። 16 ባሌዛኔ ቃንꬃ ኣሾዛ ዱማ ሻኪዲ ያርሾ ኢዛ ቦላ ሺሺዛሶዛፔ ኣርሼይ ሞኪዛ ባጋራ ቢዲንꬂ ቆሌቲዛሶን ዬጌቶ። 17 ቄፌታ ኦይኪዲ ናምኡ ኬሲ ጳልቂዲ ኣሾዛ ሙሌራ ሻኪ ዬጎንታ ዲሼ ያርሾ ሺሺዛሶዛ ቦላ ዲዛ ታማን ሙሌራ ጹጎ፤ ሄሳ ማላ ታማን ጹጌቲዛ ያርሾ ሳዎይ ጎዳ ኡፋይሴስ።