1 ሄሳፌ ጉዬ ሄ ቢታኔይ ታና ፑዴሃ ባጋ ፔንጌራ ካሬ ዳባባ ካሌꬂዴስ፤ ሂስቲዲ ጾሳ ኬꬃ ጊዶ ዳባባ ጊምቤራ ኦይኬቲዳ ኬꬃኮ ታና ኤሂዴስ። 2 ሃ ኬꬃ ፔንጌይ ፑዴሃ ባጋ ሲሚዲ ጼቱ ዋꬋ ኣዱሲኔ ኢቻሽ ታሙ ዋꬋ ኣሆ። 3 ጊዶ ዛጎፔ ናምኡ ታሙ ዋꬋ ሃኪዲ ቃሴ ሲንꬃ ባጋራ ካሬ ዛጎዛን ዲዛ ሂጼቲዳ ሹቻፌ ሲንꬃ ባጋራ ኢሶይ ኢሳኮ ጼሊዛ ሄꬑ ዴꬂ ዲዛ ፖቄይ ዴስ። 4 ሄ ኪፊሌታ ፔንጌቲ ፑዴሃ ባጋ ጼሌቴስ፤ ኢስታፌ ሲንꬃ ባጋራ ታሙ ዋꬋ ኣሆኔ ጼቱ ዋꬋ ኣዱስ ጊዲዳ ጊዶራ ኣꬂዛ ኦጌይ ዴስ። 5 ሄ ኬꬃስ ቦላ ሄꬓንꬆ ፖቄይ ናምኣንꬆዛፔ ጹሜስ፤ ናምኣንꬃይ ቃሴ ኮይሮይሳፌ ጹሜስ። ጋሶይካ ኢስቲ ኢሶይ ኢሳፌ ጉዬ ሺቂ ሺቂዲ ጊምቤቲዳ ጊሻሳ። 6 ቃሴ ኢስቲ ሄꬑ ፖቄ ጊዲዳ ጊሻሳኔ ካሬ ዳባባን ዲዛ ሃራ ኬꬃታ ማላ ኢስታስ ቱሳይ ባይንዳ ጊሻሳ፤ ሄሳ ጊሻስ ቦላራ ዲዛ ፖቄ ኪፊሌቲ ጋርሳ ባጋን ዲዛ ፖቄ ኪፊሌታፔ ጹሜቴስ። 7 ሄ ኪፊሌታፔ ሲንꬃ ባጋራ፥ ካሬ ዳባባ ጊዶን ኢቻሽ ታሙ ዋꬋ ኣዱቂዛ ዲርሳ ጊምቤይ ዴስ። 8 ካሬ ዳባባ ባጋራ ዲዛ ኪፊሌታ ኣዱሳቴꬃይ ኢቻሽ ታሙ ዋꬋ ጊዲሺን ጾሳ ኬꬃ ሲንꬃን ዲዛ ኪፊሌታ ኣዱሳቴꬃይ ጼቱ ዋꬋ ጊዴስ። 9 ካሬ ዳባባፔ ጋꬅ ጌሊዛ ዎዴ ኣርሼ ኬሳ ባጋራ ጋርሳ ኪፊሌታ ጌሊዛ ፔንጌይ ዴስ። 10 ጾሳ ኬꬃፌ ዱጌሃ ባጋራ ካሬ ባጋን ዲዛ ጊምቤራ ኦይኬቲ ኬጼቲዳ ካሬ ዳባባኮ ሲሚዳ ኪፊሌቲ ዴቴስ። 11 ሄ ኬꬃ ኪፊሌታ ሲንꬃን ኣሳይ ሄሜቲዛ ኦጌይ ዴስ። ሄ ኬꬃይ ፑዴሃ ባጋን ዲዛ ኬꬃራ ኢሲ ማላ፤ ኣዱሳቴꬃይ፥ ኣሆቴꬃይ፥ ኪፊሌቲኔ ፔንጌቲ ኡባይ ኢሲ ጊና። 12 ዲርሳ ጊምቤይ ዉሪዛሶን ኣርሼ ኬሳ ባጋን ዲዛ ጊምቤዛስ ዱጌሃ ባጋራ ዲዛ ኪፊሌታ ጌሊዛሶ ፔንጌይ ዴስ። 13 ሄሳፌ ጉዬ ሄ ቢታኔይ ታና፥ «ሃይቲ ኪፊሌቲ፥ ፑዴሃ ባጋራኔ ዱጌሃ ባጋራ ጾሳ ኬꬃ ካሬ ዳባባኮ ጼሊዛይቲ ቄሴታ ኪፊሌታ። ኢስታ ጊዶን ጎዳ ሲንꬃን ኦꬂዛ ቄሴቲ ኡባፌ ኣꬊዳ ጌሻ ቁማ ማና። ሄ ኪፊሌቲ ጌሽ ጊዲዳ ጊሻስ፥ ኡባፌ ኣꬊዳ ጌሻ ኢሞታ፥ ሄይቲካ ካꬃ ያርሾ፥ ናጋራ ያርሾኔ ቆሆ ያርሾ ኡባ ኢስቲ ሄሳን ዎꬃና። 14 ጾሳ ኬꬃ ጌሊዳ ቄሴቲ ካሬ ዳባባ ኬዚዛ ዎዴ፥ ጎዳስ ኦꬂዛ ዎዴ ማይኢዳ ጌሻ ማይኦ ኬሲዲ፥ ሄ ኪፊሌታን ዎꬆንታ ኬዜቴና። ጋሶይካ ማይኦቲ ጌሻ። ኢስቲ ካሬ ኣሳኮ ኬዚሼ ካሴ ማይኢዛ ሃራ ማይኦታ ማይኢዲ ኬሳናስ ኮሼስ» ጊዴስ።

15 ሄ ቢታኔይ ጾሳ ኬꬃ ጊዶ ዳባባን ዲዛ ኬꬃታ ዋꬊ ዉርሲዲ፥ ኣርሼ ኬሳ ባጋ ጼሊዛ ዲርሳ ፔንጌራ ታና ካሬ ኬሲዴስ። ሂስቲዲ ጾሳ ኬꬃ ሄራ ዩሺ ኣꬂዲ ዋꬊዴስ። 16 ዋꬊዛ ጉፌ ኤኪዲ፥ ኣርሼ ኬሳ ባጋ ዋꬊን፥ ኣዱሳቴꬃይ 500 ዋꬋ ጊዲዴስ። 17 ሲሚዲ ፑዴሃ ባጋ ሄ ጉፌዛን ዋꬊዴስ፤ ሂስቲን 500 ዋꬋ ጊዲዴስ። 18 ሲሚዲ ዱጌሃ ባጋ ዋꬊዴስ፤ ሂስቲን 500 ዋꬋ ጊዲዴስ። 19 ሲሚዲካ ኣርሼ ኬሳ ባጋ ዋꬊዴስ፤ ኢዚካ 500 ዋꬋ ጊዲዴስ። 20 ሄሳ ማላ ኦꬂዲ ኢዚ ኦይዱ ባጋታካ ሚዛኒዴስ። ኢዛ ዩሾን 500 ዋꬋ ኣዱቂዲ፥ 500 ዋꬋ ኣኪዛ ዲርሳ ጊምቤይ ዴስ። ሄ ጊምቤይ ጌሻሶሆ ሃንኮ ጮ ሶሆፔ ሻካናሳ።