1 «ሃይሶ ኣሳ ናዉ! ቃራ ማሻ ኤካዳ ማጋላን ሜዲዛ ማላ ኔ ሁኤኔ ኔ ቡቼ ኢዛን ሜዳ። ሂስታዳ ኔ ቢናና ሜዛኔን ጌዳራዳ ሄꬑ ኬሳ ሻካ። 2 ኔ ዶዲዛ ዎዴይ ዉርሺን ኔኒ ሻኪዳ ቢናናስ ኢሲ ኩሼዛ ዬሩሳላሜ ካታማ ሚስሌ ጊዶን ጹጋ፤ ናምኣንꬆ ኩሼዛ ካታማይ ዩሾን ጊꬃ ማሻን ቃንጼሬꬃ ዬጋ፤ ኣቲዳ ሄꬓንꬆ ኩሼዛ ጫርኮ ቦላ ላላ፤ ታኒ ኢስታ ማሻን ዬዴሬꬃና። 3 ቢናናፔ ጉꬅ ኤካዳ ኔ ሴሎ ማይኦ ጼራን ቃቻ። 4 ቃሴ ሄ ቢናናፌ ጉꬃራ ኤካዳ ታማን ጹጋ፤ ታማይ ሄፔ ኬዚዲ ኢስራኤሌ ኣሳ ማና» ጊዴስ።

5 ኡባ ሃሪዛ ጎዳይ፥ «ዴሬታ ኡባ ኢዚ ዩሾን ዎꬃዳ ካዎቴꬃታ ጊዶን ዎꬂዳ ዬሩሳላሜ ካታማያ ሃኖ። 6 ጊዶ ኣቲን ኢዛ ባ ኢታ ኦሶን፥ ባ ዩሾን ዲዛ ቢታታፔኔ ካዎቴꬃታፔ ጌዴ ኢታዳ ታ ዎጋ ቦላኔ ማራ ቦላ ማካላዱስ፤ ኣዳካ ኢዛ ታ ዎጋ ካꬋዱስ፤ ታ ማራካ ካላቤኩ» ጌስ።

7 ሄሳ ጊሻስ ኡባ ሃሪዛ ጎዳይ፥ «ኢንቴ ኢንቴ ዩሾን ዲዛ ካዎቴꬃታፔ ኣꬊ ጩቦቲዛይታ ጊዲዴታ፤ ታ ማራ ካሊቤኬታ፤ ታ ዎጋስካ ኣዛዜቲቤኬታ፤ ሃራይ ኣቶሺን ኢንቴ ዩሾን ዲዛ ካዎቴꬃቲ ናጊዛ ዎጋዮካ ናጊቤኬታ» ጌስ።

8 ሄሳ ጊሻስ ኡባ ሃሪዛ ጎዳይ፥ «ሄኮ፥ ታኒ ታ ባጋራ ኔ ቦላ ዴንዳዲስ፤ ካዎቴꬃታ ሲንꬃን ታኒ ኔ ቦላ ፒርዳ ኤሃና። 9 ኔ ሃራሲዛ ኤቃ ጾሳታ ጎይኒዳ ጋሶን ታኒ ሃይሳፌ ካሴ ኦꬃ ኤሮንታ ሚሺኔ ሃይሳፌ ጉዬካ ኦꬆንታ ሚሽ ታ ኔ ቦላ ኦꬃና። 10 ሄሳፌ ዴንዲዳይሳን ኔ ጊዶን ኣዋቲ ባንታ ናይታ፥ ናይቲ ባንታ ኣዋታ ማና፤ ታ ኔ ቦላ ፒርዳ ኤሃና፤ ኔፔ ኣቲዳይታ ታኒ ጫርኮን ላላና። ኤር ዚላ 4፡10 11 ሄሳ ጊሻስ ኡባ ሃሪዛ ጎዳይ፥ ታኒ ዴኦ ጾሳ ጊዲዳይሳን ጫቃይስ፡ ኔኒ ታ ኬꬃ ቱና ሚስሌታኒኔ ሃራሲዛ ኔ ኦሶ ኡባን ቱኒሲዳ ጊሻስ ታ ኔና ቡጫ ꬋይሳና፤ ታ ኔና ቃꬌታ ኣይፌን ጼሊኬኔ ማሪኬ። 12 ኔ ኣሳፔ ኢሲ ኩሼይ ካታማ ጊዶን ኢታ ሃርጌኒኔ ኮሻን ሃይቃና፤ ናምኣንꬆ ኩሼይ ካታማ ጊምቤፌ ካሬራ ማሻን ዉራና፤ ኣቲዳ ሄꬓንꬆ ኩሼዛ ታኒ ጫርኮስ ላላናኔ ማሻ ሾዳ ዬዴꬃና።

13 «ሄሳፌ ጉዬ ታ ሃንቆይ ዶቻና፤ ኢስታ ቦላ ቦሻይካ ሲማና፤ ታ ኢስታ ቦላ ሃሎ ኬሲኮ ታስ ዎፑ ጋና፤ ታ ኢስታ ቦላ ባሻ ጋꬂዳፔ ጉዬ ታኒ ጎዳይ ዚልኤታ ሃሳይዳይሳ ኢስቲ ኤራና።

14 «ኔ ዩሾን ዲዛ ካዎቴꬃታ ጊዶን ኔ ማታራ ኣꬊዛ ኡባ ሲንꬃን ታኒ ኔና ቡላሳናኔ ቂꬌስ ኣꬃ ኢማና። 15 ሃንቆኒኔ ቦሻን ቃሴካ ዪሎኒኔ ሃንቆን ታ ኔ ቦላ ፒርዳ ኤሂዛ ዎዴ ኔ ዩሾን ዲዛ ካዎቴꬃታስ ኔኒ ቂꬌሲኔ ሚቻስ፥ ሴራሲኔ ዳጋማስ ማላታ ጊዳና። ታኒ ጎዳይ ሃይሳ ዮታዲስ። 16 ዱኪዛ ዎንዳፌ ማላ ዎꬊዛኔ ꬋይሲዛ ኮሻ ታ ኢንቴ ቦላ ዬዲዛ ዎዴ ቱማፔ ታ ኢንቴና ꬋይሳናስ ዬዳይስ፤ ታ ኢንቴስ ኮሻ ቦላ ኮሻ ኤሃና፤ ታኒ ካꬂ ዪዛሶ ሜሊሳና። 17 ታኒ ኮሻኔ ዎራ ዶኣታ ኢንቴ ቦላ ዬዳና፤ ኢስቲካ ኢንቴና ናይ ባይንዳይታ ኦꬃና፤ ታ ኢንቴ ቦላ ኢታ ሃርጌ፥ ሱꬂኔ ማሻ ኤሃና፤ ታኒ ጎዳይ ሃይሳ ዮታይስ» ጌስ። ኣጁ 6፡8