1 ሄሳፌ ጉዬ ጎዳይ ኖሄ፥ «ኔኒ ሃይሳ ሃ ዎዴ ዬሌታ ጊዶን ጺሎ ጊዲዳይሳ ታ ቤኢዳ ጊሻስ ኔኒ ኔሶ ኣሳ ኡባራ ማርካቤዛ ጊዶ ጌላ። 2-3 ኔኒ ጌሽ ጊዲዳ ሜሄኔ ዶኣ ኡባፌ ኢዛ ቆሞፌ ቆሞፌ ኣዴኔ ማጫ ላፑን ላፑን፥ ጌሽ ጊዶንታ ሜሄኔ ዶኣ ኡባፌ ኢዛ ቆሞፌ ቆሞፌ ኢሲ ኣዴኔ ኢሲ ማጫ ቃሴ ካፎታፔ ኢዛ ቆሞፌ ቆሞፌ ኣዴኔ ማጫ ላፑን ላፑን፥ ቢታ ኡባ ቦላን ዱማ ዱማ ዜሬꬃይ ፓጻ ዳና ማላ ኔናራ ኤካ ጌላ። 4 ኣይስ ጊኮ ላፑን ጋላሳፌ ጉዬ ታኒ ኦይዱ ታሙ ጋላሲኔ ኦይዱ ታሙ ቃማ ቢታ ቦላን ኢራ ቡኪሳና፤ ሂስታዳ ታኒ ሜꬊዳ ሜꬌታ ኡባ ቢታ ቦላፌ ꬋይሳና» ጊዴስ።

5 ኖሄይ ጎዳይ ኢዛ ኣዛዚዳይሳ ኡባ ኦꬂዴስ።

6 ꬋይሳ ሃꬂ ቢታ ቦላ ዪዛ ዎዴ ኖሄስ ላይꬃይ ኡሱፑን ጼታ። 7 ኖሄ፥ ኢዛ ኣቱማ ናይቲ፥ ኢዛ ማቼያኔ ኢዛ ናይታ ማቼቲ ꬋይሳ ሃꬃፌ ኣታናስ ማርካቤዛ ጊዶ ጌሊዳ። ማቶ 24፡38-39፤ ሉቃ 17፡27 8 ጌሻ ሜሄፔኔ ዶኣፔ፥ ጌሽ ጊዶንታ ሜሄፔኔ ዶኣፔ፥ ካፎፔኔ ቢታራ ጎሼቲዛ ኡባፌ፥ 9 ጾሲ ኖሄ ኣዛዚዳ ማላካ ኣዴኔ ማጫ ናምኡ ናምኡ ጊዲዲ ኖሄኮ ማርካቤዛ ጊዶ ጌሊን፥ 10 ላፑን ጋላሳፌ ጉዬ ꬋይሳ ሃꬂ ቢታ ቦላ ዪዴስ።

11 ኖሄስ ኡሱፑን ጼቱ ላይꬅ ጊዲሺን ናምኣንꬆ ኣጊናን ታማኔ ላፑንꬃ ጋላሳን ሄ ጋላሳንካ ቢታ ጊዶን ዲዛ ጊታ ጪማ ፑልቶይ ዉሪ ꬉቂዴስ፤ ሳሎን ዲዛ ሃꬃ ማስኮቴቲካ ዶዬቲ ዎꬊዳ።2ጴጽ 3፡6 12 ኢራይ ቢታ ቦላን ኦይዱ ታሙ ጋላሲኔ ኦይዱ ታሙ ኦማርስ ቡኪዴስ። 13 ሄ ጋላሳን ኖሄይኔ ኢዛ ኣቱማ ናይቲ፥ ሴሜይ፥ ካሜይኔ ያፌቴይ፥ ኖሄ ማቼያኔ ኢዛ ናይታ ሄꬓታ ማቼቲ ኢሲፌ ማርካቤዛ ጊዶ ጌሊዳ። 14 ኢስታኔ ዶኣ ኡባፌ ባ ቆሞን ቆሞን፥ ሜሄ ኡባፌካ ባ ቆሞን ቆሞን፥ ቢታራ ጎሼቲዛያታ ኡባፌ ባ ቆሞን ቆሞን፥ ካፎ ኡባፌ ባ ቆሞን ቆሞን ኢስታራ ኢሲፌ ጌሊዳ። 15 ሼምፖራ ፓጻ ዲዛይቲ ዉሪ ናምኡ ናምኡ ጊዲዲ ኖሄኮ ማርካቤዛን ጌሊዳ፤ 16 ጾሳይ ኖሄ ኣዛዚዳ ማላ ሜꬌታ ኡባፌ ኣዴኔ ማጫ ጊዲዲ ማርካቤዛ ጊዶ ጌሊን ኖሄይ ጊዶን ዲሺን ጎዳይ ማርካቤዛ ፔንጌ ጎርዲዴስ።

17 ꬋይሳ ሃꬂ ኦይዱ ታሙ ጋላስ ቢታ ቦላ ቡኪሼ ጋምኢዴስ፤ ሃꬂ ዳሪዲ፥ ማርካቤዛ ቢታፌ ፑዴ ዴንꬂዴስ። 18 ሃꬃይ ቢታ ቦላን ኬሂ ዳሪን ማርካቤዚ ሃꬃ ቦላን ቶኬቲዴስ። 19 ሳሎፔ ጋርሳራ ዲዛ ꬎቃ ዙማቲ ዉሪ ሚቴታና ጋካናስ ሃꬃይ ቢታ ቦላን ኬሂ ዎልቃፌ ዳሪዴስ። 20 ሃꬃይ ዙማታ ጼራፔ ኣꬊዲ 15 ዋꬋ ጋካናስ ꬎቁ ጊዴስ። 21 ሂስቲን ቢታ ቦላን ሼምፖራ ፓጻ ቃጺዛ ሜꬌቴꬃቲ ዉሪ፥ ካፎይ፥ ሜሄይ፥ ዶኣይ፥ ቢታ ቦላን ዎጺ ቃጺዛይኔ ኣሲ ዉሪ ሃይቂዴስ። 22 ቢታ ቦላን ዲዛ ሲꬌራ ሼምፒዛይ ዉሪካ ሃይቂዴስ። 23 ሃ ቢታን ፓጻ ዲዛይ ዉሪ ኣሲ፥ ሜሄይኔ ዶኣይ፥ ቢታራ ጎሼቲዛ ሜꬌቴꬂኔ ሳሎ ካፎቲ ዉሪካ ቢታፌ ፒቴቲ ꬋዪን ኖሄይኔ ኢዛራ ማርካቤ ጊዶን ዲዛይቲ ጻላ ኣቲዳ። 24 ሃꬃይካ 150 ጋላስ ጋካናስ ቢታ ቦላን ጋምኢዴስ።