1 ጾሲ ኮይሮ ሳሎኔ ሳኣ ሜꬊዴስ። 2 ሄ ዎዴ ሳኣይ ሎኢ ጊጊቤናኔ ኣይኮይካ ባይንዳ ሜላ ዴስ፤ ጪማሶሆታ ꬉማይ ጎዚ ኦይኪዴስ፤ ጾሳ ኣያናይ ሃꬃፌ ቦላራ ማይኢ ኡቲዴስ።

3 ሄሳፌ ጉዬ ጾሲ፥ «ፖኦ ጊዶ» ጊን ፖኦ ጊዲዴስ። 2ቆሮ 4፡6 4 ፖኦይ ሎኦ ጊዲዳይሳ ጾሲ ቤኢዲ ፖኦ ꬉማፔ ሻኪዴስ። 5 ጾሲ ፖኦዛ፥ «ጋላስ»፥ ꬉማዛ፥ «ኦማርስ» ጊ ሱንꬂዴስ። ጋዴይ ቃሚዴሲኔ ዎንቲዴስ፤ ሄሲካ ኮይሮ ጋላሳ።

6-7 ሄሳፌ ጉዬ ጾሲ፥ «ቦላራ ዲዛ ሃꬃ ጋርሳራ ዲዛ ሃꬃፌ ሻኪዛ ሳሎ ጉፋንꬆይ ሃኖ» ጊን ሃኒዴስ። ጾሲ ሳሎ ጉፋንꬆ ጊግሲዲ፥ ሳሎ ጉፋንꬆፌ ቦላራ ዲዛ ሃꬃ ጋርሳራ ዲዛ ሃꬃፌ ሻኪዴስ። 8 ጾሲ ሄ ጉፋንꬆዛ፥ «ሳሎ» ጊ ሱንꬂዴስ። ጋዴይ ቃሚዴሲኔ ዎንቲዴስ፤ ሄሲካ ናምኣንꬆ ጋላሳ። 2ጴጽ 3፡5

9 ሄሳፌ ጉዬ ጾሲ፥ «ሳሎፔ ጋርሳራ ዲዛ ሃꬂ ኢሲሶን ሺቂ ኤሊኮ ሜላ ቢታይ ቆንጮ» ጊን ሃኒዴስ። 10 ጾሲ ሄ ሜላ ሶሆዛ፥ «ቢታ» ጊ ሱንꬂዴስ፤ ቃሴ ኢሲሶን ኤሊዳ ሃꬃ፥ «ኣባ» ጊ ሱንꬂዴስ፤ ሂስቲዲ ጾሲ ሄሲ ሎኦ ጊዲዳይሳ ቤኢዴስ። 11 ሄሳፌ ሲሚን ጾሲ፥ «ቢታይ ሚꬂኔ ማታ ሞኪሶ፤ ዜሬꬃ ኣይፌራ ዲዛ ሚꬂኔ ዜሬꬃ ኣይፌራ ዲዛ ቴሪዛ ሚꬅ ዱማ ዱማ ቆሞ ሞኪሶ» ጊን ሃኒዴስ። 12 ሄሳ ጊሻስ ቢታይ ሚꬂኔ ማታ ዱማ ዱማ ቆሞን ሞኪሲን ጾሲ ሄሲ ሎኦ ጊዲዳይሳ ቤኢዴስ። 13 ጋዴይ ቃሚዴሲኔ ዎንቲዴስ፤ ሄሲካ ሄꬓንꬆ ጋላሳ።

14 ሄሳፌ ጉዬ ጾሲ፥ «ጋላስ ቃማፌ ሻካናስ ፖኦቲ ሳሎ ጉፋንꬆን ጊዴቶ፤ ኢስቲ ጋላስ፥ ዎዴኔ ላይꬅ ኤሪሴቶ፤ 15 ቢታ ቦላን ፖኢሳና ማላ ኢስቲ ሳሎ ጉፋንꬆን ፖኤቶ» ጊን ሃኒዴስ። 16 ጾሲ ናምኡ ጊታ ፖኦታ፥ ጊታቲዛይሲ ጋላስ ፖኣና ማላኔ ጉጺዛይሲ ኦማርስ ፖኣና ማላ ሜꬊዴስ፤ ጾሊንቴታካ ሜꬊዴስ። 17-18 ጾሲ ኢስታ ሃ ቢታ ቦላን ፖኢሳና ማላ፥ ጋላሲኔ ቃማ ሃራና ማላኔ ፖኦዛ ꬉማፔ ሻካና ማላ፥ ሳሎ ጉፋንꬆን ኢስታ ዎꬂዴስ። ሂስቲዲ ጾሲ ሄሲ ሎኦ ጊዲዳይሳ ቤኢዴስ። 19 ጋዴይ ቃሚዴሲኔ ዎንቲዴስ፤ ሄሲካ ኦይዳንꬆ ጋላሳ።

20 ሄሳፌ ጉዬ ጾሲ፥ «ሼምፖራ ዲዛ ዱማ ዱማ ሜꬌቴꬃቲ ሃꬃ ጊዶን ዳሬቶ፤ ካፎቲካ ቢታፌ ቦላራኔ ሳሎ ጉፋንꬆፌ ጋርሳራ ፒራꬌቶ» ጊዴስ። 21 ሂስቲዲ ጾሲ ኣባን ዲዛ ጊታ ዶኣታ፥ ሃꬃ ጊዶን ዎጺ ቃጺዛ ሜꬌቴꬃታ ኡባ፥ ካፎ ኡባ ዱማ ዱማ ቆሞን ሜꬊዴስ። ሄሲካ ሎኦ ጊዲዳይሳ ጾሲ ቤኢዴስ። 22 ጾሲ ኢስታስ፥ «ዬሌቲቴ፤ ዳሪቴ፤ ኣባ ሃꬃ ኩሚቴ፤ ካፎይካ ቢታ ቦላን ጮራቶ» ጊ ኣንጂዴስ። 23 ጋዴይ ቃሚዴሲኔ ዎንቲዴስ፤ ሄሲካ ኢቻሻንꬆ ጋላሳ።

24 ሄሳፌ ጉዬ ጾሲ፥ «ሼምፖራ ዲዛ ሜꬌቴꬃቲ ባ ቆሞን ቆሞን ሜሄቲ፥ ቢታራ ጎሼቲዛ ሜꬌቴꬃቲኔ ዶኣቲ ባ ቆሞን ቆሞን ቢታ ቦላ ኬዜቶ» ጊን ሃኒዴስ። 25 ጾሲ ዶኣታ ኢስታ ቆሞን ቆሞን፥ ሜሄታካ ኢስታ ቆሞን ቆሞኒኔ ቢታራ ጎሼቲዛ ሜꬌቴꬃታካ ኡባ ኢስታ ቆሞን ቆሞን ሜꬊዴስ፤ ሄሲካ ሎኦ ጊዲዳይሳ ጾሲ ቤኢዴስ።

26 ሄሳፌ ሲሚን ጾሲ፥ «ኣኔ ኣስ ኑ ሌሚሶን ኑና ሚሳቲሲዲ ሜꬎስ፤ ኢስቲ ኣባ ሞሌታ፥ ሳሎ ካፎታ፥ ሜሄታ፥ ቢታ ቦላ ዎጺ ቃጺዛ ሜꬌቴꬃታ ኡባ ሃሬቶ» ጊዴስ። 1ቆሮ 11፡7 27 ሄሳꬆ ጾሲ ኣስ ባ ሌሚሶን ባና ሚሳቲሲዲ ሜꬊዴስ፤ ኢዚ ኢስታ ኣዴኔ ማጫ ኦꬂ ሜꬊዴስ።ማቶ 19፡4፤ ማር 10፡6

28 ጾሲ ኢስታስ፥ «ዬሌቲቴ፤ ጮራቲቴ፤ ሃይሳ ቢታ ኩሚቴኔ ሃሪቴ፤ ኣባ ሞሌ፥ ሳሎ ካፎታኔ ቢታ ቦላ ዎጺ ቃጺዛ፥ ሼምፖራ ዲዛ ሜꬌቴꬃታ ኡባ ሃሪቴ» ጊ ኣንጂዴስ። ሜꬌ 5፡1-2

29 ሄሳፌ ሲሚን ጾሲ፥ «ቤኢቴ! ታኒ ሃ ቢታ ኡባ ቦላን ዜሬꬃ ኣይፌራ ዲዛ ሚꬂኔ ዜሬꬃ ኣይፌራ ዲዛ ቴሪዛ ሚꬅ ኡባ ኢንቴስ ኢማዲስ፤ ኢስቲካ ኢንቴስ ሚዛ ቁማ ጊዴቶ። 30 ቃሴካ ሃ ቢታ ቦላ ዲዛ ሜሄኔ ዶኣ ኡባስ፥ ሳሎ ካፎታስ ኡባስ፥ ቢታራ ጎሼቲዛ ሜꬌቴꬃታ ኡባሲኔ ሼምፖራ ፓጻ ዲዛ ሜꬌቴꬃታ ኡባስ ሚዛ ሚሽ ጊዳና ማላ፥ ጪሊላ ሚꬂኔ ማታ ኩሜꬅ ኢማዲስ» ጊን ሃኒዴስ። 31 ጾሲ ባ ሜꬊዳይሳ ኡባካ ጼሊዲ ዳሮ ሎኦ ጊዲዳይሳ ቤኢዴስ። ጋዴይ ቃሚዴሲኔ ዎንቲዴስ፤ ሄሲካ ኡሱፑንꬃ ጋላሳ።