1 « ‹ቢታ ኢንቴ ላታናስ ሳማን ሻኪዛ ዎዴ፥ ሄ ቢታፌ ኢሲ ሳማ ጎዳስ ዱማሲዲ ዎꬂቴ። ሄሲካ ታማኔ ናምኡ ኪሎ ሜቲሬኔ ባጋ ኣዱቂዛኔ ታሙ ኪሎ ሜቲሬ ኣኪዛ ሶሆ ጊዶ። ሄ ሶሆይ ሙሌካ ጌሻሶሆ ጊዶ። 2 ሄ ሶሆፔ ኣዱሳቴꬃይ 500 ዋꬋ፥ ኣሆቴꬃይካ 500 ዋꬋ ጊዲዳ ኦይዱ ጉላይ ዲዛይ ጾሳ ኬꬃስ ጊዶ፤ ኢዛ ዩሾን ኢቻሽ ታሙ ዋꬋ ጊዲዳ ዶያ ሶሆይ ዴዮ። 3 ሄ ጎዳስ ዱማቲዳ ሶሆፔ ኣዱሳቴꬃይ ታማኔ ናምኡ ኪሎ ሜቲሬኔ ባጋ፥ ኣሆቴꬃይ ቃሴ ኢቻሽ ኪሎ ሜቲሬ ጊዲዳ ሶሆ ዋꬋዳ ሻካ። ሄ ሶሆይ ኡባፌ ኣꬊዳ ጌሻ ሶሆይ ጾሳ ኬꬃስ ጊዶ። 4 ሄሲ ጾሳ ኬꬃ ጊዶን ጎዳስ ኦꬃናስ፥ ኢዛኮ ሺቂዛ ቄሴታስ ዱማቲዳ ጌሻሶሆ ጊዶ፤ ቃሴ ኢስቲ ባንታ ኬꬃ ኬጺዛ ሶሆኔ ጾሳ ኬꬃስካ ጌሻሶሆ ጊዶ። 5 ቃሴ ኣቲዛ ታማኔ ናምኡ ኪሎ ሜቲሬ ባጋ ኣዱቂዛኔ ኢቻሽ ኪሎ ሜቲሬ ባጋ ኣኪዛ ሶሆይ ጾሳ ኬꬃን ኦꬂዛ ሌዌታስ ላታ ጊዶ፤ ኢስቲ ባስ ዴኢዛ ካታማታ ሄሳን ኬጼቶ።

6 « ‹ሄ ጎዳስ ዱማቲዳ ሶሆዛ ሚሌን ታማኔ ናምኡ ኪሎ ሜቲሬኔ ባጋ ኣዱቂዛኔ ናምኡ ኪሎ ሜቲሬኔ ባጋ ኣኪዛ ሶሆይ ካታማ ኬጻናስ ዴኦ፤ ሄ ሶሆይ ኢስራኤሌ ኣሳስ ኡባስ ጊዶ።

7 « ‹ኢስራኤሌ ሃላቃስ ኢሜቲዳ ጊሻይ ናምኡ ባጋራካ ጎዳስ ዱማቲዳ ሶሆኒኔ ካታማ ሶሆን ዛዋቴስ። ኢዚ ኣርሼ ጌሎሶ ባጋራ ሜዲቴራኔ ኣባ ጋኬስ፤ ኣርሼ ኬሳ ባጋራ ቢዲ ኢስራኤሌ ቢታ ዛዋ ጋኬስ፤ ኢዛስ ኣዱሳቴꬃይካ ኢሲ ቆሞስ ኢሜቲዛ ጺንጾ ጊና ጊዴስ። 8 ሄ ጊሻይ ኢስራኤሌ ቢታ ሃላቃስ ላታ ጋዴ ጊዶ። ሃይሳፌ ሲንꬃን ታ ሃላቃቲ ታ ኣሳ ዋዪሶፔቶ፤ ኢስቲ ኢስራኤሌ ኣሳይ ኡባይ ባ ዛሬን ዛሬን ጋዴ ኤካና ማላ ኦꬄቶ።

9 « ‹ኡባ ሃሪዛ ጎዳይ፡ ኢንቴኖ ኢስራኤሌ ሃላቃቶ፥ ኢንቴስ ሃኢ ጊዳና! ኢንቴ ሻባርሲዛይሳኔ ኣሳ ኡንኤꬂዛይሳ ኣጊቴ፤ ሱሬ ፒርዳኔ ጺሎቴꬅ ኦꬂቴ። ታ ኣሳ ኢስታ ላታ ቢታፌ ꬎቃሊዲ ጎዲዛይሳ ኣጊቴ። ታኒ ኡባ ሃሪዛ ጎዳይ ሃይሳ ዮታይስ። 10 ኢንቴ ኡባሲካ ሊኬ ጌዳራይኔ ማካ ሚሺ ዴኦ። 11 ኢንቴስ ማካ ሚሻስ ጊዶ ጊዲዛ ሆሜሬ ጌቴቲዛ ማካ ሚሽ ዴኦ፤ ኢሲ ባዶሴይ ሆሜሬስ ታማፌ ኢሲ ኩሼ ጊዲሺን፥ ኢሲ ኤፌይ ሆሜሬስ ታማፌ ኢሲ ኩሼ ጊዴስ። ሆሜሬይ ናምኡ ጌዳራታሲካ ኤሬቲዳ ማካ ጌዳራ ሚሽ ጊዶ። *ኢሲ ሆሜሬይ ናምኡ ጼታኔ ናምኡ ታሙ ኪሎ ጊራሜ ዎይኮ ናምኡ ጼታኔ ናምኡ ታሙ ሊቲሮ ጊዴስ። 12 ኢሲ ሳቂሌይ ናምኡ ታሙ ጌራ ጊዴስ፤ ናምኡ ታሙ ሳቂሌ ቦላ ናምኡ ታማኔ ኢቻሽ ሳቂሌ ቃሴካ ታማኔ ኢቻሽ ሳቂሌ ጉጂሺን ኢሲ ሚናኔ ጊዴስ። †ኢሲ ሳቂሌይ ታማኔ ኢሲ ጊራሜኔ ባጋ ዴጼስ።

13 « ‹ኢንቴ ኢሞታ ኢሚሼ ሃይሳ ማላ ሂስቲ ኢሚቴ። ኢንቴ ቡኪ ሺሺዛ ጊስቴፌ ኡሱፑን ታማፌ ኢሲ ኩሼ፥ ባንጋፌ ኡሱፑን ታማፌ ኢሲ ኩሼ፥ 14 ቃሴ ዎጋራ ዛይቴፔ ጼታፔ ኢሲ ኩሼ ኢሚቴ። ሃይታ ሜዛኒዛ ዎዴ፥ ኔኒ ማኪዛ ሚሻይ ባቴ ጊዶ። ታሙ ባቴይ ኢሲ ሆሜሬ ዎይኮ ኢሲ ኮሬ ጊዴስ። 15 ኢስራኤሌ ኣሳይ ሄሚዛ ናምኡ ናምኡ ጼቱ ሜሄይ ዲዛ ኢሲ ዉዴፔ ኢሲ ኢሲ ሜሄ ኢሚቴ። ሄይቲ ኣሳ ናጋራ ኣቶ ጊሳናስ ካꬃ ያርሾ፥ ጹጌቲዛ ያርሾኔ ኢሲፌቴꬃ ያርሾ ጊዴቶ። ታኒ ኡባ ሃሪዛ ጎዳይ ሃይሳ ዮታይስ። 16 ቢታን ዲዛ ኣሳይ ኡባይ ሃይሳ ኡባ ኢስራኤሌ ሃላቃስ ኢሞ። 17 ሃላቃዚ ኢስራኤሌ ኣሳይ ቦንቺዛ ባኣሌታን፥ ኣጊናይ ጼሪዛ ጋላሳታኒኔ ሳምባታታን ጹጊዛ ያርሾታ፥ ካꬃ ያርሾታኔ ኡሻ ያርሾታ ሺሺ ኢሞ። ኢስራኤሌ ኣሳ ናጋራ ኣቶ ጊሳናስ፥ ናጋራ ያርሾታ፥ ካꬃ ያርሾታ፥ ጹጌቲዛ ያርሾታኔ ኢሲፌቴꬃ ያርሾታ ኡባ ኢዚ ሺሺ ኢሞ።

18 « ‹ኡባ ሃሪዛ ጎዳይ፡ ኮይሮ ኣጊናን፥ ኮይሮ ጋላስ ቦሬይ ባይንዳ ዲዛ ኢሲ ዎፋኖ ጾሳ ኬꬃ ጌሻናስ ሺሻ። 19 ቄሴይ ሃ ናጋራ ያርሾ ሱꬃፌ ኤኪዲ፥ ጾሳ ኬꬃ ፔንጌ ቆሲላꬃታ፥ ያርሺዛሶ ዩሾን ዲዛ ኦይዱ ዞዜታኔ ጊዶ ዳባባ ኤፊዛ ዲርሳ ፔንጌ ቆሲላꬃታ ቲዮ። 20 ኦኒካ ቆፖንታ ዎይኮ ኤሮንታ ኣጊዲ ኦꬂዳ ናጋራ ኣቶ ጊሳናስ፥ ኣጊናስ ላፑንꬃ ጋላሳን ሄሳ ማላንካ ኦꬃ። ሂስታዳ ጾሳ ኬꬃ ቱናቴꬃፌ ጌሻ።

21 « ‹ኮይሮ ኣጊናን፥ ታማኔ ኦይዳንꬆ ጋላሳን ፓዚጋ ባኣሌ ቦንቺቴ፤ ቃሴ ላፑን ጋላስ ጋካናስ ኢርሾይ ጌሎንታ ኡኬꬅ ሚቴ። 22 ሄ ኮይሮ ጋላሳን ሃላቃይ ባ ጊሻሲኔ ባ ኣሳ ጊሻስ ናጋራ ያርሾ ኦꬂዲ ኢሲ ዎፋኖ ሺሺ ኢሞ። 23 ሄ ባኣሌይ ቦንቼቲዛ ላፑን ጋላሳታን ሃች ሃች ላፑን ዎፋኖታኔ ላፑን ꬋርሾታ ኡባይካ ቦሬይ ባይንዳ ቦላራ ዲዛይታ ጹጌቲዛ ያርሾ ኦꬂዲ፥ ጎዳስ ሺሾ። ሄሳራካ ኢሲፌ ናጋራ ያርሾስ ሃች ሃች ኢሲ ዴይሻ ኦርጌ ሺሺ ኢሞ። 24 ኢሲ ኢሲ ዎፋኖኔ ኢሲ ኢሲ ꬋርሾ ያርሺዛ ዎዴ፥ ካꬃ ያርሾስ ታማኔ ላፑን ኪሎ ጊራሜ ጊስቴኔ ሄꬑ ሄꬑ ሊቲሮ ዛይቴ ሺሺ ኢሞ።

25 « ‹ላፑንꬃ ኣጊናን፥ ታማኔ ኢቻሻንꬃ ጋላሳን ዶሚዛ ላፑን ጋላስ ባኣሌ ዎዴን ኡባን፥ ናጋራ ያርሾ፥ ጹጌቲዛ ያርሾ፥ ካꬃ ያርሾኔ ዛይቴ ካሴይሳፌ ዱማሶንታ ሃላቃይ ሺሺ ኢሞ።