1 ሄሳፌ ጉዬ ጾሲ ኣብራሃሜ ፓጪዴስ፤ ጾሲ፥ «ኣብራሃሜ!» ጊ ጼይጊን ኣብራሃሜይ፥ «ዬ!» ጊ ኮዪዴስ። ኢብ 11፡17-19

2 ጾሲ፥ «ኔኒ ሲቂዛ ኔ ሜጺ ኢሲ ናዛ ዪሳቃ ኤካዳ ሞሪያ ጌቴቲዛ ቢታ ባ፤ ባዳ ሄን ታኒ ኔስ ቤሲዛ ኢሲ ዙማ ቦላን ኢዛ ጹጌቲዛ ያርሾ ኦꬃዳ ታስ ያርሻ» ጊዴስ። 2ታሪ 3፡1

3 ዎንቴꬃ ጋላስ ኣብራሃሜይ ማላዶ ዎንታራ ዴንዲዲ ሃሬ ጫኒዴስ፤ ባ ኣይሌታፔ ናምኣታኔ ባ ና ዪሳቃ ባናራ ኤኪዲ ጹጊዛ ያርሾስ ጊዲዛ ሚꬅ ቄሪ ኤኪዲ ጾሲ ኢዛስ ዮቲዳሶ ባናስ ዴንዲዴስ። 4 ቢሼ ሄꬓንꬃ ጋላስ ኣብራሃሜይ ꬎቁ ጊዲ ያርሾ ያርሻናሶዛ ሃሆን ቤኢዴስ። 5 ኣብራሃሜይ ባ ኣይሌታ፥ «ኢንቴ ሃሬዛራ ሃይሳን ዲሺቴ፤ ታኒኔ ታ ናዚ ጌዴ ቢዲ ጾሳስ ጎይኒዲ ኢንቴኮ ሃ ሲማና» ጊዴስ።

6 ኣብራሃሜይ ያርሾ ሚꬃ ዴንꬂዲ ናዛ ዪሳቃ ቶሲዲ ባስ ታማኔ ሹካ ማሻ ኦይኪዴስ፤ ኢስቲ ናምኣይ ኢሲፌ ቢሺን፥ 7 ዪሳቂ ባ ኣዋ ኣብራሃሜ፥ «ኣቦ!» ጊዴስ።

ኣብራሃሜይካ፥ «ዬ! ታ ናዞ!» ጊን ዪሳቂ፥ «ታማይኔ ሚꬂ ዴስ ሺን ያርሼታና ዶርሳይ ኣዋኔ?» ጊዴስ።

8 ኣብራሃሜይካ፥ «ታ ናዞ! ያርሼታና ዶርሳ ጾሲ ጊጊሳና» ጊዴስ፤ ሂስቲን ኢስቲ ናምኣይ ኢሲፌ ቢዳ።

9 ኢስቲ ጾሲ ኢዛስ ዮቲዳሶ ጋኪዳ ዎዴ ኣብራሃሜይ ያርሾ ያርሺዛሶ ሄን ጊግሲዲ ሚꬃ ኮሪዴስ፤ ባ ና ዪሳቃ ቃቺዲ ሄ ሚꬃ ቦላን ሹካናስ ኢሺሲዴስ። ያቆ 2፡21 10 ኣብራሃሜይ ባ ናዛ ሹካናስ ኩሼ ዬዲዲ ማሻ ኤኪዴስ። 11 ጊዶ ኣቲን ጎዳ ኪታንቻይ ሳሎፔ ኢዛ፥ «ኣብራሃሜ! ኣብራሃሜ!» ጊ ጼይጊን ኢዚ፥ «ዬ!» ጊ ኮዪን፥

12 «ናዛ ቦላ ኔ ኩሼ ዎꬆፋ፤ ኢዛ ኣይኮካ ኦꬆፋ፤ ኔኒ ኔ ሜጺ ኢሲ ናዛካ ታና ዲጎንታ ጊሻስ ኔኒ ጾሳስ ያዪዛ ኣስ ጊዲዳይሳ ታኒ ሃኢ ኤራዲስ» ጊዴስ።

13 ኣብራሃሜይ ꬎቁ ጊዲ ጼሊሺን ካጬይ ቱራን ኦይኬቲዳ ꬋርሾ ቤኢዴስ፤ ኣብራሃሜይ ቢዲ ሄ ꬋርሾዛ ኤኪዲ ጹጌቲዛ ያርሾ ያርሺዴስ። 14 ሄሳ ጊሻስ ኣብራሃሜይ ሄ ሶሆዛ፥ «ጎዳይ ኢሚዛሶ» ጊ ሱንꬂዴስ፤ ሃች ጋካናስካ ሄ ሶሆዚ፥ «ጎዳይ ዙማ ቦላን ኢማና» ጌቴቴስ። *ጎዳይ ኢሚዛሶ ጊዛይሲ ኢብራዌታ ቃላራ ያሂዌ ዪርኣ ጊዲሺን ቢርሼꬃይ፥ «ጎዳይ ቤዬስ» ጉሳ

15 ጎዳ ኪታንቻይ ሳሎፔ ናምኣንꬆ ኣብራሃሜ ጼይጊዲ፥ 16 «ታኒ ኔስ ታናን ጫቃይስ፤ ኔኒ ሃይሳ ኦꬂዳ ጊሻስ ኔ ሜጺ ኢሲ ናዛካ ታና ዲጎንታ ጊሻስ፥ ኢብ 6፡13-14 17 ታኒ ኔና ቱሙ ኣንጃና፤ ኔ ዜሬꬃካ ታኒ ሳሎ ጾሊንቴ ማላኔ ኣባ ዶናን ዲዛ ኣጬ ማላ ኦꬃዳ ዳርሳና፤ ኔ ዜሬꬃቲ ባ ሞርኬታ ካታማታ ላታና። ኢብ 11፡12 18 ኔኒ ታስ ኣዛዜቲዳ ጊሻስ ሃ ካዎቴꬃይ ዉሪ ኔ ዜሬꬃ ባጋራ ኣንጄታና» ጊዴስ። ሃዋ 3፡25

19 ሄሳፌ ጉዬ ኣብራሃሜይ ባ ኣይሌታኮ ሲሚን ኢስቲ ዉሪ ኢሲፌ ቤርሳቤሄ ዴንዲ ቢዳ። ኣብራሃሜይ ቤርሳቤሄን ዴኢዴስ።

20 ሄሳፌ ሲሚን ኣብራሃሜስ፥ «ሚልካይ ኔ ኢሻ ናኮሬስ ናይታ ዬላዱስ። 21 ኢስቲካ፥ ባይራ ና ኡጼ፥ ኡጼ ኢሻታ ቡዜ፥ 22 ኣራሜ ኣዋ ቃሙኤሌ፥ ኬሳዴ፥ ሃዞ፥ ፒልዳሴ፥ ዪዲላፌ፥ ባቱኤሌ ጌቴቴቴስ። 23 ሄይታ ሄ ኦስፑን ናይታካ ሚልካ ኣብራሃሜ ኢሻ ናኮሬስ ዬላዱስ፤ ባቱኤሊ ኢርቢቃ ዬሊዴስ። 24 ኤሬሂሞ ጌቴቲዛ ኢዛ ጋራዴያ ቃሴ ጼባሄ፥ ጌሃሜ፥ ቴሃሻኔ ማኪሳ ዬላዱስ» ጊ ዮቲዳ።