1 ሃካሊያ ና ናሂሚያይ ሃሳይዳ ቃላይ ሃይሳፌ ካሊ ዲዛይሳ፤ ኣርጼኪሲሲ ፓሪሴ ዴሬን ካዎቲዳ ናምኡ ታማንꬃ ላይꬃን ኪሶሌ *ኪሶሌ፡ ኪሶሌ ጌቴቲዛይሲ ኢብራዌታ ኣጊና ቆዳን ኡዱፉንꬆ ኣጊና ጊዲሺን ኑ ታይቦን ሂዳሬ ኣጊና ባጋፌ ቢዲ ቲሳሴ ኣጊና ባጋ ጋካና ዲዛይሳ ቤሴስ። ጌቴቲ ጼይጌቲዛ ኣጊናን ታ ናሂሚያይ ዋና ካታማ ሱሳን ዳይስ። 2 ታ ኢሻታፔ ኢሲ ሃናኒያ ጌቴቲዛይሲ ሃራ ኣሳታ ካሌꬂዲ ዩሁዳፔ ታኮ ዪዴስ፤ ታኒ ኢስታ ዬሩሳላሜ ጊሻሲኔ ዲኤቲዲ ባቢሎኔ ቦንታ ሄን ኣቲዳ ኣሳ ጊሻስ ኦይቻዲስ። 3 ኢስቲካ ታስ፥ «ዲኤቲዲ ባቢሎኔ ቢታ ቦንታ ኣቲዳ ኣይሁዳቲ ጊታ ሜቶኒኔ ዋዬ ጊዶን ዴቴስ፤ ዬሩሳላሜ ጊምቤቲ ላሌቲዲ ኩንዲዳ፤ ቃሴ ጊምቤዛ ጎርዲዛ ፔንጌቲ ታማን ጹጌቲዳ» ጊዳ።

4 ሃይሳ ኡባ ሲዪዳፔ ጉዬ ኡታዳ ዬካዲስ፤ ዳሮ ጋላስ ጾማኒኔ ሙዞቴꬃን ጋምኣዳ ጾሳ ሂዝጋ ዎሳዲስ፥

5 «ሳሎ ጎዳዉ! ኔና ዶሲዛይታራኔ ኔ ኣዛዞ ናጊዛይታራ ሜርናስ ኔኒ ኔ ጫቆ ቃላ ናጊዛ ጊታኔ ያሺሲዛ ጾሳ። 6 ጾሳዉ! ኔ ኣይሌ ጊዲዳ ኢስራኤሌ ኣሳስ ኪያና ማላ ጋላሲኔ ኦማርስ ታ ዎሲዛ ዎሳ ሲያ፤ ታናካ ቆፓ፤ ኑኒ ኢስራኤሌ ኣሳይ ኦꬂዳ ናጋራ ታኒ ኔስ ፓጻይስ፤ ቱማፔ ታኒኔ ካሴ ኑ ኣዋቲ ናጋራ ኦꬂዶስ። 7 ኔኒ ኔ ኣይሌ ሙሴስ ኢሚዳ ኣዛዞዛኔ ዎጋዛ ኑኒ ናጎንታ ኣጊዳ ጊሻስ ኔና ቆሂዶስ።

8-9 «ኔ ሙሴስ፥ ‹ኢንቴኖ ኢስራኤሌ ኣሳዉ! ኢንቴ ታና ኣማኖን ካሎንታ ኣጊኮ ታኒ ኢንቴና ካዎቴꬃታ ጊዶን ላላና፤ ጊዶ ኣቲን ኢንቴ ታኮ ሲሚዲ ታ ኣዛዞ ፖሊዛ ጊዲኮ ታ ኢንቴና ቢታ ጋጻን ኢንቴ ላሌቲዳ ጊዲኮካ ታ ሱንꬃይ ጼይጌታና ማላ ታ ዶሪዳሶ ሺሻዳ ዛራ ታ ኤሃና› ጋዳ ዮቲዳ ቃላ ቆፓ። ሌዌ 26፡33፤ ዛሬ 30፡1-5

10 «ጾሳዉ! ሃይቲ ሃይሳፌ ካሴ ኔኒ ኔ ጊታ ዎልቃኒኔ ሚኖ ቄሴን ዎዚዳ ኔ ኦሳንቻታኔ ኔ ዴሬታ። 11 ጎዳዉ! ሃኢካ ታ ዎሲዛ ዎሳ ሲያ፤ ኔና ዶሲዲ ቦንቻና ኮይዛ ኦሳንቻታ ዎሳ ኤዝጋ፤ ቃሴ ሃይሳ ካዎዛ ሲንꬃን ታስ ቴማቴꬅ ኢማዳ ሃች ታኒ ኔ ኦሳንቻዚ ኦꬃና ኮይዛይሳ ታስ ፖሊሳ።»

ታኒ ሄ ዎዴ ካዎሶን ዎይኔ ኡሹ ጋሴꬂዛ ኣሳ።