1 ባቢሎኔን ካዎ ሚንጃ ኬꬃን ዲዛ ማዝጋባቲ ዉሪ ፒልጌቲ ጼሌታና ማላ ካዎ ዳሪዮሲ ኣዛዚዴስ፤ 2 ጊዶ ኣቲን ባቢሎኔ ካታማን ጊዶንታ ሜዶኔ ዴሬን ኣሂሚቴ ካታማን ኢሲ ጻꬃ ማጻፋይ ቤቲዴስ፤ ኢዛን ጻፌቲዳ ቃላይ፥

3 «ቂሮሲ ካዎቲዳ ኮይሮ ላይꬅ ዬሩሳላሜን ዲዛ ጾሳ ኬꬂ ጹጌቲዛ ያርሾይኔ ሃራ ዱማ ዱማ ያርሾቲ ሺቂዛሶ ጊዲዲ ኦሴታና ማላ ኣዛዞ ኢሚዴስ፤ ጾሳ ኬꬃ ኣዱሳቴꬂ 27 ሜቲሬ ጊዲሺን ኣሆቴꬃዚ 27 ሜቲሬ ጊዳናስ ቤሴስ። 4 ጊምቤቲካ ሹቻፌ ኦሴቲዳ ሄꬑቶ ዩዪ ኣꬊዳ ጊምቤታ ሁኤን ኢሲቶ ዩዪ ኣꬊ ሚꬃን ኩዬቶ፤ ሄ ኦሶዛስ ኮሺዛ ሚሽ ካዎዛ ሚንጃ ኬꬃፌ ኢሜቶ። 5 ቃሴ ሃይሳፌ ሲንꬄ ካዎ ናቡካዳናጾሬይ ዬሩሳላሜን ጾሳ ኬꬃፌ ዲኢ ኤኪዳ ዎርቃፌኔ ቢራፔ ኦሴቲዳ ጾሳ ኬꬃ ሚሻቲ ሲሚዲ ዬሩሳላሜን ኦሴቲዛ ጾሳ ኬꬃን ኢስታስ ቤሲዛሶን ኡቴቶ» ጌስ።

6 ካዎ ዳሪዮሲ ሃይሳፌ ካሊ ዲዛ ኪታ ኣꬂዴስ፤ «ኤፊራጺሴፔ ኣርሼይ ዉሊዛ ባጋራ ዲዛ ዴሬ ኣይሲዛ ታቴናዬስ፥ ሳቴርቦዚናዬሲኔ ኢንቴናራ ኢሲፌ ኦꬂዛ ኡባቲ ጾሳ ኬꬃ ኦሶን ጋኮፍቴ፤ 7 ኢንቴ ኦሶዛ ꬉጴꬆንታ ማላ ናጌቲቴ፤ ኣይሁዳታ ኣይሲዛይሲኔ ኣይሁዳታ ካሌꬂዛይቲ ጾሳ ኬꬃ ካሴ ኢዚ ዲዛሶን ዛሪ ኬጼቶ። 8 ሃይሳ ጋሶን ኢንቴ ጾሳ ኬꬃ ኦሶ ማዳና ማላ ታ ኢንቴና ኣዛዛዲስ፤ ሃ ኦሶዛስ ኮሺዛ ሚሽ ካዎ ሚንጃ ኬꬃፌኔ ኤፊራጺሴፔ ኣርሼይ ዉሊዛ ባጋራ ዲዛ ዴሬፔ ካዎስ ሺቂዛ ጊራ ሚሻፌ ኬዚዲ ኢስታስ ኢሜቶ፤ ኦሶዚካ ꬉጴታና ቤሴና። 9 ቃሴካ ዬሩሳላሜን ዲዛ ቄሴቲ ኢንቴስ ዮቲዛ ማላ ጋላስ ጋላስ ሳሎ ጾሳስ ያርሾ ሺሻና ማላ ኢንቴፌ ኮዬቲዛ ሚርጎታ፥ ꬋርሾታ፥ ꬋርሾ ላቃታ፥ ቃሴካ ሙጹዋታስ ጊዲዛ ጊስቴ፥ ማጺኔ፥ ዎይኔ ኡሹኔ ዎጋራ ዛይቴ ኡባ ፓጬይ ባይንዳ ኢስታስ ኢሚቴ። 10 ሃ ኡባስ ጋሶይካ ሳሎ ጾሳይ ኡፋይሳን ኤኪዛ ያርሾ ኢስቲ ሺሺሼ ካዎሲኔ ኢዛ ኣቱማ ናይታ ጊሻስ ዎሳና ማላሳ። 11 ሃይሳፌ ሃራ ታ ኢንቴና ኤሪሳና ኮይዛ ሚሺ ታ ኢሚዛ ኣዛዞ ኤኮንታይኔ ኣዛዜቶንታይ ዲኮ ኢዛ ኬꬃ ቱሳ ሾዲዲ ሄ ቱሳ ጼራ ማሲዲ ሄ ማሴቶ ቱሳ ጼራን ካቄቶ፤ ኢዛ ሶዚካ ላሌቲዲ ቡራ ኦሎሶ ጊዶ። 12 ሃ ኣዛዞዛ ኢጺዲ ዬሩሳላሜን ዲዛ ጾሳ ኬꬃ ላላና ኮይዛ ኣይ ካዎኔ ዴሬ ኡባ ባ ሱንꬃይ ጼይጌታና ማላ ዬሩሳላሜ ዶሪዳ ጾሳይ ꬋይሶ፤ ሃይሳ ኣዛዞዛ ኢሚዳይ ታና ካዎ ዳሪዮሳ ጊዲዳ ጊሻስ ኡባይ ፖሌታና ቤሴስ።»

13 ሄሳፌ ጉዬ ዴሬ ኣይሲዛ ታቴናዬ፥ ሳቴርቦዚናዬይኔ ኢስታራ ኢሲፌ ኦꬂዛ ዳናቲ ካዎይ ኣዛዚዳ ማላ ኡባ ፖሊዳ። 14 ኣይሁዳታ ካሌꬂዛይቲ፥ ናቤ ሃጌይኔ ዛካራሲ ሚንꬄꬂን ጾሳ ኬꬃ ኦሶ ኤሌሲ ኦꬂዳ፤ ኢስራኤሌ ጾሳ ሼኔን ፓሪሴ ካዎ ቂሮሲ፥ ዳሪዮሲኔ ኣርጼኪሲሲ ኣዛዚዳ ማላ ጾሳ ኬꬃ ኦሶ ፖሊዳ። ሃጌ 1፡1፤ ዛካ 1፡1 15 ኢስቲ ጾሳ ኬꬃ ኦሶ ፖሊዳ ዎዴይ ካዎ ዳሪዮሲ ካዎቲዳ ኡሱፑንꬆ ላይꬃን ኣዳሬ ኣጊናን ሄꬓንꬆ ጋላሳና። 16 ሄሳፌ ጉዬ ኢስራኤሌ ዴሬይ፥ ቄሴቲ፥ ሌዌቲ፥ ቃሴ ዲኤቴꬃፌ ሲሚዳ ኣሳይ ኡባይ ጾሳ ኬꬃ ኣንጂሶ ባኣሌዛ ኡፋይሳን ቦንቺዴስ። 17 ኢስቲካ ባኣሌዛ ቦንቾስ ጊዲዛ 100 ሚርጎታ፥ 200 ꬋርሾታኔ 400 ꬋርሾ ላቃታ ያርሾስ ሺሺዳ፤ ናጋራ ያርሾስ 12 ዴይሻ ኮርቤታ ኢስራኤሌ ኣሳ ኢሳ ኢሳ ዛርኬ ሱንꬃን ሺሺዳ። 18 ሙሴ ማጻፋን ጻፌቲዳ ዎጋ ማላ ዬሩሳላሜን ኬጼቲዳ ጾሳ ኬꬃን ኦሶስ ቄሴታኔ ሌዌታ ኢስታስ ቤሲዛ ማራን ማራን ዎꬂዳ።

19 ዲኤቲዳሶፔ ሲሚዳ ኣሳቲ ኮይሮ ኣጊናይ ጌሊዳ ማላ ታማኔ ኦይዳንꬆ ጋላስ ፓዚጋ ባኣሌ ቦንቺዳ። ኬሳ 12፡1-20 20 ቄሴቲኔ ሌዌቲ ዉሪ ዎጋዚ ጊዛ ማላ ባና ጌሺዳ፤ ሌዌቲካ ፓዚጋ ባኣሌ ቦንቺዛ ዎዴ ዲኤቴꬃፌ ሲሚዳ ኣሳታሲኔ ቄሴታስ፥ ቃሴ ባንታ ጊሻስ ሺቂዳ ሜሄታ ሹኪዳ። 21 ዲኤቴꬃፌ ሲሚዳ ኢስራኤሌ ኣሳቲኔ ሄ ካዎቴꬃን ዲዛ ኣይዛቤታ ዎጋ ኣጊዲ ጎዳ ኢስራኤሌ ጾሳ ጎይኒዛ ኡባታራ ፓዚጋ ካꬃ ሚዳ። 22 ጾሳይ ኣሶሬ ካዎ ላሚዲ ኢስራኤሌ ጎዳይ ኢዛን ጋላቴቲዛ ጾሳ ኬꬃ ዛሪ ኬጻና ማላ ኢስታ ኦሶን ማዲዳ ጊሻስ ላፑን ጋላስ ኩሜꬅ ኡኬꬃ ባኣሌ ኡፋይሳን ቦንቺዳ።