1 ሄሳፌ ጉዬ ሄ ቢታኔይ ታና ጉዬ ዛሪዲ ጾሳ ኬꬃስ ኣርሼ ኬሳ ባጋራ ዲዛ ካሬ ባጋ ዲርሳ ፔንጌኮ ኤሂዴስ፤ ኢዚ ኤሂዛ ዎዴ ዲርሳ ፔንጌይ ጎርዴቲ ኡቲዴስ። 2 ጎዳይ፥ «ታና ሃ ፔንጌይ ጎርዳን ዴኣናፔ ኣቲን ናምኣንꬆ ዶዬቴና። ኣሲካ ኢዛራ ጌሌና፤ ኣይስ ጊኮ ጎዳ ኢስራኤሌ ጾሳይ ኢዛራ ጌሊዴስ። ሄሳ ጊሻስ ሄ ፔንጌይ ጎርዳን ዳና። 3 ጊዲኮካ ኢስራኤሌ ሃላቃይ ጎዳ ሲንꬃን ኡኬꬅ ማናስ ሄሳን ኡታና ዳንዳዬስ። ፔንጌ ዳራንቻራ ኢዚ ጌላናሲኔ ኬዛናስ ዳንዳዬስ» ጊዴስ።

4 ሄሳፌ ጉዬ ሄሳዴይ ታና ፑዴሃ ፔንጌኮ ኤፊዛ ኦጌራ ኤፊዲ፥ ጾሳ ኬꬃስ ሲንꬃ ባጋ ጋꬂዴስ። ሄሳን ታኒ ጼሊዛ ዎዴ ሄኮ፥ ጎዳ ቦንቾይ ጾሳ ኬꬃ ኩሚ ኡቲዳይሳ ቤያዲስ፤ ቤያዳ ታ ሲንꬃ ጉꬅ ጉፋናዲስ። 5 ሂስቲን ጎዳይ ታና፥ «ሃይሶ ኣሳ ናዉ፥ ጾሳ ኬꬃ ዎጋታ ኡባኔ ኢዛ ማራታ ኡባ ጼሊዛይሳን ታኒ ኔስ ዮቲዛይሳ ኔ ሃይꬃን ሚንꬃዳ ሲያ፤ ኔ ኣይፌንካ ሚንꬃዳ ጼላ። ጾሳ ኬꬃ ጌላናሲኔ ኬዛናስ ቤሲዛ ኣሳቲኔ ቤሶንታ ኣሳቲ ኣዋይታኮ ሚንꬃዳ ኣኬካ። 6 ማካላንቻ ኢስራኤሌ ኣሳስ ኡባ ሃሪዛ ጎዳይ፥ ‹ኢንቴኖ ኢስራኤሌ ኣሳቶ፥ ኢንቴ ኦꬂዛ ቱና ኦሶይ ኤቆ። 7 ኢንቴ ታስ ታ ቁማ፥ ሞꬎኔ ሱꬃ ያርሾ ኦꬂዲ ሺሺዛ ዎዴ፥ ዎዚናይኔ ኣሾይ ቃጻሬቶንታ ኣላጋ ኣሳታ ጾሳ ኬꬃ ጌልꬂዲ ኢስቲ ኢዛ ቱኒሳና ማላ ኦꬂዴታ። ኢንቴ ቱናቴꬃ ኡባ ቦላካ ጉጂዲ ታ ጫቆዛ ላሊዴታ። 8 ቃሴ ታ ጌሻ ሚሻታ ቦላ ኣዋቶንታ ኢጺዲ፥ ታ ኬꬃን ኣላጋታ ኣዋሲዴታ። 9 ሄሳ ጊሻስ ኡባ ሃሪዛ ጎዳይ፡ ኢስራኤሌ ኣሳ ጊዶን ዲዛ ኣላጋ ኣሲ፥ ባ ዎዚናኒኔ ባ ኣሾን ቃጻሬቶንታይ፥ ኦኒኔ ታ ጾሳ ኬꬃ ጌሎፖ።

10 « ‹ታፔ ሃኪዳ ሌዌቲ፥ ኢስራኤሌ ኣሳይ ታና ኣጊዲ ዎራ ሲሚን፥ ባንታ ኤቃታስ ጎይናናስ ዎራ ሲሚዳይቲ ባንታ ቂጻቴ ኤኬቶ። 11 ጊዲኮካ ኢስቲ ጾሳ ኬꬃን ኦሳንቻ ጊዴቶ፤ ጾሳ ኬꬃ ዲርሳ ፔንጌታ ናጌቶ፤ ጾሳ ኬꬃ ኦሶካ ኦꬄቶ። ኢስቲ ጹጊዛ ያርሾኔ ኣሳይ ኤሂዛ ሃራ ያርሾ ሹኬቶ፤ ቃሴ ኣሳስ ኦꬃናስ ኢስቲ ኣሳኮ ሺቄቶ። 12 ጊዶ ኣቲን ኢስቲ ካሴ ኢስራኤሌ ኣሳ ኤቃታስ ጎይኒሲዳ ጊሻሲኔ ኣሳ ናጋራን ኦንጊዛ ꬉጴ ጊዲዳ ጊሻስ፥ ኢስቲ ባንታ ናጋራ ቂጻቴ ኤካና ማላ ታኒ ኩሼ ዴንꬃዳ ጫቃዲስ። ታኒ ኡባ ሃሪዛ ጎዳይ ሃይሳ ዮታይስ። 13 ኢስቲ ቄሴ ጊዲዲ ኦꬃናስ ታኮ ሺቄቴና፤ ዎይኮ ታስ ዱማቲዳ ጌሻኮኔ ኡባፌ ኣꬊዳ ጌሻኮ ሺቄቴና። ኢስቲ ባንታ ኦꬂዳ ቱና ኦሶ ጊሻስ ዬላ ማይኤቶ። 14 ጊዲኮካ ኢስቲ ጾሳ ኬꬃን ኣዋታና ማላኔ ኢዛ ጊዶን ኦꬃናስ ዲዛ ኦሶ ኡባካ ኦꬃና ማላ፥ ታኒ ኢስታ ሱንꬃና።

15 « ‹ጊዶ ኣቲን ኢስራኤሌ ኣሳይ ታና ኣጊዲ፥ ዎራ ሲሚዳ ዎዴ፥ ጾሳ ኬꬃ ዎጋ ኣማኔቲዲ ፖሊዳ፥ ሌዌ ዛሬ ቄሴቲ ሳዶቄ ዛሬቲ ታስ ኦꬃናስ ታኮ ሺቄቶ። ሞꬎኔ ሱꬃ ሺሺሼ፥ ኢስቲ ታ ሲንꬃን ኦꬄቶ። ታኒ ኡባ ሃሪዛ ጎዳይ ሃይሳ ዮታይስ። 16 ጾሳ ኬꬃ ኢስቲ ጌሌቶ፤ ታስ ኦꬃናስ ታ ያርሺዛሶ ኢስቲ ሺቄቶ፤ ኣዋቴꬃካ ኢስቲ ኦይኬቶ። 17 ኢስቲ ጾሳ ኬꬃስ ጊዶ ዳባባ ጌሊዛ ዎዴ፥ ላይኖፔ ዳዴቲዳ ማይኦ ማይኤቶ፤ ጊዶ ዳባባ ፔንጌን ዎይኮ ጾሳ ኬꬃ ጊዶን ኦꬂዛ ዎዴ፥ ሱፌ ማይኦ ማይኦፌቶ። ኬሳ 28፡39-43፤ ሌዌ 16፡4 18 ኢስቲ ባንታ ሁኤን ላይኖ ሻሼ ጻጼቶ፤ ባንታ ጼሳንካ ላይኖ ሱሬ ጊጼቶ። ባና ጫዋሲዛ ሚሽ ኣይኮካ ማይኦፌቶ። 19 ኣሳይ ዲዛ ካሬ ዳባባ ኢስቲ ኬዚዛ ዎዴ፥ ጾሳ ኬꬃን ኦꬂሼ ማይኢዳ ማይኦ ቃሪዲ ጌሻ ኪፊሌታን ዎꬄቶ። ሂስቶንታ ኣጊኮ ኢስቲ ባንታ ጌሻ ማይኦን ኣሳ ጎዳስ ጌሻና። ሌዌ 16፡23

20 « ‹ቄሴቲ ባንታ ሁኤ ሜዴቶፌቶ፥ ዎይኮ ባንታ ቢናና ኣዱሶፌቶ፤ ባንታ ሁኤ ሊኬን ቃንጺሴቶ። ሌዌ 21፡5 21 ኣይ ቄሴይካ ጊዶ ዳባባ ጌሊዛ ዎዴ ዎይኔ ኡሹ ኡዮፖ። 22 ኢስታ ኣዚናይ ሃይቂዳ፥ ዎይኮ ኣንጄታ ቢዳ ማጫስ ማቾ ኤኮፌቶ። ኢስራኤሌ ኣሳፔ ጌላኦ ኤኬቶ፤ ዎይኮ ኣዚናይ ቄሴ ጊዲዲ ዲሼ ሃይቂዳ ማጫሳ ኤኬቶ። ሌዌ 21፡7

23 « ‹ቄሴቲ ጎዳስ ዱማቲዳይሳፌኔ ዱማቶንታ ጮ ዲዛይሳፌ ጊዶን ዲዛ ዱማቴꬃ ታ ኣሳ ታማርሴቶ። ቃሴ ጌሻፌኔ ቱናፔ ጊዶን ዲዛ ዱማቴꬃ ኢስታ ቤሴቶ። ሌዌ 10፡10 24 ኣይ ሞቶይ ዴንዲኮካ ቄሴቲ ታ ዎጋይ ዮቲዛይሳ ማላ ፒርዴቶ። ታ ማራኔ ታ ዎጋ ናጊዲ፥ ታ ባኣሌታ ቦንቼቶ፤ ታ ሳምባታካ ዱማሲዲ ቦንቼቶ።

25 « ‹ቄሴይ ሃይቂዳ ኣሃኮ ሺቂዲ ባና ቱኒሶፖ። ጊዲኮካ ሃይቂዳይሲ ኣዋ፥ ዎይኮ ኣዮ፥ ዎይኮ ዬሊዳ ኣቱማ ና፥ ዎይኮ ማጫ ና፥ ዎይኮ ኢሻ፥ ዎይኮ ኣዚና ጌሎንታ ሚቾ ጊዲኮ ቦቻና ዳንዳዬስ። ሌዌ 21፡1-4 26 ጌዪዳፔ ጉዬ ላፑን ጋላስ ታኮ። ሄሳፌ ጉዬ ኢዚ ጌሽ ጊዳና። 27 ሄሳፌ ሲሚዲ ጌሻሶሆን ኦꬃናስ ጊዶ ዳባባ ቢዛ ጋላስ፥ ባ ናጋራስ ያርሾ ሺሾ። ታኒ ኡባ ሃሪዛ ጎዳይ ሃይሳ ዮታይስ።

28 « ‹ቄሴታስ ላታይ ባዋ፤ ታኒ ኢስታስ ላታ። ኢስራኤሌ ቢታን ኢስታስ ኣይ ላታ ኢሞፍቴ፤ ኢስታ ላታይ ታና። ታይ 18፡20 29 ኢስቲ ካꬃ ያርሾ፥ ናጋራ ያርሾኔ ቆሆ ያርሾ ሜቶ። ኢስራኤሌ ቢታን ጎዳስ ዱማቲዳይ ኡባይ ኢስታሳ። ታይ 18፡8-19 30 ኮይሮ ጋኪዛ ዱማ ዱማ ካꬃስ ኮይሮ ኣይፌይኔ ኢንቴ ጎዳስ ኢሚዛ ኢሞታ ኡባይ ቄሴታሳ። ኢንቴ ኬꬃን ኣንጆይ ሼምፓና ማላ፥ ኢንቴ ꬊሌፌ ኮይሮ ኩሼ ኢስታስ ኢሚቴ። 31 ቄሴቲ ባዉቲዳይሳ ዎይኮ ዶኣይ ዎꬊዳይሳ ካፎ ኣሾ ጊዲን፥ ሜሄ ኣሾ ጊዲን ኣይኮካ ሞፔቶ። ሌዌ 25፡10