1 ጊዶ ኣቲን ጾሲ ኖሄ፥ ኢዛራ ማርካቤዛ ጊዶን ዲዛ ዶኣኔ ሜሄ ኡባ ቆፒዲ ቢታ ቦላን ጫርኮ ጫርኪሲን ሃꬃይ ዎꬊ ዎꬊ ቢዴስ። 2 ቃሴ ቢታ ጊዶን ዲዛ ጪማ ፑልቶይኔ ሳሎን ዲዛ ሃꬃ ማስኮቴቲ ጎርዴቲዳ፤ ኢራይካ ሳሎን ቴቄቲዴስ። 3 ሂስቲን ሃꬃይ ዎꬊ ዎꬊ ቢዴስ፤ ሄ 150 ጋላሳፌ ጉዬ ሃꬃይ ዎꬊዴስ። 4 ሃꬃይ ዎꬊን ማርካቤዚ ላፑንꬃ ኣጊናን ታማኔ ላፑንꬃ ጋላሳን ኣራራቴ ጌቴቲዛ ዙማ ቦላ ሼምፒዴስ። 5 ሃꬃይ ታማንꬆ ኣጊና ጋካናስካ ዎꬊ ዎꬊ ቢዴስ፤ ታማንꬆ ኣጊናን ኮይሮ ጋላስ ዙማታስ ሁኤይ ቤቲዴስ።

6 ኦይዱ ታሙ ጋላሳፌ ጉዬ ኖሄይ ባ ኬጺዳ ማርካቤዛ ማስኮቴዛ ዶይዲ፥ 7 ኢሲ ቁሮ ካሬ ኬሲ ዬዲን ቁሮዚ ሃꬂ ቢታ ቦላፌ ሜላና ጋካናስ ያኔ ሃ ፒራꬊሼ ጋምኢዴስ። 8 ቃሴ ኖሄይ ሃꬂ ቢታ ቦላፌ ዎꬊ ዉሪዳኮ ቤያናስ ኢሲ ሃራጴ ካሬ ዬዲዴስ። 9 ጊዶ ኣቲን ሄ ሃራጴያ ሃꬂ ቢታ ኡባ ቦላን ሃኢካ ዲዛ ጊሻስ ሼምፒዛሶ ዴማቤኩ፤ ሄሳ ጊሻስ ሲማዳ ማርካቤዛ ጊዶን ዲዛ ኖሄኮ ዪን ኢዚ ባ ኩሼ ዬዲዲ ባኮ ማርካቤዛ ጊዶ ኤኪዴስ።

10 ቃሴካ ሃራ ላፑን ጋላስ ጋምኢዲ ሃኢካ ሃራጴዮ ማርካቤዛ ጊዶፌ ኬሲ ዬዲዴስ። 11 ሄ ሃራጴያ ጋዴይ ቃሚሺን ኢዛኮ ሲማ ያሼ ዎጋራ ጼራፔ ጪሊላ ሃይꬅ ዱꬃዳ ዶናን ሳጻ ኤካ ዪዳ ጊሻስ ሃꬂ ቢታ ቦላፌ ዎꬊዳይሳ ኖሄይ ኤሪዴስ። 12 ቃሴ ኖሄይ ሃራ ላፑን ጋላስ ጋምኢዲ ሄ ሃራጴዮ ዛሪ ዬዲዴስ፤ ጊዶ ኣቲን ሄ ሃራጴያ ኢዛኮ ሲማ ያቤኩ።

13 ኖሄይ 601 ላይꬅ ዴኢን ኮይሮ ኣጊናን ኮይሮ ጋላስ ሃꬂ ቢታ ቦላፌ ጾስኪዴስ፤ ኖሄይ ማርካቤዛ ካራ ቃሪ ጼሊዲ ጋዴይ ጾስኪዳይሳ ቤኢዴስ። 14 ናምኣንꬆ ኣጊናን ናምኡ ታማኔ ላፑንꬃ ጋላሳን ቢታይ ሙሌራ ሜሊዴስ።

15 ሄ ዎዴ ጾሲ ኖሄ ሂዝጊ ኣዛዚዴስ፥ 16 «ኔኒ ኔ ማቾ፥ ኔ ናይታኔ ኔ ናይታ ማቼታ ኤካዳ ማርካቤዛፔ ኬዛ። 17 ኢስቲ ዬሌቲ ዳሪዲ ጮራታና ማላ ሼምፖራ ዲዛ ሜꬌቴꬃ ኡባፌ ኔናራ ዲዛይታ፥ ካፎታ፥ ሜሄታ፥ ዶኣታኔ ቢታራ ጎሼቲዛይታ ኡባ ኔናራ ኬሳ» ጊዴስ። 18 ኖሄይ ባ ናይታራ፥ ባ ማቼይራኔ ባ ናይታ ማቼታራ ማርካቤዛ ጊዶፌ ኬዚዴስ። 19 ሜሄይ፥ ዶኣይ፥ ቢታራ ጎሼቲዛ ሜꬌቴꬂ፥ ካፎይኔ ቢታ ቦላን ዎጺ ቃጺዛ ሚሺ ዉሪ ባ ቆሞን ቆሞን ማርካቤዛ ጊዶፌ ኬዚዴስ።

20 ሄሳፌ ጉዬ ኖሄይ ጎዳስ ያርሺዛሶ ኬሊዲ ጌሻ ሜሄ ኡባፌኔ ጌሻ ካፎ ኡባፌ ኤኪዲ ያርሺዛሶን ጹጊዲ ያርሺዴስ። 21 ሂስቲን ጎዳይ ያርሾዛ ፔኖ ሳዊዛይሳ ሲንጊዲ ባ ዎዚናን፥ «ዬላጋቴꬃፌ ዶሚን ኣሲ ዎዚናን ቆፒዛይሲ ዉሪ ኢታ ጊዲኮካ ታኒ ኣሳ ጊሻስ ጋዳ ናምኣንꬆ ሙሌካ ሃ ቢታ ቃንጊኬ። ቃሴ ታኒ ሃኢ ኦꬂዳ ማላ ፓጻ ዲዛ ሜꬌቴꬅ ኡባ ናምኣንꬆ ሙሌካ ꬋይሲኬ። 22 ሃ ቢታይ ዲዛ ዎዴ ኡባን ዜሬꬃ ዎዴይኔ ማጻ ዎዴይ ሞጬይኔ ሆምቤይ፥ ቦኔይኔ ባልጎይ፥ ጋላሲኔ ቃማይ ኡባ ዎዴካ ፓጬና» ጊዴስ።