1 ኢስማኤሌ ኣሳቲ ዮሴፌ ጊብጼ ኤፊን ጊብጼ ካዎ ኦሳንቻታፔ ጲጺፋራ ጌቴቲዛ ዛቤታ ሃላቃይ ዮሴፌ ኢስማኤሌታፔ ሻሚዴስ።

2 ጎዳይ ዮሴፌራ ዲዛ ጊሻስ ኢዚ ኦꬂዛይሳ ኡባ ኢዛስ ኢንጄሲዴስ፤ ኢዚካ ባ ጎዳ ሶን ጊብጼን ዴኢዴስ። ሃዋ 7፡9 3 ጎዳይካ ኢዛራ ዴኢዛይሳኔ ጎዳይ ኢዚ ኦꬂዳይሳ ኡባ ኢዛስ ኢንጄሲዳይሳ ጲጺፋራይ ቤኢዲ፥ 4 ዮሴፌ ዶሲዴስ። ዮሴፌይካ ኢዛ ኦሳንቻ ጊዲዴስ። ጲጺፋራይ ኢዛ ባ ኬꬃ ኣሳ ቦላ ሱንꬂዲ ባስ ዲዛዝ ኡባ ኢዛ ኩሼን ዎꬂዴስ። 5 ጲጺፋራይ ባ ኬꬃን ዲዛይሳ ኡባ ቦላኔ ባ ኣቆታ ኡባ ቦላ ሱንꬂዳ ዎዴፔ ዶሚን ጎዳይ ጊብጼ ኣዴዛ ኬꬅ ዮሴፌ ጌዶን ኣንጂዴስ። ጎዳ ኣንጆይ ጲጺፋራ ሶን ጊዲን ካሬን ዲዛ ሚሽ ኡባ ቦላ ዎꬊዴስ። 6 ሄሳ ጊሻስ ባስ ዲዛ ኡባ ዮሴፌስ ሼꬊዴስ፤ ኢዚ ባ ሚዛ ካꬃፌ ኣቲን ሃራ ዮሴፌ ኩሼን ዬጊዴስ።

ዮሴፌይ ዬጋልꬂኔ ማላ ሎኦ ኣሳ። 7 ጉꬃ ዎዴፔ ጉዬ ኢዛ ጎዳ ማቼያ ዮሴፌ ጫዳ ጼላዳ፥ «ሃ ያ፤ ታናራ ዚንኣ» ጋዱስ።

8 ጊዶ ኣቲን ኢዚ ኢጺዴስ፤ ባ ጎዳ ማቼይስ፥ «ቤያ! ታ ጎዳይ ባሶን ዲዛ ኡባ ታስ ሼꬊዲ ኣዛስካ ሂርጌና፤ ባስ ዲዛይሳ ኡባ ታ ኩሼን ዎꬂዴስ። 9 ሃሶን ታፔ ኣꬊዛይ ዴና፤ ኔኒ ኢዛ ማቾ ጊዲዳ ጊሻስ ኔና ጻላ ኣቲን ታ ጎዳይ ታስ ኢሞንታ ሚሺ ባዋ። ሂስቲን ታኒ ሃይሳ ማላ ኢታ ሚሽ ጾሳ ሲንꬃን ዎስታ ኦꬆ?» ጊዴስ። 10 ኢዛ ኡባ ዎዴ ዮሴፌ ሳሌꬂንካ ኢዚ ኤሞ ኢሚቤና፤ ኢዚራ ኢሼች ኣቲን ኢዚኮ ሺቃናዉካ ኮዪቤና።

11 ኢሲ ጋላስ ኢዚ ባ ኦሶ ኦꬃናስ ሶ ጌሊሺን ሶ ኣይሌታፔ ኦኒካ ሶን ባዋ። 12 ኢዛካ ዮሴፌ ማይኦ ሺሻ ኦይካዳ፥ «ታናራ ዚንኣ» ጋዱስ። ጊዶ ኣቲን ኢዚ ባ ማይኦ ኢዚ ኩሼን ዬጊዲ ሶፔ ካሬ ዎጺ ኬዚዴስ።

13 ዮሴፌይ ባ ማይኦ ኢዚ ኩሼን ዬጊዲ ሶፔ ካሬ ዎጺ ኬዚዳይሳ ኢዛ ቤኣዳ፥ 14 ባ ሶ ኣይሌታ ጼይጋዳ ኢስታስ፥ «ቤኢቴ! ታ ኣዚናይ ኤሂዳ ኢብራዌ ኣዴዚ ታና ካዉሺሼ ኣጊዴስ፤ ኢዚ ታናራ ዚንኣናስ ሃ ሶ ጌሊዴስ፤ ጊዶ ኣቲን ታኒ ታ ቃላ ꬎቂሳዳ ዋሳዲስ። 15 ሂስቲን ኢዚ ባ ማይኦ ታ ኣቻን ዬጊዲ ሶፔ ካሬ ዎጺ ኬዚዴስ» ጋዱስ።

16 ኬꬃ ኣዋይ ያና ጋካናስ ኢዛ ዮሴፌ ማይኦዛ ባ ኣቻን ዎꬃዱስ። 17 ሄሳፌ ጉዬ ኢዛ ኢዛስ፥ «ሄሲ ኔኒ ኑስ ኤሂዳ ኢብራዌ ኣይሌይ ታናራ ዚንኣናስ ታኮ ጌሊዴስ፤ 18 ጊዶ ኣቲን ታኒ ታ ቃላ ꬎቂሳዳ ዋሲን ኢዚ ባ ማይኦ ታ ኣቻን ዬጊዲ ሶፔ ካሬ ዎጺ ኬዚዴስ» ጋዱስ።

19 ኬꬃ ኣዋይ ማቼዮ፥ «ኔ ኣይሌይ ታና ሃይሳꬆ ኦꬂዴስ» ጋዳ ዮቲዳ ቃላ ሲዪዲ ዳሮ ሃንቄቲዴስ። 20 ኢዚካ ዮሴፌ ኤፊዲ ካዎ ቃሾ ኣሳይ ዲዛ ቃሾ ኬꬃን ዬጊዴስ።

21 ጊዶ ኣቲን ዮሴፌይ ሄን ቃሾ ኬꬃን ዲዛ ዎዴ ጎዳይ ኢዛራ ዴስ። ጾሲ ቃሾ ኬꬃን ኢዛራ ዲዛ ባ ኪያቴꬅ ኢዛስ ዳርሲዴስ። ቃሴካ ቃሾ ኬꬃ ሃላቃዛ ሲንꬃን ኢዛስ ቦንቾ ኢሚዴስ። ሃዋ 7፡9 22 ሂስቲን ቃሾ ኬꬃ ሃላቃይ ቃሾ ኣሳ ኡባ ዮሴፌ ኩሼን ዎꬂዴስ፤ ሄን ኦሴቲዛይሳ ኡባ ቦላ ኣዋቲዛይ ኢዛ። 23 ጎዳይ ዮሴፌራ ጊዲዲ ኢዚ ኦꬂዛ ኡባ ፖሊሲዛ ጊሻስ ዎይኔ ኬꬃ ኣላፌይ ዮሴፌ ኣላፌቴꬃን ዲዛ ኣይ ሚሻስካ ዋናንዴሻ ጊዲ ሂርጊ ኤሬና።