1 ሳሎ ቦላኔ ሳኣ ቦላ ዲዛይ ዉሪ ሃይሳꬆ ኦሴቲ ፖሌቲዴስ። 2 ጾሲ ባ ኦꬂዳ ኦሶ ኡሱፑንꬃ ጋላስ ፖሊዲ ባ ኦꬂዳ ኦሶ ኡባፌ ላፑንꬃ ጋላስ ሼምፒዴስ። ኢብ 4፡4፥10 3 ቃሴ ጾሲ ላፑንꬃ ጋላሳ ኣንጂዴሲኔ ዱማ ጋላስ ኦꬂዴስ፤ ኣይስ ጊኮ ጾሲ ባ ኦꬂዛ ኦሶ ዉርሲዲ ሼምፒዳይ ሄ ጋላሳና። ኬሳ 20፡11 4 ሳሎይኔ ሳኣይ ሜꬌቲዳይ ሄሳ ማላና።

ጎዳይ ሳኣኔ ሳሎ ሜꬊዳ ዎዴ፥ 5 ሳኣ ቦላን ማታይ፥ ሚꬂ፥ ኣይ ሚሺካ ሞኪቤና፤ ኣይስ ጊኮ ጎዳይ ኢራ ቡኪሲቤና፤ ቃሴ ቢታ ኦꬂዛ ኣሲካ ሜꬌቲቤና። 6 ጊዲኮካ ሃꬂ ቢታፌ ፑዴ ማጮቲ ኬዚዲ ቢታ ኡባ ኢርጺሴስ። 7 ሄሳፌ ጉዬ ጎዳይ ቢታፌ ኢሲ ኣስ ሜꬊዲ ኢዛ ሲꬌን ዴኦ ሼምፖ ፑኒን ኣዴዚ ሼምፖራ ዲዛዴ ጊዲዴስ። 1ቆሮ 15፡45*ኣስ ጉሲ ኢብራዌታ ቃላን፥ «ኣዳሜ» ጌቴቴስ፤ «ኣዳሜ» ጉሲ፥ «ቢታ» ጌቴቴስ፤ ሄ ናምኡ ቃላቲ ኢሶይ ኢሳ ሚሳቴቴስ።

8 ካሴ ጎዳይ ኣርሼይ ሞኪዛ ባጋራ ኤዴኔ ጌቴቲዛሶን ሎኦሶ ጊግሲዲ ባ ሜꬊዳ ኣዴዛ ሄን ዎꬂዴስ። 9 ጎዳይ ጼላናስ ሎኢዛ፥ ማናስካ ማልኢዛ ዱማ ዱማ ቆሞ ሚꬅ ቢታፌ ሞኪሲዴስ፤ ኤዴኔ ጊዶን ዴኦ ኢሚዛ ሚꬂ ዴስ፤ ሄሳꬆካ ሎኦኔ ኢታ ኤሪሲዛ ሚꬅ ዎꬂዴስ።ኣጁ 2፡7፤ 22፡2፥14

10 ጋናቴ ኡሺዛ ሻፋ ሃꬂ ኤዴኔፔ ጎጌስ። ኤዴኔፔ ኬዚዳፔ ጉዬ፥ ኦይዱ ሻፋ ጊዲ ሻኬቴስ። 11 ኮይሮ ሻፋ ሱንꬂ ፒሶኔ፤ ፒሶኔይ ዎርቃይ ዲዛ ሃዊላ ጌቴቲዛ ቢታ ዩሾ ኡባን ጎጌስ። 12 ሄ ቢታ ዎርቃይ ጌሻ ዎርቃ፤ ቃሴ ኣልኦ ሺቶይኔ ኬሂ ሎኢዛ ሹቺ ሄን ዴስ። 13 ናምኣንꬆ ሻፋ ሱንꬂ ጊዮኔ፤ ጊዮኔይ ቶጵያ †ቶጵያ፡ ቶጵያ ጊዛይሳ ኢብራዌ ማጻፋይ ኩሽ ጌስ። ቢታ ዩሾ ኡባን ጎጌስ። 14 ሄꬓንꬆ ሻፋ ሱንꬂ ጼግሮሴ፤ ጼግሮሴይ ኣሶሬፔ ኣርሼይ ሞኪዛ ባጋራ ጎጌስ፤ ቃሴ ኦይዳንꬆ ሻፋይ ኤፊራጺሴ ጌቴቴስ።

15 ኣዴዚ ኤዴኔን ኦꬃና ማላኔ ናጋና ማላ ጎዳ ጾሳይ ኢዛ ኤፊ ዎꬂዴስ። 16 ሂስቲዲ ጎዳ ጾሳይ ኣዴዛ፥ «ኤዴኔ ሚꬃ ቴራ ኡባፌ ኔኒ ማና ጊኮ ማ፤ 17 ጊዶ ኣቲን ሎኦኔ ኢታ ኤሪሲዛ ሚꬃይ ቴራፔ ሞፓ፤ ኣይስ ጊኮ ኔኒ ኢዚፔ ሚዳ ጋላስ ቱሙ ሃይቃና» ጊ ኣዛዚዴስ።

18 ሄሳፌ ጉዬ ጎዳ ጾሳይ፥ «ኣዴዚ ባርካ ዲዛይሲ ሎኦ ዴና፤ ታኒ ኢዛስ ኢንጄቲዛ ማዶ ኣስ ሜꬋና» ጊዴስ።

19 ጎዳ ጾሳይ ካሴ ሜሄታ ዶኣታ ሳሎ ካፎታ ኡባ ቢታፌ ሜꬊዴስ፤ ቃሴ ኣዴዚ ኢስታ ኣይ ጊዲ ሱንꬃናኮ ሲያናስ ኢዛኮ ኤሂን ኣዴዚ ሼምፖራ ዲዛ ሜꬌቴꬃታ ኡባ ሱንꬂዳ ሱንꬃይ ኢስታስ ሱንꬅ ጊዲ ኣቲዴስ። 20 ሄሳꬆ ኣዴዚ ሜሄታ፥ ሳሎ ካፎታኔ፥ ዶኣታ ኡባ ሱንꬂዴስ፤ ጊዶ ኣቲን ኣዳሜስ ኢንጄቲዛ ማዶ ኣሲ ቤቲቤና።

21 ሄሳ ጊሻስ ጎዳ ጾሳይ ኣዴዛ ꬊስኮ ꬊስኪሲዲ፥ ኢዚ ꬊስኮን ዲሺን ኢዛ ሚሌ ሜቄꬃታፔ ኢሳ ኤኪዲ ሄ ሶሆዛን ኣሾ ኩንꬂዴስ። 22 ጎዳ ጾሳይ ኣዴዛፔ ኤኪዳ ሜቄꬃ ማጫስ ሜꬊዲ ኢዞ ኣዴዛኮ ኤሂዴስ። 23 ኤሂን ኣዴዚ፥ «ሄኮ! ሃ ሜቄꬃያ ታ ሜቄꬃፌ፥ ሃ ኣሾያካ ታ ኣሾፔ ኤኬቲዳሮ፤ ኢዛካ ኣቱማሳፔ ኤኬቲዳ ጊሻስ፥ ማጫስ ጌቴቱ» ጊዴስ። ‡ኣዴ ጉሲ ኢብራዌታ ቃላን፥ «ኢሽ» ጌቴቴስ፤ «ማጫስ» ጉሲ፥ «ኢሻ» ጌቴቴስ፤ ሄ ናምኡ ቃላቲ ኢሶይ ኢሳ ሚሳቴቴስ። 24 ሄሳ ጊሻስ ኣሲ ባ ኣዋኔ ባ ኣዮ ኣጌስ፤ ባ ማቼይራ ኢሲፌ ዴስ፤ ኢስቲ ናምኣይ ኢሲ ኣሾ። ማቶ 19፡5፤ ማር 10፡7-8፤ 1ቆሮ 6፡16፤ ኤፌ 5፡31 25 ኣዴዚኔ ኢዛ ማቼያ ናምኣይካ ፓጻ ካሎ ዴቴስ፤ ጊዶ ኣቲን ኢሳይ ኢሳስ ዬላቲ ኤሬቴና።