1 ኣብራሃሜይ ዳሮ ጪሚዴስ፤ ጎዳይ ኢዛ ኡባንካ ኣንጂዴስ። 2 ኣብራሃሜይ ባሶ ኣስ ኡባስ ሃላቃቲዛይሳኔ ኢዛፔ ጋርሳራ ኢዛ ኣቆታ ኡባ ኣይሲዛ ኣይሌዛ፥ «ኔ ኩሼ ታ ጉልባቴ ቦላ ዎꬃዳ ጫቃ። *ኔ ኩሼ ታ ጉልባቴ ቦላ ዎꬃዳ ጫቃ ዎይኮ ታ ዎዲራፔ ጋርሳራ ጊዛይሲ ኢብራዌታ ዎጋን ላሜቶንታ ጫቆ ጊዲዳይሳ ቤሴስ 3 ታኒ ኢስታ ጊዶን ዲዛ ካናኔ ማጫ ናይታፔ ኔ ታ ናስ ማቾ ኦይቾንታ ማላ ሳሎ ሳኣ ሜꬊዳ ጾሳን ታ ኔስ ጫቃይስ፤ 4 ጊዶ ኣቲን ታ ዬሌቲዳ ቢታ ታ ዳቦታኮ ባዳ፥ ታ ና ዪሳቃስ ማቾ ኦይቻ» ጊዴስ።

5 ኢዛ ኦሳንቻዚ፥ «ማጫሳያ ታናራ ያናስ ዶሶንታ ኢጺኮ ናዛ ኔኒ ዪዳ ቢታ ጉዬ ዛራ ኤፎ?» ጊ ኦይቺዴስ።

6 ኣብራሃሜይ፥ «ታ ናዛ ጌዴ ጉዬ ዛራ ኤፎንታ ማላ ናጌታ! 7 ጎዳ ሳሎ ጾሳይ ታና ታ ኣዋ ሶሆፔኔ ታ ዬሌቲዳ ቢታፌ ኬሲዳይሲ ታስ፥ ‹ኔ ዜሬꬃስ ታኒ ሃይሳ ቢታ ኢማና› ጊ ጫቂዳይሲ ኔኒ ታ ናስ ሄፔ ማቾ ዴማና ማላ ኢዚ ባ ኪታንቻ ኔፔ ሲንꬄ ኪታና። 8 ማጫሳያ ኔናራ ጉዬ ያናስ ዶሶንታ ኢጺኮ ሃይሲ ታኒ ኔና ጫቄꬂዳ ጫቆይ ኔስ ጎሜቶፖ፤ ናዛ ጉዬ ሙሌካ ኤፎፓ» ጊዴስ። 9 ሄሳ ጊሻስ ኦሳንቻዚ ባ ጎዳ ኣብራሃሜ ዎዲራ ቦላ ባ ኩሼ ዎꬂ ጫቂዴስ።

10 ሄሳፌ ጉዬ ኦሳንቻዚ ባ ጎዳ ጋሜላታፔ ታማታ ኤኪዲ ባ ጎዳ ሚሻፌካ ሙሩታ ሙሩታ ኤኪዲ ቢዴስ፤ ሜስጴጾሚያ ጌቴቲዛ ቢታን ዲዛ ናኮሬ ካታማ ጋኪዴስ። 11 ኦማርሳ ዎዴ ማጫሲ ሃꬅ ዱቃናስ ዪሺን ካታማፔ ጋጻን ሃꬃ ኦላ ኣቻን ባ ጋሜላታ ጉልባቲሲዲ፥

12 «ጎዳዉ! ታ ጎዳ ኣብራሃሜ ጾሶ! ሃች ታኒ ቆፓዳ ዪዳይሳ ታስ ኢንጄሳ፤ ቃሴ ታ ጎዳ ኣብራሃሜስ ኪያ ኦꬃ። 13 ቤያ! ታኒ ሃይሳ ፑልቶ ሃꬃ ኣቻን ኤቃዲስ፤ ሃ ካታማ ኣሳ ማጫ ናይቲ ሃꬅ ዱቃናስ ሃ ዬቴስ። 14 ታኒ፥ ‹ኣኔ ኦቶዛ ዚቂ ሂስታዳ ታና ሃꬅ ኡሻ› ጊዛ ዎዴ፥ ኢዛካ፥ ‹ሄኮ ኡያ! ቃሴ ኔ ጋሜላታካ ታኒ ኡሻና› ጊዛራ ሂና ኔ ኣይሌ፤ ዪሳቃስ ኔኒ ዶሪዳሮ ጊዱ፤ ኔኒ ታ ጎዳስ ኪያ ኦꬂዳይሳ ታኒ ሄሳን ኤራና» ጊ ዎሲዴስ።

15 ቡሮ ኢዚ ዎሳ ዉርሶንታ ዲሺን ኢርቢቃይ ሃꬃ ኦቶ ቶካ ኤካዳ ፑቱ ጋዱስ፤ ኢዞ ባቱኤሊ ዬሊዴስ፤ ባቱኤሊ ሚልካ ና፤ ሚልካይ ኣብራሃሜ ኢሻ ናኮሬ ማቾ። 16 ኢርቢቃይ ዳሮ ማላ ሎኦኔ ጌሎንታ ጌላኦ። ዱጌ ዎꬋዳ ፑልቶዛፔ ባ ኦቶ ሃꬅ ኩንꬃዳ ኬዛዱስ። 17 ሄ ኣይሌይ ኢዚኮ ዎጺ ቢዲ ኢዞ፥ «ኔ ኦቶዛፔ ታና ጉꬃ ሃꬅ ኡሻርኪ!» ጊዴስ።

18 ኢዛ፥ «ኤሮ ታ ጎዶ! ኡያ» ጋዱስ። ኤሶታዳ ኦቶዛ ባ ሃሼፔ ዎꬃዳ ጌዲ ሂስታ ኦይካዳ ኢዛ ኡሻዱስ። 19 ኢዛ ኡሺዳይሳፌ ጉዬ፥ «ኔ ጋሜላቲካ ኣላና ጋካናስ ታኒ ኢስታስ ሃꬅ ዱቃና» ጋዱስ። 20 ኣቲዳ ሃꬄ ኤሶን ሃꬃ ጎንጌን ቲጋዳ ዱቃናስ ሃꬃ ኦላይ ዲዛሶ ዎጻዱስ፤ ጋሜላቲ ዉሪ ኣላና ጋካናስ ሃꬃ ኦላፌ ዱቃ ዱቃ ኤሃዳ ሃꬃ ጎንጌን ቲጋዳ ኡሻዱስ። 21 ኢዚ ቆፒዲ ዪዳ ቆፋ ጎዳይ ኢንጄሲዳኮ ኤራና ማላ ኣዴዚ ጮኡ ጊዲ ኢዞ ጼሌስ።

22 ጋሜላቲ ሃꬅ ኡዪ ሲሚን ኣዴዚ ኢቻሽ ጊራሜ ባጋ ጊዲዛ ዎርቃ ሳጋዮታኔ 100 ጊራሜ ጊዲዛ ናምኡ ዎርቃ ሳጋዮታ፥ 23 ኬሲዲ ኢዞ፥ «ኔኒ ኦና ና? ኣኔ ታስ ዮታ፤ ኔ ኣዋ ሶን ኑስ ኣቂዛሶይ ዳኔ?» ጊዴስ።

24 ኢዛ፥ «ታኒ ሚልካይ ናኮሬስ ዬሊዳ ባቱኤሌ ና። 25 ኑሶን ጊዲዛ ሃፓይኔ ባሶይ ዴስ፤ ቃሴ ኢንቴስካ ኣቂዛሶይ ዴስ» ጋዱስ።

26 ኣዴዚ ጉልባቲዲ ጎዳስ ጎይኒሼ፥ 27 «ባ ኪያቴꬃኔ ባ ቱማ ታ ጎዳፔ ሃሶንታ ታ ጎዳ ኣብራሃሜ ጎዳ ጾሳይ ጋላቴቶ! ታኒ ዪሺን ጎዳ ጾሳይ ታና ታ ጎዳ ዳቦታሶ ካሌꬂዴስ» ጊዴስ።

28 ናያ ዎጻ ባዳ፥ ባ ኣዬይሶን ዲዛ ኣሳስ ሃኒዳይሳ ዮታዱስ። 29 ኢርቢቃስ ላባ ጌቴቲዛ ኢሻይ ዴስ፤ ላባይ ካሬ ኬዚዲ ሃꬃ ፑልቶ ኣቻን ዲዛ ኣዴዛኮ ዎጺዴስ። 30 ቃላባቴኔ ባ ሚቼይ ኩሼን ዲዛ ሳጋዮታ ቤኢዳ ማላኔ ኢርቢቃይ ኣዴዚ ባና ጊዳይሳ ዮቲን ሲዪዳ ማላ ኬዚ ቢዲ ኣዴዚ ጋሜላታራ ፑልቶዛ ኣቻን ኤቂዳይሳ ዴሚዴስ። 31 ኢዛ፥ «ሃይሶ ጎዳይ ኔና ኣንጂዳይሶ ሃያ! ኔኒ ሃይሳን ካሬን ኣይስ ኤቃዲ? ታኒ ኔስ ኬꬂኔ ጋሜላታስካ ሶ ጊጊሳዲስ» ጊዴስ።

32 ሄሳ ጊሻስ ኣዴዚ ሶ ጌሊዴስ፤ ላባይ ጋሜላታ ጫና ቢርሺዲ ሃፓኔ ባሶ ጋሜላታስ ዬጊዴስ። ኢዛሲኔ ኢዛራ ዲዛ ኣሳታስ ቶሆ ሃꬅ ኤሂዴስ። 33 ቁማካ ኢዛ ሲንꬅ ኣꬂዴስ፤ ኢዚ፥ «ታና ኤሂዳ ጉዳ ኢንቴስ ዮቶንታ ዳሼ ካꬅ ሚኬ» ጊዴስ።

ላባይ፥ «ሂስቲኮ ዮታ» ጊዴስ።

34 ሄሳ ጊሻስ ኢዚ፥ «ታኒ ኣብራሃሜ ኣይሌ። 35 ጎዳይ ታ ጎዳ ኣብራሃሜ ኬሂ ኣንጂን ኢዚ ዱሬቲዴስ፤ ዶርስ፥ ሚዝ፥ ቢራ፥ ዎርቃ፥ ኣቱማ ኣይሌታ፥ ማጫ ኣይሌታ፥ ጋሜላታኔ፥ ሃሬታ ኢዛስ ኢሚዴስ። 36 ታ ጎዳ ማቺያ ሳራይ ባ ጪማቴꬃ ላይꬃን ኢዛስ ኣቱማ ና ዬሊን ኢዚ ባስ ዲዛዝ ኡባ ኢዛስ ኢሚዴስ። 37 ታ ጎዳይ ታና ሃይሳꬆ ጫቂሲዴስ፤ ‹ታኒ ዲዛ ካናኔ ቢታ ማጫ ናይታፔ ታ ናዛስ ማቾ ኦይቾፋ፤ 38 ታ ኣዋ ኣሳኮ ታ ዜሬꬃኮ ባዳ ታ ናዛስ ማቾ ኦይቻ› ጊዴስ። 39 ታኒካ ታ ጎዳዉ፥ ‹ናያ ታናራ ያናስ ዶሶንታ ኢጺኮቺ?› ጋዲስ። 40 ኢዚ፥ ‹ጎዳይ ታኒ ኢዛ ሲንꬃን ሱሬ ሄሜቲዳ ጾሲ ኔናራ ባ ኪታንቻ ኪታና፤ ኔኒ ታ ኔስ ታ ኣዋ ኣሳፔ፥ ታ ዛሬታፔ ማቾ ዴማና ማላ፥ ኔ ቢዛ ኦጌ ኡባ ሎኤꬃና። 41 ኔኒ ታ ዛሬታኮ ቢን ኢስቲ ኔስ ኢዞ ኢሞንታ ኢጺኮ ሄ ዎዴ ኔስ ጫቆይ ጎሜቴና› ጊዴስ።

42 «ታኒ ሃች ሃይሳ ፑልቶዛኮ ዪዳ ዎዴ ጎዳዉ! ታ ጎዳ ኣብራሃሜ ጾሶ! ኔ ሼኔ ጊዲኮ ታኒ ቢዛ ቆፋዛ ኢንጄሳ። 43 ቤኣ፤ ታኒ ሃ ፑልቶዛ ኣቻን ኤቃዲስ፤ ጌላኦ ኢሲኒያ ሃꬄ ዱቃናስ ዪኮ ታኒ ኢዞ፥ ‹ታና ኔ ኦቶዛፔ ጉꬃ ሃꬅ ኡሻርኪ!› ጋና። 44 ሂስቲኮ ኢዛ ታና፥ ‹ኤሮ ኡያ› ቃሴ፥ ‹ኔ ጋሜላታስካ ታኒ ሃꬅ ዱቃና› ጊዛራ ጾሲ ታ ጎዳይ ኔስ ዶሪዳሮ ጊዱ።

45 «ታኒ ታ ዎዚናን ዎሲዛይሳ ዉርሶንታ ዲሺን ኢርቢቃይ ባ ኦቶ ሃሼን ቶካ ኤካዳ ፑቱ ጋዱስ፤ ዱጌ ፑልታኮ ዎꬋዳ ሃꬅ ዱቃዱስ፤ ታኒ ኢዞ፥ ‹ታና ሃꬅ ኡሻርኪ!› ጋዲስ።

46 «ኢዛ ኤሶን ባ ሃሼፔ ኦቶዛ ዎꬃዳ፥ ‹ሄኮ ኡያ! ቃሴ ታኒ ኔ ጋሜላታ ኡሻና› ጋዱስ፤ ታኒካ ኡያዲስ፤ ቃሴ ታ ጋሜላታካ ኡሻዱስ።

47 «ታኒ ኢዞ፥ ‹ኔኒ ኦና ና?› ጋ ኦይቻዲስ።

«ኢዛ፥ ‹ታኒ ሚልካይ ናኮሬስ ዬሊዳ ባቱኤሌ ና› ጋዱስ።

«ታኒካ ኢዚ ኩሼን ቃላባቴ ኣꬃዲስ። 48 ሄሳፌ ጉዬ ታኒ ጉልባታዳ ጎዳስ ጎይናዲስ፤ ታኒ ጎዳ ታ ጎዳ ኣብራሃሜ ጾሳ፥ ታ ጎዳ ኢሻ ናዮ ኢዛ ኔስ ኤካናስ ታና ሊኬ ኦጌ ካሌꬂዳይሳ ጋላታይስ። 49 ሃኢካ ኢንቴ ታ ጎዳስ ኪያና ማላኔ ኣማኔታና ጊዲኮ ታስ ዮቲቴ፤ ሄሲ ሃኔና ጊኮካ ታስ ዮቲቴ፤ ሄሳፌ ጉዬ ታኒ ሃናናይሳ ታ ኤራይስ» ጊዴስ።

50 ላባይኔ ባቱኤሊ፥ «ሃ ቆፋዚ ጎዳፔ ዪዴስ፤ ኑኒ ኔስ ጌዴ ሃ ጋናስ ዳንዳዮኮ። 51 ኢርቢቃ ሃኖ ቤያ፤ ኤካዳ ባ! ጎዳይ ጊዳ ማላ ኔ ጎዳ ናዛስ ማቾ ጊዱ» ጊዳ።

52 ኣብራሃሜ ኣይሌይ ኢስቲ ጊዛይሳ ሲዪዳ ማላ ቢታን ጉልባቲዲ ጾሳስ ጎይኒዴስ። 53 ኣሽካራዚ ቢራ ኣሌቆኔ ዎርቃ ኣሌቆ፥ ማይኦካ ኬሲዲ ኢርቢቃስ ኢሚዴስ፤ ቃሴ ኣልኦ ሚሻታ ኢዚ ኢሻሲኔ ኢዚ ኣዬይስ ኢሚዴስ።

54 ሄሳፌ ጉዬ ኢዚካ ኢዛራ ዲዛይቲ ሚዳኔ ኡዪዳ፤ ሂስቲዲ ሄን ኣቂዳ፤ ኢስቲ ማላዶ ዎንታራ ዴንዲን፥ «ታና ታ ጎዳኮ ሞይዚቴ» ጊዴስ።

55 ጊዶ ኣቲን ኢዚ ኢሻይኔ ኢዚ ኣያ፥ «ናያ ኢሲ ታሙ ጋላሳ ማላ ኑናራ ታኩ፤ ሄሳፌ ጉዬ ኢዛ ባና» ጊዳ።

56 ኢዚ ጊዲኮ፥ «ጎዳይ ታኒ ዪዳይሳ ኢንጄሲን ኢንቴ ታና ጋምኢሶፒቴ፤ ታኒ ታ ጎዳኮ ባና ማላ ታና ሞይዚቴ» ጊዴስ።

57 ኢስቲካ፥ «ናዮ ጼይጊዲ ኣኔ ኑ ኢዞ ኦይቾስ» ጊዳ። 58 ሄሳ ጊሻስ ኢርቢቃ ጼይጊዲ፥ «ሃ ኣዴዛራ ባኔ?» ጊ ኦይቺዳ።

ኢዛካ፥ «ኤ፤ ታኒ ባና» ጋዱስ።

59 ሂስቲን ኢስቲ ባ ሚቼዮ ኢርቢቃ ኢዞ ዲቺዛሪራ፥ ኣብራሃሜ ኣይሌዛራኔ ኢዛ ኣሳታራ ሞይዚዳ። 60 ኢስቲ ኢርቢቃ፥

62 ሄ ዎዴ ዪሳቂ፥ «ታና ቤኢዛ ዴኦ ጾሳ ፑልቶ» ጊዛ ፑልቶዛ ማታ ቢዲ፥ ኔጌቤ ባዞን ዴስ። 63 ኢሲ ጋላሳ ኦማርስ ዪሳቂ ባ ዎዚናን ቆፒዲ ዴምባ ኬዚዲ ዩዪሼ ኢዚ ꬎቁ ጊ ጼሊዛ ዎዴ ጋሜላቲ ዪዛይታ ቤኢዴስ። 64 ኢርቢቃይካ ꬎቁ ሂስታ ጼላዳ ዪሳቃ ቤያዳ ጋሜላ ቦላፌ ዎꬋዱስ። 65 ዎꬋዳ ኣይሌዛ፥ «ኑናራ ጋጋናስ ሴኪ ዴምባራ ሃ ዪዛ ኣዴይ ኦኔ?» ጋዱስ።

ኣሽካራዚ፥ «ኢዚ ታ ጎዳ ዴኔ» ጊዴስ፤ ኢዛ ባ ሻሼዛ ኤካዳ ጉሉንታዱስ።

66 ቃሴ ኣይሌዚ ባ ኦꬂዳይሳ ኡባ ዪሳቃስ ዮቲዴስ። 67 ዪሳቂ ኢርቢቃ ባ ኣዬይ ሳራ ዱንካኔን ኤፊዲ ኢዞ ማቾ ኤኪዴስ፤ ኢዛካ ኢዛስ ማቾ ጊዳዱስ፤ ሂስቲን ኢዚ ኢዞ ሲቂዴሲኔ ባ ኣዬይ ሃይቆን ካዮቲዛይሳፌ ሚኔቲዴስ።