1 ሄ ዎዴ ናምኡ ናቤቲ ሃጌይኔ ኢዶ ና ዛካራሲ ዬሩሳላሜኒኔ ዩሁዳ ዴሬን ዴኢዛ ኣይሁዳ ኣሳስ ጾሳ ኬꬃ ኦሶ ጊሻስ ባ ጎዳ ኢስራኤሌ ጾሳ ሱንꬃን ቲንቢቴ ዮቲዳ። ሃጌ 1፡12፤ ዛካ 1፡1 2 ሳላቲያሌ ና ዜሩባቤሌይኔ ኢዮሳዶቄ ና ኢያሶይ ሄ ናቤታ ቃላ ሲዪዳፔ ጉዬ ዬሩሳላሜን ዲዛ ጾሳ ኬꬅ ዛሪ ኬጾ ኦይኪዳ፤ ናምኡ ናቤቲካ ኢስታ ማዲሼ ኢስታራ ዴቴስ። ሃጌ 1፡12፤ ዛካ 4፡6-9

3 ሄ ዎዴ ኤፊራጺሴ ሻፋ ፒንꬃን ኣርሼይ ዉሊዛ ባጋራ ዴሬ ኣይሲዛ ታቴናዬይኔ ሳቴርቦዚናይ ቃሴካ ኢስታራ ኢሲፌ ኦꬂዛ ዳናቲ ዬሩሳላሜ ዪዲ «ኢንቴስ ሃ ጾሳ ኬꬃ ኬጻናሲኔ ጊምቤዛ ኦራጺሳናስ ኦኒ ኢንቴስ ፒቃዴ ኢሚዴ?» ጊ ኦይቺዳ። 4 ቃሴ ሃይሳ ጾሳ ኬꬃ ኬጺዛ ኣሳታ ሱንꬅ ኤራናስ ኦይቺዳ። 5 ጊዶ ኣቲን ኣይሁዳ ዳናታ ጾሲ ናጊዛ ጊሻስ ፓሪሴ ካዎ ዳሪዮሳስ ኪታይ ጋኪን ሄ ኪታዛስ ዛሮይ ያና ጋካናስ ኦሶ ኣጊቤቴና።

6 ኤፊራጺሴ ሻፋ ፒንꬃን ኣርሼይ ዉሊዛ ባጋራ ዴሬ ኣይሲዛ ታቴናዬይኔ ሳቴርቦዚናይ ቃሴካ ኢስታራ ኢሲፌ ኦꬂዛ ዳናቲ ካዎ ዳሪዮሳስ ጻፊ ዬዲዳ ዳብዳቤይ ሃይሳፌ ካሊ ዲዛይሳ፤ 7 «ቦንቼቲዳ ካዎ ዳሪዮሳ! ኔ ኣይሲዛ ዴራሲኔ ኔስ ሳሮይ ጊዶ፤ 8 ኑኒ ዩሁዳ ቢታ ቢዲ ጊታ ጾሳ ኬꬃይ ጊታ ማሴቲዳ ሹቻኒኔ ሚꬃን ኬጼቲዳይሳ ቤይዳይሲ ኔስ ኤሬቶ፤ ሄ ኦሶዚካ ጪማቲ ካሌꬂሺን ማራኒኔ ኤሶን ኦሴቴꬃ ቦላ ዴስ።

9 «ኑኒካ ዴሬዛ ካሌꬂዛይታ፥ ‹ሃይሳ ጾሳ ኬꬃ ዛሪ ኬጻናሲኔ ጊምባ ኦራጺሳናስ ኦኔ ኢንቴስ ፒቃዴ ኢሚዳይ?› ጊ ኦይቺዶስ። 10 ሃይሳ ኦሶዛ ኣዋቴꬃን ኦሲሲዛይ ኦናንታኮ ኤሪዲ ኑ ኔስ ቆንጪሳናስ ኢስታ ሱንꬃካ ኦይቺዶስ።

11 «ኢስቲካ ኑስ፥ ‹ኑኒ ሳሎኔ ሳኣ ሜꬊዳ ጾሳ ኦሳንቻታ፤ ሄሳ ጊሻስ ዳሮ ላይꬃፌ ካሴ ጊታ ኢስራኤሌ ካዎይ ኬጺዳ ጾሳ ኬꬃ ኑኒ ዛሪዲ ሃኢ ኦሶ ቦላ ዶስ፤ 12 ጊዶ ኣቲን ካሴ ኑ ኣዋቲ ሃይሳ ሳሎ ጾሳ ሃንቄꬂዳ ጋሶን ካላዳዌ ቢታ ኣስ ባቢሎኔ ካዎ ናቡካዳናጾሬን ጾኒሲዴስ፤ ካዎ ናቡካዳናጾሬይ ጾሳ ኬꬃ ላሊዲ ኣሳ ዲኢ ባቢሎኔ ኤፊዴስ። 2ካዎ 25፡8-12፤ 2ታሪ 36፡17-20፤ ኤር 52፡12-15 13 ሄሳፌ ጉዬ ቃሴ ባቢሎኔ ዴሬን ካዎ ቂሮሲ ካዎቲዳ ኮይሮ ላይꬅ ሃይሳ ጾሳ ኬꬃ ኬጻና ማላ ኣዛዚዴስ። ኢዝ 1፡2-11 14 ናቡካዳናጾሬይ ዬሩሳላሜፔ ካሴ ጾሳ ኬꬃፌ ዲኢ ኤፊዲ ባቢሎኔን ዲዛ ኤቃ ኬꬃታን ዎꬂዳ ዎርቃፌኔ ቢራፔ ኦሴቲዳ ጌሻ ሚሻታ ኡባ ካዎ ቂሮሲ ዩሁዳ ዴሬ ኣይሲዛ ሴሳቢሳሬ ባጋራ ዛሪ ኑስ ኢሚዴስ። 15 ሄሲካ ዴሬ ኣይሲዛ ዳና ሳቢሳሬይ ጌሻ ሚሻታ ኤሂዲ ዬሩሳላሜን ዲዛ ጾሳ ኬꬃን ዎꬃና ማላኔ ጾሳ ኬꬃይ ካሴ ባ ዲዛሶን ዛሪ ኬጼታና ማላ ካዎ ቂሮሲ ኢዛ ኣዛዚዴስ። 16 ሄሳ ጊሻስ ሴሳቢሳሬይ ዪዲ ጾሳ ኬꬃ ዮቻ ዬጊዳፔ ጉዬ ኦሶዚ ኦሴቲ ኦሴቲ ሲንꬄ ባና ማላ ሃኒዲ ሃይሳ ጋካናስ ጾሳ ኬꬃ ኦሶይ ኦሴቴꬃ ቦላ ዴስ፤ ጊዶ ኣቲን ጾሳ ኬꬃ ኦሶይ ኦሴቲ ጊጊቤና› ጊዳ።

17 «ካዎ! ሂያ ቱማፔ ሃ ጾሳ ኬꬃይ ዬሩሳላሜን ኦሴታና ማላ ካዎ ቂሮሲ ኣዛዚዳ ኣዛዞይ ዲዛኮ ባይንዳኮ ሻኪ ኤራናስ ባቢሎኔን ካዎ ኬꬃን ማዝጋቤን ጻፌቲ ዲዛይሳ ፒልጊሳ ጼሊሳዳ ኔ ኣይ ጋ ቃቺዳኮ ኑና ኤሪሳና ማላ ዎሶስ» ጊ ጻፊዳ።