1 «ኣይ ኣሲካ ሳሮቴꬃ ጊሻስ ባ ሜሄፔ ጎዳስ ኢሲፌቴꬃ ያርሾ ሺሺዛ ዎዴ ኢዛ ቦላ ዎሶይ ባይንዳ ሚርጎ ዎይኮ ማጫ ሚዝ ዶሪዲ ኤሆ። 2 ያርሾ ኤሂዛዴይ ያርሾስ ኢዚ ሺሺዛ ሜሄዛ ቦላ ባ ኩሼ ዎꬂዲ ጋይቶቴꬃ ዱንካኔ ፔንጌ ማታን ሹኮ፤ ኣሮኔ ዜሬꬅ ጊዲዳ ቄሴቲ ሱꬃ ኢዛፔ ኤኪዲ ያርሾይ ያርሼቲዛሶዛ ሚሌዛ ቦላ ዩዪ ኣꬋናስ ዉጼቶ። 3 ኢሲፌቴꬃ ያርሾስ ሺቂዛ ያርሾዛፔ ጎዳስ ታማን ጹጌቲዛ ያርሾ ጊዲ ሺቃናይቲ ቃንꬃ ኣሾታ ጎዚ ኦይኪዳ ሃንዳ ኩሜꬅ፥ 4 ኪላሆታኔ ኢስታ ቦላ ዲዛ ሃንዳ ሄሳꬆካ ቲሬ ጎዚ ኦይኪዳ ሃንዳታፔ ዶሬቲዳይታ። 5 ቄሴቲ ሄሳ ኡባ ሃራ ጹጌቲዛ ያርሾራ ጋꬂ ያርሾ ያርሺዛሶን ጹጌቶ፤ ሄሳ ማላ ታማን ጹጌቲዛ ያርሾ ሳዎይ ጎዳ ኡፋይሴስ።

6 «ኢሲፌቴꬃስ ሺቂዛ ያርሾይ ዶርሳፌ ዎይኮ ዴይሻፌ ጊዲኮ ኣዴ ዎይኮ ማጫ ጊዲዲ ኢስታ ቦላ ዎሶይ ባይንዳይታ ጊዴቶ። 7 ኢሲ ኣሲ ጎዳስ ሺሺዛ ያርሾይ ዶርሳ ላቃ ጊዲኮ፥ 8 ባ ኩሼዛ ላቃ ሁኤ ቦላ ዎꬂዲ ዱንካኔዛ ፔንጌ ቦላ ሹኮ፤ ቄሴቲ ሱꬃ ኢዛፔ ኤኪዲ ያርሾ ያርሺዛሶዛ ቦላ ሚሌዛ ዩዪ ኣꬋናስ ዉጼቶ። 9 ኢሲፌቴꬃ ያርሾስ ሺቂዛ ያርሾዛፔ ጎዳስ ታማን ጹጌቲዛ ያርሾ ጊዲ ሺቃናይቲ ሃንዳዛኔ ዞኮ ሜቄꬃ ጋርሳፌ ቃንጼቲዳ ጎይና ኡባ፥ ቃንꬃ ኣሾ ጎዚ ኦይኪዳ ሃንዳ ኡባ፥ 10 ኪላሆታኔ ኢስታ ጎዚ ኦይኪዳ ሃንዳ ኡባ ቃሴ ቲሬ ካሚ ኦይኪዳ ሎኦ ሃንዳ ኡባ፥ 11 ቄሴዚካ ሄሳ ኡባ ጎዳስ ካꬃ ያርሾ ሂስቲ ሺሺዲ ያርሾ ያርሺዛሶዛ ቦላ ጹጎ።

12 «ኢሲ ኣሲ ጎዳስ ያርሾ ዴይሼ ሺሺዛ ጊዲኮ፥ 13 ባ ኩሼ ዴይሻዛ ሁኤ ቦላ ዎꬂዲ ዱንካኔዛ ሲንꬃን ሹኮ፤ ቄሴቲ ሱꬃ ኢዛፔ ኤኪዲ ያርሾይ ያርሼቲዛሶዛ ቦላ ሚሌዛ ዩዪ ኣꬋናስ ዉጼቶ። 14 ሄ ሹኬቲዳ ኣሾዛፔ ሃይሳፌ ካሊዛ ኣሾ ቆሞታ ካꬃ ያርሾ ኦꬂዲ ጎዳስ ሺሼቶ፤ ሄይቲካ ቃንꬃ ኣሾ ካሚዛ ሃንዳ ኡባ፥ 15 ኪላሆታኔ ኢስታ ጎዚ ኦይኪዳ ሃንዳ፥ ቃሴካ ቲሬ ካሚ ኦይኪዳ ሎኦ ሃንዳዛፔ ኤኬቶ። 16 ቄሴዚካ ሄሳ ታማን ጹጌቲ ሳዊዛ ያርሾ ኦꬂዲ ያርሾ ያርሺዛሶን ጹጎ፤ ሃንዳይ ዉሪ ጎዳስ ሻኬቲዲ ዱማቶ። 17 ኢስራኤሌ ናይታፔ ሃንዳ ሚዛዴይ ዎይኮ ሜሄ ሱꬅ ኡዪዛዴይ ዶፖ፤ ሄሲ ዉሪ ኢስራኤሌ ናይቲ ዲዛሶኒኔ ኢስቲ ዲዛ ዎዴ ኡባን ሜርናስ ኤቂ ዲዛ ዎጋ ጊዶ።»