1 «ኣይ ኣሲካ ጾሳስ ካꬃ ያርሾ ሺሺዛ ዎዴ ሊቆ ꬊሌ ሺሻና ቤሴስ፤ ሄ ꬊሌዛ ቦላ ዎጋራ ዛይቴኔ ኤጻኔ ጉጆ፤ 2 ኣሮኔ ዜሬꬃፌ ጊዲዳ ቄሴታኮ ኤኪ ዮ፤ ሄ ዎዴ ኢዛ ኦሶ ታራይ ጋኪዳ ቄሴይ ሄ ꬊሌዛፔ ባ ኩጳ ኩሜꬃ ዛይቴዛኔ ኤጻኔዛ ኤኪዲ ዉሪካ ጾሳስ ሺቂዳይሳ ኤሪሳናስ ያርሾ ሺሺዛይሳ ቦላ ታማን ጹጎ፤ ሄሳ ማላ ካꬃ ያርሾ ሳዎይ ጾሳ ኡፋይሴስ። 3 ካꬃ ያርሾፌ ኣቲዳ ꬊሌይ ኣሮኔ ዜሬꬃፌ ጊዲዳ ቄሴታስ ኢሜቶ፤ ሄሲካ ጾሳስ ሺቂዳ ያርሾፌ ሻኬቲ ኤኬቲዳ ጊሻስ ሃራታፔ ኬሂ ዱማቴስ።

4 «ያርሾዚ ኡኬꬂ ኡኬቲዛ ባሼን ኡኬቲዳ ጊዲኮካ ኢርሾይ ቦቾንታዝ ጊዶ፤ ኢዚካ ዎጋራ ሚꬃ ዛይቴራ ዋላኬቲዲ ሊቆ ꬊሌራ ኡኬቲዳ ቄሪ ኡኬꬅ ዎይኮ ዛይቴን ጊንዴቲ ኡኬቲዳ ኡኬꬅ ጊዳናስ ቤሴስ።

5 «ያርሾዚ ታማ ጮጬን ኮምፔቲዳዝ *ኮምፓ፡ ኮምፓ ጌቴቲዛይሲ ታማ ጮጬን ዎይኮ ቦንቆ ታማ ጋርሳን ካꬂዛ ኡኬꬅ። ጊዲኮ ኢርሾይ ቦቾንታ ዎጋራ ሚꬃ ዛይቴይ ጉጄቲዲ ሊቆ ꬊሌፌ ጊጌቲዳዝ ጊዶ። 6 ኔ ኡኬꬃዛ ባሴሬꬃዳ ኢዛ ቦላ ዎጋራ ሚꬃ ዛይቴ ጉሳዳ ካꬃ ያርሾ ሺሻ።

7 «ያርሾዚ ቄሪ ባሼን ኡኬቲዳ ኡኬꬃ ማላ ጊዲኮ ዎጋራ ሚꬃ ዛይቴይ ኢዛን ጉጄቲ ሙኑቄቲዳ ሊቆ ꬊሌፌ ጊጊዳዝ ጊዶ። 8 ካꬃ ያርሾ ጾሳስ ኢሜቲዛ ያርሾ ሂስታ ቄሴዛስ ኢማ፤ ቄሴዚካ ያርሾ ያርሺዛሶን ያርሾ። 9 ቄሴዚ ሄሳ ሄ ያርሾዛፔ ባጋ ኤኪዲ ኡባ ጎዳይ ኢዚ ሺሺዳይሳ ዩሺ ቆፓና ማላ ያርሾ ያርሺዛሶን ዲዛ ታማን ጹጎ፤ ሃይሳ ማላ ታማን ጹጌቲዛ ያርሾ ሳዎይ ጎዳ ኡፋይሴስ። 10 ያርሺሺን ኣቲዳይሲ ቃሴ ቄሴታስ ኢሜቶ፤ ሄሲካ ጎዳስ ሺቂዳ ያርሾፌ ሻኬቲ ኤኬቲዳ ጊሻስ ሃራታፔ ኬሂ ዱማቴስ።

11 «ጎዳስ ጹጌቲ ያርሼቲዛ ካꬃ ያርሾራ ሺቂዛ ኢርሾ ጊዲን ዎይኮ ኤስ ጊዲኮካ ኔ ታማን ጹጋናስ ቤሶንታ ጊሻስ ኔ ጎዳስ ሺሺዛ ካꬃ ያርሾን ኡባን ኣይኮ ኢርሾይካ ኢዛን ጌሎፖ። 12 ላይꬃን ላይꬃን ካꬅ ሺሺዛ ዎዴ ኮይሮ ማጼቲዳ ካꬃፌ ጼራ ያርሾ ኦꬂዲ ጎዳስ ኤኪ ዪቴ፤ ሄ ያርሾዚ ያርሾ ያርሺዛሶዛን ታማን ጹጌቶፎ። 13 ኣይ ቆሞ ካꬃ ያርሾንካ ማጺኔይ ꬋዮፖ፤ ሄሲ ኔኒ ኔ ጾሳራ ጫቄቲዳ ጫቆ ቃላስ ማላታ፤ ሄሳ ጊሻስ ኔ ሺሺዛ ካꬃ ያርሾ ኡባ ማጺኔራ ማልኢንꬃ ኦꬃ። 14 ካꬅ ሺሺዛ ኮይሮ ኣጊናን ካꬃ ጼራ ኔ ሺሺዛ ዎዴ ጫጬቲዲ ሺጌቼቲዳ ቲያ ጊዶ። 15 ሃይሲ ካꬃ ያርሾ ጊዲዳ ጊሻስ ኢዛ ቦላ ዎጋራ ሚꬃ ዛይቴኔ ኤጻኔ ጉጃ። 16 ቄሴዚካ ሄ ያርሾዛፔ ባጋ ኤኪዲ ኢዚ ጎዳስ ሺቂዳዝ ጊዲዳይሳ ኣኬኪሳና ማላ ዛይቴዛካ፥ ኤጻኔዛካ ኡባ ካꬃራ ኢሲፌ ጹጎ።