1 ጾሲ ሙሴ ሂዝጊ ኣዛዚዴስ፤ 2 «ኔኒ ኢስራኤሌ ናይታስ ዮታናይሲ ሃይሳ፤ ኦኒካ ኤሮንታ ባሌቴꬃን ናጋራ ኦꬂኮ ዎይኮ ኤሮንታ ጎዳ ኣዛዞታፔ ኢሳ ሞሪኮ ሃይሳፌ ካሊዛ ዎጋ ናጎ!

3 «ሄ ዎዴ ቲዬቲዳ ቄሴይ ናጋራ ኦꬂዲ ዴሬዚ ናጋራ ኦꬂዳ ሚሳቲሲ ቤቲኮ ኢዛ ቦላ ኢሲ ዎሶይካ ባይንዳ ኢሲ ሚርጎ ቦራ ኤሂዲ ባ ናጋራ ጊሻስ ጎዳስ ያርሾ ሺሾ። 4 ኮርማዛ ዱንካኔዛ ፔንጌ ኤሂዲ ባ ኩሼ ኢዛ ሁኤ ቦላ ዎꬂዲ ጎዳ ሲንꬃን ሹኮ። 5 ሄሳፌ ጉዬ ቄሴታ ሃላቃይ ሄ ቦራዛ ሱꬃፌ ጉꬃራ ኤኪዲ ጌዴ ዱንካኔዛ ጊዶ ጌሎ፤ 6 ጎዳ ኬꬃ ማጋላሻስ ሲንꬃ ባጋራ ኤቂዲ ባ ቢራꬌ ሱꬃን ጌልꬂ ጌልꬂ ኬሲዲ ላፑንቶ ጋካናስ ዉጾ። 7 ኢዛፔ ጉꬃ ሱꬅ ኤኪዲ ዱንካኔዛ ጊዶን ኤጻኔ ያርሺዛሶዛን ኦይዱ ባጋራ ዲዛ ꬌሞታ ቦላ ዎꬆ፤ ሃንኮ ኣቲዳ ሱꬃ ዱንካኔዛን ጌሊዛ ፔንጌ ባጋራ ጹጌቲዛ ያርሾይ ያርሼቲዛሶ ጋርሳን ጉሶ። 8 ሄ ሚርጎዛ ሃንዳዛ ኡባ፥ ቃንꬃ ኣሾ ካሚ ኦይኪዳ ሃንዳዛካ፥ 9 ኪላሆታካ ኢስታ ጎዚ ኦይኪዳ ሃንዳዛኔ ሄሳꬆካ ቲሬ ካሚ ኦይኪዳ ሞꬌዛፔ ዶሬቲዳይሳ ኤኮ። 10 ቄሴታ ሃላቃይ ሄሳ ኡባ ኤኪዲ ጹጌቲዛ ያርሾይ ሺቂዛ ያርሾሶዛ ቦላ ጹጎ፤ ኦሶዚካ ኢሲፌቴꬃስ ያርሾይ ሺቂዛ ሜሄዛ ሃንዳፌ ኤኪዲ ጹጌቲዛ ያርሾስ ሺቂዛ ማላ ሃኖ። 11 ጊዶ ኣቲን ጋልባዛ፥ ኣሾዛ፥ ሁኤዛኔ ቶሆታ፥ ማራጬዛራኔ ቃንꬃ ኣሾ፥ 12 ሄራፔ ጌዴ ካሬ ኬሶ፤ ጌዴ ቢዲንꬅ ኬሲ ቆሊዛሶ፥ ቱኖንታሶ ኤፊዲ ሚꬂ ሺሺዲ ታማን ጹጎ።

13 «ኢስራኤሌ ኣሳይ ኤሮንታ ባላ ኦꬂኮ ዎይኮ ኤሮንታ ጎዳ ኣዛዞፔ ኢሲኖ ሞሪዳ ጊዲኮ ሄ ናጋራይካ ኣሳፔ ጌሚኮ፥ 14 ሄ ኦሴቲዳ ናጋራይ ኤሬቲዳ ማላ ሄራካ ዴሬዚ ሄ ናጋራ ጊሻስ ያርሾስ ኢሲ ሚርጎ ኤሆ፤ ኢዛካ ኣሳይ ጋይቶቴꬃ ዱንካኔ ሲንꬄ ሺሾ። 15 ዴራ ሃላቃቲ ባንታ ኩሼ ሚርጎዛ ሁኤ ቦላ ዎꬂን ሄን ቦራዚ ጎዳ ሲንꬃን ሹኬቶ። 16 ቲዬቲዳ ቄሴይ ሄ ሚርጎዛ ሱꬃፌ ጉꬃራ ኤኪዲ ጌዴ ዱንካኔዛን ጌሎ፤ 17 ጎዳ ኬꬃ ማጋላሻስ ሲንꬃ ባጋራ ጊዲዲ ባ ኩሼ ቢራꬌታ ላፑንቶ ሱꬃን ጌልꬂ ጌልꬂ ኬሲዲ ጾሳ ሲንꬃን ዉጾ። 18 ቃሴካ ጉꬃ ሱꬅ ኤኪዲ ዱንካኔ ጊዶን ዲዛ ኤጻኔ ኢዛ ቦላ ያርሺዛሶዛስ ኦይዱ ባጋራ ዲዛ ꬌሞታ ቦላ ዎꬆ፤ ኣቲዳ ሱꬃ ቃሴ ጌዴ ዱንካኔን ጌሊዛሶን ጹጌቲዛ ያርሾይ ያርሼቲዛሶዛ ጋርሳን ጉሶ። 19 ሄሳፌ ቃሴ ሄ ሚርጎ ሞꬌዛ ኡባ ኤኪዲ ያርሾ ያርሺዛሶዛ ቦላ ጹጎ። 20 ኦሶዚ ዉሪካ ናጋራ ጊሻስ ሺቂዛ ሚርጎ ያርሺዛይሳꬆ ኦꬄቶ፤ ቲዬቲዳ ቄሴዚ ዴራፔ ናጋራ ዲጋና፤ ዴራሲካ ኣቶ ጌቴታና። 21 ሄሳፌ ጉዬ ሚርጎዛ ኣሳይ ዲዛሶፔ ጌዴ ካሬ ኬሲዲ ባ ናጋራ ጊሻስ ሺሺዳ ሚርጎዛ ካሴ ጹጎይሳꬆ ጹጎ፤ ሄሲካ ዴሬዛ ናጋራፔ ጌሺዛ ያርሾ ጊዳና።

22 «ናጋራ ኦꬂዳዴይኔ ኤሮንታ ዲሼ ባሌቴꬃን ጎዳ ባ ጾሳ ኣዛዞታፔ ኢሲኒዮ ሞሪዳዴይ ኢዚ ዴሬ ካሌꬂዛዴ ጊዲኮ፥ 23 ባ ኦꬂዳ ናጋራ ኢዚ ኤሪዳ ማላ ሄራካ ኢሲ ቦሬይ ኢዛ ቦላ ባይንዳ ዴይሻ ኦርጌ ባ ናጋራፔ ማሬታናስ ያርሾ ሺሾ። 24 ባ ኩሼ ዴይሻ ሁኤ ቦላ ዎꬂዲ ያርሾ ያርሺዛሶዛፔ ፑዴሃ ባጋራ ጹጌቲዛ ያርሾስ ሺቂዛ ሜሄቲ ሹኬቲዛሶን ጎዳ ሲንꬃን ሹኮ። ሄሲካ ናጋራ ዲጊዛ ያርሾ ጊዳና። 25 ቄሴዚ ሄ ሹኬቲዳ ሜሄዛ ሱꬃን ባ ቢራꬌታ ጌልꬂ ጌልꬂ ኬሲዲ ኦይዱ ባጋራ ዲዛ ꬌሞታ ቲዮ፤ ኢዛፔ ኣቲዳ ሱꬃ ያርሾይ ያርሼቲዛሶዛ ጋርሳን ጉሶ። 26 ሃንዳዛ ኡባ ያርሾ ያርሺዛሶዛ ቦላ ጹጎ፤ ሄ ኦሶይ ካሴ ኢሲፌቴꬃ ያርሾስ ሺሺዳ ሜሄታ ሃንዳ ጹጎይሳꬆ ኦꬄቶ፤ ሄሳꬆ ቄሴዚ ዴሬዛ ካሌꬂዛዴ ናጋራ ዉርሳናስ ያርሾ ሺሾ፤ ኢዛስካ ኣቶ ጌቴታና።

27 «ናጋራ ኦꬂዳዴይኔ ኤሮንታ ዲሼ ባሌቴꬃን ጎዳ ኣዛዞታፔ ኢሲኒዮ ሞሪዳዴይ ሃንኮ ዴራ ጊዶፌ ጊዲኮ፥ 28 ባ ኦꬂዳ ናጋራ ኢዚ ኤሪዳ ማላ ሄራካ ኢዚ ቦላ ኢሲ ቦሬይካ ባይንዳ ማጫ ዴይሽ ባ ናጋራ ጊሻስ ሺሾ። 29 ባ ኩሼ ሄ ዴይሻይ ሁኤ ቦላ ዎꬆ፤ ያርሾ ያርሺዛሶፔ ፑዴሃ ባጋራ ጹጌቲዛ ያርሾስ ሺቂዛ ሜሄቲ ሹኬቲዛሶን ሹኮ። 30 ቄሴዚካ ሄ ሹኬቲዳ ዴይሻይ ሱꬃን ባ ቢራꬌታ ጌልꬂ ጌልꬂ ኬሲዲ ኦይዱ ባጋራ ዲዛ ꬌሞታ ቲዮ፤ ኢዛፔ ኣቲዳ ሱꬃ ያርሾይ ያርሼቲዛሶዛ ጋርሳን ጉሶ። 31 ኢሲፌቴꬃስ ሺቂዛ ያርሾስ ሺቂዛ ሜሄታ ሞꬌ ቦላራ ሾቂ ኬሲዛይሳꬆ ሃይሳ ሃ ሜሄዛ ሞꬌካ ኡባ ቦላራ ሾቂ ዲጎ፤ ሳዎዚ ጎዳ ኡፋይሲዛ ያርሾ ኦꬂዲ ያርሺዛሶዛ ቦላ ጹጎ፤ ሄሳꬆ ቄሴዚ ሄ ኣዴዛ ናጋራ ኢዛፔ ዲጋናስ ያርሾ ሺሾ፤ ኢዛዴስካ ኣቶ ጌቴታና። ታይ 15፡27-28

32 «ሄ ኣዴዚ ባ ናጋራፔ ማሬታናስ ያርሾስ ዶርስ ሺሻና ኮይኮ ኢዚ ቦላ ኣይኮ ቦሬይ ባይንዳ ማጫ ዶርስ ሺሾ። 33 ኢዛዴይካ ዶርሳይ ሁኤ ቦላ ባ ኩሼ ዎꬆ፤ ያርሾ ያርሺዛሶፔ ፑዴሃ ባጋን ጹጌቲዛ ያርሾስ ሺቂዛ ሜሄቲ ሹኬቲዛሶን ሹኮ። 34 ቄሴዚ ቃሴ ዶርሳይ ሱꬃን ባ ቢራꬌ ጌልꬂ ጌልꬂ ኬሲዲ ያርሾ ያርሺዛሶዛስ ኦይዱ ባጋራ ዲዛ ꬌሞታ ሱꬃራ ቲዮ፤ ኢዛፔ ኣቲዳ ሱꬃ ያርሾ ያርሺዛሶ ጋርሳን ጉሶ። 35 ሄሳፌ ካሊዲ ኢሲፌቴꬃ ያርሾስ ሺቂዛ ሜሄታ ሞꬌ ሾቂ ኤኪዛይሳ ማላ ሃ ዶርሳይ ሞꬌካ ኡባ ሾቂ ዲጎ፤ ሄሳካ ጎዳስ ሺቂዛ ካꬃ ያርሾስ ሺሺዛሶዛ ቦላ ጹጎ፤ ሄሳꬆ ቄሴዚ ሄ ኣዴዛ ናጋራ ኢዛፔ ዲጋናስ ያርሾ ሺሾ፤ ኢዛዴስካ ኣቶ ጌቴታና።