1 ኣብራሃሜይ ማሚሬፔ ዴንዲዲ ኔጌቤ ጌቴቲዛ ቢታ ቢዲ ቃዴሴኔ ሹራ ጌቴቲዛ ካታማታፔ ጊዶን ዴኢዴስ፤ ጌራሬ ቢታን ጉꬃ ዎዴ ጋምኢዴስ። 2 ሄን ኣብራሃሜይ ባ ማቺዮ ሳራ፥ «ኢዛ ታስ ሚቾ» ጊን ጌራሬ ካዎ ኣቢሜሌኬይ ኪቲዲ ሳራ ባሶ ኤፊዴስ። ሜꬌ 12፡13፤ 26፡7 3 ጊዶ ኣቲን ጾሲ ኢሲ ጋላሳ ኦማርስ ኣጉሞን ኣቢሜሌኬኮ ዪዲ፥ «ኔኒ ኤሂዳ ማጫሳይ ጌዶን ኔ ሃይቃና፤ ኢዛ ኣሳ ማቾ» ጊዴስ።

4 ጊዶ ኣቲን ኣቢሜሌኬይ ኢዚራ ኣቂቤና፤ ሄሳ ጊሻስ፥ «ታ ጎዶ! ኔኒ፥ ታኒ፥ ታ ካዎቴꬃይካ ኔና ቆሆንታ ዲሺን ኑና ጮ ꬋይሳኔ? 5 ኢዚ፥ ‹ኢዛ ታ ሚቾ› ጊቤኔ? ቃሴ ኢዛ፥ ‹ኢዚ ታ ኢሻ› ጋቤኬ? ታኒ ሃይሳ ቱሙ ዎዚናፔ ኦꬃዲስ» ጊዴስ።

6 ሄሳፌ ጉዬ ጾሲ ኣጉሞን ኢዛስ፥ «ኤ፥ ኔኒ ኔ ዎዚና ጌሻቴꬃን ኦꬂዳይሳ ታኒ ኤራዳ ኔኒ ኢዞ ቦቾንታ ማላኔ ታ ሲንꬃን ናጋራ ኦꬆንታ ማላ ኔና ታኒ ቴቃዲስ። 7 ሃኢ ሃኖ ማጫሳዮ ኢዚ ኣዚናስ ዛራ፤ ጋሶይካ ኢዚ ናቤ ጊዲዳ ጊሻስ ኢዚ ኔስ ጾሳ ዎሲኮ ኔኒ ፓጻና፤ ጊዶ ኣቲን ኔ ኢዞ ዛሮንታ ኢጺኮ ኔኒኔ ኔስ ዲዛዚ ዉሪ ሃይቃናይሳ ቱማፔ ኔ ኤራ» ጊዴስ።

8 ኣቢሜሌኬይ ዎንቴꬃ ጋላስ ማላዶ ባ ካዎቴꬃን ዲዛ ሹሜታ ኡባ ጼይጊዲ ሃ ዮኦዛ ኡባ ኢስታስ ዮቲን ኢስቲ ኬሂ ባቢዳ። 9 ሂስቲን ኣቢሜሌኬይ ኣብራሃሜ ጼይጊዲ፥ «ኔኒ ኑ ቦላ ኣይ ኦꬃዲ? ኔኒ ታ ቦላኔ ታ ካዎቴꬃ ቦላ ሃይሳ ማላ ቆሆ ኤሃናስ ታኒ ኔስ ኣይ ኢታ ሚሽ ኦꬃዲና? ኔኒ ታ ቦላ ኦሴታናስ ቤሶንታ ኢታ ኦꬃዳሳ» ጊዴስ። 10 ቃሴካ ኣቢሜሌኬይ ኣብራሃሜ፥ «ኔና ሃይሳ ኦሲሲዳይ ኣዜ?» ጊ ኦይቺን፥

11 ኣብራሃሜይ፥ « ‹ጾሳስ ባቢዛ ኢሲ ኣሲካ ሃ ዴሬን ባዋ፤ ቃሴካ ታ ማቼይ ጌዶን ኢስቲ ታና ዎꬋና› ጋዳ ቆፒዳ ጊሻሳ። 12 ኢዛካ ታ ኣዋ ና ጊዲዳ ጊሻስ ታስ ሚቾ፤ ታስ ኣዪ ና ጊዶንታ ጊሻስ ታ ኢዞ ማቾ ኤካዲስ። 13 ጾሲ ታና ታ ኣዋ ኬꬃፌ ኬሲዳ ዎዴ ታኒ ኢዚስ ኑኒ ቢዳ ቢታን ኡባን ኔኒ ታስ ኦꬃና ኪያቴꬂ፥ ‹ኢዚ ታስ ኢሻ› ጋዳ ዮታ ጋዲስ» ጊዴስ።

14 ሄሳፌ ጉዬ ኣቢሜሌኬይ ዶርስ፥ ሚዝ፥ ማጫ ኣይሌታኔ ኣቱማ ኣይሌታ ኤሂዲ ኣብራሃሜስ ኢሚዴስ፤ ቃሴ ኢዛ ማቺዮ ሳራካ ኢዛስ ዛሪዴስ። 15 ኣቢሜሌኬይ፥ «ሄኮ ታ ቢታይ ኔ ሲንꬃን ዴስ፤ ኔና ሎኢዛሶን ዳ» ጊዴስ። 16 ሳራስካ፥ «ታኒ ኔ ኢሻስ ኢሲ ሺ ሳቂሌ ቢራ *ኢሲ ሺ ሳቂሌ ቢራ፡ ኢሲ ሺ ሳቂሌ ቢራ ጉሲ ታማኔ ኢሲኖኔ ባጋ ኪሎ ጊራሜ ዴጺዛዛ ጉሳ። ኢማዲስ፤ ሃይሲ ሄኮ ኔናራ ዲዛይታ ኡባ ሲንꬃን ኔኒ ጺሎ ጊዲዳይሳ ኤሪሳና» ጊዴስ።

17-18 ጎዳይ ኣብራሃሜ ማቼዮ ሳራ ጌዶን ኣቢሜሌኬ ኬꬃ ኣሳ ኡባ ዬሊዛ ኡሎ ማካርሲዳ ጊሻስ ኣብራሃሜይ ጾሳ ዎሲን ኣቢሜሌኬይ ኢዛ ማቼያኔ ኢዛ ማጫ ኣይሌቲ ና ዬላና ማላ ጾሲ ኢስታ ፓꬂዴስ።