11
ባቢሎኔ ጊምቤ
1 ቢታ ቦላን ዲዛ ኣሲ ዉሪ ኮይሮ ኢሲ ዶናኔ ኢሲ ቃላ ሃሳዬስ። 2 ኣሳይ ኣርሼይ ሞኪዛ ባጋ ሲሚዲ ቢሼ ሳናኦሬ ጌቴቲዛ ቢታን ኢሲ ዴምባሶ ዴሚዲ ሄን ኡቲዴስ።
3 ኢስቲ ኢሶይ ኢሳ፥ «ሃ ዪቴ፤ ጹቤ ሜꬊዲ ኣኔ ታማን ጹጎስ» ጊዲ ኢስታ ሹቻ ጊሻስ ጹቤ፥ ኡርቃ ጊሻስ ሺዳ 4 ኤኪዲ፥ «ሃ ዪቴ! ኑ ሱንꬅ ጼይጊሳናሲኔ ቃሴ ኑኒ ሃ ቢታ ኡባ ቦላን ላሌቶንታ ማላ ኢሲ ጊታ ካታማኔ ጼራይ ፑዴ ሳሎ ጋኪዛ ኢሲ ጊምቤ ኣኔ ኬጾስ» ጊዳ።
5 ጊዶ ኣቲን ጎዳይ ኣሳይ ኬጺዳ ጊታ ካታማዛኔ ጊምቤዛ ቤያናስ ዱጌ ዎꬊዲ፥ 6 «ሄኮ ኢስቲ ኢሲ ኣሳ! ቃሴ ኢስቲ ዉሪካ ኢሲ ቃላን ሃሳዬቴስ፤ ኢስቲ ሃኢ ሃይሳ ኦሶ ኦይኪዳፔ ጉዬ፥ ኢስቲ ባስ ኦꬃናስ ቆፒዳይሳ ኢስታ ዲጋናይ ዴና። 7 ሃ ዪቴ! ኣኔ ኑ ዱጌ ዎꬊዲ ኢስቲ ኢሶይ ኢሳ ቃላ ኤሮንታ ማላ ኢስታ ቃላ ዋላኮስ» ጊዴስ። 8 ሄሳ ጊሻስ ጎዳይ ኢስታ ሄሳፌ ቢታ ኡባ ቦላን ላሊን ኢስቲ ሄ ጊታ ካታማ ኦꬂዛይሳ ኣጋጊዳ። 9 ጎዳይ ቢታ ኣሳ ቃላ ሄን ዋላኪዳ ጊሻስ ሄ ካታማያ ባቢሌ *ባቢሌ፡ ባቢሌ ጉሲ ኢብራዌታ ቃላራ ቢርሼꬂ ባይንዳ ሃሳያ። ጌቴታዱስ። ጎዳይ ኢስታ ሄሳፌ ቢታ ኡባ ቦላን ላሊዴስ።
ሴሜ ዜሬꬅ
(1ታሪ 1፡24-27)
10 ሴሜ ዜሬꬂ ሃይሳፌ ካሊዲ ጻፌቲዳይሳ፤ ꬋይሳ ሃꬂ ሲሚን ናምኡ ላይꬃፌ ጉዬ ሴሜስ ላይꬃይ 100 ጊዲን ሴሜይ ኣርፋኪሲዴ ዬሊዴስ። 11 ሴሜይ ኣርፋኪሲዴ ዬሊዳፔ ጉዬ 500 ላይꬅ ዴኢዴስ፤ ሃራ ኣቱማ ናይታካ ማጫ ናይታካ ዬሊዴስ።
12 ኣርፋኪሲዴይ 35†35 ጊዛይሳ ኢብራዌታ ማጻፋን ላፑን ታሙ ኤራንቻቲ 135 ጌቴስ። ላይꬅ ዴኢዲ ሼላሄ ዬሊዴስ፤ 13 ኣርፋኪሲዴይ ሼላሄ ዬሊዳፔ ጉዬ 403 ላይꬅ ዴኢዴስ፤ ሃራ ኣቱማ ናይታኔ ማጫ ናይታካ ዬሊዴስ።
14 ሼላሄይ 30‡30 ጊዛይሳ ኢብራዌታ ማጻፋን ላፑን ታሙ ኤራንቻቲ 130 ጌቴስ። ላይꬅ ዴኢዲ ኤቦሬ ዬሊዴስ፤ 15 ሼላሄይ ኤቦሬ ዬሊዳፔ ጉዬ 403 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
16 ኤቦሬ ሄꬑ ታማኔ ኦይዱ §ሄꬑ ታማኔ ኦይዱ ጊዛይሳ ኢብራዌታ ማጻፋን ላፑን ታሙ ኤራንቻቲ 134 ጌቴስ። ላይꬅ ዴኢዲ ፔሌጌ ዬሊዴስ፤ 17 ኤቦሬይ ፔሌጌ ዬሊዳፔ ጉዬ 430 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
18 ፔሌጌይ 30 ላይꬅ ዴኢዲ ኤራኤ ዬሊዴስ፤ 19 ፔሌጌይ ኤራኤ ዬሊዳፔ ጉዬ 209 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
20 ኤራኤይ 32 ላይꬅ ዴኢዲ ሳሩጌ ዬሊዴስ፤ 21 ኤራኤይ ሳሩጌ ዬሊዳፔ ጉዬ 207 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
22 ሳሩጌይ 30 ላይꬅ ዴኢዲ ናኮሬ ዬሊዴስ፤ 23 ሳሩጌይ ናኮሬ ዬሊዳፔ ጉዬ 200 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
24 ናኮሬይ 29*29 ጊዛይሳ ኢብራዌታ ማጻፋን ላፑን ታሙ ኤራንቻቲ 109 ጌቴስ። ላይꬅ ዴኢዲ ታራ ዬሊዴስ። 25 ናኮሬይ ታራ ዬሊዳፔ ጉዬ 119 ላይꬅ ዴኢዴስ፤ ሃራ ኣቱማ ናይታኔ ማጫ ናይታ ዬሊዴስ።
26 ታራይ 70 ላይꬅ ዴኢዲ ኣብራሜ፥ ናኮሬኔ ሃራኔ ዬሊዴስ።
ታራ ዜሬꬅ
27 ታራ ዬሌታይ ሃይሳፌ ካሊዲ ጻፌቲዳይሳ፤ ታራይ ኣብራሜ፥ ናኮሬኔ ሃራኔ ዬሊን ሃራኔይ ሎጼ ዬሊዴስ። 28 ሃራኔይ ባ ኣዋይ ታራይ ፓጻ ዲሺን ባ ዬሌቲዳ ካላዳዌታ ቢታን ኡሬ ጌቴቲዛ ጊታ ካታማን ሃይቂዴስ። 29 ኣብራሜይኔ ናኮሬይ ናምኣይካ ማቺዳ፤ ኣብራሜ ማቼይ ሱንꬂ ሶራ፤ ቃሴ ናኮሬ ማቼይ ሱንꬂ ሚልካ፤ ሚልካይ ሃራኔ ና፤ ሃራኔይ ሚልኪሲኔ ዪስካኒሲ ኣዋ። 30 ሶራይ ማይኔ፤ ኢዚስ ናይ ባዋ።
31 ታራይ ባ ና ኣብራሜ፥ ባ ናዛ ሃራኔ ና ሎጼኔ ባ ና ኣብራሜ ማቾ ሶራ ኤኪዲ ኬዚን ኢስቲ ኢሲፌ ካናኔ ቢታ ባናስ ኡሬ ጌቴቲዛ ካላዳዌታ ካታማፔ ዴንዲዳ፤ ጊዶ ኣቲን ኢስቲ ካራኔ ጌቴቲዛ ካታማ ጋካናስ ቢዲ ሄን ዴኢዳ። 32 ታራይ 205 ላይꬅ ዴኢዲ ካራኔን ሃይቂዴስ።