1 ኢዝራይ ጾሳ ኬꬃ ፔንጌን ጉልባቲዲ ዬኪ ዎሲሼኔ ኦሴቲዳ ናጋራ ኡባ ጾሳስ ፓጺሺን ኣቱማሳቲ፥ ማጫሳቲኔ ናይታራ ጉጂን ዳሮ ኢስራኤሌ ዴሬይ ኢዛ ዩዪ ኣꬊ ኢታ ዬሆ ዬኪዳ። 2 ሄሳፌ ጉዬ ኤላሜ ዜሬꬃታፔ ዪሂኤሌ ና ሻካኒያይ ኢዝራ፥ «ኑኒ ኑ ዴሬን ዲዛ ኣይዛቤ ማጫሳታ ኤኪዳ ጊሻስ ኑኒ ጾሳ ሲንꬃን ኣማኔቲቤኮ፤ ጊዶ ኣቲን ሃኢካ ኢስራኤሌስ ሂዶታይ ዴስ። 3 ሃኢ ሃ ኣላጋ ማጫሳታ ኢስታ ናይታራ ጋꬂ ዬዳናስ ጾሳ ሲንꬃን ጫቆ ቃላ ጌሎስ፤ ጎዶ ኔኒኔ ኑ ጾሳ ኣዛዞ ቦንቺዛ ሃራ ኣሳቲ ኢሚዛ ዞሬ ኡባ ኑ ፖላና፤ ቃሴ ጾሳ ዎጋይ ኣዛዚዛይሳ ኡባ ኑ ኦꬃና። 4 ሃይሳ ፖላናስ ኣላፌቴꬂ ኔስ ዲዛ ጊሻስ ዴንዳ፤ ኑኒካ ኔና ማዳና፤ ኣይኮይ ባ ሚና!» ጊዴስ።

5 ኢዝራይ ዴንዲዲ ቄሴ ሃላቃቲ፥ ሌዌቲኔ ሃንኮ ኣቲዳ ዴሬ ካሌꬂዛይቲ ሻካኒያይ ሺሺዳ ቆፋ ኤኪዳይሳ ኢዛስ ቆንጪሳና ማላ ጫቄꬂዲ ኦሶ ዶሚዴስ። 6 ሄሳፌ ጉዬ ኢዝራይ ጾሳ ኬꬃስ ሲንꬃ ባጋፌ ዴንዲዲ ኤልያሼቤ ና ዪሆሃናኔይ ዲዛ ኪፊሌ ጌሊዴስ፤ ዲኤቲዳ ኣሳታስ ኣማኖይ ꬋዪን ኢስቲ ኦꬂዳ ሞሮ ጊሻስ ኩሜꬃ ኦማርስ ሙዞቲሼ ጋዴ ዎንቲሲዴስ፤ ካꬂኔ ሃꬅ ባ ዶናኮ ሺሾንታ ጾሚዴስ።

7 ሄሳፌ ጉዬ ዲኤቴꬃፌ ሲሚዳ ኣሳይ ዬሩሳላሜን ሺቃና ማላ ዩሁዳኒኔ ዬሩሳላሜ ኡባን ኣዋጄቲዴስ። 8 ሄሲ ዉሪካ ዴሬ ኣይሲዛይታ ዞሬኒኔ ኣዛዞን ቃሼቲዳ ማላ ሄꬑ ጋላሳ ጊዶን ሃ ሺቆዛን ሺቆንታ ኣቲዳዴይ ኦኒካ ዲኮ ኢዚ ሃሪዳዚ ዉሪ ቦንቄቲን ዲኤቴꬃፌ ሲሚዳ ኣሳታ ሺቆፔ ጎዴታና ማላ ዮቴቲዴስ። 9 ሄ ጼይሳዚ ጼይጌቲዳ ማላ ሄꬑ ጋላሳ ጋርሳን ዩሁዳኒኔ ቢኒያሜ ዴሬን ዴኢዛ ኣሳይ ዉሪ ኡዱፉንꬆ ኣጊናን ናምኡ ታማንꬃ ጋላስ ዬሩሳላሜ ዪዲ ጾሳ ኬꬃ ካሬን ዲዛ ዴምባን ሺቂዳ፤ ሄ ሺቂዳ ኣሳይ ኣሾንታ ዱላታፔኔ ሄ ዎዴ ቡኪዛ ዎልቃማ ኢራፔ ዴንዲዳይሳን ኮኮሪሼ ሲዪዴስ።

10 ቄሴ ኢዝራይ ኤቂዲ፥ «ኢንቴ ኢንቴ ኣማኖ ፓጪሲ ቤቲዴታ፤ ኣይዛቤ ማጫሳታፔ ማቼታ ኢንቴ ኤኪዳ ጊሻስ ኢስራኤሌ ኣሳ ቆሆ ቦላ ቆሆ ጉጂዴታ። 11 ሃኢፔ ዶሚዲ ካሴ ኢንቴ ኣዋታ ጾሳ ሲንꬃን ኢንቴ ናጋራ ፓጺቴ፤ ኢዚ ኡፋዬቲዛ ሚሽ ኡባ ኦꬂቴ፤ ኑ ዴሬን ዲዛ ኣይዛቤ ኣሳታፔ ሻኬቲቴ፤ ኢንቴ ኤኪዳ ሄ ማጫሳታ ኣንጂ ዬዲቴ» ጊዴስ።

12 ሺቂዳ ዴሬይ ዉሪ ባ ቃላ ꬎቁ ሂስቲዲ «ኔ ጊዛይሳ ኡባ ኑ ኦꬃና! 13 ጊዶ ኣቲን ሄኮ ሺቂዳ ኣሳይ ዳሮ፤ ቃሴካ ዴጾ ኢራይ ቡኪዛ ጊሻስ፥ ኢዛን ጌላና ኬꬂ ባይንዳ ጊሻስ ሃይሳን ኤቃናስ ዳንዳዮኮ፤ ሄሳ ቦላ ቃሴ ኑፔ ዳሮቲ ሃ ናጋራን ጌሊዳ ጊሻስ ኢሲ ቃማኒኔ ናምኡ ቃማን ሃ ዮኦዚ ዉራና ዳንዳዬና። 14 ሄሳ ጊሻስ ኑ ሃላቃቲ ዬሩሳላሜን ታኪዲ ሃ ዮኦዛ ሎኤꬂ ጼሌቶ፤ ሄሳፌ ጉዬ ኣይዛቤ ማጫሳታ ኤኪዳይቲ ዉሪ ባንቲ ዲዛ ካታማን ዲዛ ካሌꬂዛይታራኔ ዳናታራ ጊዲዲ ባሬይ ኢሜቲዳ ጋላስ ባስ ኢሜቲዳ ፒርዳ ኤኬቶ፤ ሄሳꬆ ኦꬂኮ ጾሳ ሃንቆይ ሄሳን ኢርጻና» ጊዴስ። 15 ሃይሲ ዮቴቲን ማሹላሜይኔ ሌዌ ሳባታይ ሄ ዮቴቲዳ ቆፋ ኤቄቲን ኢስታ ቆፋ ማዲዳይቲ ኣሳሄሌ ና ዮናታኔኔ ቴቁዌ ና ያሂጼሌ ጻላ ጊዲሺን ሃንኮ ዴሬይ ቆፋዛን ኩዪዴስ።

16 ዲኤቴꬃፌ ሲሚዳ ዴሬ ኡባይ ሃይሳ ቆፋዛ ኤሮ ጊ ኤኪዴስ፤ ሄሳ ጊሻስ ቄሴ ኢዝራይ ሃ ኦሶዛ ኦሲሲዛይታ ኮራፒኔታ ዶሪዲ ኢስታ ሱንꬅ ጻፊ ዎꬂዴስ፤ ኢስቲካ ታማንꬃ ኣጊናይ ጌሊዳ ኮይሮ ጋላስ ሄ ዮኦዛ ፒልጊ ጼሎ ኦይኪዳ። 17 ካሊዛ ላይꬃን ኮይሮ ኣጊናን ኮይሮ ጋላስ ኣይዛቤ ማጫሳታ ኤኪዳ ኣሳታ ዮኦ ፒልጊ ጼሊ ኦንጊዳ።

18 ኣይዛቤ ማጫሳታ ኤኪዳ ኣሳታ ሱንꬂ ሃይሳፌ ካሊ ዲዛይሳ፤ ቄሴ ዜሬꬃታፔ፥ ኢዮሳዶቄ ናይታ ጊዲዳ ኢያሶፔኔ ኢዛ ኢሻታፔ ባጋፌ ማኢሳያ፥ ኤልኤዜሬ፥ ያሪቤኔ ጎዶሊያሳ፤ 19 ኢስቲ ባ ማቼታ ኣንጂ ዬዳና ማላ ቃላ ጌሊዳፔ ጉዬ ባንታ ቆሆ ያርሾስ ꬋርሾ ኤኪ ኤሂዳ።

20 ኢሜሬ ዜሬꬃፌ፥ ሃናኒያኔ ዛባዲያ፥

21 ሃሪሜ ዜሬꬃፌ፥ ማኢሳያ፥ ኤላሳ፥ ሻማኤ፥ ዪሂኤሌኔ ኦዚያ፤

22 ፓሽኩሬ ዜሬꬃፌ፥ ኤልዮኤናዬ፥ ማኢሳያ፥ ኢስማኤሌ፥ ናቲናኤሌ፥ ዮዛባዴኔ ኤልኣሳ፤

23 ሌዌታ ዜሬꬃታፔ፥ ዮዛባዴ፥ ሺምኤ፥ ቃሊጻ ጌቴቲ ጼይጌቲዛ ቄላያ፥ ፓታያ፥ ዩሁዳኔ ኤልኤዜሬ፤

24 ዬꬃ ዬጺዛይታ ባጋፌ፥ ኤልያሼቤ ጾሳ ኬꬃ ጊቤ ናጊዛይታ ባጋፌ፥ ሻሎሜ፥ ቴሌሜኔ ኡሪ፤

25 ሃራ ኢስራኤሌ ኣሳፔ፥ ፓሮሴ ዜሬꬃፌ፥ ኤራሚያ፥ ዪዚያ፥ ማልኪያ፥ ሚያሚኔ፥ ኤልኤዜሬ፥ ማልኪያኔ ባናያ፤

26 ኤላሜ ዜሬꬃፌ፥ ማታኒያ፥ ዛካራሳ፥ ዪሂኤሌ፥ ኣቢዴ፥ ያርሞቴኔ ኤላሳ፤

27 ዛቶ ዜሬꬃፌ፥ ኤልዮኤናዬ፥ ኤልያሼቤ፥ ማታኒያ፥ ያርሞቴ፥ ዛባዴኔ ኣዚዛ፤

28 ቤባዬ ዜሬꬃፌ፥ ዪሆሃናኔ፥ ሃናኒያ፥ ዛባዬኔ ኣትላዬ፤

29 ባኔ ዜሬꬃፌ፥ ማሹላሜ፥ ማሉኬ፥ ኣዳያ፥ ያሹቤ፥ ሼኣሌኔ ኤራሞቴ፥

30 ፓሃቴ-ሞኣቤ ዜሬꬃፌ፥ ኣዳና፥ ካላሌ፥ ባናያ፥ ማኢሳያ፥ ማታኒያ፥ ባስሊኤሌ፥ ቢኑዌኔ ሚናሴ፤ 31-32 ሃሪሜ ዜሬꬃፌ፥ ኤልኤዜሬ፥ ዪሺያ፥ ማልኪያ፥ ሻማኤ፥ ሲሞና፥ ቢኒያሜ፥ ማሉኬኔ ሻማሪያ፤

33 ሃሹሜ ዜሬꬃፌ፥ ማታኒያ፥ ማታታ፥ ዛባዴ፥ ኤልፋሌጼ፥ ዬርማዬ፥ ሚናሴኔ ሺምኤ፤

34-37 ባኔ ዜሬꬃፌ፥ ማኢዳዬ፥ ኣሚራሜ፥ ኡእሌ፥ ባናያ፥ ባዲዬ ኬሉሄ፥ ዋኒያ፥ ሜርሞቴ፥ ኤልያሼቤ፥ ማታኒያ፥ ማቲኒያኔ ያኢሴ 38-42 ባኔ ዜሬꬃፌ፥ ሺምኤ፥ ሼሌሚያ፥ ናታኔ፥ ኣዳያ፥ ማኪናዳባዬ፥ ሻሻዬ፥ ሻራዬ፥ ኣዛሪኤሌ፥ ሼልሚያ፥ ሻማሪያ፥ ሻሎሜ፥ ኣማሪያኔ ዮሴፌ፤

43 ኔቦ ዜሬꬃፌ፥ ዪኢኤሌ፥ ማቲቲያ፥ ዛባዴ፥ ዜቢኔ፥ ያዳያ፥ ኢዩኤሌኔ ባናያ፤ 44 ሃይቲ ዉሪ ኣይዛቤ ማጫሳታ ባስ ማቾ ኤኪዳይታ፤ ኢስቲካ ኣይዛቤ ማጫሳታ ኣንጂዲ ኢስታ ናይታራ ጋꬂ ዬዲዳ።