36
ኤሳዌ ዬሌታ
(1ታሪ 1፡34-37)
1 ኤዶሜ ጌቴቲዛ ኤሳዌ ዬሌታይ ሃይሳፌ ካሊ ጻፌቲዳይሳ። 2 ኤሳዌይ ካናኔ ቢታ ማጫ ናይታፔ ባስ ማቾ ኤኪዴስ፤ ኢስቲካ ሂቴ ኤሎኔ ና ኣዳ፥ ሂዌያ ጺባኦኔ ና ኣናይ ዬሊዳ ኦሆሊባሜኔ ሜꬌ 26፡34 3 ኢስማኤሌ ና ኔባዮቲ ሚቺዮ ባሴማቶ። ሜꬌ 28፡9 4 ኣዳይ ኤሳዌስ ኤልፋዜ ዬላዱስ፤ ባሴማታያካ ኤራኡኤሌ ዬላዱስ፤ 5 ኦሆሊባሜ ያኡሼ፥ ያኢላሜኔ ቆሬ ዬላዱስ፤ ካናኔ ቢታን ኤሳዌስ ዬሌቲዳ ኣቱማ ናይቲ ሃይታንታ።
6 ኤሳዌይ ባ ማቼታ፥ ባ ኣቱማ ናይታኔ ማጫ ናይታ፥ ባሶ ኣስ ኡባ ባ ሚዛታኔ ባ ሜሄ ኡባ ካናኔ ቢታን ኢዚ ሃሪዳይሳ ኡባ ኤኪዲ ባ ኢሻ ያቆቤፔ ሃኪ ቢዴስ። 7 ኢስታ ሃሮይ ዳሪዳ ጊሻስ ኢስቲ ኢሲፌ ዴኣናስ ዳንዳይቤቴና፤ ሜሄይ ኢስታስ ዳሪዳ ጊሻስ ኢስቲ ዲዛ ዴሬይ ኢስታ ናምኣታስ ጊዳናስ ዳንዳይቤና።
8 ሂስቲን ኤዶሜ ጌቴቲዛ ኤሳዌይ ሴይሬ ጌቴቲዛ ጌዜን ኡቲዴስ።
9 ሴይሬ ጌቴቲዛ ጌዜ ቢታን ዲዛ ኤዶሜታ ኣዋ ኤሳዌ ዬሌታይ ሃይሳፌ ካሊ ጻፌቲዳይሳ። 10 ኤሳዌ ኣቱማ ናይታ ሱንꬂ ሃይሳፌ ካሊ ጻፌቲዳይሳ፤ ሄሳቲካ ኤሳዌ ማቾ ኣዳ ና ኤልፋዜኔ ኤሳዌ ማቾ ባሴማቲ ና ኤራኡኤሌ።
11 ኤልፋዜ ናይቲ ቴማኔ፥ ኦማሬ፥ ጼፎ፥ ጋኢታሜኔ ቄናዜ። 12 ቃሴ ኤሳዌ ና ኤልፋዜስ ቴሚናኤ ጌቴቲዛ ኣይሌይ ዳዉስ፤ ኢዛካ ኤልፋዜስ ኣማሌቄ ዬላዱስ፤ ሃይቲ ኤሳዌ ማቾ ኣዲስ ና ናይታ።
13 ኤራኡኤሌ ኣቱማ ናይቲ ናሃቴ፥ ዛራሄ፥ ሻማሃኔ ሚዛሄ፤ ሃይቲ ኤሳዌ ማቺዮ ባሴማቲስ ና ናይታ።
14 ጺባኦኔስ ናዛ ና ኣናይ ዬሊዳ ኦሆሊባሚ ኣቱማ ናይቲ ሃይታ፤ ኢዛ ኤሳዌስ ያኡሼ፥ ያኢላሜኔ ቆሬ ዬላዱስ።
15 ኤሳዌ ዬሌታ ዜሬꬃ ሃላቃቲ ሃይሳፌ ካሊ ጻፌቲዳይታ። ኤሳዌስ ባይራ ና ኤልፋዜ ኣቱማ ናይታስ ሃላቃ ጊዲዳይቲ ቴማኔ፥ ኦማሬ፥ ጼፎ፥ ቄናዜ፥ 16 ቆሬ፥ ጋኢታሜኔ ኣማሌቄ፤ ኤዶሜ ቢታን ኤልፋዜይ ዬሊዳ ሃላቃቲ ሃይታ፤ ሃይቲ ዉሪ ኣዲስ ና ናይታ።
17 ኤሳዌ ና ኤራኡኤሌ ኣቱማ ናይታስ ሃላቃ ጊዲዳይቲ ናሃቴ፥ ዛራሄ፥ ሻማሃኔ ሚዛሄ፤ ኤዶሜ ቢታን ኤራኡኤሌይ ዬሊዳ ሃላቃቲ ሃይታ፤ ኢስቲ ኤሳዌ ማቾ ባሴማቲስ ና ናይታ።
18 ኤሳዌ ማቺዮ ኦሆሊባሚ ኣቱማ ናይታስ ሃላቃ ጊዲዳይቲ ያኡሼ፥ ያኢላሜኔ ቆሬ፤ ኢስቲ ኣና ና፥ ኤሳዌ ማቺዮ ኦሆሊባሚፔ ዬሌቲዳ ሃላቃታ።
19 ሃይቲ ኤዶሜ ጌቴቲዛ ኤሳዌ ኣቱማ ናይታሲኔ ኢስታ ዜሬꬃታስ ሃላቃታ።
ሴይሬ ዬሌታ
(1ታሪ 1፡38-42)
20 ኤዶሜ ቢታን ዲዛ ሆሬ ሴይሬ ኣቱማ ናይቲ ሃይሳፌ ካሊ ጻፌቲዳይታ፤ ሄይቲካ ሎጻኔ፥ ሾባሌ፥ ጺባኦኔ፥ ኣና፥ 21 ዲሾኔ፥ ኤጼሬኔ ዲሻኔ፤ ኢስቲካ ኤዶሜ ቢታን ዲዛ ሴይሬ ኣቱማ ናይቲ፥ ሆሬታ ሃላቃታ።
22 ሎጻኔ ኣቱማ ናይቲ ሆሬኔ ሄማኔ፤ ሎጻኔ ሚቺያ ቴሚናኦ።
23 ሾባሌ ኣቱማ ናይቲ ኣሊዋኔ፥ ማናሃቴ፥ ኤባሌ፥ ሼፋኔ ኦናሜ።
24 ጺባኦኔ ኣቱማ ናይቲ ኣያኔ ኣና፤ ኣናይካ ባዞን ባ ኣዋ ጺባኦኔ ሃሬታ ሄሚሼ ጻባላ ሃꬅ ዴሚዳይሳ።
25 ኣና ናይ ዲሾኔ፤ ናያ ቃሴ ኦሆሊባሞ።
26 ዲሾኔ ኣቱማ ናይቲ ሄምዳኔ፥ ኤሺባኔ፥ ዪቲራኔኔ ካራኔ።
27 ኤጼሬ ኣቱማ ናይቲ ቢሊሃኔ፥ ዛኢዋኔኔ ኣቃኔ።
28 ዲሻኔ ኣቱማ ናይቲ ኡጼኔ ኣራኔ።
29 ሆሬታ ሃላቃቲ ሃይታንታ፤ ሎጻኔ፥ ሾባሌ፥ ጺባኦኔ፥ ኣና፥ 30 ዲሾኔ፥ ኤጼሬኔ ዲሻኔ። ሃይቲ ሴይሬ ቢታን ባ ቆሞን ቆሞን ሻኬቲዳ ሆሬታ ሃላቃታ።
ኤዶሜ ካዎታ
(1ታሪ 1፡43-54)
31 ኢስራኤሌን ካዎይ ካዎታናፔ ካሴ ኤዶሜ ቢታን ካዎቲዳ ካዎቲ ሃይሳፌ ካሊ ጻፌቲዳይታ።
32 ቢኦሬ ና ቤላይ ኤዶሜን ካዎቲዴስ፤ ኢዛ ካታማ ሱንꬂ ዲናቤ ጌቴቴስ።
33 ቤላይ ሃይቂን ቦጺራፔ ዪዳ ዛራሄ ናይ ዮባቤይ ካዎቲዴስ።
34 ዮባቤይ ሃይቂን ቴማኔ ቢታፌ ዪዳ ሁሻሜይ ካዎቲዴስ።
35 ሁሻሜይ ሃይቂን ሚዲያሜ ኣሳታ ሞኣቤ ቢታን ጾኒዳ ባዳዴ ና ሃዳዴይ፥ ካዎቲዴስ፤ ኢዛ ካታማ ሱንꬂ ኣዊቴ ጌቴቲዴስ።
36 ሃዳዴይ ሃይቂን ማሲሬቄፔ ዪዳ ሳሚላይ ካዎቲዴስ።
37 ሳሚላይ ሃይቂን ሻፋ ኣቻን ዲዛ ኤራሆቦቴፔ ዪዳ ሻኡሌይ ካዎቲዴስ።
38 ሻኡሌይ ሃይቂን ኣኪቦሬ ና ባኣሊ-ሃናኔይ ካዎቲዴስ።
39 ኣኪቦሬ ና ባኣሊ-ሃናኔይ ሃይቂን ሃዳሬይ ካዎቲዴስ፤ ኢዛ ካታማ ሱንꬂ ፓኡ ጌቴቴስ፤ ኢዛ ማቺያ ሜዛሃቤ ናዮ ማጺሬዳ ዬሊዳ ማሄጻቢኤሎ ጌቴታዉስ።
40 ኤሳዌ ዬሌታ ሃላቃቲ ባ ቆሞን ቆሞን ባ ሱንꬃን ሱንꬃን ሃይታንታ፤ ቴሚናኤ፥ ኣሊዋ፥ ዬቴቴ፥ 41 ኦሆሊባሜ፥ ኤላ፥ ፒኖኔ፥ 42 ቄናዜ፥ ቴማኔ፥ ሚቢዛሬ፥ 43 ማጊዲኤሌኔ ኢራሜ። ሃይታንቲ ባ ሃሪዛ ቢታን፥ ባ ዲዛሶን ኤዶሜ ሃላቃታ። ሃይሲ ኤሳዌይ ኤዶሜታ ኣዋ።