1 ኢዚ ታና፥ «ሃይሶ ኣሳ ናዉ! ዴንዳ ኔ ቶሆን ኤቃ፤ ታኒ ኔስ ዮታና» ጊዴስ። 2 ኢዚ ታስ ዮቲሺን ጾሳ ኣያናይ ታ ጊዶ ጌሊዲ ታና ታ ቶሆን ኤሲዴስ። ኢዚ ታስ ዮቲዛይሳካ ሲያዲስ።

3 ኢዚካ ታስ፥ «ሃይሶ ኣሳ ናዉ! ታ ቦላ ማካሊዳ ማካላንቻ ዴሬ ኢስራኤሌ ኣሳኮ ታ ኔና ኪታይስ፤ ኢስቲኔ ኢስታ ኣዋቲ ሃች ጋካናስካ ታ ቦላ ማካሊዳ። 4 ኢስቲ ዬላይ ባይንዳይታኔ ዎዚና ሙሜታ ጊዲዳ ጊሻስ ታኒ ኔና ኢስታኮ ኪታይስ። ኔ ባዳ ኢስታስ፥ ‹ኡባ ሃሪዛ ጎዳይ ዮቲዴስ› ጋ ዮታ፤ 5 ኢስቲ ማካላንቻ ኬꬅ ጊዲዳ ጊሻስ ኢስቲ ሲዪኮካ ሲዮንታ ኢጺኮካ ኢስታ ጊዶን ናቤይ ዲዛይሳ ኢስቲ ኤራና። 6 ሃይሶ ኣሳ ናዉ! ኢስታስ ዎይኮ ኢስታ ቃላስ ባቦፋ! ኣጉንꬂኔ ኪንዲቾይ ኔ ዩሾን ዲኮካ ቃሴ ማሲማሶታ ጊዶን ኔ ኡቲኮካ ባቦፋ። ኢስቲ ማካላንቻ ዛሬ ጊዲኮካ ኢስቲ ኔና ጊዛይሳስ ባቦፋ፤ ኢስታስ ዳጋሞፋ። 7 ኢስቲ ማካላንቻ ዛሬ ጊዲዳ ጊሻስ ኢስቲ ሲዪኮካ ሲዮንታ ኢጺኮካ ታ ቃላ ኢስታስ ዮታ። 8 ኔኒ ጊዲኮ ሃይሶ ኣሳ ናዉ! ታ ኔስ ዮቲዛይሳ ሲያ! ሄ ማካላንቻ ዛሬታ ማላ ማካሎፋ፤ ኔ ዶና ዶያዳ ታኒ ኔስ ኢሚዛይሳ ማ» ጊዴስ።

9 ሄሳፌ ጉዬ ታኒ ጼሊሺን ኢሲ ኩሼይ ታኮ ሚጬቲዳይሳ ሄራካ ቤኣዲስ፤ ሄ ኩሼዛን ጻꬃ ማጻፋይ ዴስ። 10 ኢዚ ታ ሲንꬃን ሄ ጻꬃ ማጻፋ ቢርሺዴስ፤ ሄ ጻꬃ ማጻፋን ጊዶ ባጋራኔ ካሬ ባጋራ ዚላሲ፥ ዬሆይኔ ዋሶ ቃላይ ጻፌቲ ኡቲዴስ። ኣጁ 5፡1