ሂዚቄላ ቲንቢቴ
ጊዶ ቆፋ
ናቤ ሂዚቄሊ ዬሩሳላሜይ ኪርስቶሳ ዬሌታፔ ካሴ፥ 586 ላይꬃን ላሌታናፔ ሲንꬃኒኔ ላሌቲዳፔ ጉዬን ዲኤቲዲ ባቢሎኔን ዴኢዴስ። ኢዚ ቲንቢቴን ዮቲዳ ቃላይ ዲኤቲ ቢዲ ባቢሎኔን ዲዛይታሲኔ ዬሩሳላሜን ዲዛ ኣሳታሳ፤ ሂዚቄላ ቲንቢቴ ማጻፋይ ኦይዱ ኣይፌ ዮኦን ሻኬቴስ። 1. ኣሳ ቦላ ጾሳ ፒርዳይ ያና ማቲዳይሳኔ ዬሩሳላሜይ ኦይኬታዳ ላሌታና ማቲዳይሳ ቆፍሴስ (1-3)። 2. ጾሳይ ባ ኣሳ ኡንኤꬂዳኔ ባሌꬂዳ ዱማ ዱማ ካዎቴꬃታ ቃጻያናስ ዮቲዛ ቃላ (4-24)። 3. ዬሩሳላሜ ኩንዴꬃፌ ሲሚን ኢስራኤሌ ኣሳ ሚንꬃናስ ኢሜቲዳ ኪታኔ ሲንꬃፌ ኢዚስ ያና ሎኦ ቃዳ ጊሻስ ዮቴቲዳ ሂዶታ ቃላ (25-39)። 4. ጾሳ ኬꬂኔ ኢስራኤሌ ካዎቴꬃይ ቤኒይሳꬆ ሃናናይሳ ሂዚቄሊ ዱማ ሚስሌን ቆንጪሲዴስ (40-48)።
ሂዚቄሊ ጊታ ኣማኖይኔ ኣኬካይ ዲዛ ኣሳ። ሲንꬃፌ ሃናና ዮኦታ ኢዚ ኣጁታን ቤዪዴስ። ኢዛ ኪታታፔ ዳሪዛ ባጋቲ ቆንጬን ሌሚሶራ ፖሌቲዳ። ሂዚቄሊ ቆንጪሲ ቤሲዳይ ጊዶ ዎዚናኒኔ ኣያናን ኦራꬃቴꬅ ኮሺዛ ጊሻስ ኢሶይ ኢሶይ ባ ናጋራ ጊሻስ ኦይሼታና፤ ሄሳፌካ ቦላራ ዴሬዛ ኦራꬃቴꬃን ያና ሂዶታ ቆንጪሴስ። ሂዚቄሊ ቄሴኔ ናቤ ጊዲዳ ጊሻስ ጾሳ ኬꬃ ጊሻሲኔ ጌሻቴꬃ ጊሻስ ዱማ ዉዴቲዳይሳ ቤሲዴስ።
ሃ ማጻፋይ ኦይኪዳ ኩሜꬃ ቆፋ
ሂዚቄሊ ናቤቴꬃስ ዶሬቴꬂኔ ጾሳ ቦንቾ ቤኦ 1፡1—3፡27
ሂዚቄሊ ሌሚሶን ቆንጪሲዳ ዬሩሳላሜኔ ዩሁዳ ꬋዮ 4፡1—5፡17
ባሺ ማቲዳይሳ ቆንጪሴꬅ 6፡1—7፡27
ጾሳ ቦንቾይ ናጋራንቻ ጊዲዳ ዬሩሳላሜ ኣጊ ቡስ 8፡1—11፡25
ዩሁዳ ኩንዴꬂኔ ዬሩሳላሜ ኩንዴꬅ 12፡1—24፡27
ሃራ ካዎቴꬃታ ቦላ ዮቴቲዳ ፒርዳ 25፡1—32፡32
ዴሬይ ባ ናጋራፔ ሲማና ማላ ሂዚቄሊ ኢሚዳ ሴራ 33፡1-20
ዬሩሳላሜ ኩንዴꬅ 33፡21-22
ጾሲ ዴራ ዛራናሲኔ ዩሁዳ ኣሻናስ ኢሚዳ ሂዶታ 34፡1—37፡28
ጎጌ ጾኔቴꬂኔ ኢስራኤሌ ሲሞ 38፡1—39፡29
ሲንꬃፌ ኦሴታና ጾሳ ኬꬃ ጊሻስ ሂዚቄሊ ቤኢዳ ኣጁታ 40፡1—46፡24
ጾሳ ኬꬃ ጊዶፌ ፑልቲዛ ሃꬃ 47፡1-12
ኢስራኤሌታ ቆሞን ቆሞን ጋካና ጺንጾ 47፡13—48፡35
1
ጎዳ ቦንቾ
1 ሄꬑ ታማንꬃ ላይꬃን፥ ኦይዳንꬆ ኣጊናን፥ ኢቻሻንꬆ ጋላሳን፥ ታኒ ኮቦሬ ሻፋን ዲኤቲዲ ቢዳይታ ጊዶን ዳሼ ሳሎቲ ዶዬቲን ጾሳ ኣጁታ ቤኣዲስ። ኣጁ 19፡11
2 ካዎ ኢዮኣኪኔይ ዲኤቲዳ ኢቻሻንꬃ ላይꬃን፥ ሄ ኣጊናን ኢቻሻንꬆ ጋላሳን፥ 2ካዎ 24፡10-16፤ 2ታሪ 36፡9-10 3 ባቢሎኔን ኮቦሬ ሻፋ ማታን ዲዛ ቡዜ ና ቄሴ ሂዚቄላኮ ጎዳ ቃላይ ዪዴስ፤ ጎዳ ዎልቃይ ታና ኦይኪዴስ።
4 ታኒ ꬎቁ ጋ ጼሊሺን ፑዴሃ ባጋፌ ጎቴ ጫርኮይ ዪዛይሳ ቤኣዲስ፤ ኢዛፔ ዎልቃንꬂ ዋዋጪ ጊዛ ꬊፒ ጊዳ ሻራ ጊታ ፖኦይ ጊዶꬂ ዎꬂዴስ፤ ታማዛስ ጊዶ ኣዳይ ቢራታ ቦንቆ ሚሳቴስ። 5 ታማዛ ጊዶን ሼምፖራ ፓጻ ዲዛ ኦይዱ ሜꬌቴꬃታ ሚስሌይ ዴስ፤ ኢስታ ሜꬋይካ ኣሳ ሜꬋ ሚሳቴስ። ኣጁ 4፡6 6 ኢስታስ ኢሳስ ኢሳስ ኦይዱ ኣይፌሶይኔ ኦይዱ ቄፌይ ዴስ። 7 ኢስታስ ሲቲ ጊዳ ሉሌ ቶሆይ ዴስ፤ ኢስታ ቶሆይ ማራ ቂንጪፊሌ ማላኔ ቁጬቲዲ ጾልቂዛ ጻርቂማላ ሚሳቴስ። 8 ኢስታስ ኦይዱ ባጋራ ቄፌታ ጋርሳን ኣሳ ኩሼይ ዴስ፤ ሄ ኦይዳታሲካ ኣይፌሶቲኔ ቄፌቲ ዴቴስ። 9 ኢስታ ቄፌቲ ኢሶይ ኢሳራ ዲሼቴቴስ፤ ኢስቲ ኡባይካ ጉዬ ሲሚ ጼሎንታ ሲቲ ጊዲ ሲንꬅ ቤቴስ።
10 ኢስታ ኣይፌሶይ ሃይሳፌ ካሊ ዲዛይሳ ማላ፤ ኢስታ ኦይዳታሲካ ኢሳስ ኢሳስ ሲንꬃ ባጋራ ኣሳ ኣይፌሶ ማላይ ዴስ፤ ኡሻቻ ባጋራ ጋሞ ኣይፌሶ ማላይ፥ ሃዲርሳ ባጋራ ቦራ ኣይፌሶ ማላይ፥ ቃሴካ ኢስታ ኢሳስ ኢሳስ ጉዬ ባጋራ ጎሌ ኣይፌሶ ማላይ ዴስ። ሂዚ 10፡14፤ ኣጁ 4፡7 11 ኢስታ ኣይፌሶይ ሄሳ ሚሳቴስ፤ ኢስታ ቄፌይ ፑዴ ያንጌቲ ኡቲዴስ፤ ኢስታስ ኢሳስ ኢሳስ ናምኡ ናምኡ ቄፌይ ዴስ፤ ኢሳ ኢሳ ቄፌይ ሃንኮይሳ ቄፌራ ዲሼቲ ኡቲዴስ። 12 ኢስቲ ኡባይካ ሲቲ ጊዲ ሲንꬅ ቤቴስ፤ ጉዬ ሲሞንታ ጾሳ ኣያናይ ቢዛሶ ኣዋካ ቤቴስ። 13 ሃ ሼምፖራ ፓጻ ዲዛ ሜꬌቴꬃታ ሜꬋይ ኤጺዛ ታማ ቦንቆኔ ጾምፔ ሚሳቴስ፤ ሄ ሼምፖራ ፓጻ ዲዛ ሜꬌቴꬃታ ጊዶን ታማይ ያኔ ሃ ቃጼስ፤ ታማዚ ጶሌስ፤ ኢዛ ጊዶፌካ ዎልቃንꬂ ኬዜስ። 14 ሃ ሼምፖራ ፓጻ ዲዛ ሜꬌቴꬃቲ ዎልቃንꬂ ኤሶን ዋዋጪ ጊዛ ማላ ያኔ ሃ ሲሜሬቴቴስ።
15 ታ ሃ ኦይዱ ሼምፖራ ፓጻ ዲዛ ሜꬌቴꬃታ ጼላሼ፥ ኦይዱ ኣይፌሶቲ ሼምፖራ ፓጻ ዲዛ ሜꬌቴꬃታ ማታን ኢሲ ኢሲ ኢርዞ ቢታ ቦላ ቤያዲስ። ሂዚ 10፡9-13 16 ሄ ኢርዞታ ሜꬋይኔ ሃኖታይ ሃይሳፌ ካሊዛይሳ ማላ፤ ኣልኦ ሹቻ ማላ ጾልቄቴስ፤ ኦይዳታ ሜꬋይካ ኢሲ ማላ፤ ኢሲ ኢሲ ኢርዞይ ሃራ ኢርዞራ ቃጼቲ ኡቲዳ ሚሳቴስ። 17 ኢስቲ ቢዛ ዎዴ ሜꬌቴꬃቲ ኦይዱ ባጋ ዩያና ዳንዳዬቴስ፤ ሜꬌቴꬃቲ ቢዛ ዎዴ ኢርዞቲ ያኔ ሃ ጌቴና። 18 ሄ ኦይዱ ኢርዞታስ ኦꬖꬖይ ዴስ፤ ሃ ኦይዱ ኢርዞቲ ጊታኔ ባቢሲዛዛ፤ ዩዪ ኣꬋናስካ ኢስታን ኣይፌቲ ኩሚዳ። ኣጁ 4፡8
19 ሃ ሼምፖራ ፓጻ ዲዛ ሜꬌቴꬃቲ ቢዛ ዎዴ ኢስታ ሚሌን ዲዛ ኢርዞቲካ ቤቴስ፤ ሄ ሼምፖራ ፓጻ ዲዛ ሜꬌቴꬃቲ ቢታፌ ፑዴ ዴንዲዛ ዎዴ ኢርዞቲካ ኢስታራ ኢሲፌ ዴንዴቴስ። 20 ጾሳ ኣያናይ ቢዛሶ ኣዋካ ኢስቲ ቤቴስ፤ ኣያናይ ኢስታ ጊዶን ዲዛ ጊሻስ ኢርዞቲ ኢስታራ ኢሲፌ ፑዴ ዴንዴቴስ። 21 ዴኦይ ዲዛ ሜꬌቴꬃቲ ቢዛ ዎዴ ኢርዞቲካ ቤቴስ፤ ኢስቲ ኤቂዛ ዎዴ ኢርዞቲካ ኤቄቴስ፤ ቃሴ ኢርዞቲ ኢስታራ ኢሲፌ ፑዴ ዴንዴቴስ።
22 ሃ ሼምፖራ ፓጻ ዲዛ ሜꬌቴꬃታ ሁኤፔ ቦላራ ባቢሲዛኔ ማስቶቴ ማላ ጾልቂዲ ኣይፌ ጫዲዛ ሳሎ ጉፋንꬆ ሚሳቲዛይ ሚጬቲ ዴስ። ኣጁ 4፡6 23 ሄ ሳሎ ጉፋንꬆዛፔ ጋርሳ ባጋራ ኢስታ ቄፌይ ሲቲ ጊዲ፥ ኢሶይ ኢሳኮ ሚጬቲ ኡቲዴስ፤ ቃሴ ኢስታ ኡባሲካ ኢስታ ቦላ ካሚዛ ናምኡ ናምኡ ቄፌይ ዴስ። 24 ሃ ሼምፖራ ፓጻ ዲዛ ሜꬌቴꬃቲ ፒራꬊዛ ዎዴ ኢስታ ቄፌታ ጊሪሳ ሲያዲስ፤ ሄ ጊሪሳይ ዲኦ ሃꬃ ጉንꬃ ማላ፥ ኡባ ዳንዳይዛ ጾሳ ጬንጉርሳ ማላኔ ጮራ ኦላንቻታ ዎጫማ ማላ ሃኒዛይሳ ሲያዲስ። ኢስቲ ፒራꬎ ኣጊዛ ዎዴ ባንታ ቄፌዛ ሺጵ ሂስቴቴስ። ኣጁ 1፡15፤ 19፡6
25 ኢስቲ ፒራꬊዛይሳ ኣጊዲ ባንታ ቄፌዛ ሺሺዳ ማላ ኢስታ ሁኤፔ ቦላራ ዲዛ ሳሎ ጉፋንꬆፌ ቦላራ ጊሪሲ ሴቴቲዴስ። 26 ኢስታፌ ቦላራ ዲዛ ሳሎ ጉፋንꬆፌ ꬎቁ ጊዲ ሲምፔሬ ኣራታ ሚሳቲዛይ ዴስ፤ ሄ ኣራታ ቦላ ኣስ ሚሳቲዛዚ ኡቲዴስ። ሂዚ 10፡1፤ ኣጁ 4፡2-3 27 ኢዛስ ጼስ ሚሳቲዛሶፔ ፑዴ ባጋይ ታማን ቦንቂዳ ቢራታ ሚሳቲዛይሳ፤ ጼስ ሚሳቲዛሶፔ ዱጌ ባጋይ ታማ ሚሳቲዛይሳ ቤኣዲስ፤ ኢዛ ዩሾን ጶሊዛ ፖኦይ ዴስ። ሂዚ 8፡2 28 ኢዛ ዩሾን ዲዛ ጶሊዛ ፖኦይ ኢራ ጋላስ ሻራ ቦላ ኤቂዳ ዙላ ሚሳቴስ።
ሄሲካ ጎዳ ቦንቾ ቆንጬꬅ ሚሳቴስ። ታኒ ሄሳ ቤኢዳ ዎዴ፥ ቢታን ዱጌ ጉፋናዳ ኢሳዴ ሃሳያ ጬንጉርስ ሲያዲስ።