1 ሄሳፌ ሲሚዲ ሄ ቢታኔይ ታና ጾሳ ኬꬃን ዲዛ ጌሻሶሆ ጌልꬂዴስ። ሄ ጌሻሶሆ ጎዳ ኦርዴቴꬃ ሚዛኒን ኡሱፑን ዋꬋ ጊዲዴስ። 2 ፔንጌ ኣሆቴꬃዚ ቃሴ ታሙ ዋꬋ ጊዲዴስ። ሃዲርሳራኔ ኡሻቻራ ዲዛ ጎዳታ ኣሆቴꬃይ ኢቻሽ ኢቻሽ ዋꬋ። ቃሴ ኢዚ ጌሻሶሆ ዋꬊን ኣዱሳቴꬃ 40 ዋꬋ፥ ኣሆቴꬃይካ 20 ዋꬋ ጊዲዴስ።

3 ሄሳፌ ጉዬ ቆልኣ ጌሊዴስ። ሄ ጌሊዛ ፔንጌ ጎዳ ኦርዴቴꬃ ዋꬊን ናምኡ ናምኡ ዋꬋ ጊዲዴስ። ፔንጌዛ ኣሆቴꬃይ ኡሱፑን ዋꬋ ጊዲዴስ፤ ሃዲርሳራኔ ኡሻቻራ ዲዛ ጎዳታ ኣሆቴꬃይ ላፑን ላፑን ዋꬋ። 4 ቃሴ ኢዚ ቆልኣ ዋꬊዴስ፤ ኣዱሳቴꬃይ 20 ዋꬋ፥ ኣሆቴꬃይካ 20 ዋꬋ ጊዲዴስ። ሄሳፌ ጉዬ ኢዚ ታና፥ «ሃይሲ ኡባፌ ኣꬊዛ ጌሻሶሆ» ጊዴስ።

5 ሄ ቢታኔይ ጾሳ ኬꬃ ጎዳ ዋꬊዴስ፤ ሂስቲን ኦርዴቴꬃይ ኡሱፑን ዋꬋ ጊዲዴስ። ሄ ጎዳዛራ ኦይኬቲዲ፥ ጾሳ ኬꬃ ጊምቤ ዩሾን ኬጼቲዳ ኦይዱ ኦይዱ ዋꬋ ኣኪዛ ዳሮ ኪፊሌቲ ዴቴስ። 6 ሄ ኪፊሌቲ ኢሶይ ኢሳ ቦላ ኬጼቲዳ ሄꬑ ፖቄ ጊዲሺን ኢሲ ኢሲ ፖቄስ ሄꬑ ታሙ ኪፊሌቲ ዴቴስ። ዞንጋልꬅ ዬጊዛ ሚꬂ ጌሻሶሆዛ ጊዶ ጌሎንታ ማላ፥ ኮይሮ ጎዳራ ኦይሴꬂ ዎꬂዳ። 7 ሄ ኬꬃይ ጋርሳ ዉርሴꬃ ፖቄን ኦርዲዳ ጊሻሲኔ ፑዴ ሺቂሼ ሌኢዛ ጊሻስ፥ ኪፊሌቲካ ፑዴ ሺቂዛ ዎዴ፥ ኣኪ ኣኪዲ ቤቴስ። ኮይሮ ዉይጌፔ ጊዶ ፖቄዛራ ካንꬂዲ፥ ዉርሴꬃ ፖቄዛ ጋካናስ ኤፊዛ ꬌካቲ ዴቴስ። 8 ታኒ ጾሳ ኬꬃ ዩሾን ꬎቁ ጊዳ ባሳይ ዲዛይሳ ቤያዲስ። ኢዛ ዩሾን ዲዛ ኪፊሌቲ ሄ ባሳ ቦላን ኬጼቲዳ፤ ሄ ባሳይ ጊዶ ዳባባፔ ኡሱፑን ዋꬋ ꬎቄስ። 9-11 ሄ ኪፊሌታስ ካሬ ባጋ ጎዳ ኦርዴቴꬃይ ኢቻሽ ዋꬋ። ኪፊሌታ ጌሊዛ ናምኡ ፔንጌቲ፥ ኢሶይ ፑዴሃ ባጋራ፥ ኢሶይ ቃሴ ዱጌሃ ባጋራ ዴቴስ፤ ቃሴ ሄ ኪፊሌታ ዩሾን ዲዛ ባሳዛ ኣሆቴꬃይ ኢቻሽ ዋꬋ። ጾሳ ኬꬃ ባሳፔኔ ጊዶ ዳባባን ዲዛ ኪፊሌታፔ ጊዶን ዲዛ ሜላ ሶሆይ ናምኡ ታሙ ዋꬋ።

12 ጾሳ ኬꬃፌ ኣርሼ ጌሎሶ ባጋራ ዲዛ ሜላ ሶሆ ጊናራ ኢሲ ኬꬃይ ዴስ። ሄ ኬꬃስ ኣዱሳቴꬃይ ኡዱፉን ታሙ ዋꬋ፤ ኣሆቴꬃይካ ላፑን ታሙ ዋꬋ። ሄ ኬꬃ ጎዳይ ኢቻሽ ዋꬋ ኦርዴ።

13 ሄ ቢታኔይ ጾሳ ኬꬃስ ካሬ ባጋ ዋꬊዴስ፤ ሂስቲን ኣዱሳቴꬃይ ጼቱ ዋꬋ። ጾሳ ኬꬃ ዞኮሶፔ ቢዲ፥ ሄኒ ኣርሼይ ዉሊዛ ባጋ ኬꬃ ዞኮሶ ጋካናስ ዲዛሶሆ ዋꬊን፥ ጼቱ ዋꬋ ጊዲዴስ። 14 ኣርሼ ኬሳ ባጋራ ዲዛ ጾሳ ኬꬃ ኣሆቴꬃይ ናምኡ ሜላ ሶሆታ ጉጂዲ ዋꬊን ጼቱ ዋꬋ ኣኬስ። 15 ናምኡ ባጋራካ ዲዛ ካንꬂዛ ሶሆታ ጉጂዲ ኣርሼይ ዉሊዛ ባጋራ ዲዛ ኬꬃ ኣዱሳቴꬃ ዋꬊዴስ፤ ሂስቲን ጼቱ ዋꬋ ጊዲዴስ።

ጾሳ ኬꬃ ጌሻ ሶሆይ፥ ኢዛ ቆልኣይኔ ኢዛ ዳራንቻይ 16 ዉይጌፔ ቢዲ ማስኮቴታ ጋካናስ፥ ሚꬃን ሊጬቲ ኡቲዴስ፤ ማስኮቴቲካ ሚꬃን ሊጬቲ ኡቲዳ። 17-18 ጾሳ ኬꬃስ ሶ ባጋ ኪፊሌታ ጎዳይ ፔንጌታፔ ቦላ ኣꬋና ጋካናስ፥ ዛምባታኔ ኪሩቤታ ሚስሌታን ኣሌቄቲ ኡቲዴስ፤ ኪፊሌታን ዩዪ ኣꬋናስካ ዛምባ ሚስሌኒኔ ኪሩቤ ሚስሌን ዋላካን ሜꬌቲ ኡቲዴስ። ኪሩቤታስ ኡባስ ናምኡ ናምኡ ኣይፌሶይ ዴስ። 19 ኢሲ ባጋራ ኣሳ ኣይፌሶ ሚሳቲዛይ ዛምባ ሚስሌዛኮ ጼሌስ፤ ቃሴ ሃራ ባጋራ ጋሞ ኣይፌሶ ሚሳቲዛይ ዛምባ ሚስሌዛኮ ጼሌስ። 20 ዉይጌፔ ዴንዲ ቢዲ ፔንጌታፔ ቦላ ባጋን ዲዛሶሆ ጋካናስ፥ ጌሻሶሆ ጎዳ ዩሾ ኡባይ ሄሳ ማላን ኣሌቄቲዴስ። 21 ጾሳ ኬꬃ ፔንጌ ቆሲላꬃቲ ኡባይ ኦይዱ ዞዜ ጊዲዲ ማሴቲዳይታ፤ ኢስቲ ኡባይካ ኢሲ ጊና።

22 ኡባፌ ኣꬊዳ ጌሻሶሆ ጌሊዛሶ ሲንꬃን ሚꬃፌ ኦሴቲዳ ያርሾ ያርሺዛሶ ሚሳቲዛይ ቤቴስ። ኢዚካ ኦይዱ ዞዜ ጊዲዲ ጌሳይ ሄꬑ ዋꬋ፥ ኣሆቴꬃይ ናምኡ ዋꬋ፥ ኣዱሳቴꬃይ ናምኡ ዋꬋ፤ ጉላቲ፥ ዮቻቲኔ ዞዜቲ ሚꬃፌ ኦሴቲዳ፤ ሄ ቢታኔይ ታና፥ «ሃይሲ ጎዳ ሲንꬃን ዲዛ ጻራጴዛ» ጊዴስ።

23 ጌሻ ሶሆዛስ ኢሲ ፔንጌይ ዴስ፤ ቃሴ ኡባፌ ኣꬊዳ ጌሻ ሶሆዛስ ኢሲ ፔንጌይ ዴስ። 24 ኢሲ ኢሲ ፔንጌስ ጊዶን ዳኮቲዲ ዶዬቲዛ ናምኡ ሳንቃቲ ዴቴስ። 25 ጌሻሶሆ ጎዳታ ቦላ ኦሴቲዳ ማላ፥ ፔንጌታ ሳንቃታ ቦላካ ኪሩቤታኔ ዛምባታ ሚስሌይ ኦሴቲ ኡቲዴስ። ዳራንቻፔ ቦላ ባጋራ ሲንꬃራ ዲዛ ሳንቃይ ሚꬃፌ ኦሴቲዳይሳ። 26 ሄ ዳራንቻ ጎዳታ ሚሌን ማስኮቴቲ ዴቴስ። ናምኡ ባጋ ጎዳቲካ ዛምባ ሚስሌን ኣሌቄቲዳ፤ ሃዲርሳ ባጋራኔ ኡሻቻ ባጋራ ዲዛ ኪፊሌታስ ꬌካ ባጋራ ካሚዛ ካራይ ዴስ።