1 «ሃይሶ ኣሳ ናዉ! ኡርቃፌ ሜꬌቲዳ ኢሲ ጹቤ ኤካዳ ኔ ሲንꬃን ዎꬃ፤ ሂስታዳ ዬሩሳላሜ ሚስሌ ኢዛ ቦላ ኦꬃ። 2 ሂስታዳ ዎታዳራይ ጊዶꬂዛ ማላ ኢዞ ጊዶꬃ፤ ሚጻ ኢዚን ጊጊሳ፤ ቢታ ሺሻ ዶራ፤ ኦላ ዎሳናታ ኢዚ ዩሾን ጊጊሳ፤ ጊምቤዛ ላሊዛ ዱሩማ ኢዚ ዩሾን ዋጻ። 3 ቃሴ ቢራታ ባሼ ኤካዳ ኔፔኔ ካታማፔ ጊዶን ቢራታ ጊምቤ ማላ ኤሳ። ኔ ሲንꬃ ኢዚኮ ዛራዳ ዴሬቃ፤ ኢዛ ዶዴቲዳሮ ጊዳና፤ ኔካ ኢዞ ዶዳና። ሄሲካ ኢስራኤሌ ኣሳስ ማላታ ጊዳና።

4 «ታኒ ኢስራኤሌ ኬꬃ ሙሪዛይሳስ ማላታ ጊዳና ማላ ኔኒ ሃዲርሳ ሚሌን ኢቻ፤ ኔኒ ሃዲርሳ ሚሌን ኢቺዳ ዎዴታ ኡባን ኢስራኤሌ ኬꬃ ባላ ማላ ጊዳና ማላ ቤሳና። 5 ኢስራኤሌ ኬꬃይ ባ ባላን ዋኒ ቃጻዬታናኮ ኔ ቤሳና ማላ ታ ኔስ 390 ጋላሳታ ኢማዲስ፤ ኢሲ ኢሲ ጋላሳይ ኢስቲ ቃጻዬታና ኢሲ ኢሲ ላይꬅ ቤሴስ።

6 «ሄሳፌ ጉዬ ኔኒ ኡሻቻ ሚሌን 40 ጋላስ ኢቻ፤ ሄሲ ዩሁዳ ኣሳይ ባ ባላን ዋኒ ቃጻዬታናኮ ቤሲዛ ማላታ ጊዳና፤ ኢሲ ኢሲ ጋላሳይ ኢስቲ ቃጻዬታና ኢሲ ኢሲ ላይꬅ ቤሴስ። 7 ኔ ሲንꬅ ዬሩሳላሜ ዶዴቴꬃኮ ዛራዳ ዴሬቃ፤ ኔ ኩሼ ዴንꬃዳ ማንዳሼ ቲንቢቴ ኢዚ ቦላ ዮታ። 8 ሄ ዶዴቴꬃ ኣጊናይ ዉራና ጋካናስ ኔ ሚሌ ሺሮንታ ማላ ታ ኔና ዎዶሮን ቃቻና።

9 «ሃኢ ኔኒ ጊስቴኔ ባንጋ፥ ባኤላኔ ሚሲራ፥ ማሊዶኔ ሙርቃ ኤካዳ ኦቶን ዎꬃ፤ ኢዛፔ ካꬃ ማ፤ ሂስታዳ ኔኒ ሃዲርሳ ሚሌን ኢቻ ዲዛ 390 ጋላሳታን ማና። 10 ሃች ሃች ኔ ማና ካꬃ ጌዳራ ዎꬃ፤ ኢዛ ዎዴን ዎዴን ኢሲ ዞላ ማ። 11 ኔ ኡያና ሃꬃካ ማካ ዎꬃ፤ ሄሳ ኢዛ ዎዴን ዎዴን ናምኡ ኩባያ ኡያ። 12 ሄ ዋላኬቲዳ ካꬃ ኤካዳ ዴራ ሲንꬃን ባንጋ ኡኬꬃ ማላ ሺኣ ኬፌን ኡካዳ ማ።» 13 ጎዳይካ፥ «ሄሳ ማላ ሃኖታን ኢስራኤሌ ኣሳይ ታኒ ኢስታ ላላና ካዎቴꬃታ ጊዶን ኢስቲ ቱና ካꬅ ማናይሳስ ማላታ» ጊዴስ።

14 ሂስቲን ታኒ ዛራዳ፥ «ሃይ! ኡባ ሃሪዛ ጎዳዉ! ሙሌካ ታ ሄሳ ማላን ቱና ኤሪኬ፤ ታኒ ዬላጋቴꬃፌ ዶማዳ ባዉታ ዎይኮ ዶኣይ ዎꬊዳይሳ ማ ኤሪኬ፤ ቱኒዳ ኣሾይካ ታ ዶናኮ ሺቂ ኤሬና» ጋዲስ።

15 ኢዚካ ታና፥ «ኤሮ ሎኦ፥ ሺኣ ኬፌን ኡኪዛይሳ ኣጋዳ ኦሻ ኬፌን ኡካ» ጊዴስ።

16 ቃሴካ ጎዳይ ታና፥ «ሃይሶ ኣሳ ናዉ! ኣኬካ፤ ታኒ ዬሩሳላሜስ ካꬂ ዪዛሶታ ዱꬃና ሃናይስ፤ ኣሳይ ካꬃ ሂርጊሼ ማካን ማና፤ ሃꬃካ ያዪሼ ጉꬃራ ኡያና። 17 ሄሳን ኢስታስ ዲዛ ካꬂኔ ሃꬂ ፓጫና፤ ኢሶይ ኢሳ ቤኢሼ ጮልኡ ጋና፤ ኢስቲ ባንታ ናጋራ ጋሶን ጊልቂ ꬋያና።