1 ሴታ ጋላስ ኣብራሃሜይ ማሚሬን ዲዛ ጊታ ሚꬃታ ጋርሳን ባ ዱንካኔ ፔንጌን ኡቲ ዲሺን ጎዳይ ኢዛስ ቆንጪዴስ። 2 ኣብራሃሜይ ꬎቁ ጊ ጼሊዲ ሄꬑ ኣሳቲ ኤቂዳይታ ቤኢዲ ኢስታ ሞኪ ኤካናስ ባ ዱንካኔዛ ፔንጌፌ ዴንዲዲ ዎጺ ቢዴስ፤ ሄ ጋኪ ቢታን ሆኪዲ ኢስታ ሲንꬃን ዚጊዴስ። ኢብ 13፡2 3 ዚጊ ሲሚዲ፥ «ኣቤት ታ ጎዶ! ኔ ታና ኔ ኣይሌዛ ቦንቺዛ ጊዲኮ ታሶ ጌሎንታ ኣꬋ ቦፓ። 4 ሃኢ ኢንቴ ቶሆ ሜጫና ቶሆ ሃꬂ ዪኮ ኢንቴ ቶሆ ሜጬቲዲ ሃይሳ ሚꬃ ኩዋን ሼምፒ ኤኪቴ። 5 ኢንቴ ሃኢ ታኮ ኢንቴ ኣይሌዛኮ ዪዳ ጊሻስ ሼምፒ ኤኪዲ ኢንቴ ቢዛሶ ባና ማላ ታኒ ኢንቴስ ሚዛ ሚሽ ኣኔ ኤሃይስ» ጊዴስ።

ኢስቲ፥ «ዳሮ ሎኦ፤ ኔኒ ጊዛ ማላ ኦꬃ» ጊዳ።

6 ኣብራሃሜይ ዱንካኔዛ ጊዶ ሳራኮ ኤሶቲ ቢዲ፥ «ኤሶታዳ ሊቆ ꬊሌዛፔ ሄꬑ ኬሬ ጊዲዛይሳ ኤካ ሙኑቃዳ ኡኬꬅ ኡካ» ጊዴስ። 7 ቃሴ ኣብራሃሜይ ባ ዉዴዛኮ ዎጺ ቢዲ ሎኦ ኣንቃራ ማር ዶሪዲ ኢሲ ኣይሌስ ኢሚን ኢዚ ኤሶን ሹኪዲ ጊግሲዴስ። 8 ሂስቲን ኣብራሃሜይ ሜቆ ማꬂኔ ጊግሲዳ ማራ ኣሾዛ ኢማꬃታ ሲንꬅ ኣꬂዴስ፤ ኢስቲ ሚሺን ኢዚ ሄ ሚꬃ ጋርሳን ኢስታ ኣቻን ኤቂዴስ።

9 ኢስቲ ኢዛ፥ «ኔ ማቼያ ሳራይ ኣዋኔ?» ጊ ኦይቺን ኢዚ፥ «ሄኒን ዱንካኔ ጊዶን ዳዉስ» ጊዴስ።

10 ጎዳይ ኢዛስ፥ «ታኒ ዪዛ ላይꬅ ሃኒ ዎዴ ቱሙ ኔኮ ሲማና፤ ሄ ዎዴ ኔ ማቺያ ሳራይ ኣቱማ ና ኔስ ዬላና» ጊዴስ። ሳራይካ ኢዛፔ ጉዬ ባጋራ ዱንካኔዛ ሲንꬃን ዳሼ ሄሳ ሲያዱስ። ኦሮ 9፡9 11 ኣብራሃሜይኔ ሳራይ ኬሂ ጪሚዳ፤ ሳራስካ ማጫሳታስ ዪዛ ዎጋይ ኣጊዴስ። 12 ሄሳ ጊሻስ ሳራይ ባ ዎዚናን፥ «ታኒ ሃኢ ጪሚዳፔ ጉዬ፥ ታ ኣዚናይካ ጪሚዳፔ ጉዬ ሃይሲ ኡፋይሳይ ታስ ሃናኔ?» ጋዳ ሚጫዱስ። 1ጴጽ 3፡6

13 ሄ ዎዴ ጎዳይ ኣብራሃሜ፥ « ‹ታኒ ጪማይቺዳፔ ጉዬ ቱሙ ና ዬላኔ?› ጋዳ ሳራይ ኣዛስ ሚጫዴ? 14 ጎዳስ ዳንዳዬቶንታ ሚሺ ቱሙ ዲዜ? ታ ጊዳ ማላ ዪዛ ላይꬅ ሃኒ ዎዴ ታ ኔኮ ያና፤ ሄ ዎዴ ሳራይ ኣቱማ ና ዬላና» ጊዴስ። ሉቃ 1፡37

15 ሳራይ ኬሃ ባቢዳ ጊሻስ፥ «ታኒ ሚጫቤኬ» ጋዳ ላሆታዱስ። ጊዶ ኣቲን ኢዚ፥ «ኤ፥ ኔኒ ቱማ ሚጫዳሳ» ጊዴስ።

16 ሄሳፌ ጉዬ ኣሳቲ ባና ዴንዲሼ ሶዶሜ ካታማ ዱጌ ዛሪ ጼሊዳ፤ ኣብራሃሜይካ ኢስታ ሞይዚሼ ኢስታራ ቢዴስ። 17 ሄ ዎዴ ጎዳይ፥ «ታኒ ታ ኦꬃና ጊዛይሳ ኣብራሃሜፔ ቆታኔ? 18 ኣብራሃሜይ ቱማፔ ጊታኔ ዎልቃማ ካዎቴꬅ ጊዳና፤ ሃ ቢታ ኣሲ ዉሪ ኢዛ ባጋራ ኣንጄታና። 19 ጺሎቴꬂኔ ሱሬ ኦሶ ኦꬂዲ ጎዳ ኦጌ ናጋና ማላ ባ ናይታኔ ባፔ ጉዬ ባ ሶ ኣሳ ኢዚ ዞራና ማላ ታኒ ኢዛ ዶራዲስ፤ ሄሲካ ጎዳይ ኣብራሃሜስ ኢማና ጊዳይሳ ኡባ ፖላናሳ» ጊዴስ።

20-21 ጎዳይ ኣብራሃሜ፥ «ሶዶሜኔ ጋሞራ ዋሶይ ኬሂ ዳሪዳ ጊሻሲኔ ኢስታ ናጋራይ ኬሂ ዴጺዳ ጊሻስ ኢስቲ ኦꬂዳይሲ ታኮ ጋኪዳ ዋሶ ማላ ኢታኮኔ ኢታ ጊዶንታኮ ኣኔ ታኒ ዱጌ ዎꬋ ቤያይስ» ጊዴስ።

22 ሄሳፌ ጉዬ ናምኡ ኣሳቲ ሶዶሜ ሲሚ ቢዳ፤ ጊዶ ኣቲን ኣብራሃሜይ ጎዳ ሲንꬃን ኤቂዳ ማላ ዴስ። 23 ሄ ዎዴ ኣብራሃሜይ ኢዛኮ ሺቂዲ፥ «ቱሙ ኔኒ ጺሎታ ኢታታራ ጋꬃ ꬋይሳኔ? 24 ሄ ጊታ ካታማን 50 ጺሎቲ ዲኮ ኔኒ ኢስታ ꬋይሳኔ? ኔኒ ኢዛን ዲዛ 50 ጺሎታ ጊሻስ ሄ ካታማ ማርኪ? 25 ጺሎታ ዎርዶታራ ጋꬃ ዎꬊዛይሲኔ ጺሎታኔ ዎርዶታ ኢሲ ኣይፌን ጼሊዛይሲ ሄሲ ኔፔ ሃኮ፤ ሃ ቢታ ኡባ ቦላ ፒርዲዛ ኔኒ ጺሎ ፒርዲኪ?» ጊዴስ።

26 ጎዳይካ፥ «ሄ ሶዶሜ ካታማን 50 ጺሎቲ ዲኮ ሄ ካታማ ኡባ ኢስታ ጊሻስ ታኒ ኡባ ማራና» ጊዴስ።

27 ሄሳፌ ጉዬ ኣብራሃሜይ፥ «ታኒ ቢታኔ ቢዲንꬃኮሺን ታ ጎዳራ ጻላዳ ሃሳያ ኦይካዲስ። 28 ኢቻሹ ታሙ ጺሎታፔ ኢቻሻቲ ፓጪኮ ኔኒ ሄ ፓጪዳ ኢቻሻታ ጊሻስ ሄ ካታማ ኡባ ꬋይሳኔ?» ጊዴስ።

ጎዳይካ፥ «ታኒ ሄን ኦይዱ ታማኔ ኢቻሽ ጺሎታ ዴሚኮ ሄ ካታማ ꬋይሲኬ» ጊዴስ።

29 ኣብራሃሜይ ዛሬꬂዲካ፥ «ሄን 40 ጺሎቲ ጻላ ቤቲኮቺ?» ጊዴስ።

ኢዚካ፥ «ታኒ ሄ ኦይዱ ታማታ ጊሻስ ሄ ካታማ ꬋይሲኬ» ጊዴስ።

30 ሄሳፌ ጉዬ ኢዚ፥ «ታ ጎዶ! ኔ ታ ቦላ ሃንቄቶፋ፤ ታኒ ጉጃዳካ ኦይቻይስ፤ ሄን 30 ጺሎቲ ጻላ ቤቲኮቺ?» ጊዴስ።

ጎዳይ፥ «ታኒ ሄን 30 ጺሎ ኣስ ዴሚኮ ሄ ካታማ ꬋይሲኬ» ጊዴስ።

31 ቃሴካ ኣብራሃሜይ፥ «ታኒ ጎዳራ ጻላቴꬃን ሃሳያ ዶማዲስ፤ ሄን 20 ጺሎቲ ጻላ ቤቲኮቺ?» ጊዴስ።

ጎዳይ፥ «ሄ ናምኡ ታማታ ጊሻስ ꬋይሲኬ» ጊዴስ።

32 ሄሳፌ ጉዬ ኣብራሃሜይ፥ «ታ ጎዶ! ኔ ታ ቦላ ሃንቄቶፋ፤ ታኒ ሜጺ ኢሲቶ ሃሳያይስ፤ ሄን 10 ጺሎይ ቤቲኮቺ?» ጊዴስ።

ጎዳይ፥ «ሄ ታማታ ጊሻስ ታኒ ሄ ካታማ ꬋይሲኬ» ጊዴስ።

33 ጎዳይ ኣብራሃሜራ ሃሳያ ዉርሲዳፔ ጉዬ ቢዴስ፤ ኣብራሃሜይካ ባሶ ሲሚዴስ።