1 ሳራይ 127 ላይꬅ ዴኢዳፔ ጉዬ፥ 2 ኢዛ ካናኔ ቢታን ዲዛ (ኬብሮኔ ጌቴቲዛ) ቂሪያቴ-ኣርባኤ ካታማን ሃይቂን ኣብራሃሜይ ሳራስ ዬኪዴሲኔ ካዮቲዴስ።

3 ኣብራሃሜይ ባ ማቼይ ኣሃ ኣቻፌ ሂቴታኮ ቢዲ፥ 4 «ታኒ ኢንቴ ጊዶን ኢማꬃ፤ ታ ማቼዮ ሞጋናስ ታስ ኢንቴ ጋዴፔ ሞጎሶ ባይዜርኬቲ!» ጊዴስ። ኢብ 11፡9፤ 13፤ ሃዋ 7፡16

5-6 ሂቴቲ ኢዛስ፥ «ጎዶ! ኑኒ ኔና ዮቲዛይሳ ሲያ፤ ኔኒ ኑ ጊዶን ጊታ ኣሳ፤ ኔኒ ኔ ማቼይ ኣሃ ኑ ዱፎፔ ኔና ሎኢዳሶን ሞጋ፤ ኔኒ ኔ ማቼይ ኣሃ ሞጋናስ ባ ዱፎ ኦኒካ ኔና ዲጌና» ጊ ዛሪዳ።

7 ኣብራሃሜይ ዴንዲ ኤቂዲ ሂቴታ ሃላቃታ ሲንꬃን ዚጊዴስ። 8-9 ኢዚ ኢስታስ፥ «ኢንቴ ታና፥ ‹ኔ ማቼይ ኣሃ ሞጋ› ጊኮ ሲዪቴ፤ ጾሃሬ ና ኤፍሮኔስ ኢዛ ጋዴዛ ጋጻን ዲዛ ማኪጴሌ ጌቴቲዛ ጎንጎሎዛ ታስ ዱፎስ ባይዛና ማላ ኩሜꬃ ዋጋን ኑና ዛልኢሴርኬቲ» ጊዴስ።

10 ሄ ዎዴ ኤፍሮኔይ ካታማ ፔንጌን ሺቂዳ ባ ኣሳ ሂቴታ ጊዶን ዴስ፤ ሄሳ ጊሻስ ሂቴቲ ዉሪ ሲዪሺን ኣብራሃሜስ፥ 11 «ሄሳ ማላ ጊዴና፤ ታ ጎዶ! ታ ዮቲዛይሳ ሲያ፤ ታኒ ጋዴዛካ ኢዛ ጊዶን ዲዛ ጎንጎሎዛካ ታ ኔስ ሃይሳ ኣሳ ሲንꬃን ኢማዲስ፤ ኔካ ኔ ማቼይ ኣሃ ሞጋ» ጊዴስ።

12 ኣብራሃሜይ ሃላቃታ ሲንꬃን ቃሴካ ዚጊዲ፥ 13 ኣሳይ ሲዪሺን ኤፍሮኔ፥ «ታ ዮቲዛይሳ ሲያርኪ! ታኒ ሄ ጋዴዛስ ዋጋ ቃንጻና፤ ኔ ታፔ ኤካርኪ! ሄን ታኒ ታ ማቼይ ኣሃ ሞጋና» ጊዴስ።

14-15 ኤፍሮኔይ ኣብራሃሜስ ዛሪዲ፥ «ታ ጎዶ! ታኒ ዮቲዛይሳ ሲያ፤ ጋዴዚ 400 ሳቂሌ ቢራ ጻላ ኬሲዛ ጋዴ ጊዲዳ ጊሻስ ሃይሲ ኔ ጊዶኒኔ ታ ጊዶን ኣይኮካ ጊዴና፤ ኔ ማቼይ ኣሃ ኢዛን ሞጋ» ጊዴስ። 16 ኣብራሃሜይ ሂቴ ኣሳይ ሲዪሺን ኤፍሮኔይ ጊዳ ዋጋ 400 ሳቂሌ ቢራ ኤፍሮኔስ ኢሚዴስ።

17 ማሚሬ ካታማ ኣቻን ማኪጴሌን ዲዛ ኤፍሮኔ ጋዴን ዲዛ ጎንጎሎይኔ ሄ ጋዴን ዲዛ ሚꬃይ ዉሪ፥ 18 ካታማ ፔንጌን ሺቂዳ ሂቴ ኣሳ ኡባ ሲንꬃን ዎጋን ኣብራሃሜ ጋዴ ጊዲዴስ።

19 ሄሳፌ ጉዬ ኣብራሃሜይ ባ ማቾ ሳራ ኣሃ ካናኔ ቢታን (ኬብሮኔ ጌቴቲዛ) ማሚሬ ካታማ ኣቻን ዲዛ ጎንጎሎን ሞጊዴስ። 20 ሄሳ ጊሻስ ሄ ጋዴዚኔ ጋዴዛን ዲዛ ጎንጎሎዚ ሂቴታ ሲንꬃን ዎጋን ኣብራሃሜስ ጊዲዴስ።