1 ኑኒ ዲኤቲዳ ናምኡ ታማኔ ኢቻሻንꬃ ላይꬃን፥ ኮይሮ ኣጊናን ታማንꬃ ጋላሳን፥ ዬሩሳላሜይ ኩንዲዳ ታማኔ ኦይዳንꬃ ላይꬃን ሄ ጋላስ ጎዳ ኩሼይ ታ ቦላ ዴስ፤ ኢዚካ ታና ዬሩሳላሜ ኤፊዴስ። 2 ጾሳ ኣጁታን ኢዚ ታና ኢስራኤሌ ቢታ ኤፊዲ ꬎቃ ዙማ ቦላ ዎꬂዴስ፤ ሄ ዙማፔ ዱጌሃ ባጋራ ካታማ ሚሳቲዛ ጊምቤ ኬꬃታ ቤኣዲስ። ኣጁ 21፡10 3 ኢዚ ታና ሄ ኤፊዴስ፤ ሂስቲን ታኒ ጻርቂማላ ሚሳቲዛ ኢሲ ኣስ ቤኣዲስ፤ ኢዚ ላይኖፔ ኦሴቲዳ ዎዶሮኔ ዋꬋ ሚꬅ ባ ኩሼን ኦይኪዲ ጌሊዛ ፔንጌ ቦላ ኤቂዴስ። ኣጁ 11፡1፤ 21፡15 4 ኣዴዚ ታና፥ «ሃይሶ ኣሳ ናዉ! ኔ ኣይፌን ጼላ፤ ኔ ሃይꬃን ሲያ፤ ታ ኔና ቤሲዛይሳ ኡባ ዎዚናን ዎꬃዳ ኤዝጋ። ኔ ሃ ዪዳይ ሃይሳስ ጊዲዳ ጊሻስ ኔ ቤኢዳ ኡባ ኢስራኤሌ ኬꬃስ ዮታ» ጊዴስ።

5 ታኒ ጾሳ ኬꬃ ሙሌራ ዩዪ ኣꬊዳ ዲርሳ ጊምቤ ቤኣዲስ። ኣዴዛ ኩሼን ኡሱፑን ዋꬋ ጊዲዛ ዛንጌ ቤኣዲስ፤ ኢሲ ኢሲ ዋꬋ ሚሻይ ዋꬋኔ ታꬋኮ ጊዴስ፤ ኢዚ ጊምቤዛ ዋꬊዴስ፤ ኣኮቴꬃይ ኢሲ ዋꬋ፥ ጌሳይካ ኢሲ ዋꬋ ጊዲዴስ። 1ካዎ 6፡1-38፤ 2ታሪ 3፡1-9 6 ሄሳፌ ጉዬ ኣርሼ ኬሳ ባጋራ ዲዛ ዲርሳ ፔንጌኮ ቢዴስ። ኬቻታ ኬዚዲ ጌሊዛ ፔንጌዛ ማዲራኬ ዋꬊዴስ፤ ኢዛስ ጌሳይ ኡሱፑን ዋꬋ ጊዲዴስ። 7 ዛቤታ ኬꬃስ ጌሳይኔ ጎምፓይ ኡሱፑን ኡሱፑን ዋꬋ፥ ኬꬃታ ጊዶን ዲዛ ጊምቤ ኦርዴቴꬃይ ኢቻሽ ዋꬋ ጊዲዴስ፤ ጾሳ ኬꬃፌ ሲንꬃ ባጋራ ኣꬊ ቢዛሶን ዲዛ ዳራንቻን ጊዶ ባጋራ ዲዛ ማዲራኬዛስ ዉይጌዛ ዋꬋይ ኡሱፑን ጊዲዴስ።

8 ሄሳፌ ጉዬ ጌሊዛሶራ ካንꬂ ቢዛ ዳራንቻ ዋꬊዴስ። 9 ኢዛስ ኣዱሳቴꬃይ 8 ዋꬋ፥ ቱቄታ ኦርዴቴꬃይ 2 ዋꬋ ጊዴስ፤ ጌሊዛሶ ፔንጌን ዲዛ ዳራንቻይ ጾሳ ኬꬃ ጊናን ዴስ።

10 ኣርሼይ ሞኪዛ ባጋ ፔንጌዛስ ሃዲርሳ ባጋራኔ ኡሻቻ ባጋራ ኢሲ ጊና ጊዲዳ ሄꬑ ሄꬑ ዛቤ ኬꬃቲ ዴቴስ፤ ኢስታ ጊዶን ሻኪዛ ጊምቤታ ኦርዴቴꬃይ ኢሲ ጊናኔ ኢሲ ማላ።

11 ሄሳፌ ጉዬ ፔንጌዛ ጎምፓ ዋꬊዴስ፤ ኢዛ ጎምፓይ ታሙ ዋꬋ፥ ኣዱሳቴꬃይ ታማኔ ሄꬑ ዋꬋ ጊዲዴስ። 12 ዛቤ ኬꬃታስ ኢሳስ ኢሳስ ሲንꬃ ባጋራ ኣዱሳቴꬃይ ኢሲ ዋꬋ ጊምቤ ጊዲዳ ዲርሳይ ዴስ፤ ዛቤታ ኬꬃ ጎምፓይ ኢሲ ጊና ጊዲዳ ኡሱፑን ኡሱፑን ዋꬋ። 13 ዛቤ ኬꬃስ ጉዬ ባጋ ጎዳፔ ዶሚዲ ሃራይሳ ጼራ ጋካናስ ዲዛ ጌሎሶ ፔንጌ ዋꬊዴስ፤ ኢሲ ጎዳፔ ቢዲ ሃንኮ ጎዳ ጋካናስ 25 ዋꬋ ጊዲዴስ። 14 ጌሊዛሶ ፔንጌ ዩሾን ዲዛ ኬኢ ኬኢ ኡቲዳ ጊምቤታ ኡባ ሲንꬃን ዲዛሶዛ ዋꬊን 20 ዋꬋ ጊዲዴስ፤ ዋꬌቲዳይካ ዛጎዛፔ ሲንꬃ ባጋራ ዲዛ ሲሜሬቲዛሶ ዳራንቻ ጋካናሳ። 15 ጌሊዛ ፔንጌፌ ቢዲ ሲሜሬቲዛሶዛ ዳራንቻ ጋካናስ ዲዛ ኣዱሳቴꬃይ 15 ዋꬋ ጊዲዴስ። 16 ኪፊሌቲ ሲሜሬቲዛሶን ዲዛ ዳራንቻታ ማላ ሃዲርሳ ባጋራኔ ኡሻቻ ባጋራ ኢስታስ ጉꬃ ማስኮቴቲ ዴቴስ። ዩዪ ኣꬋናስ ዲዛ ማስኮቴቲ ጌሊዛ ፔንጌዛፔ ሲንꬃ ባጋራ ዲዛይታ ጊዲሺን ኢሲ ኢሲ ኪፊሌስ ሃዲርሳ ባጋራኔ ኡሻቻ ባጋራ ጎዳ ቦላ ዛምባ ሚꬃ ሚስሌይ ጊጌቲ ኡቲዴስ።

17 ሄሳፌ ጉዬ ኣዴዚ ካሬ ባጋ ዛጎ ታና ኤፊዴስ፤ ሄን ዛጎዛ ዩሾን ዮቻ ሹቺ ዬጌቲ ኡቲዳ ሲሜሬቲዛሶሆታ ቤኣዲስ፤ ኢስታ ዩሾንካ 30 ኪፊሌቲ ዴቴስ። 18 ሹቺ ዬጌቲ ኦሴቲዳ ዛጎዚ ጊምባስ ኡባ ዩሾ ጋኬስ፤ ካሬ ዛጎዚ ጊዶ ዛጎፔ ዚቄስ። 19 ሄፔ ዱጌ ባጋራ ጌሊዛ ፔንጌ ሲንꬃፌ ዶሚዲ ጊዶ ዛጎዛ ፔንጌ ጋካናስ ዲዛሶዛ ዋꬊዴስ፤ ኣርሼይ ሞኪዛ ባጋራ ጊዲን ፑዴሃ ባጋራ ዲዛ ኣዱሳቴꬃይ 100 ዋꬋ ጊዲዴስ።

20 ሄሳፌ ጉዬ ፑዴሃ ባጋ ጊናራ ዲዛ ጌዴ ካሬ ዛጎ ኬሲዛ ፔንጌዛ ኣዱሳቴꬂኔ ኣኮቴꬅ ዋꬊዴስ። 21 ኮይሮ ፔንጌዛ ማላ ሃይሲካ ሚሌ ባጋራ ዲዛ ሄꬑ ሄꬑ ዛቤ ኬꬃታስ፥ ኢስታ ጊዶን ኬኢ ኬኢ ቤቲዛ ጊምቤታሲኔ ሲሜሬቲዛሶ ዳራንቻታስ ዋꬋይ ኢሲ ጊና፤ ኣዱሳቴꬃይ 50 ዋꬋ፥ ጎምፓይ 25 ዋꬋ ጊዲዴስ። 22 ማስኮቴቲ፥ ሲሜሬቲዛሶ ዳራንቻቲኔ ዛምባ ሚꬃታ ሚስሌቲ ኣርሼይ ሞኪዛ ባጋራ ዲዛይታራ ኢሲ ማላ፤ ሄ ኤፊዛ ላፑን ኬቻቲ ዴቴስ፤ ሲሜሬቲዛሶን ዲዛ ዳራንቻቲ ኢስታ ጊናን ዴቴስ። 23 ኣርሼይ ሞኪዛ ባጋራ ዲዛይሳꬆ ፑዴሃ ባጋራ ዲዛ ፔንጌ ጊና ጌዴ ጊዶ ዛጎ ጌልꬂዛ ፔንጌይ ዴስ፤ ኢሲ ፔንጌዛፔ ቢዲ ሃራ ፔንጌ ጋካናስ ዲዛይሳ ዋꬊዴስ፤ ሄሲካ 100 ዋꬋ ጊዲዴስ።

24 ሄሳፌ ሲሚዲ ሄ ቢታኔይ ታና ዱጌሃ ባጋ ዲርሳ ፔንጌ ካሌꬂዴስ፤ ካሌꬂን ባዳ፥ ሄሳን ሃራ ዲርሳ ፔንጌ ቤያዲስ። ኢዚ ቱቄታኔ ጊዶ ኪፊሌታ ሊኪዛ ዎዴ ሃራታራ ኢሲ ጊና ጊዲዴስ። 25 ሊኬ ሃራታ ማላ፥ ሃ ዲርሳ ፔንጌ ማታን ዲዛ ኪፊሌታስ ኡባስ ማስኮቴቲ ዴቴስ። ዲርሳ ፔንጌዛ ዞኖይ 50 ዋꬋ፤ ኣሆቴꬃይካ 25 ዋꬋ። 26 ሄ ጋꬂዛ ላፑን ꬌካቲ ዴቴስ። ዳራንቻይ ዳባባ ሲንꬃን ዉርሴꬃ ባጋራ ዴስ። ፔንጌዛ ቦላ ሄ ባጋራኔ ሃ ባጋራ ዛምባ ሚስሌይ ሜꬌቲ ኡቲዴስ። 27 ጊዶ ዳባባስካ ሃራ ፔንጌይ ዴስ። ሄ ቢታኔይ ሃ ናምኡ ዲርሳ ፔንጌታፔ ጊዶን ዲዛሶሆ ሚዛኒን 100 ዋꬋ ጊዲዴስ።

28 ሄ ቢታኔይ ታና ዱጌሃ ዲርሳ ፔንጌ ባጋራ ሄኒ ጊዶ ዳባባኮ ኤፊዴስ። ኢዚ ዲርሳ ፔንጌ ሜዛኒን ሃራ ፔንጌታራ ሊኬ ጊዲዴስ። 29 ሄሳስ ናጊዛይታ ኪፊሌቲ፥ ጎዳቲኔ ዳራንቻቲ ኡባይ ሃራ ዲርሳ ፔንጌታራ ኢሲ ማላ። ሄ ዲርሳ ፔንጌ ዩሾን ዲዛ ኪፊሌታ ኡባስ ማስኮቴቲ ዴቴስ። ሃ ጊዶ ፔንጌ ዞኖይ 50 ዋꬋ፤ ኣሆቴꬃይካ 25 ዋꬋ። 30 ኢዛ ዩሾን ዳራንቻቲ ዴቴስ፤ ኢስታ ዞኖይ 25 ዋꬋ፤ ኣሆቴꬃይካ 5 ዋꬋ። 31 ሄ ዳራንቻቲ ካሬ ባጋ ዳባባ ጼሌቴስ። ፔንጌ ቦላ ሄ ባጋራኔ ሃ ባጋራ ዛምባ ሚስሌይ ሜꬌቲ ኡቲዴስ። ሄ ጋꬂዛ 8 ꬌካቲ ዴቴስ።

32 ሄ ቢታኔይ ታና ኣርሼ ኬሳ ባጋ ዲርሳ ፔንጌራ ሄኒ ጊዶ ዳባባኮ ኤፊዴስ። ኢዚ ሄ ዲርሳ ፔንጌ ሜዛኒን ሃራ ፔንጌታራ ኢሲ ጊና ጊዲዴስ። 33 ናጊዛይታ ኪፊሌቲ፥ ጎዳቲኔ ዳራንቻይ ኡባይ ሃራ ዲርሳ ፔንጌታራ ኢሲ ማላ። ሄ ዲርሳ ፔንጌ ዩሾን ዲዛ ኪፊሌታ ኡባስ ማስኮቴቲ ዴቴስ። ሄ ፔንጌ ዞኖይ 50 ዋꬋ፤ ኣሆቴꬃይካ ናምኡ ታማኔ ኢቻሽ ዋꬋ። 34 ዳራንቻይ ካሬ ባጋ ዳባባ ጼሌስ። ፔንጌ ቦላ ሄ ባጋራኔ ሃ ባጋራ ዛምባ ሚስሌይ ሜꬌቲ ኡቲዴስ። ሄ ጋꬂዛ 8 ꬌካቲ ዴቴስ።

35 ሄ ቢታኔይ ታና ፑዴሃ ባጋ ዲርሳ ፔንጌኮ ኤፊዴስ። ኢዚ ሄ ዲርሳ ፔንጌ ሜዛኒን፥ ኢዚካ ሃራ ፔንጌታራ ኢሲ ጊና ጊዲዴስ። 36 ናጊዛይታ ኪፊሌቲ፥ ጎዳቲኔ ዳራንቻይ ኡባይ ሃራ ዲርሳ ፔንጌታራ ኢሲ ጊና። ሄ ዲርሳ ፔንጌዛ ዩሾን ማስኮቴቲ ዴቴስ። ሄ ፔንጌዛ ዞኖይ 50 ዋꬋ፤ ኣሆቴꬃይካ 25 ዋꬋ። 37 ዳራንቻይ ካሬ ባጋ ዳባባ ጼሌስ። ፔንጌ ቦላ ሄ ባጋራኔ ሃ ባጋራ ዛምባ ሚስሌይ ሜꬌቲ ኡቲዴስ። ሄ ጋꬂዛ ኦስፑን ꬌካቲ ዴቴስ።

38 ካሬ ዳባባስ ፑዴሃ ባጋራ፥ ጊዶ ዲርሳ ፔንጌ ዳራንቻራ ኦይኬቲዳ ሃራ ኪፊሌይካ ዴስ። ጹጌቲዛ ያርሾስ ኤሂዛ ሜሄ ኣሾይ ሜጬቲዛይ ሄ ኪፊሌና። 39 ሄ ዳራንቻን ሃ ባጋራ ናምኡ ጻራጴዛቲ፥ ሄ ባጋራካ ናምኡ ጻራጴዛቲ ዴቴስ፤ ጹጌቲዛ ያርሾስ፥ ናጋራ ያርሾሲኔ ቆሆ ያርሾስ ሹኪዛ ሜሄ ኡባይ ሹኬቲዛይ ሄ ጻራጴዛታ ቦላና። 40 ዳራንቻፌ ካሬ ባጋራ ፑዴሃ ዲርሳ ፔንጌ ማታን ናምኡ ጻራጴዛቲ ሃ ባጋራ፥ ናምኡ ጻራጴዛቲ ሄ ባጋራ ዴቴስ። 41 ሄሳ ጊሻስ ያርሾስ ሺቂዳ ሜሄይ ኢስታ ቦላ ሹኬቲዛ ሙሌራ ኦስፑን ጻራጴዛቲ ዴቴስ፤ ኢስታፌ ኦይዳቲ ዳራንቻን ዴቴስ፤ ኦይዳቲ ቃሴ ካሬ ዳባባን ዴቴስ። 42 ቃሴ ጹጌቲዛ ያርሾ ዎꬃናስ ጊግሲዳ፥ ሹቻፌ ማሴቲዲ ኦሴቲዳ ኦይዱ ጻራጴዛቲ ዴቴስ። ኢስታስ ꬎቃቴꬃይ ኢሲ ዋꬋ፤ ኣዱሳቴꬃይ ኢሲ ዋꬋኔ ታꬋኮ፤ ቃሴ ኣሆቴꬃይካ ኢሲ ዋꬋኔ ታꬋኮ። ጹጌቲዛ ያርሾኔ ሃራ ያርሾታ ኡባ ሹኪዛ ሚሻቲ ሄ ጻራጴዛታ ቦላን ኡቴቴስ። 43 ኦይዱ ቢራꬌ ኣዱቂዛ ካቆ ሆኮቲ ጎዳዛ ቦላ ዩዪ ኣꬊዲ ꬊሽኬቲ ኡቲዳ። ያርሾስ ሺሺዛ ኣሾይ ኡባይ ሄ ጻራጴዛታ ቦላ ዎꬌስ።

44 ሄሳፌ ጉዬ ሄ ቢታኔይ ታና ጊዶ ዳባባ ጌልꬂዴስ። ሄሳን ፔንጌቲ ጊዶ ዳባባኮ ዶዬቲዛ ናምኡ ኪፊሌቲ ዴቴስ። ኢስታፌ ኢሲ ኪፊሌይ ፑዴሃ ዲርሳ ፔንጌ ማታራ ዱጌሃ ባጋ ጼሌስ፤ ናምኣንꬃይ ቃሴ ዱጌሃ ዲርሳ ፔንጌ ማታራ ፑዴሃ ባጋ ጼሌስ። 45 ሄ ቢታኔይ ታና፥ «ዱጌሃ ባጋ ጼሊዛ ኪፊሌይ ጾሳ ኬꬃን ኦꬂዛ ቄሴታይሳ። 46 ፑዴሃ ባጋ ጼሊዛ ኪፊሌይ ቃሴ ያርሺዛሶን ኦꬂዛ ቄሴታይሳ። ቄሴቲ ኡባይ ሳዶቄ ዛሬፔ ዬሌቲዳ ሌዌታ፤ ጎዳኮ ሺቂዲ ኦꬃናስ ቤሴቴስ ጌቴቲዳይ ኢስታ ጻላ» ጊዴስ።

47 ሄ ቢታኔይ ዳባባ ሚዛኒን ኣዱሳቴꬃይ 100 ዋꬋ፥ ኣሆቴꬃይካ 100 ዋꬋ ጊዲዴስ። ዳባባን ጾሳ ኬꬃፌ ሲንꬃ ባጋራ ኢሲ ያርሺዛሶሆይ ዴስ። 48 ሄሳፌ ጉዬ ኢዚ ታና ጾሳ ኬꬃ ዳራንቻ ኤፊዴስ። ዳራንቻ ጌሊዛሶን ዲዛ ቆሲላꬃ ሚዛኒን ꬎቃቴꬃይ 5 ዋꬋ፤ ኣሆቴꬃይካ 14 ዋꬋ። ሃዲርሳራኔ ኡሻቻራ ዲዛ ጎዳታ ኦርዴቴꬃይ ሄꬑ ሄꬑ ዋꬋ ጊዲዴስ። 49 ዳራንቻ ኣዱሳቴꬃይ 20 ዋꬋ፤ ኣሆቴꬃይካ 12 ዋꬋ። ሄ ጋꬂዛ ታሙ ꬌካቲ ዴቴስ። ጌሊዛሶን ኡሻቻራኔ ሃዲርሳራ ኤቂዳ ናምኡ ቱቄቲ ዴቴስ።